Tistaʼ Tintrebaħ il-​Ġlieda Kontra d-​Drogi?

IR-​REBĦA fil-​ġlieda kontra d-​drogi hija mira taʼ min ifaħħarha, imma m’hijiex waħda faċli. Żewġ strumenti qawwijin imexxu n-​negozju illeċitu tad-​drogi—il-​provvista u d-​domanda. Kważi għal seklu sħiħ, il-​gvernijiet u l-​korpi tal-​pulizija kkonċentraw fuq li jnaqqsu l-​provvista. Dak li assumew kien sempliċi: Ebda droga, ebda persuna dipendenti mid-​droga.

Attakk Kontra l-​Provvista

Għal dan l-​għan, l-​iskwadri tal-​pulizija taʼ kontra d-​droga kkonfiskaw konsenji kbar taʼ drogi, u kollaborazzjoni internazzjonali wasslet għall-​arrest taʼ traffikanti prominenti tad-​droga. Imma r-​realtà ħarxa hi li waqt li ħidma effettiva mill-​pulizija tistaʼ ġġiegħel lil xi traffikanti tad-​droga jiċċaqalqu band’oħra, ifittxu swieqi oħrajn, jew isiru iktar makakki, din ma twaqqafhomx. “Qatt ma se nlaħħqu mat-​traffikanti tad-​droga sakemm ikollhom fondi bla limitu u aħna rridu niġġieldu biex ikollna biżżejjed flus mill-​budget nazzjonali,” ammetta ċertu espert tan-​narkotiċi.

Joe de la Rosa, uffiċjal għall-​prevenzjoni tal-​kriminalità fil-​Korp tal-​Pulizija taʼ Ġibiltà, tkellem maʼ Stenbaħ! dwar kemm hu diffiċli li tikkontrolla l-​ittraffikar tad-​droga bejn l-​Afrika u l-​Peniżola Iberjana. “Matul l-​1997 ħadna fil-​pussess tagħna kważi 400 kilo raża tal-​kannabis,” qal hu. “Il-​biċċa l-​kbira fil-​fatt ma kkonfiskajnihomx minn traffikanti tad-​droga; din instabet f’wiċċ il-​baħar jew fuq ix-​xtut fejn inġarret mill-​mewġ. Dan jagħti ftit ħjiel tal-​kwantità enormi taʼ drogi li jaqsmu l-​Istrett taʼ Ġibiltà kull sena. Dak li nikkonfiskaw huwa biss parti żgħira minn kwantità ferm akbar. Il-​kumpaniji tal-​ġarr tal-​merkanzija li jagħmlu l-​vjaġġi tagħhom mill-​Afrika sa Spanja għandhom dgħajjes li jiġru ħafna iktar mid-​dgħajjes taʼ l-​uffiċjali tad-​dwana tagħna. U jekk iħossuhom fil-​periklu li jinqabdu, huma sempliċement jarmu d-​drogi fil-​baħar, sabiex aħna ma jkollna l-​ebda evidenza fuqiex nakkużawhom.”

Il-pulizija jiffaċċjaw problemi simili fi nħawi oħra tad-​dinja. Vjaġġaturi li jidhru normali, ajruplani ħfief, vapuri tat-​tagħbija, u saħansitra sottomarini jittraffikaw id-​drogi b’kuntrabandu minn naħa għall-​oħra taʼ l-​oċeani jew minn fruntieri penetrabbli. Rapport mill-​Ġnus Magħquda kkalkula li “minn taʼ l-​inqas 75 fil-​mija tal-​konsenja internazzjonali tad-​drogi bil-​baħar trid tiġi mwaqqfa sabiex jitnaqqas sew il-​qligħ li jsir mill-​ittraffikar tad-​droga.” Bħalissa, ir-​rata li biha qed iwaqqfu l-​kokaina probabbilment m’hijiex iktar minn 30 fil-​mija—u hija ferm inqas għal drogi oħrajn.

Allura l-​gvernijiet għala ma jattakkawx is-​sors tal-​problema u jeqirdu l-​pjanti kollha tal-​kannabis, il-​peprin taʼ l-​oppju, u s-​siġar tal-​koka? Il-​Ġnus Magħquda dan l-​aħħar irrikkmandat li jittieħed dan il-​pass, imma dan m’huwiex pass faċli. Il-​kannabis tistaʼ titkabbar kważi f’kull ġnien. Waħda mill-​inħawi ewlenin taʼ l-​Andes fejn tikber il-​koka tinstab f’reġjun deskritt bħala li hu “barra l-​kontroll taʼ l-​istat.” Jeżistu sitwazzjonijiet simili fi nħawi remoti taʼ l-​Afganistan u l-​Burma, li huma sorsi prinċipali taʼ l-​oppju u l-​eroina.

Biex ikomplu jgħaxxquha, it-​traffikanti tad-​droga jistgħu jaqilbu malajr għal drogi ġodda, li d-​domanda għalihom qed tiżdied. U laboratorji klandestini jistgħu jipproduċu dawn id-​drogi sintetiċi kważi kullimkien fid-​dinja.

Jistaʼ jkun li jekk il-​pulizija jagħmlu xogħol iktar effettiv u s-​sentenzi tal-​ħabs ikunu iktar ibsin jonqos in-​negozju tad-​drogi? Hemm wisq traffikanti tad-​droga, wisq uħud li jiddependu minnha, u ftit wisq pulizija biex dan il-​metodu jaħdem. Per eżempju, l-​Istati Uniti, għandha kważi żewġ miljun ruħ fil-​ħabs—ħafna minnhom fuq offiżi taʼ droga. Imma t-​theddida tal-​ħabs ma waqqfitx lin-​nies milli jieħdu d-​drogi. F’ħafna pajjiżi li qed jiżviluppaw, fejn il-​bejgħ tad-​drogi qed jiżdied bil-​bosta, korpi tal-​pulizija bi ftit nies u li huma mħallsin ftit ma jistgħu jagħmlu xejn biex jiħduha kontra dan il-​kurrent.

Tistaʼ d-​Domanda għad-​Drogi Titnaqqas?

Jekk l-​isforzi biex tiġi kontrollata l-​provvista tad-​drogi huma għalxejn, xi ngħidu għal li titnaqqas id-​domanda? “Il-​ġlieda kontra d-​drogi hija tassew battalja għall-​qlub u l-​imħuħ, u m’hijiex biss kwistjoni tal-​pulizija u l-​qrati u l-​ħabsijiet,” tistqarr ir-​rivista Time.

Joe de la Rosa, li kkwotajnieh qabel, bl-​istess mod jemmen li l-​edukazzjoni hija l-​uniku mod biex niġġieldu lid-​drogi illegali. “Il-​vizzju tad-​drogi huwa problema soċjali li ħolqitha s-​soċjetà, allura rridu nibdlu s-​soċjetà jew għall-​inqas nibdlu l-​mod kif jaħsbu n-​nies,” jgħid hu. “Qed nipprovaw ninvolvu lill-​iskejjel, lill-​ġenituri, u lill-​għalliema sabiex kollha jkunu konxji li jeżisti periklu, li d-​drogi huma disponibbli, u li wliedhom jistgħu jsiru l-​vittmi tagħhom.”

Dak li Għamlu x-​Xhieda taʼ Jehovah

Ix-​Xhieda taʼ Jehovah ilhom bosta snin involuti b’mod attiv f’li jedukaw in-​nies biex jevitaw id-​drogi. Huma ppreparaw tagħrif imfassal biex jgħin lill-​ġenituri jgħallmu lil uliedhom dwar il-​perikli tad-​drogi.a Iktar minn hekk, il-​ministeru tagħhom għen lil ħafna li kienu jieħdu u jittraffikaw id-​drogi biex jirkupraw.

Ana, li ssemmiet fl-​artiklu taʼ qabel, iltaqgħet max-​Xhieda taʼ Jehovah għax oħtha kienet semgħet dwar is-​suċċess li kellhom f’li jgħinu lil dawk li jiddependu mid-​droga. Ana ma kinitx interessata wisq fil-​Bibbja, imma fuq qalbha marret għal assemblea tax-​Xhieda. Hemmhekk lemħet raġel li kien traffikant tad-​droga magħruf, imma li kien bidel għalkollox kemm id-​dehra tiegħu kif ukoll l-​istil taʼ ħajtu. “Irraġunajt li jekk hu setaʼ jinbidel, jien stajt ukoll,” tgħid Ana. “It-​trasformazzjoni tiegħu kkonvinċietni li għandi naċċetta l-​offerta taʼ studju tal-​Bibbja.

“ Maʼ l-​ewwel studju tal-​Bibbja stess, iddeċidejt li nibqaʼ d-​dar, peress li kont naf li jekk kont se nitlaq mid-​dar, kont se niltaqaʼ m’oħrajn li jieħdu d-​drogi u nerġaʼ lura għall-​vizzju. Kont diġà naf li d-​drogi kienu ħżiena u li dan il-​vizzju ma kienx jogħġbu lil Alla. Kont rajt ukoll l-​effett li d-​drogi għandhom fuq in-​nies u l-​ħsara li kont għamilt lill-​familja tiegħi stess. Imma kelli bżonn saħħa spiritwali biex ninħeles mill-​jasar tiegħi tad-​drogi. Il-​kura biex naqtaʼ l-​vizzju kienet diffiċli ħafna. Għal xi żmien kont norqod il-​ġurnata kollha sakemm l-​effett tad-​drogi batta. Imma kien vallapena.”

Tama u Sinjifikat Veri

Ir-​raġel taʼ Ana, Pedro, li wkoll issemmaʼ fl-​artiklu taʼ qabel, ħelisha b’mod simili. “Darba waħda waqt li kont qed inpejjep il-​ħaxixa fid-​dar taʼ ħija, ilmaħt ktieb b’titlu li qajjimli l-​kurżità,” jiftakar Pedro. “Kien jismu Il-​Verità li Twassal għall-​Ħajja Eterna. Ħadtu d-​dar, qrajtu, u ċċekkjajt l-​iskritturi. Kont ċert li kont sibt il-​verità.

“Billi kont naqra l-​Bibbja u nitkellem m’oħrajn dwar dak li kont qed nitgħallem bdejt inħossni aħjar u l-​kilba tiegħi għad-​drogi naqsitli. Iddeċidejt li ma nagħmilx is-​serqa armata minn pompa tal-​petrol li kont ippjanajt. Ħabib tiegħi kien qed jistudja l-​Bibbja max-​Xhieda taʼ Jehovah, u malajr għamilt bħalu. F’disaʼ xhur biddilt l-​istil taʼ ħajti u tgħammidt. Matul dan iż-​żmien, ħafna mill-​ħbieb li kelli qabel offrewli d-​drogi, imma mill-​ewwel kont nibda nkellimhom dwar il-​Bibbja. Xi wħud irreaġixxew b’mod favorevoli. Wieħed minnhom saħansitra għeleb il-​vizzju li kellu.

“Biex taqtaʼ l-​vizzju tad-​drogi, irid ikollok tama. Il-​Bibbja tatni dik it-​tama, lil ħajti tatha sinjifikat, u wrietni ċar il-​ħarsa t’Alla lejn id-​drogi u l-​vjolenza. Innotajt li bdejt inħossni aħjar hekk kif kont qed nitgħallem dwar il-​Wieħed li Jistaʼ Kollox—u ma kien hemm ebda effetti negattivi. Iktar ’il quddiem, is-​sħubija maʼ nies li jgħixu ħajja nadifa f’laqgħat tax-​Xhieda taʼ Jehovah għenitni biex inkompli f’din id-​direzzjoni.”

Minn Traffikant tad-​Droga għal Bennej

José, it-​traffikant tad-​droga li semmejna fl-​artiklu taʼ qabel, issa reġaʼ huwa bennej. Ma kienx faċli għalih li jitlaq in-​negozju li tant kien irendilu qligħ. “Id-​drogi jġagħluk taqlaʼ ħafna flus,” jammetti hu, “imma m’huwiex mod tajjeb kif tiggwadannjahom. Jien nara żgħażagħ żgħar b’pistoli u b’karozzi jlellxu. Il-​familji jinfirdu, fit-​toroq hemm ħafna kriminalità, u ħafna dipendenti mid-​drogi jisirqu mill-​karozzi, jisirqu mill-​ħwienet, jew jassaltaw lin-​nies biex jiksbu l-​flus għad-​drogi. Ħafna jibdew bil-​ħaxixa, jgħaddu għall-​ecstasy jew pilloli oħrajn, u mbagħad jipprovaw il-​kokaina jew anki l-​eroina. Jien nirrealizza li kont involut f’li nġiegħel lil ħaddieħor jaqbad dan iċ-​ċiklu.

“Hekk kif bdejt nistudja l-​Bibbja max-​Xhieda taʼ Jehovah, bdejt nikkonvinċi ruħi iktar u iktar li t-​tbagħbis tiegħi fid-​drogi kien ħażin. Ridt li jkolli kuxjenza nadifa, u marti, li wkoll kienet qed tistudja, xtaqet l-​istess. M’għandniex xi ngħidu, huwa diffiċli li tieqaf tittraffika d-​droga. Jien spjegajt lill-​klijenti tiegħi u lit-​traffikanti tiegħi, li kont qed nistudja l-​Bibbja u li kont abbandunajt in-​negozju tad-​drogi. Għall-​ewwel, lanqas emmnuni, u xi wħud għadhom ma jemmnunix. Però, waqaft kważi sentejn ilu, u ma ddispjaċinix tikka.

“Ili din l-​aħħar sena naħdem bħala bennej, li hija s-​sengħa tiegħi. Issa f’xahar naqlaʼ kwart taʼ dak li stajt naqlaʼ f’ġurnata waħda bħala traffikant tad-​droga. Imma dan huwa mod taʼ ħajja aħjar, u nħossni ferħan iktar.”

Soluzzjoni Globali li se Tirnexxi

Ftit traffikanti kuraġġużi abbandunaw in-​negozju tad-​drogi. U diversi forom taʼ riabilitazzjoni għenu lil eluf li kienu jieħdu d-​drogi biex jegħlbu l-​vizzju tagħhom. Imma, bħalma jammetti l-​World Drug Report, “għal min ilu jieħu ħafna drogi, l-​astinenza kontinwa hija l-​eċċezzjoni mhux il-​ħaġa normali.” Il-​ħaġa kerha hi li għal kull wieħed li jirkupra mill-​vizzju, diversi vittmi ġodda jinqabdu fin-​nassa. Il-​provvista u d-​domanda jkomplu jiżdiedu.

Jekk il-​ġlieda kontra d-​drogi għandha tintrebaħ, irid ikun hemm soluzzjoni globali għax il-​problema diġà hija waħda globali. F’dan ir-​rigward il-​Kummissjoni tal-​Ġnus Magħquda għad-​Drogi Narkotiċi tinnota: “Filwaqt li f’ħafna pajjiżi l-​abbuż tad-​droga, l-​ittraffikar tad-​droga u l-​kriminalità konnessa mal-​problema tad-​droga kienu meqjusin bħala theddida ewlenija għas-​sigurtà, il-​pubbliku ma kienx daqstant konxju tal-​fatt li d-​drogi illeċiti kienu problema globali li ma setgħetx tissolva iktar bi sforzi nazzjonali biss.”

Imma l-​gvernijiet tad-​dinja se jingħaqdu flimkien biex jeqirduh għalkollox dan il-​flaġell globali? Ir-​riżultati s’issa ma kienu inkuraġġanti xejn. Madankollu, il-​Bibbja tiġbed l-​attenzjoni lejn gvern tas-​sema li bħala soluzzjoni definittiva se jissupera l-​fruntieri nazzjonali. Il-​Bibbja tiżgurana li s-​Saltna t’Alla, maħkuma minn Ġesù Kristu, se tibqa għal “dejjem taʼ dejjem.” (Apokalissi 11:15) Għaldaqstant, taħt is-​Saltna t’Alla, l-​edukazzjoni divina se tagħmel ċert li d-​domanda għad-​drogi se tisparixxi. (Isaija 54:13) U l-​problemi soċjali u emozzjonali li bħalissa jkomplu jinkuraġġixxu lin-​nies biex jabbużaw mid-​drogi se jgħibu għal dejjem.—Salm 55:23 [55:​22, NW]; 72:12; Mikea 4:4.

Għandek Bżonn l-​Għajnuna?

Saħansitra issa, tama fis-​Saltna t’Alla f’idejn Kristu qed tqanqal lil xi nies biex jgħidu le għad-​drogi. Jekk tixtieq iktar tagħrif, jekk jogħġbok ikkuntattja lix-​Xhieda taʼ Jehovah fl-​inħawi tiegħek.

[Nota taʼ taħt]

[Stampa f’paġna 11]

Isir arrest relatat mad-​drogi

[Sors]

K.Sklute/SuperStock

[Stampa f’paġna 12]

Pedro u martu, Ana, jistudjaw il-​Bibbja maʼ wliedhom

[Stampa f’paġna 13]

Pedro jwaħħal apparat taʼ sigurtà