Min Se Jipproteġihom Lil Uliedna?

HUWA inkuraġġanti li tkun taf li l-​abbuż fuq it-​tfal issa huwa rikonoxxut bħala problema li tinsab madwar id-​dinja kollha. Inizjattivi bħall-​Kungress Kontra l-​Isfruttar Sesswali u Kummerċjali tat-​Tfal li sar fi Stokkolma, u li għalih attendew rappreżentanti minn 130 pajjiż, taw attenzjoni lil din il-​problema.

Iżjed minn hekk, xi pajjiżi issa qed jgħaddu leġislazzjoni li tipprojbixxi t-​turiżmu għas-​sess u l-​pornografija tat-​tfal. Xi wħud saħansitra ħolqu reġistru taʼ pedofili magħrufin, biex ma jħalluhomx ikollhom aċċess faċli għat-​tfal.

Imbagħad hemm dawk li jfittxu ħajja aħjar għal uliedhom billi jgħaddu leġislazzjoni sabiex jipproteġuhom. U ftit pajjiżi u individwi oħrajn qed jirrifjutaw li jixtru prodotti magħmulin permezz tax-​xogħol mill-​minorenni.

Waqt li aħna lkoll ċertament infaħħru sforzi bħal dawn sabiex is-​soċjetà tinħeles minn dawk li jagħmlu abbuż fuq it-​tfal, irridu nkunu realistiċi u nirrikonoxxu li l-​abbuż fuq it-​tfal għandu għeruq fondi ħafna fis-​soċjetà umana. Ma nkunux realistiċi jekk naħsbu li xi soluzzjoni sempliċi, bħal xi leġislazzjoni, se tipprovdi protezzjoni kompleta għal uliedna. Diġà għaddew ħafna liġijiet, u l-​problema xorta għadha hemm. Id-​delinkwenza taʼ l-​adulti fid-​dinja tidher ċar mill-​fatt tal-​biki li d-​dritt naturali tat-​tfal ikollu jiġi protett minn numru vast taʼ liġijiet.

Il-liġijiet m’humiex l-​aqwa protezzjoni għat-​tfal. Biżżejjed inħarsu lejn ir-​riżultati taʼ leġislazzjoni formidabbli bħal dik tal-​Konvenzjoni tal-​ĠM dwar id-​Drittijiet tat-​Tfal, li ħafna gvernijiet huma firmatarji tagħha. Hemm ħafna dokumenti li jgħidu li saħansitra ħafna minn dawn il-​gvernijiet, minħabba l-​limiti ekonomiċi, mhux qed jaħdmu biżżejjed sabiex iwaqqfu l-​isfruttament taʼ wliedhom. L-​abbuż fuq it-​tfal jibqaʼ jkun problema kbira internazzjonali.

Il-​Ġenituri Jistgħu Jagħmlu Ħafna

Biex tkun ġenitur li jirnexxi jirrikjedi ħafna xogħol. Jitlob sagrifiċċju. Imma ġenituri li jimpurtahom iridu jaċċertaw ruħhom li ma jkunux uliedhom li jsofru. Ir-​rivista Maclean’s tinnota li taʼ spiss “li tkun ġenitur huwa meqjus bħala delizzju.” Ġugarell jistaʼ jitwarrab u delizzju jistaʼ ma jitkompliex, imma li tkun ġenitur huwa responsabbiltà mogħtija minn Alla.

Li tkun ġenitur tajjeb huwa waħda mill-​iktar għotjiet prezzjużi li tistaʼ tagħti lit-​tifel tiegħek, għaliex dan se jgħinu jkollu tfulija hienja u fis-​sigurtà. Sigurtà bħal din ma tiddependix fuq stat soċjali jew status ekonomiku fil-​ħajja. It-​tifel tiegħek għandu bżonn lilek​—l-​imħabba u l-​affezzjoni tiegħek, l-​assigurazzjonijiet tiegħek meta jħossu mhedded, kif ukoll il-​ħin tiegħek. It-​tifel tiegħek ikun irid jismaʼ l-​vuċi tiegħek tirrakkontalu l-​istejjer, iridek bħala mudell li jkun jistaʼ jimitah, u jrid id-​dixxiplina kollha mħabba tiegħek.

Inkwantu għas-​suġġett taʼ l-​immoralità sesswali​—ġenituri, mexxu r-​relazzjonijiet tal-​familja tagħkom bil-​modestja u r-​rispett għall-​imħuħ u l-​iġsma taʼ wliedkom. It-​tfal jitgħallmu malajr liema azzjonijiet jaqbżu l-​limiti morali li l-​ġenituri jistabbilixxu magħhom. Huma għandhom bżonn jiġu mgħallmin kif iġibu ruħhom kemm ġewwa kif ukoll barra mid-​dar. Jekk tonqos li tagħmel dan, xi ħaddieħor se jagħmel dan flokok, u forsi r-​riżultat ma jkunx jogħġbok. Għallem lit-​tfal kif għandhom jirreaġixxu jekk xi darba jiġu mheddin moralment. Għarrafhom għalxiex qegħdin il-​partijiet privati taʼ ġisimhom, u għallimhom li dawn ħadd m’għandu jmisshomlhom. Għidilhom kif għandhom jirreaġixxu jekk xi ħadd javviċinahom u jkun irid japprofitta ruħu minnhom.

Dejjem kun af uliedek fejn qegħdin u maʼ min qegħdin. Min huma l-​ħbieb intimi tat-​tifel tiegħek? Min huma dawk li jieħdu ħsieb it-​tifel tiegħek waqt li ma tkunx miegħu? Huma taʼ min jafdahom? M’għandniex xi ngħidu, dan ma jfissirx li ġenitur għandu jissuspetta f’kulħadd. Għamel stima tajba taʼ l-​adulti li hemm fil-​ħajja tat-​tifel tiegħek, billi ma tħarisx biss lejn l-​apparenzi taʼ barra.

Aħseb dwar l-​uġigħ taʼ qalb li għaddew minnu ġenituri li skoprew, meta kien tard wisq, li uliedhom kienu ġew abbużati minn membri tal-​kleru, għalliema, jew saħansitra minn familjari li kienu jafdawhom. Ikun tajjeb għalik bħala ġenitur li tistaqsi lilek innifsek, ‘Il-​knisja tiegħi tittollerah jew tgħattih l-​abbuż fuq it-​tfal? Ir-​reliġjon tiegħi żżomm sod maʼ prinċipji morali għoljin?’ It-​tweġibiet għal mistoqsijiet bħal dawn jistgħu jgħinuk tagħmel deċiżjonijiet għaqlin sabiex tipproteġi lil uliedek.

Imma fuq kollox, ipprova għinhom isiru jafu u jħobbu l-​prinċipji tal-​Ħallieq, li se jipproteġuhom mill-​ħsara. Meta t-​tfal jaraw ir-​rispett tal-​ġenituri tagħhom għall-​prinċipji morali għoljin, huma se jkunu iktar lesti li jsegwu dan l-​eżempju tajjeb.

L-​Unika Vera Soluzzjoni

M’għandniex xi ngħidu, la l-​liġijiet u lanqas sentenzi twal fil-​ħabs ma se jipproteġu lil uliedna. Hu l-​Ħallieq innifsu permezz tal-​Kelma mnebbħa tiegħu, il-​Bibbja, li jistaʼ b’mod effettiv joħloq kondotta safja, billi jbiddel il-​ħsieb taʼ nies qishom annimali f’dak taʼ membri morali u kollhom imħabba fi kwalunkwe komunità.

Diġà ntwera li dan hu possibbli. Hemm ħafna li abbandunaw l-​istili taʼ ħajja li kellhom qabel u ma baqgħux mogħtijin għas-​sess. Issa qed jagħtu prova ħajja tal-​qawwa tal-​Kelma t’Alla. Imma waqt li dan hu pass fid-​direzzjoni t-​tajba, il-​maġġuranza tal-​ħżiena mħassrin moralment m’humiex se jinbidlu. Din hi r-​raġuni għala Alla Jehovah wiegħed li dawk kollha li jisfruttaw lil uliedna dalwaqt se jitneħħew minn fuq l-​art​—flimkien mal-​filosofiji, ix-​xenqiet għall-​pjaċiri, u r-​regħba tagħhom.​—1 Ġwann 2:​15-17.

Imbagħad, fid-​dinja ġdida t’Alla, meta ma jkunx hawn iktar faqar, it-​tfal kollha se jgawdu tfulija komda u mingħajr inkwiet, u dan hu d-​dritt tagħhom mogħti minn Alla. Dan ma jfissirx biss it-​tmiem taʼ l-​abbuż fuq it-​tfal imma wkoll it-​tmiem tal-​memorji kollhom uġigħ li jħassru l-​ħajjiet tan-​nies illum: “Ma jitfakkarx iżjed l-​imgħoddi, f’moħħ ħadd aktar ma jiġi.”​—Isaija 65:17.

B’hekk, fid-​dinja ġdida t’Alla, il-​kliem taʼ Ġesù Kristu se jieħu t-​tifsir veru tiegħu b’mod grandjuż: “Ħalluhom it-​tfal iż-​żgħar jiġu għandi, u la żżommuhomx, għax taʼ min hu bħalhom hija s-​Saltna tas-​Smewwiet [li se taħkem fuq l-​art kollha, id-​dar bħal Ġenna taʼ l-​umanità].”​—Mattew 19:14.

[Stampa f’paġna 9]

Bit-​tattika, għallem lit-​tfal tiegħek kif għandhom jirreaġixxu jekk jiġu mheddin sesswalment

[Stampa f’paġna 9]

Li tkun ġenitur tajjeb huwa għotja prezzjuża għat-​tfal tiegħek

[Stampa f’paġna 9]

Għin lil uliedek jitgħallmu l-​iskopijiet u l-​prinċipji tal-​Ħallieq

[Stampi f’paġna 10]

Fid-​dinja ġdida t’Alla, it-​tfal kollha se jgawdu t-​tfulija tagħhom bis-​sħiħ