Nissalvagwardjaw Saħħet It-​tfal

RAPPORT riċenti mill-​Fond Tal-​Ġnus Magħquda Għat-​Tfal (UNICEF), The Progress of Nations (Il-Progress tal-​Ġnus), juri titjib sinjifikanti fil-​kundizzjonijiet tas-​saħħa għat-​tfal f’ħafna artijiet. Permezz taʼ l-​isforzi magħqudin taʼ gvernijiet u organizzazzjonijiet internazzjonali, ir-​rati taʼ mwiet għat-​tfal taħt il-​ħames snin tbaxxew f’għadd taʼ pajjiżi. Minkejja dan, The Progress of Nations juri wkoll li kull sena miljuni taʼ ħajjiet żgħar oħrajn jistgħu jiġu salvati b’metodi sempliċi u li ma jiswewx ħafna, speċjalment f’pajjiżi li qegħdin jiżviluppaw. Ġenituri f’dawn l-​artijiet u f’postijiet oħrajn għandhom mnejn isibu t’għajnuna dawn ir-​rakkomandazzjonijiet li kien hemm fir-​rapport.

Treddigħ. “It-​treddigħ huwa l-​aqwa bidu possibbli lejn saħħa u nutriment tajbin,” jirrikmanda r-​rapport. Skond l-​Organizzazzjoni Dinjija Tas-​Saħħa (WHO), “’il fuq minn miljun ħajja tat-​tfal jistgħu jiġu salvati kull sena jekk it-​trabi kollha jiġu mreddgħin esklussivament għal madwar l-​ewwel sitt xhur.” Peress li l-​isptarijiet u s-​swali tal-​maternità jistabbilixxu eżempju qawwi, l-​UNICEF u l-​WHO qegħdin jippromwovu “inizjattiva fl-​isptar dwar l-​interess fit-​trabi.” L-​objettiv tagħhom huwa li jimmotivaw lill-​isptarijiet biex jagħtu appoġġ u parir xieraq lill-​ommijiet tat-​trabi tat-​twelid rigward it-​treddigħ.

L-iġjene u l-​ilma nadif. “In-​numru taʼ ħajjiet imkaxkra mill-​mard jistaʼ jitnaqqas drastikament billi jintuża ilma nadif, bl-​użu taʼ latrini, billi jinħaslu l-​idejn qabel jintmess l-​ikel, u billi l-​ikel jiġi ppreparat u merfugħ b’attenzjoni,” jistqarr ir-​rapport. Għalkemm f’ħafna komunitajiet huwa meħtieġ sforz kbir biex jinkiseb biżżejjed minnu, l-​ilma nadif huwa indispensabbli għas-​saħħa tat-​tfal u tal-​familja.

Nutriment. Supplimenti tal-​vitamina A jistgħu jiskansaw daqs tliet miljun tifel u tifla mill-​mewt kull sena, skond ir-​rapport. Is-​soluzzjoni għall-​problema hija disponibbli u ma tiswiex ħafna, jgħid ir-​rapport, u tistaʼ tiġi rrealizzata b’titjib fid-​dieti, b’ikel sustanzjuż, jew billi jitqassmu kapsuli tal-​vitamina A. It-​tqassim perjodikament taʼ kapsuli tal-​vitamina A li jqumu biss żewġ ċenteżmi Amerikani, lil tfal żgħar diġà qed jintwera li huwa effettiv f’artijiet fejn in-​nuqqas tal-​vitamina A huwa komuni. Ikel bħall-​papaja, mangoes, karrotti, ħxejjex bil-​weraq aħdar, u bajd huwa rrikmandat ukoll.

Oral Rehydration Therapy (Terapija orali biex il-​ġisem jerġaʼ jiġi fornut bl-​ilma). L-​UNICEF tgħid li nofs l-​imwiet annwali tat-​tfal ikkaġunati mid-​dijaréa jistgħu jiġu skansati bil-​għajnuna taʼ taħlitiet li ma jiswewx ħafna u li huma faċli biex tippreparahom, taʼ ilma nadif, melħ, u zokkor jew trab tar-​ross.a Il-​ġenituri għandhom ukoll jibqgħu jagħtuh l-​ikel lit-​tifel. Huwa stmat li, diġà, miljun ħajja kull sena qed tiġi salvata b’dawn il-​mezzi.

[Nota taʼ taħt]

[Sors tal-Istampa fʼpaġna 30]

WHO