VERSI MILL-BIBBJA SPJEGATI
Salm 37:4—“Qiegħed fil-Mulej l-Għaxqa Tiegħek”
“Ħu pjaċir f’li taqdi lil Ġeħova, u hu jagħtik dak li tixtieq qalbek.”—Salm 37:4, Traduzzjoni tad-Dinja l-Ġdida.
“Qiegħed fil-Mulej l-għaxqa tiegħek, u jagħtik dak li tixtieq qalbek.”—Salm 37:4, Il-Bibbja, Għaqda Biblika Maltija.
Xi jfisser Salm 37:4
Is-salmista jgħid lill-qaddejja t’Alla biex ikunu ferħanin għax għandhom ħbiberija mill-qrib m’Alla. Dawk kollha li jkollhom din il-ħbiberija jistgħu jkunu ċerti li Alla Ġeħovaa se jagħtihom dak li jixtiequ jekk ikun fi qbil maʼ dak li jogħġob lilu.
“Ħu pjaċir f’li taqdi lil Ġeħova.” Din l-espressjoni tiġi tradotta wkoll “qiegħed fil-Mulej l-għaxqa tiegħek” jew “tgħaxxaq b’Ġeħova.” L-idea hi li aħna għandna nieħdu pjaċir naqdu lill-Alla l-veru. (Salm 37:4, nota taʼ taħt) Għala nistgħu ngħidu hekk?
Dawk li jaqdu lil Ġeħova jaraw l-affarijiet bħalma jarahom hu. Huma mhux biss jafu lil Alla imma wkoll jafu li se jkun taʼ benefiċċju għalihom jekk jobduh. Għalhekk, huma għandhom kuxjenza nadifa u jevitaw ħafna żbalji u deċiżjonijiet ħżiena. (Proverbji 3:5, 6) Pereżempju, meta nies rgħiba jew diżonesti jidhru li qed jirnexxu, in-nies t’Alla ma jħallux ir-rabja jew l-għira ttellfilhom il-paċi li jkollhom. (Salm 37:1, 7-9) Huma ferħanin għax jafu li Alla dalwaqt se jneħħi l-inġustizzja kollha u se jippremja lil dawk li bl-imġiba tagħhom jipprovaw jogħġbuh. (Salm 37:34) Huma ferħanin ukoll għax jafu li Missierhom tas-sema hu ferħan bihom.—Salm 5:12; Proverbji 27:11.
“Hu jagħtik dak li tixtieq qalbek.” Dan il-kliem ma jfissirx li kull ħaġa li nitolbu lil Ġeħova se jagħtihielna. Bħal ġenitur tajjeb, Ġeħova jaf x’inhu tajjeb għat-tfal tiegħu. : Barra minn hekk, dak li nitolbu lil Alla u l-mod kif ngħixu ħajjitna għandhom jaqblu mal-livelli tiegħu u mal-iskop tiegħu. (Proverbji 28:9; Ġakbu 4:3; 1 Ġwanni 5:14) Jekk nagħmlu hekk, nistgħu nitolbu lil “Semmiegħ it-talb” u nkunu ċerti li se jismagħna.—Salm 65:2; Mattew 21:22.
Dwar xiex jitkellem Salm 37:4
Salm 37 kitbu r-Re David taʼ Iżrael. Hu kiteb dan is-salm bi stil alfabetiku, jiġifieri, akrostiku.b
David kien ġie trattat ħażin ħafna drabi u kellu jaħrab minħabba li r-Re Sawl u oħrajn riedu joqtluh. (2 Samwel 22:1) Però, David kellu fidi soda f’Alla. Hu kien jaf li Ġeħova kien se jikkastiga lil dawk li kienu qed jagħmlu l-ħażen. (Salm 37:10, 11) Għalkemm dehru li qed jirnexxu, “bħall-ħaxix li jkun għadu tielaʼ,” xorta kienu se jinqerdu.—Salm 37:2, 20, 35, 36.
Salm 37 jurina x’se jiġri lil dawk li jobdu l-livelli t’Alla u lil dawk li ma jobduhomx. (Salm 37:16, 17, 21, 22, 27, 28) Għalhekk dan is-salm jgħinna jkollna l-għerf u nkunu nies li jogħġbu lil Alla.
Ara dan il-vidjow qasir biex ikollok idea x’fih il-ktieb tas-Salmi.
a Ġeħova hu l-isem t’Alla bil-Malti, tradott mil-lingwa Ebrajka. Biex tkun taf għala ħafna Bibbji jużaw il-kelma Mulej minflok l-isem personali t’Alla, ara l-artiklu “Min Hu Ġeħova?”
b F’dan l-istil, l-ewwel vers jew grupp taʼ versi jibdew bl-ewwel ittra tal-alfabett Ebrajk, it-tieni grupp jibda bit-tieni ittra tal-alfabett Ebrajk u nkomplu sejrin hekk. Dan l-istil jistaʼ jkun li għen lin-nies biex jiftakru s-salm.