Il-​Ħarsa tal-​Bibbja

Ħarsa Bilanċjata Lejn Drawwiet Popolari

“M’HEMM L-​EBDA TIP TAʼ KONDOTTA LI MA ĠIETX F’XI ŻMIEN JEW POST KUNDANNATA, U LI F’XI ŻMIEN JEW POST IEĦOR ĠIET ORDNATA LI SSIR BĦALA DMIR.”

B’DIN l-​osservazzjoni, l-​istudjuż Irlandiż taʼ l-​istorja William Lecky jiġbor in-​natura xejn soda tal-​bniedem. Il-​kummenti tiegħu jistgħu japplikaw ukoll għad-​drawwiet u t-​tradizzjonijiet taʼ matul l-​istorja. Tabilħaqq, ħafna prattiċi li kienu jitħarsu bħala parti essenzjali mill-​ħajja taʼ kuljum ġew kundannati meta għadda ż-​żmien. Dan ma jissorprendiniex, għax bħalma l-​appostlu Kristjan Pawlu nnota, “is-​sura taʼ din id-​dinja [“qegħda tinbidel,” NW].”—1 Korintin 7:31.

Iva, is-​soċjetà umana hija fi stat taʼ tibdil li ma jaqtaʼ qatt. Dan huwa taʼ spiss rifless fil-​bidliet kbar li jsiru fl-​attitudnijiet u fid-​drawwiet soċjali. Il-​Kristjani m’għandhom ikunu l-​“ebda parti mid-​dinja”—jiġifieri, huma jibqgħu separati mis-​soċjetà umana li hija mbegħda minn Alla. Xorta waħda, il-​Bibbja tirrikonoxxi li l-​Kristjani huma “fid-​dinja,” u ma tikkmandahomx biex ikunu eremiti. Għaldaqstant, huwa neċessarju li jkollna ħarsa bilanċjata lejn id-​drawwiet.​—Ġwann 17:​11, 14-​16, NW; 2 Korintin 6:​14-​17; Efesin 4:​17-​19; 2 Pietru 2:​20.

Id-​Drawwiet x’Inhuma?

Id-​drawwiet huma prattiċi li japplikaw għall-​ħajja soċjali u huma komuni għal xi post jew klassi partikulari taʼ nies. Għandu mnejn li xi drawwiet, bħall-​manjieri taʼ waqt ħin l-​ikel, kif ukoll l-​etikett, kellhom isiru minħabba l-​bżonn li tiġi regolata l-​imġiba tan-​nies meta jkunu f’attivitajiet bħala grupp. Dan għen biex dawn ikunu jistgħu jassoċjaw bejniethom b’mod ċivili u rispettabbli. F’każi bħal dawn, il-​manjieri soċjali jistgħu jitqiesu bħallikieku kienu żejt, peress li huma jillubrikaw ir-​roti tar-​relazzjonijiet umani.

Id-drawwiet ġew influwenzati profondament mir-​reliġjon. Fil-​fatt, ħafna minnhom ġew minn superstizzjonijiet antiki u ideat reliġjużi mhux Bibliċi. Per eżempju, l-​għoti taʼ fjuri meta jiġi nieqes xi ħadd jistaʼ jkun li oriġina minn superstizzjoni reliġjuża.a Flimkien maʼ dan, il-​kulur blu—taʼ spiss assoċjat maʼ trabi subien—kien maħsub li jbeżżaʼ lix-​xjaten. Il-​maskara kienet isservi bħala protezzjoni kontra min jgħajjen, waqt li l-​lipstik kien jintuża biex jiskuraġġixxi lix-​xjaten milli jidħlu f’ħalq in-​nisa u jippussessawhom. Saħansitra drawwa insinjifikanti bħal li tgħatti ħalqek meta tittewweb jistaʼ jkun li ħarġet mill-​idea li r-​ruħ taʼ dak li jkun tistaʼ taħrab minn ħalq miftuħ beraħ. Mas-​snin, madankollu, il-​konnessjonijiet reliġjużi spiċċaw fix-​xejn, u llum dawn il-​prattiċi u d-​drawwiet m’għandhom l-​ebda sinjifikat reliġjuż.

Dak li Jikkonċerna lill-​Kristjani

Meta Kristjan ikollu jiddeċiedi jekk jiħux sehem f’xi drawwa partikulari jew le, għandu jikkonċerna ruħu primarjament minn dan, X’inhi l-​ħarsa t’Alla kif murija fil-​Bibbja? Fil-​passat Alla kkundanna ċerti prattiċi li forsi kienu tollerati f’xi komunitajiet. Dawn inkludew s-​sagrifiċċji tat-​tfal, l-​użu ħażin tad-​demm, u diversi prattiċi sesswali. (Levitiku 17:​13, 14; 18:​1-​30; Dewteronomju 18:10) Bl-​istess mod, ċerti drawwiet li huma komuni llum, b’mod ċar, m’humiex fi qbil mal-​prinċipji tal-​Bibbja. Fost dawn hemm tradizzjonijiet mhux Bibliċi konnessi maʼ btajjel reliġjużi bħall-​Milied u l-​Għid jew maʼ prattiċi superstizzjużi li għandhom x’jaqsmu maʼ l-​ispiritiżmu.

Imma xi ngħidu dwar drawwiet li xi darba kienu konnessi maʼ prattiċi dubjużi imma li llum jitqiesu primarjament bħala etikett soċjali? Per eżempju, ħafna drawwiet popolari li jsiru fit-​tiġijiet—inkluż il-​fatt li jingħataw iċ-​ċrieket u li jittiekel il-​kejk—jistaʼ jkollhom oriġini pagana. Ifisser dan li l-​Kristjani huma projbiti li josservaw drawwiet bħal dawn? Għandhom il-​Kristjani jeżaminaw l-​irqaqat kollha taʼ kull drawwa tal-​komunità biex jaraw jekk f’xi post jew f’xi żmien kellhiex xi konnessjoni negattiva?

Pawlu jiġbed l-​attenzjoni li “fejn hemm l-​Ispirtu tal-​Mulej hemm il-​ħelsien.” (2 Korintin 3:17; Ġakbu 1:25) Alla jridna nużaw dan il-​ħelsien, mhux biex iwassalna għal xenqiet egoistiċi, imma biex iħarrġilna s-​sensi li jgħinuna nagħżlu t-​tajjeb mill-​ħażin. (Galatin 5:​13; Lhud 5:​14; 1 Pietru 2:​16) B’hekk, fi kwistjoni fejn ma jkunx hemm ksur ċar tal-​prinċipji tal-​Bibbja, ix-​Xhieda taʼ Jehovah ma joħolqux xi regola fissa. Minflok, kull Kristjan għandu jiżen iċ-​ċirkustanzi li jkun fihom u jagħmel deċiżjoni persunali.

Fittex l-​Interessi taʼ Ħaddieħor

Ifisser dan li huwa dejjem tajjeb li tipparteċipa f’xi drawwa partikulari sakemm ma tiksirx direttament it-​tagħlim tal-​Bibbja? Le. (Galatin 5:​13) Pawlu indika li Kristjan m’għandux ifittex biss l-​interessi tiegħu “imma tal-​ħafna.” Għandu jagħmel “kollox għall-​glorja taʼ Alla” u ma jkunx taʼ tfixkil għal ħaddieħor. (1 Korintin 10:​31-33) Mela individwu li jkun qed ifittex l-​approvazzjoni t’Alla jkun irid jistaqsi lilu nnifsu: ‘Ħaddieħor kif iħares lejn din id-​drawwa? Il-​komunità torbot affarijiet oġġezzjonabbli magħha? Il-​parteċipazzjoni tiegħi se timplika li jien naqbel mal-​prattiċi jew l-​ideat li ma jogħġbux lil Alla?’—1 Korintin 9:​19, 23; 10:​23, 24.

Għalkemm ġeneralment ma jkun fihom xejn ħażin, xi drawwiet jistgħu jiġu prattikati lokalment b’modi li huma kuntrarju għall-​prinċipji tal-​Bibbja. Per eżempju, f’xi okkażjonijiet speċifiċi l-​għoti taʼ fjuri jistaʼ jieħu tifsira speċjali li ma taqbilx mat-​tagħlim tal-​Bibbja. Mela, Kristjan fuq xiex għandu jkun primarjament konċernat? Għalkemm jistaʼ jkun hemm raġuni biex neżaminaw l-​oriġini taʼ ċertu drawwa, f’xi każi huwa iktar importanti li nikkunsidraw kif iqisuha n-​nies taʼ dak iż-​żmien partikulari u f’dak il-​pajjiż li wieħed qed jgħix fih issa. Jekk id-​drawwa għandha konnessjonijiet mhux skritturali jew inkella negattivi waqt perijodu partikulari tas-​sena jew taħt ċertu ċirkustanzi, il-​Kristjani jistgħu b’mod għaqli jiddeċiedu li jaħarbu minnha f’dak iż-​żmien partikulari.

Pawlu talab biex il-​Kristjani jkomplu jħallu l-​imħabba tagħhom tikber b’għarfien eżatt u b’dixxerniment profond. Billi jżommu ħarsa bilanċjata lejn id-​drawwiet popolari, il-​Kristjani jkunu ‘jistgħu jagħrfu jagħżlu l-​aħjar, u mbagħad ikunu safja u bla ebda ħtija.’ (Filippin 1:​9, 10) Fl-​istess ħin, ‘[“ir-​raġunevolezza,” NW] tagħhom, se jkunu jafuha l-​bnedmin kollha.’—Filippin 4:5.

[Nota taʼ taħt]

[Stampi f’paġna 26]

Xi drawwiet tal-​qedem, bħal li tgħatti ħalqek meta tittewweb u l-​għoti taʼ fjuri meta jiġi nieqes xi ħadd, tilfu s-​sinjifikat oriġinali tagħhom