Żjajjar regulari bir-​rivisti—Tajbin biex nibdew studji tal-​Bibbja

1. L-​organizzazzjoni taʼ Ġeħova għala ilha tinkuraġġixxi lill-​pubblikaturi biex jagħmlu żjajjar regulari bir-​rivisti?

¹ Ħafna nies ma jitħajrux jistudjaw il-​Bibbja magħna, imma jieħdu pjaċir jaqraw ir-​rivisti tagħna. Għalhekk, l-​organizzazzjoni taʼ Ġeħova ilha tinkuraġġixxi lill-​pubblikaturi biex jagħmlu żjajjar regulari bir-​rivisti. Hekk kif in-​nies regolarment jaqraw ir-​rivisti tagħna, spiss jifformaw xenqa għall-​Kelma t’Alla. (1 Pt. 2:2) Eventwalment, xi ħaġa li jaqraw tistaʼ tolqothom, u b’hekk jaċċettaw studju tal-​Bibbja.

2. Kif nistgħu nikkultivaw l-​interess taʼ dawk li nżuruhom regolarment bir-​rivisti?

² ‘Saqqi’ ż-​żrieragħ tal-​verità: Minflok ma sempliċement tħallilu r-​rivisti, aqbad konversazzjoni mal-​inkwilin u pprova ibni ħbiberija miegħu. Dan se jgħinek issir taf x’inhuma ċ-​ċirkustanzi, l-​interessi, u t-​twemmin tiegħu. Jekk tagħmel hekk se jgħinek titkellem bid-​dehen. (Prov. 16:23) Ipprepara għal kull żjara. Jekk ikun possibbli, fil-​qosor enfasizza punt mir-​rivisti u skrittura relatata miegħu biex b’hekk issaqqi kwalunkwe żerriegħa tal-​verità li jkollu f’qalbu. (1 Kor. 3:6) Niżżel bil-​miktub id-​data taʼ kull żjara, il-​letteratura li ħallejtlu, u s-​suġġetti u l-​iskritturi li ddiskutejtu.

3. Kemm spiss għandna nżuru lil dawk li niħdulhom ir-​rivisti?

³ Kemm spiss għandek iżżurhom? Għandek tmur darba fix-​xahar biex tiħdilhom ir-​rivisti tal-​aħħar. Madankollu, skont iċ-​ċirkustanzi tiegħek u l-​interess tal-​individwu, tistaʼ tagħżel li tmur iktar spiss. Pereżempju, xi ġimgħa jew ħmistax wara li tħalli r-​rivisti, tistaʼ tmur lura u tgħid, “Mhux se niħodlok ħafna ħin imma ġejt biex nurik xi ħaġa mir-​rivisti li ħallejtlek.” Dan se jqanqlu jkun irid jaqra artiklu partikulari. Jekk ikun diġà qrah, tistaʼ tistaqsih x’deherlu mill-​artiklu u tiddiskutuh fil-​qosor. Jew jekk l-​individwu jieħu pjaċir jaqra l-​letteratura tagħna, forsi tistaʼ tmur lura u toffrilu l-​fuljett, il-​browxer, jew il-​ktieb li nkunu qed noffru dak ix-​xahar.

4. Minn żmien għal żmien, x’nistgħu nagħmlu biex naraw jekk dawk li niħdulhom ir-​rivisti jkunux lesti jistudjaw il-​Bibbja?

⁴ Tistenniex lill-​inkwilin biex jitolbok studju. Ħu l-​inizjattiva. Anki jekk fil-​passat irrifjuta studju tal-​Bibbja, minn żmien għal żmien tistaʼ turih l-​artiklu “Mistoqsijiet dwar il-​Bibbja mweġbin” fit-​Torri tal-​Għassa u tara jekk ikunx lest jiddiskutih miegħek. Forsi tkun tistaʼ tibda studju fuq l-​għatba tal-​bieb. Però, jekk ma jirnexxilekx tibda studju, tistaʼ tkompli tiħodlu r-​rivisti biex tikkultiva l-​interess tiegħu.