Kif l-Anzjani Jgħinu lil Min Jitneħħa mill-Kongregazzjoni

1-2. (a) Ġeħova kif iħossu dwar dawk li jagħmlu dnub apposta? (b) Ġeħova x’jittama li jagħmlu dawk li jidinbu?

ĠEĦOVA mhuwiex Alla li jippermetti kollox; hu jobogħdu d-dnub. (Slm. 5:​4-6) Hu jistenna li aħna ngħixu skont il-livelli ġusti tiegħu li nsibuhom fil-Bibbja. Naturalment, Ġeħova ma jistenniex perfezzjoni min-nies imperfetti. (Slm. 130:​3, 4) Fl-istess ħin, hu ma jittollerax lil min ‘mhuwiex leali, li juża l-qalb tajba kbira tiegħu bħala skuża biex jaġixxi b’mod ħażin bla mistħija.’ (Ġuda 4) Infatti, il-Bibbja titkellem dwar “il-qerda taʼ nies mhux leali” fil-gwerra t’Alla f’Armageddon.—2 Pt. 3:7; Riv. 16:16.

² Madankollu, Ġeħova ma jridx li xi ħadd jinqered. Bħalma ddiskutejna qabel f’din is-serje t’artikli, il-Bibbja tgħid b’mod ċar li Alla “jixtieq li kulħadd jindem.” (2 Pt. 3:9) L-anzjani jimitaw lil Ġeħova hekk kif bil-paċenzja jipprovaw jgħinu lil min għamel id-dnub biex jindem u biex jerġaʼ jersaq qrib taʼ Ġeħova. Madankollu, mhux kulħadd ikun jixtieq jindem. (Isa. 6:9) Xi wħud xorta jibqgħu jagħmlu l-ħażin avolja l-anzjani kemm-il darba jippruvaw jgħinuhom biex jindmu. X’għandu jsir meta jiġri hekk?

“NEĦĦU LILL-PERSUNA ĦAŻINA”

3. (a) Il-Bibbja x’tgħid li għandu jsir mill-midinbin li ma jindmux? (b) Għala nistgħu ngħidu li sa ċertu punt min jagħmel il-ħażin jagħżel li jitneħħa mill-kongregazzjoni?

³ Meta xi ħadd jagħmel dnub u ma jindimx, l-anzjani m’għandhomx għażla ħlief li jsegwu d-direzzjoni li hemm fl-​1 Korintin 5:13: “Neħħu lill-persuna ħażina mill-kongregazzjoni.” Sa ċertu punt, dak li jagħmel il-ħażin ikun qed jagħżel il-konsegwenzi; ikun qed jaħsad dak li hu żeraʼ. (Gal. 6:7) Għala nistgħu ngħidu hekk? Għax hu ma jkunx irid jinbidel, avolja l-anzjani jkunu ppruvaw jgħinuh ħafna drabi. (2 Slat. 17:​12-15) L-azzjonijiet tiegħu juru li hu ma jkunx irid jgħix fi qbil mal-livelli ġusti taʼ Ġeħova.—Dewt. 30:​19, 20.

4. Għala jsir avviż meta xi ħadd li ma jindimx jitneħħa mill-kongregazzjoni?

⁴ Meta xi ħadd li ma jindimx jitneħħa mill-kongregazzjoni, isir avviż biex jinforma lill-kongregazzjoni li hu m’għadux wieħed mix-Xhieda taʼ Ġeħova.a L-iskop tal-avviż mhuwiex biex jumilja lill-persuna, imma biex l-aħwa fil-kongregazzjoni jobdu l-kmand tal-Bibbja u ‘ma jibqgħux jagħmluha’ maʼ persuna bħal din u ‘lanqas biss jieklu’ magħha. (1 Kor. 5:​9-11) Hemm raġunijiet tajbin għala Ġeħova ta dan il-kmand. L-appostlu Pawlu kiteb: ‘Ftit ħmira tinxtered mal-għaġina kollha.’ (1 Kor. 5:6) Jekk xi ħadd li ma jindimx ma jitneħħiex mill-kongregazzjoni, xi wħud jistgħu jaħsbu li m’għandhomx għalfejn jipprovaw jgħixu skont il-livelli ġusti taʼ Ġeħova.—Prov. 13:20; 1 Kor. 15:33.

5. Kif għandna nqisu lil xi ħadd li tneħħa mill-kongregazzjoni, u għala?

⁵ Allura, kif għandna nqisu lil xi ħadd mill-aħwa li tneħħa mill-kongregazzjoni? Għalkemm ma nagħmluhiex miegħu, aħna nqisuh bħal nagħġa li ntilfet u mhux bħal xi ħadd li m’hemmx tama għalih. Nagħġa li tkun tbiegħdet mill-merħla tagħha tistaʼ terġaʼ lura. Ftakar li dan l-individwu kien iddedika lilu nnifsu lil Ġeħova. B’dispjaċir, bħalissa mhux qed jagħmel dak li jogħġob lil Ġeħova, u minħabba f’hekk qiegħed fil-periklu. (Eżek. 18:31) Minkejja dan, la għad hemm iż-żmien u Ġeħova hu lest li juri ħniena, aħna nittamaw li l-persuna tbiddel l-attitudni tagħha. Allura l-anzjani kif jistgħu jgħinu lil xi ħadd li għamel dnub u tneħħa mill-kongregazzjoni?

KIF L-ANZJANI JGĦINU LIL DAWK LI TNEĦĦEW MILL-KONGREGAZZJONI

6. L-anzjani x’jagħmlu biex jgħinu lil min tneħħa mill-kongregazzjoni?

⁶ Meta xi ħadd jitneħħa mill-kongregazzjoni, l-anzjani żgur li jkomplu jipprovaw jgħinuh biex jerġaʼ lura lejn Ġeħova. Meta jinformaw lil min ma jkunx nidem li se jitneħħa mill-kongregazzjoni, il-kumitat tal-anzjani jispjegawlu x’għandu jagħmel biex jerġaʼ lura fil-kongregazzjoni. Imma mhux hekk biss. Fil-biċċa l-kbira, huma jgħidulu li jkunu jixtiequ jiltaqgħu miegħu wara ftit xhur ħalli jaraw jekk ikunx biddel fehemtu. Jekk ikun lest li jiltaqaʼ magħhom, l-anzjani minn qalbhom se jinkuraġġuh biex jindem u jerġaʼ lura. Anke jekk sa dak iż-żmien hu jkun għadu bl-istess attitudni, l-anzjani minn żmien għal żmien se jipprovaw jagħmlu kuntatt miegħu u jinkuraġġuh biex jindem.

7. Meta xi ħadd jitneħħa mill-kongregazzjoni, l-anzjani kif jistgħu jimitaw il-ħniena taʼ Ġeħova? (Ġeremija 3:12)

⁷ L-anzjani jagħmlu l-almu tagħhom biex jimitaw lil Ġeħova u juru ħniena maʼ dawk li jkunu għamlu dnub serju u li tneħħew mill-kongregazzjoni. Pereżempju, Ġeħova ma qagħadx jistenna lill-poplu ribelluż tiegħu Iżrael biex jieħu l-ewwel pass. Minflok, hu ħa l-inizjattiva u bagħtilhom il-profeti, saħansitra qabel urew xi sinjal li kien iddispjaċiehom. Bħalma rajna fit-tieni artiklu taʼ din is-serje, Ġeħova wera kemm hi kbira l-ħniena tiegħu billi qal lil Ħosea biex jerġaʼ jieħu lura lill-mara tiegħu, avolja kienet għadha qed tidneb. (Ħos. 3:1; Mal. 3:7) Billi jimitaw lil Ġeħova, l-anzjani minn qalbhom jixtiequ li min jagħmel id-dnub jerġaʼ lura u ma jagħmluhilux diffiċli.—Aqra Ġeremija 3:12.

8. L-eżempju taʼ Ġesù tat-tifel mitluf kif jgħinna nifhmu aħjar kif iħossu Ġeħova dwar dawk li telquh? (Luqa 15:7)

⁸ Ftakar fl-eżempju tat-tifel mitluf li ddiskutejna fit-tieni artiklu taʼ din is-serje. Meta l-missier ra lil ibnu ġej lura, hu “ġera lejh, għannqu, u biesu b’tenerezza.” (Luqa 15:20) Innota li l-missier ma qagħadx jistenna li ibnu jitolbu biex jaħfirlu. Minflok, hu ħa l-inizjattiva għax kien iħobbu. L-anzjani jagħmlu kulma jistgħu biex juru attitudni simili lejn dawk li tbiegħdu mill-kongregazzjoni. Huma jridu li dawn l-uħud li huma bħal nagħaġ mitlufin jerġgħu lura għand Ġeħova. (Luqa 15:​22-24, 32) Meta midneb jerġaʼ lura, ikun hemm il-ferħ fis-sema u jkun hemm il-ferħ fuq l-art ukoll!—Aqra Luqa 15:7.

9. Ġeħova xi jħeġġiġhom jagħmlu lil dawk li dinbu?

⁹ Minn dak li rajna s’issa, huwa ċar li Ġeħova ma jridx li min ma ddispjaċiehx għad-dnub li għamel jibqaʼ fil-kongregazzjoni. Però, hu ma jagħtihomx dahru. Hu jridhom jerġgħu lura għandu. Ġeħova jesprimi kif iħossu dwar l-uħud li jindmu bil-kliem li nsibu f’​Ħosea 14:4: “Se nfejjaq in-nuqqas taʼ lealtà tagħhom. Se nħobbhom minn jeddi, għax m’għadnix irrabjat magħhom.” Peress li jafu kif iħossu Ġeħova, l-anzjani jfittxu kwalunkwe sinjal li juri li l-persuna beda jiddispjaċiha. U dan il-kliem żgur li jaċċerta lil dawk li telqu lil Ġeħova li hu jħobbhom u jridhom jiġu lura malajr.

10-11. L-anzjani kif se jipprovaw jgħinu lil dawk li tneħħew mill-kongregazzjoni fil-passat?

¹⁰ Xi ngħidu għal dawk l-uħud li tneħħew mill-kongregazzjoni fil-passat, forsi ħafna snin ilu. Jistaʼ jkun li dawn l-uħud m’għadhomx jagħmlu d-dnub li tneħħew minħabba fih. F’ċerti każi, huma jaf lanqas biss jiftakru għala tneħħew. Ilu kemm ilu, l-anzjani se jipprovaw isibu lil dawn l-uħud u jżuruhom. Matul dawn iż-żjajjar, l-anzjani se joffru li jitolbu magħhom u jinkuraġġuhom biex jerġgħu lura fil-kongregazzjoni. Ovvjament, jekk l-individwu jkun ilu ħafna snin li tbiegħed mill-kongregazzjoni, hu se jkollu bżonn jerġaʼ jsir jaf lil Ġeħova u l-veritajiet tal-Bibbja. Għalhekk, jekk hu juri li jixtieq jerġaʼ lura lejn il-kongregazzjoni, l-anzjani jistgħu jagħmlu arranġament biex xi ħadd jistudja l-Bibbja miegħu anki qabel ma jiġi aċċettat lura. Fil-każijiet kollha, ikunu l-anzjani li jirranġaw biex isir l-istudju.

¹¹ L-anzjani jippruvaw jimitaw il-ħniena li Ġeħova għandu għan-nies. Għalhekk, huma jippruvaw jilħqu u jgħinu lil uħud li għamlu dnub biex jerġgħu lura għand Ġeħova u juruhom li l-bieb għadu miftuħ. Meta xi ħadd li jagħmel dnub juri li nidem u ma jibqax jagħmel il-ħażen, hu jistaʼ jiġi aċċettat lura bla dewmien.—2 Kor. 2:​6-8.

12. (a) L-anzjani f’liema sitwazzjonijiet għandhom joqogħdu speċjalment attenti? (b) Għala m’għandniex inħossu li Ġeħova qatt mhu se juri ħniena ma’ min għamel ċertu dnubiet? (Ara wkoll in-nota ta’ taħt.)

¹² F’ċerti ċirkustanzi, l-anzjani għandhom joqogħdu speċjalment attenti qabel ma jaċċettaw lura lil xi ħadd. Pereżempju, huma jridu jagħmlu ċert li l-individwu verament nidem jekk qabel ikun instab ħati li abbuża mit-tfal, ħati t’apostasija, jew li ppjana li jtemm iż-żwieġ tiegħu. (Mal. 2:14; 2 Tim. 3:6) L-anzjani jridu jipproteġu lill-merħla. Fl-istess ħin, aħna nirrealizzaw li Ġeħova se jaċċetta lura lil kull min verament iddispjaċieh għad-dnub li għamel u ma jibqax jagħmel il-ħażin. Allura, għalkemm l-anzjani se joqogħdu attenti ħafna meta jittrattaw maʼ xi ħadd li jkun qarraq b’oħrajn, huma m’għandhomx jaħsbu li Ġeħova qatt mhu se jħenn għal persuna bħal din.b—1 Pt. 2:10.

DAK LI TISTAʼ TAGĦMEL IL-KONGREGAZZJONI

13. Għala nittrattaw b’mod differenti lil xi ħadd li ġie kkoreġut mill-anzjani u lil xi ħadd li tneħħa mill-kongregazzjoni?

¹³ Bħalma rajna mill-artiklu taʼ qabel, xi kultant isir avviż li xi ħadd ġie kkoreġut. F’dan il-każ, aħna nistgħu nibqgħu nagħmluha miegħu għax hu jkun iddispjaċieh u m’għadux jagħmel il-ħażin. (1 Tim. 5:20) Hu għadu parti mill-kongregazzjoni u għandu bżonn l-inkuraġġiment mill-aħwa biex jibqaʼ jagħmel dak li hu tajjeb. (Lhud 10:​24, 25) Madankollu, is-sitwazzjoni hi differenti minn meta xi ħadd jitneħħa mill-kongregazzjoni. Aħna ma ‘nibqgħux nagħmluha miegħu’ u ‘lanqas biss nieklu miegħu.’—1 Kor. 5:11.

14. L-aħwa kif jistgħu jużaw il-kuxjenza ttrennjata fuq il-Bibbja meta jittrattaw maʼ min tneħħa mill-kongregazzjoni? (Ara l-istampa.)

¹⁴ Dan li għadna kif ikkunsidrajna, ifisser li għandna ninjoraw għalkollox persuna li tneħħiet mill-kongregazzjoni? Mhux bilfors. Ovvjament m’aħniex se nagħmluha magħha. Imma l-Kristjani għandhom jużaw il-kuxjenza tagħhom ittrennjata fuq il-Bibbja jekk jistidnux għal laqgħa lil xi ħadd li tneħħa mill-kongregazzjoni. Dan jistaʼ jkun xi ħadd li jiġi minnhom jew xi ħadd li qabel kien ħabib sew tagħhom. U jekk dan imbagħad jattendi, kif għandna nittrattawh? Fil-passat ma konniex insellmu lil individwu bħal dan. Għal darb’oħra, kull Kristjan għandu juża l-kuxjenza tiegħu ttrennjata fuq il-Bibbja f’din il-kwistjoni. Xi wħud iħossuhom komdi li jsellmu jew jilqgħu lill-individwu li jattendi l-laqgħa. Però, aħna mhux se jkollna konversazzjonijiet twal miegħu jew inqattgħu ħin miegħu nagħmlu affarijiet oħra.

15. It-​2 Ġwanni 9-11 dwar liema dnubiet qed jitkellem? (Ara wkoll il-kaxxa “Ġwanni u Pawlu Kienu Qed Jitkellmu Dwar l-Istess Tip taʼ Dnub?”)

¹⁵ Xi wħud forsi jistaqsu, ‘Il-Bibbja ma tgħidx li jekk Kristjan isellem individwu bħal dan ikun qed jappoġġa l-affarijiet ħżiena li qed jagħmel?’ (Aqra t-​2 Ġwanni 9-11.) Il-kuntest taʼ din l-iskrittura juri li kien qed jirreferi għall-apostati u għall-uħud li jħajru lil oħrajn biex jagħmlu dak li hu ħażin. (Riv. 2:20) Għalhekk, jekk persuna tkun qed ixxerred tagħlim apostat jew tħajjar lil ħaddieħor biex jagħmel dak li hu ħażin, l-anzjani mhux se jagħmlu arranġamenti biex iżuruha. Naturalment hemm tama li xi darba tiġi f’sensiha. Imma sakemm jiġri dan, aħna la ħa nsellmu lil persuna bħal din u lanqas ħa nistidnuha biex tattendi laqgħa tal-kongregazzjoni.

L-ANZJANI JIMITAW IL-ĦNIENA U L-QALB TAJBA TAʼ ĠEĦOVA

16-17. (a) Ġeħova xi jrid li jagħmel min jidneb? (Eżekjel 18:32) (b) L-anzjani kif jistgħu jaħdmu maʼ Ġeħova meta jgħinu lil min għamel dnub serju?

¹⁶ X’tgħallimna minn din ir-rivista? Ġeħova ma jrid li jinqered ħadd! (Aqra Eżekjel 18:32.) Hu jrid li dawk li għamlu dnub jerġgħu jagħmlu ħbieb miegħu. (2 Kor. 5:20) Hu għalhekk li matul l-istorja, Ġeħova għal darba wara l-oħra ħeġġeġ lill-poplu ribelluż tiegħu—kif ukoll lill-individwi ribellużi—biex jindmu u jerġgħu lura għandu. L-anzjani għandhom il-privileġġ li jaħdmu maʼ Ġeħova hekk kif jagħmlu kulma jistgħu ħalli jgħinu lil dawk li għamlu dnubiet serji biex jindmu.—Rum. 2:4; 1 Kor. 3:9.

¹⁷ Immaġina kemm ikun hemm ferħ fis-sema meta dawk li għamlu dnub jindmu! Missierna tas-sema, Ġeħova, iħossu ferħan ħafna kull darba li xi ħadd min-nagħaġ mitlufin tiegħu jmur lura lejn il-kongregazzjoni. L-imħabba tagħna għal Ġeħova se tkompli tissaħħaħ hekk kif nimmeditaw fuq il-ħniena, il-maħfra, u l-qalb tajba kbira tiegħu.—Luqa 1:78.