L-​Użu Tas-​Slielem Dawn l-​Affarijiet Tiċċekkjahom għas-​Sigurtà?

Minn korrispondent taʼ STENBAĦ! fl-​Irlanda

PAUL ried jibdel bozza maqtugħa fil-​fanal taʼ barra tad-​dar tiegħu. Ried ukoll inaddaf it-​twieqi taʼ fuq minn barra​—martu kienet ilha tgħidlu bihom. Imma Paul baqaʼ jħalli dan ix-​xogħol għal ġurnata oħra. Għala? Għax kellu juża s-​sellum.

Wieħed jistaʼ jifhem il-​biżaʼ tiegħu. Kien jaf li l-​inċidenti li jinvolvu s-​slielem jistgħu jikkaġunaw ġrieħi serji u anki fatali. Dawn taʼ spiss jiġru għaliex il-​ħaddiem ma jkunx ħaseb biżżejjed dwar kif għandu juża s-​sellum kif suppost.

Qabel ma medd idejh għal dan ix-​xogħol, Paul x’kellu bżonn iqis dwar is-​slielem? Dawn huma għaxar suġġerimenti li lil Paul għenuh biex jagħmel l-​affarijiet sew ħalli ma jweġġax.

Huwa s-​Sellum kif Għandu Jkun?

1 Uża sellum addattat. X’aktarx li jkollok tiġġebbed iżżejjed jekk is-​sellum ikun qasir wisq. Forsi jkollok tpoġġih f’angolu perikoluż jekk ikun twil iżżejjed. Evita li tuża forċi biex titlaʼ fuq ir-​raff. Waħħal sellum addattat mar-​raff tiegħek, jew inkella uża sellum normali li sserrħu maʼ xi mkien.

2 Ifli s-​sellum tiegħek bir-​reqqa. Is-​sellum kien miżmum barra? Is-​slielem taʼ l-​injam jisimnu meta jixxarrbu u jogħlbu meta jinxfu. Maż-​żmien, l-​iskaluni jistgħu jillaxkaw, u s-​sellum ma jibqax sod. Hemm xi skaluni taʼ l-​injam xpakkati, jew forsi qegħdin juru xi sinjali taʼ tmermir? Ħafna drabi, taħt kull skaluna taʼ l-​injam ikun hemm virga tal-​ħadid bħala appoġġ. Qegħda din f’postha u mwaħħla sew? Il-​viti u l-​boltijiet li ntużaw biex iwaħħlu l-​iskaluni tal-​ħadid mal-​waqqafiet inkisru jew issaddu? Slielem akbar li jitwalu jistgħu jkollhom it-​taljoli u l-​ħbula. It-​taljoli jaħdmu sew? Il-​ħabel juri sinjali taʼ ħafna użu, u għadu twil biżżejjed? Agħmel it-​tiswijiet u t-​tibdiliet kollha minnufih.

L-​iskaluni taʼ spiss ikollhom kanali mnaqqxin fihom biex dak li jkun ma jiżloqx. Kun ċert li tneħħi kwalunkwe ħmieġ li jinġabar fil-​kanali. Is-​slielem kollha għandu jkollhom għata mas-​saqajn biex is-​sellum ma jiżloqx. Iċċekkja li dawn qegħdin hemm u li m’humiex mgħarrqin iżżejjed.

3 Ittrasporta s-​slielem bla periklu. Meta niġu għal karozza, orbot is-​sellum maʼ carrier apposta għas-​slielem, jew għallinqas orbtu minn żewġ bnadi maʼ karru rmonkat mill-​karozza. Sellum twil abbli jibqagħlu biċċa ħierġa ’l barra minn wara l-​karozza, għalhekk orbot biċċa drapp mat-​tarf sabiex dak li jkun qed isuq warajk jinduna bih faċilment.

Ikun inqas perikoluż jekk sellum twil jinġarr minn tnejn min-​nies. Imma jekk ikollok iġġorr wieħed waħdek u tagħżel li ġġorru mimdud, żomm is-​sellum sod fuq spalltek b’id waħda, filwaqt li tuża l-​id l-​oħra biex iżżommlu l-​bilanċ. Sabiex tevita li tolqot lil xi ħadd, żomm il-​parti taʼ quddiem għolja iktar minn tul taʼ bniedem. Ftakar, iżda, li wara għandek l-​istess tul taʼ sellum li għandek quddiemek! Il-​kummidjanti jagħmluha tidher tad-​daħq meta xi ħadd jintlaqat minn sellum. Fil-​verità, iżda, din qatt m’hija xi ħaġa tad-​daħq​—speċjalment jekk int tkun il-​wieħed li jweġġaʼ.

Meta s-​sellum iġġorru wieqaf, itfaʼ l-​piż fuq il-​parti taʼ fuq taʼ ġismek, billi tuża id waħda biex iġġorru u l-​id l-​oħra, mgħollija ’l fuq minn spalltek, biex tibbilanċjah. Oqgħod attent għal xi wajers għaddejjin ’il fuq minn rasek, fanali tad-​dawl, u tabelli!

4 Poġġi s-​sellum sew. Għas-​sigurtà, is-​sellum m’għandux ikun immejjel fuq ġenb u għandu jserraħ mal-​ħajt f’angolu taʼ 75 grad minn maʼ l-​art.

5 Ipprovdi appoġġ għal fuq u għal isfel. Oqgħod attent fejn isserraħ il-​parti taʼ fuq tas-​sellum. Kun ċert li l-​wiċċ taʼ fuq taʼ fejn se jserraħ is-​sellum huwa sod u ma jiżloqx. Qatt m’għandek isserraħ is-​sellum mal-​ħġieġ jew mal-​plastik. Fejn ikun possibbli, orbtu sew maʼ xi mkien, u l-​ponta tas-​sellum għandha tkun madwar metru ogħla minfejn qed iserraħ is-​sellum mal-​ħajt.

Oqgħod attent b’mod partikulari li meta titlaʼ fuq is-​sellum għall-​ewwel darba, torbtu min-​naħa taʼ fuq. Is-​sellum mhux se jkun sod l-​ewwel darba li titilgħu, u lanqas ma se jkun sod l-​aħħar darba li tinżlu, wara li tkun ħallejtu minn fuq. Biex is-​sellum ikun sod l-​ewwel darba u l-​aħħar darba li tużah, qabbad lil xi ħadd iżommlok is-​sellum minn isfel sakemm titlaʼ jew tinżel. Madankollu, dan huwa effettiv biss meta s-​sellum ma jkunx itwal minn 5 metri.

Jekk l-​art taʼ ħdejn il-​bini hija mżerżqa, poġġi xi ħaġa tqila ħdejn il-​bażi tas-​sellum jew orbot waħda mill-​iskaluni taʼ isfel maʼ xi ħaġa. Jekk l-​art m’hijiex indaqs imma solida, uża feles biex tillivella l-​art. Uża tavla taʼ l-​injam jew xi ħaġa simili biex toħloq bażi soda jekk l-​art tkun ratba jew ramlija.

Jekk se tuża forċi, qis li l-​erbaʼ saqajn ikunu qegħdin imissu sew maʼ l-​art, biż-​żewġ naħiet miftuħin sew u li kwalunkwe lukketti jkunu maqfulin sew f’posthom.

Int Protett?

6 Iċċekkja ż-​żarbun tiegħek. Qabel ma tuża sellum, qis li l-​qiegħ taż-​żarbun tiegħek ikun niexef. Neħħi kwalunkwe ħaġa, bħalma huwa t-​tajn, li tistaʼ tiżloq bih.

7 Ġorr l-​affarijiet bil-​galbu. Sabiex ikollok idejk it-​tnejn liberi waqt li tuża s-​sellum, jekk ikun possibbli, ġorr l-​għodda ġo barżakka li tkun imqabbda maċ-​ċintorin. Ipprova sib metodi oħra taʼ kif iġġorr oġġetti goffi, imma jekk ikollok tuża sellum, żomm l-​id il-​vojta f’kuntatt mas-​sellum il-​ħin kollu billi sserraħha mal-​ġenb tas-​sellum int u tielaʼ jew nieżel. Ħudha bil-​mod u imxi pass pass, u m’għandekx għalfejn tgħaġġel.

Jekk se tuża għodod li jaħdmu bid-​dawl, qatt m’għandek tuża idejk it-​tnejn biex tħaddimhom. Per eżempju, driller jistaʼ f’daqqa waħda jeħel jew jiżloq, u minħabba f’hekk titlef il-​bilanċ u taqaʼ. Qatt m’għandek tissettja l-​għodod fuq l-​on; dawn jistgħu jaqgħulek waqt li jkunu għadhom mixgħulin.

8 Aħseb f’ħaddieħor. Jekk qed taħdem f’post pubbliku, poġġi s-​sellum fejn jistaʼ jarah kulħadd u, jekk ikun possibbli, dawwar is-​sellum b’xi ħaġa sabiex in-​nies ma jersqux lejh. Jekk ikollok iddur maʼ kantuniera bis-​sellum, żomm f’moħħok li ħaddieħor jistaʼ ma jkunx jaf bik. Għid x’bi ħsiebek tagħmel biex twissi lin-​nies, u iċċekkja li t-​triq hija vojta.

Meta jkollok l-​għodda miegħek fuq is-​sellum, ftakar li anki daqsxejn taʼ tornavit jistaʼ jweġġaʼ lil xi ħadd meta jaqaʼ mill-​għoli. Jekk ikollok tillarga għal xi raġuni u ma rnexxilekx torbot is-​sellum, ġib lil xi ħadd biex joqgħodlok għassa jew poġġi s-​sellum bil-​galbu maʼ l-​art sakemm terġaʼ tiġi. Tħallix is-​sellum waħdu.

9 Iċċekkja l-​istat taʼ saħħtek. Peress li l-​użu tas-​slielem huwa primarjament kwistjoni taʼ bilanċ u ritmu, tużahx jekk tħossok ma tiflaħx jew imdardar jew jekk tbati mill-​istordamenti.

10 Użah kif suppost. F’kull ħin u f’kull mument, kun konxju tas-​sigurtà. Qatt m’għandek tħalli tnejn min-​nies jew iktar jitilgħu fuq is-​sellum fl-​istess ħin. Qatt m’għandek tużah meta jkun hemm il-​buffuri tar-​riħ. Qatt m’għandek titlaʼ sa l-​iskaluna taʼ fuq tal-​forċi jew ’il fuq iktar mir-​rabaʼ skaluna minn fuq taʼ sellum twil. Qatt m’għandek tiftaħ iżżejjed sellum li jitwal; dejjem ħalli minn taʼ l-​inqas tliet skaluni mrikkbin fuq xulxin. Qatt m’għandek tiġġebbed iżżejjed. Jekk tiġġebbed iżżejjed waqt li tkun fuq sellum, ikun faċli li titlef il-​bilanċ u taqaʼ. Minflok ma tirriskja li tweġġaʼ, ċaqlaq is-​sellum, anki jekk dan ifisser li ddum iktar biex tlesti x-​xogħol. Meta tkun tielaʼ, ħares dritt quddiemek.

Tieħu kemm tieħu prekawzjonijiet, xi periklu dejjem se jkun hemm meta tuża sellum. Forsi tistaʼ tnaqqashom bl-​għajnuna taʼ dawn is-​suġġerimenti. Lil Paul għenuh. Billi segwiehom, irnexxielu jwaħħal mingħajr periklu l-​bozza li kellu fil-​fanal taʼ barra. U t-​tindif tat-​twieqi? U iva, jagħmilhom darb’oħra . . . forsi!

[Stampi f’paġna 19, 20]

1 Uża sellum addattat

2 Ifli s-​sellum tiegħek bir-​reqqa

3 Ittrasporta s-​slielem bla periklu

4Poġġi s-​sellum sew

5 Ipprovdi appoġġ għal fuq u għal isfel

6 ż-​żarbun tiegħek

7 Ġorr l-​affarijiet bil-​galbu

8 Aħseb f’ħaddieħor

9 Iċċekkja l-​istat taʼ saħħtek

10 Użah kif suppost