VERSI MILL-BIBBJA SPJEGATI
Proverbji 17:17—“Il-Ħabib Iħobbok Kull Ħin”
“Ħabib veru juri mħabba l-ħin kollu. Hu bħal ħu li tistaʼ tistrieħ fuqu meta tħossok imdejjaq.”—Proverbji 17:17, Traduzzjoni tad-Dinja l-Ġdida.
“Il-ħabib iħobbok kull ħin, bħal ħuk imwieled għal żmien l-hemm.”—Proverbji 17:17, Il-Bibbja, Għaqda Biblika Maltija.
Xi Jfisser Proverbji 17:17
Ħbieb taʼ vera huma taʼ min jafdahom. Bħal żewġt aħwa li jkunu close, huma dejjem hemm għal xulxin u jieħdu ħsieb lil xulxin, speċjalment matul żmien diffiċli.
“Ħabib veru juri mħabba l-ħin kollu.” Din il-frażi tistaʼ tfisser ukoll li “l-ħbieb dejjem juru l-imħabba.” Il-kelma Ebrajka għal “imħabba” f’din il-frażi tinvolvi iktar minn emozzjoni jew sentiment lejn persuna. Hija mħabba mhux egoista li persuna turi b’dak li tagħmel. (1 Korintin 13:4-7) Ħbieb li jkunu jħobbu lil xulxin b’dan il-mod jibqgħu leali lejn xulxin meta l-ħbiberija tagħhom tkun ittestjata minħabba nuqqas taʼ ftehim jew minħabba xi problemi fil-ħajja. Huma jkunu lesti wkoll li jaħfru lil xulxin. (Proverbji 10:12) U ħabib veru ma jgħirx meta l-affarijiet ikunu sejrin tajjeb għall-ħabib tiegħu. Anzi, hu jifraħ miegħu.—Rumani 12:15.
“Ħabib veru . . . hu bħal ħu li tistaʼ tistrieħ fuqu meta tħossok imdejjaq.” Dan il-proverbju hu bbażat fuq l-idea li l-aħwa spiss ikunu close ħafna. Mela meta nagħmlu li nistgħu biex ngħinu ħabib li jkun għaddej minn żmien diffiċli, inkunu qed naġixxu kif jaġixxu l-aħwa bejniethom. Iktar minn hekk, din il-ħbiberija ma ssirx dgħajfa meta jinqalaʼ l-inkwiet, minflok tissaħħaħ. Dan minħabba li l-problemi jkabbru l-imħabba u r-rispett li l-ħbieb ikollhom għal xulxin.
Dwar Xiex Jitkellem Proverbji 17:17
Il-ktieb tal-Proverbji fih ħafna ideat u suġġerimenti li kienu miktubin fil-qosor u b’mod li jġegħluk taħseb. Ir-Re Salamun kiteb ħafna minn dan il-ktieb li nsibu fil-Bibbja. Il-mod kif inhu miktub hu simili għall-poeżiji tal-Lhud. Minflok ma uża kliem biex jagħmel rima, hu uża ideat simili jew ideat opposti biex joħroġ it-tagħlima. Pereżempju, Proverbji 17:17 hu eżempju fejn it-tieni parti tal-vers issaħħaħ il-punt tal-ewwel parti. Proverbji 18:24 hu eżempju fejn jagħmel kuntrast biex joħroġ il-punt. “Hemm ħbieb li lesti li jkissru lil xulxin, imma hemm ħabib li jintrabat miegħek iktar minn ħuk.”
Meta Salamun kiteb Proverbji 17:17, jistaʼ jkun li kien qed jaħseb dwar il-ħbiberija kbira li missieru David kellu maʼ Ġonatan, wieħed mit-tfal tar-Re Sawl. (1 Samwel 13:16; 18:1; 19:1-3; 20:30-34, 41, 42; 23:16-18) Għalkemm Ġonatan u David ma kinux jiġu minn xulxin, huma kienu iktar close minn aħwa. Ġonatan anki rriskja ħajtu għall-ħabib tiegħu li kien iżgħar minnu.a
Proverbji 17:17 f’Bibbja Oħra
“Ħabib iħobb f’kull ħin; hu imwieled biex ikun ħuk għall-waqt il-hemm.”—Il-Bibbja Mqaddsa.
Ara dan il-vidjow qasir biex ikollok idea x’fih il-ktieb tal-Proverbji.
a Ara l-artiklu bl-Ingliż “Bound Together in Close Friendship.”