Esplojtazzjoni Sesswali Taʼ Tfal Problema Mad-​Dinja Kollha

MINN KORRISPONDENT TAʼ STENBAĦ! FL-​ISVEZJA

Is-​soċjetà umana tinsab mheżhża b’għamla li tqażżek t’abbuż mit-​tfal li l-​firxa u n-​natura tiegħu ħarġu fil-​beraħ biss f’dawn l-​aħħar snin. Biex jaraw x’jistaʼ jsir dwar dan, rappreżentanti minn 130 pajjiż iltaqgħu fi Stokkolma, l-​Isvezja, għall-​Ewwel Kungress Dinji Kontra L-​Esplojtazzjoni Sesswali u Kummerċjali Taʼ Tfal. Kien hemm ukoll korrispondent taʼ Stenbaħ! fl-​Isvezja.

META Magdalen kellha 14-il sena, ġiet imħajra taħdem bħala “hostess” f’ħanut tax-​xorb ġewwa Manila, fil-​Filippini. Attwalment, xogħolha kien jinvolvi li tieħu klijenti rġiel f’kamra żgħira u hemmhekk tinżaʼ ħwejjiġha biex huma jużawha sesswalment​—madwar 15-il raġel kull fil-​għaxija u 30 nhar taʼ Sibt. Xi drabi, meta kienet tgħid li ma setgħetx tiflaħ iktar, dak li kien iħaddimha kien iġagħalha tkompli. Spiss kienet tispiċċa mix-​xogħol fl-​erbgħa taʼ fil-​għodu, mifnija, qalbha sewda, u mifluġa.

Sareoun kien tifel iltim jiġġerra fit-​toroq taʼ Phnom Penh, fil-​Kambodja. Kien marid bis-​sifilis u magħruf li kien ‘imur’ mal-​barranin. Ngħata post fejn joqgħod ġewwa pagoda, fejn kellu ‘jieħu ħsiebu’ wieħed li darba kien patri. Dar-raġel, iżda, abbuża mit-​tifel sesswalment u ġagħlu jagħmel atti sesswali mal-​barranin. Meta twaqqgħet il-​pagoda fejn kien joqgħod Sareoun, hu beda jgħix maʼ zitu imma xorta ġie mġiegħel jaħdem bħala prostitut.

Dawn huma biss żewġ eżempji tal-​problema terribbli li ġiet ittrattata tard is-​sena l-​oħra fil-​Kungress Dinji Kontra L-​Esplojtazzjoni Sesswali u Kummerċjali Taʼ Tfal. Kemm hi mifruxa din il-​prattika? Hemm involuti mijiet t’eluf taʼ tfal​—xi wħud saħansitra jgħidu li miljuni. Waħda mid-​delegati ġabret fil-​qosor il-​problema: “It-​tfal jinxtraw u jinbiegħu bħala oġġetti sesswali u taʼ kummerċ. Jiġu ttraffikati fil-​pajjiż u minn pajjiż għall-​ieħor bħala kuntrabandu, maqfulin fi briedel u mġagħlin joqogħdu għal għadd kbir taʼ nies li jesplojtawhom sesswalment.”

Fid-diskors tiegħu hekk kif fetaħ il-​laqgħa, il-​prim ministru taʼ l-​Isvezja, Göran Persson, ittimbra din l-​esplojtazzjoni bħala “dik il-​kategorija taʼ kriminalità l-​iktar brutali, l-​iktar salvaġġa u moqżieża.” Rappreżentanta tal-​Ġnus Magħquda qalet li hija “attakk sfrenat fuq it-​tfal . . . , għalkollox viljakk u l-​akbar vjolazzjoni mistmerra tad-​drittijiet umani li wieħed qatt jistaʼ jimmaġina.” Il-​kelliema lissnu bosta espressjonijiet simili taʼ korla kontra l-​esplojtazzjoni sesswali tat-​tfal matul il-​kungress kollu hekk kif dawn qiesu l-​firxa, in-​natura, il-​kawża, u l-​effett taʼ dan kollu.

“Mifruxa fost ħafna pajjiżi u tolqot ġenerazzjoni wara l-​oħra,” poġġieha sors wieħed. Ieħor stqarr: “Huwa stmat li mal-​miljun tifel u tifla jidħlu fis-​suq illegali tas-​sess kull sena biex iqallgħu ħafna biljuni taʼ dollari.” U dan x’effett iħalli? “Jiġi mminat is-​sens taʼ dinjità, identità u stima tagħhom infushom u t-​tfal ma jibqgħux jafu jafdaw. Is-​saħħa fiżika u emozzjonali tagħhom titqiegħed fil-​periklu, id-​drittijiet tagħhom imkasbrin u l-​futur tagħhom mhedded.”

Xi Wħud Mill-​Kawżi

X’inhuma xi wħud mill-​kawżi li wasslu biex din il-​problema kibret b’tant ħeffa? Intqal li xi tfal jiġu “mbottati għall-​prostituzzjoni minħabba ċ-​ċirkostanzi, bħala mod kif jibqgħu ħajjin fit-​toroq, biex imantnu ’l-familji tagħhom, jew biex iħallsu għall-​ħwejjeġ u affarijiet oħrajn. Oħrajn jiġu mħajrin mill-​bumbardament taʼ xbihat konsumisti mid-​dinja tar-​riklami.” Jerġaʼ oħrajn jinħatfu minn djarhom u jiġu mġagħlin jidħlu fil-​prostituzzjoni. It-​tnaqqir tal-​valuri morali li dejjem qed jikber maʼ kullimkien, flimkien maʼ sens ġenerali taʼ disperazzjoni, issemmew fost il-​kawżi.

Ħafna bniet u subjien isiru involuti fin-​negozju tas-​sess minħabba abbuż fil-​familja​—vjolenza u inċest fid-​dar iwassluhom għal li jmorru jgħixu fit-​toroq. Hemmhekk ikunu f’riskju li jiġu abbużati minn pedofili u oħrajn, saħansitra, milli jidher, minn xi pulizija. Rapport dwar il-​problema, intitolat Kids for Hire (Tfal għall-​Kiri), jgħidilna dwar Katia, tifla taʼ sitt snin fil-​Brażil. Meta nqabdet minn wieħed pulizija, dan ġagħalha twettaq atti indiċenti u heddidha li joqtol lill-​familja tagħha jekk tgħid lill-​kap tiegħu. L-​għada reġaʼ ġie maʼ ħamest irġiel oħra, u lkoll kemm huma riduha twettaq l-​istess servizz sesswali għalihom.

L-Ombudsman tat-​Tfal, li huwa istituzzjoni Svediża, qal lid-​delegati: “Wara li saru studji dwar x’jikkaġuna l-​prostituzzjoni tat-​tfal, m’hemm l-​ebda dubju li t-​turiżmu [għas-sess] huwa waħda mill-​kawżi ewlenin.” Rapport minnhom qal: “Iż-​żjieda inkredibbli fil-​prostituzzjoni tat-​tfal matul dawn l-​aħħar għaxar snin hija kkawżata direttament min-​negozju turistiku. Il-​prostituzzjoni tat-​tfal hija l-​iktar attrazzjoni turistika ġdida offruta mill-​pajjiżi li qegħdin jiżviluppaw.” “Vjaġġi għas-​sess” mill-​Ewropa, mill-​Istati Uniti, mill-​Ġappun, u minn postijiet oħra joħolqu domanda kbira għal prostituti tfal mad-​dinja kollha. Waħda mil-​linji taʼ l-​ajru fl-​Ewropa wżat karikatura taʼ tifel f’qagħda sesswali sfaċċata biex tbigħ il-​vjaġġi għas-​sess. Aġenziji taʼ l-​ivvjaġġar jorganizzaw vjaġġi għas-​sess għal eluf kull sena.

Il-lista twila taʼ kawżi tinkludi wkoll il-​promozzjoni internazzjonali taʼ l-​industrija tas-​sess fuq it-​tfal permezz taʼ teknoloġija ġdida. L-​Internet, flimkien maʼ teknoloġiji oħrajn relatati mal-​kompjuter, jingħad li waħdu huwa l-​akbar sors taʼ pornografija. Tagħmir irħis tal-​video bl-​istess mod għamel iktar faċli l-​produzzjoni taʼ pornografija bit-​tfal.

Min Huma?

Ħafna mill-​adulti li jabbużaw mit-​tfal sesswalment huma pedofili. Wieħed pedofil ikollu ġibda sesswali perverta lejn it-​tfal. Skond l-​Ombudsman tat-​Tfal fl-​Isvezja, “dawn m’humiex bilfors irġiel xjuħ u żmattati lebsin inċirata jew nies vjolenti li jaħsbu li huma xi ħaġa. Pedofil tipiku huwa raġel taʼ mezz’età li jaf l-​iskola, taʼ spiss wieħed li jaħdem mat-​tfal bħala għalliem, tabib, social-worker jew qassis.”

Il-grupp Svediż ġab l-​eżempju taʼ Rosario, tifla taʼ 12-il sena mill-​Filippini li ġiet abbużata sesswalment minn turist għas-​sess, tabib mill-​Awstrija. L-​abbuż tiegħu wassal għall-​mewt tagħha.

Carol Bellamy, direttriċi eżekuttiva taʼ l-​UNICEF (United Nations Children’s Fund) f’Ġinevra, stqarret hekk rigward it-​tifla taʼ 12-il sena mill-​Filippini: “Huma taʼ spiss l-​istess adulti fdati bil-​kura u l-​protezzjoni tat-​tfal li jippermettu u jipperpetwaw din il-​prattika intollerabbli. Hemm għalliema, professjonisti fil-​qasam tas-​saħħa, pulizija, politikanti, u membri tal-​kleru li jużaw il-​prestiġju u l-​awtorità tagħhom biex jesplojtaw lit-​tfal sesswalment.”

Ir-​Reliġjon Involuta

Delegat tal-​Knisja Kattolika Rumana fil-​kungress taʼ Stokkolma ddikjara li l-​esplojtazzjoni tat-​tfal hija “l-​iktar delitt faħxi” u hija “riżultat taʼ taħwid profond u tifrik taʼ valuri.” Madankollu, il-​Knisja Kattolika ġiet effettwata ferm minn prattiċi bħal dawn fost il-​kleru tagħha stess.

Fil-ħarġa taʼ Newsweek tas-​16 t’Awissu, 1993, artiklu intitolat “Qassisin u Abbuż” irrapporta dwar “l-​agħar skandlu klerikali fl-​istorja moderna tal-​Knisja Kattolika fl-​Istati Uniti.” Dan stqarr: “Waqt li saru allegazzjonijiet kontra madwar 400 qassis mill-​1982 ’l hawn, xi uffiċjali tal-​knisja jaħsbu li hemm maʼ l-​2,500 qassis li mmolestaw lil tfal jew żgħażagħ. . . . Apparti l-​flus, l-​iskandlu sewa lill-​knisja mistħija kbira​—u xi ftit mill-​awtorità morali tagħha.” Reliġjonijiet oħra madwar id-​dinja qegħdin fl-​istess sitwazzjoni.

Ray Wyre, konsulent dwar il-​kriminalità sesswali fir-​Renju Unit, qal lill-​kungress taʼ Stokkolma dwar żewġ subjien li kienu ġew abbużati sesswalment b’mod sadistiku minn qassis. Wieħed mit-​tfal qiegħed issa jmexxi aġenzija li tieħu ħsieb il-​vittmi t’abbuż fuq it-​tfal minn qassisin, u l-​ieħor sar huwa stess wieħed li jabbuża.

Mettanando Bhikkhu, studjuż Buddist mit-​Tajlandja, irrapporta li “ċerti tipi taʼ prattika Buddista għandhom sehem mir-​responsabbiltà għall-​esplojtazzjoni kummerċjali tat-​tfal bis-​sess fit-​Tajlandja fuq bosta livelli. F’xi rħula lokali fit-​Tajlandja hemm patrijiet li xi drabi bbenefikaw minn flus li ġew lura fil-​komunità minn tfal li ġew imġagħlin jagħmlu l-​prostituzzjoni.”

X’Jistaʼ Jsir?

Dr. Julia O’Connell Davidson, taʼ l-​Università taʼ Leicester fir-​Renju Unit, stiednet lill-​kungress biex jisfida lil dawk li jesplojtaw meta jiġġustifikaw l-​imġiba tagħhom. Dawk li jabbużaw iħobbu jiffokaw taʼ spiss fuq dik li jsostnu li hi l-​laxkezza sesswali u l-​immoralità tat-​tfal, billi jargumentaw li t-​tifel ikun diġà maħmuġ u mħassar. Oħrajn li jesplojtaw jużaw l-​allegazzjoni perverta u falza li ma ssir ebda ħsara mill-​atti tagħhom u li t-​tifel jibbenefika.

Panel li studja l-​problema tat-​turiżmu għas-​sess irrakkomanda li wieħed għandu jikkumbattiha permezz taʼ l-​edukazzjoni fl-​iskejjel. Flimkien maʼ dan, informazzjoni kontra l-​esplojtazzjoni sesswali tat-​tfal għandha tilħaq lill-​vjaġġaturi matul il-​vjaġġ kollu​—qabel it-​tluq, matul l-​ivvjaġġar, u mal-​wasla fid-​destinazzjoni.

Rigward it-​teknoloġiji l-​ġodda tal-​komunikazzjoni, panel ieħor issuġġerixxa li l-​ġnus għandhom jingħataw linji taʼ gwida biex jiġi eliminat kull materjal li jesplojta lit-​tfal. Ġie kkunsidrat jekk għandhiex titwaqqaf aġenzija internazzjonali waħda biex tikkoordina l-​attività f’dan il-​qasam. Jerġaʼ panel ieħor irrakkomanda li l-​pornografija bit-​tfal iġġenerata bil-​kompjuter u l-​pussess taʼ kull pornografija bit-​tfal għandhom jitqiesu bħala offiżi kriminali f’kull pajjiż, b’kastigi preskritti mil-​liġi.

X’jistgħu jagħmlu l-​ġenituri? Panel li ttratta l-​irwol tal-​mezzi taʼ komunikazzjoni ssuġġerixxa li l-​ġenituri għandhom jieħdu r-​responsabbiltà li jipproteġu lil uliedhom. Dan stqarr: “Il-​ġenituri ma jistgħux jiggwidaw biss lit-​tfal hekk kif dawn jiżviluppaw bħala konsumaturi tal-​mezzi taʼ komunikazzjoni imma għandhom jipprovdu tagħrif ieħor, spjegazzjonijiet u sorsi diversi taʼ informazzjoni biex jibbilanċjaw kontra l-​impatt tal-​mezzi taʼ komunikazzjoni u jgħinu lit-​tifel jikber fil-​fehma tiegħu.”

Programm fuq it-​TV Svediż li rrapporta dwar il-​kungress saħaq fuq il-​ħtieġa tal-​ġenituri li jħarsu ’l uliedhom aħjar u jiftħulhom għajnejhom għall-​perikli. Madankollu, ta dan il-​parir: “Twissux lit-​tfal biss kontra ‘rġiel xjuħ maħmuġin,’ għax inkella t-​tfal jaħsbu li jridu joqogħdu għassa biss kontra rġiel xjuħ u żmattati, waqt li wieħed li jikkommetti atti kriminali bħal dawn jistaʼ sew ikun liebes xi uniformi jew libsa pulita. Mela, wissuhom kontra stranġieri li jieħdu interess mhux tas-​soltu fihom.” M’għandniex xi ngħidu, it-​tfal għandhom ukoll jiġu mwissijin dwar​—u mħeġġin jirrapportaw lill-​awtoritajiet​—kwalunkwe persuna li tagħmel avvanzi mhux xierqa lejhom, inklużi nies li jafuhom.

L-​Unika Soluzzjoni

Dak li l-​kungress taʼ Stokkolma ma setax jissuġġerixxi kien dwar kif setgħu jingħelbu l-​kawżi li jwasslu għall-​esplojtazzjoni sesswali taʼ tfal. Dawn jinkludu l-​fatt li l-​valuri morali qegħdin jitmermru maʼ kullimkien; iż-​żjieda fl-​egoiżmu u fix-​xenqa għal affarijiet materjali; in-​nuqqas li dejjem jikber taʼ rispett lejn il-​liġijiet li jsiru biex jipproteġu lin-​nies mill-​inġustizzja; il-​fatt li dejjem iktar n-​nies qed jiġu jaqgħu u jqumu mill-​benesseri, mid-​dinjità u mill-​ħajja t’oħrajn; it-​tifrik b’mod mgħaġġel taʼ l-​arranġament tal-​familja; il-​faqar kbir li hawn maʼ kullimkien minħabba l-​popolazzjoni żejda, il-​qgħad, ir-​rassa fl-​ibliet, u l-​immigrazzjoni; iż-​żjieda fir-​razziżmu kontra nies barranin u refuġjati; il-​produzzjoni u t-​traffikar tad-​drogi li dejjem qed jikbru; u fehmiet, prattiċi, u tradizzjonijiet reliġjużi degradanti.

Għalkemm l-​esplojtazzjoni tat-​tfal hija xi ħaġa li taħsdek, ħażen bħal dan m’huwiex taʼ sorpriża għal min jaqra l-​Bibbja bir-​reqqa. Dan għala? Għaliex qegħdin issa ngħixu f’dak li l-​Bibbja ssejjaħlu “l-​aħħar tad-​dinja” (“l-​aħħar jiem,” Saydon u Karm Żammit) u, skond il-​Kelma t’Alla, ninsabu fi “żmien iebes.” (2 Timotju 3:​1-5, 13) Mela mhux taʼ b’xejn li l-​morali marru mill-​ħażin għall-​agħar!

Madankollu, il-​Bibbja tipponta lejn l-​unika soluzzjoni għall-​problemi tant kbar tad-​dinja​—tindifa sħiħa minn Alla li Jistaʼ Kollox. Dalwaqt se juri l-​qawwa tiegħu u jneħħi lil dawk kollha fuq l-​art li mhux qed jimxu mal-​prinċipji u l-​liġijiet taʼ tjieba tiegħu: “It-​tajbin jgħammru fl-​art, u n-​nies sewwa joqogħdu fiha; imma l-​ħżiena mill-​art jitqaċċtu, u l-​qarrieqa jinqalgħu minnha.”​—Proverbji 2:​21, 22; 2 Tessalonikin 1:​6-9.

Dawk li “jitqaċċtu” se jinkludu lil dawk kollha li jġagħlu lil tfal isiru prostituti u nies korrotti li jużaw lit-​tfal ħażin. Il-​Kelma t’Alla tistqarr: “La żienja . . . la adulteri . . . la om[o]sesswali [“dawk li jħobbu s-​subjien,” Saydon (1965) u KŻ] . . . ma jirtu s-​saltna taʼ Alla!” (1 Korintin 6:​9, 10) Iżżid ukoll li ‘dawk taʼ ħajja mħassra u ż-​żienja’ se jieħdu t-​“tieni mewt”​—qerda eterna.​—Apokalissi 21:8.

Alla se jnaddaf l-​art u jdaħħal sistema t’affarijiet għalkollox ġdida u ġusta, “smewwiet ġodda u art ġdida.” (2 Pietru 3:​13) Imbagħad, f’dik id-​dinja l-​ġdida magħmula minnu, nies korrotti u perverti qatt ma se jerġgħu jieħdu vantaġġ minn uħud innoċenti. U l-​innoċenti qatt iktar ma se jkollhom għalfejn jibżgħu li jkunu vvittimizzati, għax “ma jkunx hemm min iwerwirhom.”​—Mikea 4:4.

[Kumment fʼpaġna 12]

“Il-​kategorija taʼ kriminalità . . . l-​iktar salvaġġa u moqżieża.”—Il-​prim ministru taʼ l-​Isvezja

[Kumment fʼpaġna 13]

“Kull ġimgħa, bejn 10 miljuni u 12-il miljun raġel iżur prostituti żgħar.”—The Economist, Londra

[Kumment fʼpaġna 14]

It-​turiżmu għas-​sess huwa wieħed mill-​kawżi ewlenin għall-​esplojtazzjoni taʼ tfal f’pajjiżi li qegħdin jiżviluppaw

[Kaxxa fʼpaġna 13]

Turiżmu Għas-​Sess​—Għala?

(Xi wħud mir-​raġunijiet għala turisti jagħmlu s-​sess mat-​tfal)

(1) L-anonimità li jgawdi t-​turist teħilsu mill-​irbit soċjali taʼ fejn joqgħod

(2) Peress li ftit li xejn jifhmu l-​lingwa lokali, huwa faċli li turist jiġi mqarraq biex jaħseb li l-​ħlas għal sess mat-​tfal huwa xi ħaġa aċċettata jew li huwa mod taʼ kif wieħed jgħin lit-​tfal joħorġu mill-​faqar

(3) Attitudnijiet razzisti jġagħlu lill-​viżitaturi jesplojtaw lil oħrajn li huma jqisuhom bħala inferjuri

(4) It-turisti jħossuhom sinjuri meta jaraw li servizzi sesswali jistgħu jinkisbu bl-​irħis f’pajjiżi li qegħdin jiżviluppaw

[Kaxxa fʼpaġna 15]

Il-​Firxa Tal-​Problema Mad-​Dinja Kollha

(Dawn li ġejjin huma stimi mogħtijin minn diversi awtoritajiet governattivi u organizzazzjonijiet oħra)

Brażil: Minn taʼ l-​inqas 250,000 tifel u tifla prostituti

Kanada: Eluf taʼ tfajliet taħt l-​għoxrin sena qed jitħaddmu minn gruppi organizzati għall-​prostituzzjoni

Ċina: Minn 200,000 sa 500,000 tifel u tifla prostituti. F’dawn l-​aħħar snin madwar 5,000 tifla Ċiniża ġew imħajrin jaqsmu l-​fruntiera u nbigħu bħala prostituti fi Mjanma

Kolumbja: L-​għadd taʼ tfal esplojtati sesswalment fit-​toroq taʼ Bogotá żdied b’ħames darbiet f’dawn l-​aħħar sebaʼ snin

Ewropa tal-​Lvant: 100,000 tifel u tifla tat-​toroq. Ħafna minnhom jintbagħtu fi briedel fl-​Ewropa tal-​Punent

Indja: 400,000 tifel u tifla involuti fl-​industrija tas-​sess

Możambik: Aġenziji li jagħtu l-​għajnuna akkużaw lit-​truppi tal-​ĠM għaż-​żamma tal-​paċi li esplojtaw lit-​tfal sesswalment

Mjanma: 10,000 tfal bniet u nisa jittieħdu fi briedel fit-​Tajlandja kull sena

Filippini: Hemm involuti 40,000 tifel u tifla

Sri Lanka: 10,000 tifel u tifla taʼ bejn is-​6 u l-​14-il sena mjassrin fi briedel u 5,000 t’etajiet bejn l-​10 u t-​18-il sena qegħdin jaħdmu għal rashom f’postijiet turistiċi

Tajwan: Hemm involuti mat-​30,000 tifel u tifla

Tajlandja: Hemm involuti mat-​300,000 tifel u tifla

Stati Uniti: Sorsi uffiċjali jgħidu li hemm involuti iktar minn 100,000 tifel u tifla