Kif Ipprovajt Nieħu Deċiżjonijiet Għaqlin

KIF RAKKONTAT MINN GUSTAVO SISSON

Taʼ 12-il sena, kont involut ħafna fl-​għawm imma ddeċidejt li nsir tabib. Però, f’dan l-​istess perijodu bdejt nistudja l-​Bibbja, u għalhekk ridt insir ministru. Fejn spiċċaw l-​ambizzjonijiet u l-​interessi kollha li kelli? Kienu jmorru flimkien?

FL-​1961, Olive Springate, missjunarja tax-​Xhieda taʼ Jehovah fil-​Brażil, bdiet tistudja l-​Bibbja miegħi u m’ommi. Missieri, tabib rispettat f’Pôrto Alegre, kien jopponi ħafna u allura waqafna nistudjaw. Xorta waħda, Olive baqgħet tikkuntattjana, u maż-​żmien bdejt ninduna kemm dak li kont tgħallimt kien veru. Imma sadanittant, l-​għawm tant kien sar parti minn ħajti li aljenani minn kwistjonijiet spiritwali.

Meta kelli 19-il sena, iltqajt maʼ tfajla ħelwa jisimha Vera Lúcia fil-​klabb fejn kont immur ngħum, u bdejna noħorġu flimkien. Ommi kellmitha dwar dak li konna nemmnu, u hi interessat ruħha. Allura kkuntattjajt lil Olive, u din bditilna studju tal-​Bibbja, avolja missier Vera Lúcia kien jopponi.

Vera Lúcia kompliet tistudja, u għamlet progress kbir fl-​għarfien tal-​Bibbja. Saħansitra bdiet tistudja l-​Bibbja maʼ xi ħaddiema fil-​klabb taʼ l-​għawm fejn konna mmorru. Min-​naħa tiegħi, moħħi kien biex nittrennja għall-​kompetizzjonijiet nazzjonali taʼ l-​għawm li kienu fil-​qrib.

Konna ilna sena nistudjaw u nattendu l-​laqgħat Kristjani, meta missier Vera Lúcia beda jxomm xi ħaġa. Darba waħda meta wasalna lura mil-​laqgħa, kien qed jistenniena u ried ikun jaf fejn konna morna. Jien weġibtu li morna għal laqgħa Kristjana u li għalkemm ir-​reliġjon forsi ma kinitx importanti għalih, għalina kienet kwistjoni taʼ ħajja jew mewt. Hu ħa nifs qawwi u qalilna: “Ħeqq, jekk hija kwistjoni taʼ ħajja jew mewt, ikolli naċċettaha din il-​ħaġa.” Minn dakinhar ’l hemm, l-​attitudni tiegħu nbidlet u għalkemm qatt ma sar Xhud taʼ Jehovah, sar ħabib kbir speċjalment meta konna fil-​bżonn.

Id-​Deċiżjonijiet li Kelli Nieħu

Kont iddeċidejt li wara l-​kampjunati nazzjonali kont se nieqaf nikkompeti fl-​għawm. Imma rbaħt darbtejn u waqqaft rekord Brażiljan għall-​400 metru u għall-​1,500 metru fl-​istil liberu, u għalhekk stidnuni nieħu sehem fil-​Logħob Pan Amerikan taʼ l-​1970 f’Cali, il-​Kolombja. Għalkemm Vera Lúcia ma riditnix immur, jien bdejt nittrennja għal-​logħob.

Billi mort tajjeb f’Cali, ġejt mistoqsi jekk kontx lest li nittrennja għall-​Olimpijadi. Bdejt naħseb dwar il-​fatt li kont għadni ma spiċċajtx l-​istudju tiegħi fil-​mediċina u dwar il-​veritajiet sbieħ li kont tgħallimt dwar l-​iskopijiet taʼ Jehovah. Għalhekk qtajtha li ma nkomplix fil-​karriera tiegħi taʼ l-​għawm. Minn dakinhar ’il quddiem, bdejt nagħmel progress spiritwali mgħaġġel. Fl-​1972, is-​sena meta saru l-​Olimpijadi f’Munich, il-​Ġermanja, Vera Lúcia u jien issimbolizzajna d-​dedikazzjoni tagħna lil Jehovah billi tgħammidna fl-​ilma. Dan inkuraġġixxa lil ommi biex terġaʼ taqbad tistudja l-​Bibbja, u maż-​żmien tgħammdet hi wkoll.

Wara li tgħammdet ommi, missieri beda jopponi iktar. Fl-​aħħar il-​familja tagħna nfirdet, u peress li kont għadni l-​università, kellna ngħaddu bin-​naqra taʼ pensjoni li kellha ommi u minn dak li qlajna meta begħna d-​dar. Minħabba f’hekk, jien u Vera kellna mmexxu d-​data tat-​tieġ u niżżewġu iktar tard. Fil-​fatt, it-​tagħlim li tani missieri għenni biex nieħu d-​deċiżjonijiet li ħadt. Taʼ spiss kien jgħidli: “Tibżax tkun differenti” u, “Il-​maġġuranza mhux dejjem ikollha raġun.” Waħda mill-​frażijiet li kien iħobb jgħid l-​iktar kienet, “Il-​valur taʼ raġel jitkejjel skond dak li jagħti lil ħaddieħor.”

Bħala wieħed mix-​Xhieda taʼ Jehovah, fil-​fatt stajt napplika l-​pariri eċċellenti li tani missieri. Kont maġenbu meta miet fl-​1986. Konna lħaqna rġajna għamilna ħbieb u konna nirrispettaw lil xulxin. Naħseb li kien kburi bija peress li kont sirt tabib bħalu.

Sadanittant, fl-​1974 iggradwajt mill-​iskola tal-​mediċina. Iddeċidejt li nkun tabib tad-​dar, imma wara li komplejt naħsibha sew, wasalt għall-​konklużjoni li jekk insir kirurgu stajt inkun iżjed t’għajnuna għal ħuti l-​Kristjani. (Atti 15:​28, 29) Għalhekk aċċettajt l-​isfida u qattajt it-​tliet snin taʼ wara nieħu t-​taħriġ biex insir kirurgu.

Battalja Legali Diffiċli

Kont involut f’każ ikrah taʼ waħda Xhud, tfajla taʼ 15-il sena li kienet qed titlef id-​demm minn ġewwa. Kienet bajda karti u kellha l-​pressjoni tad-​demm baxxa, imma kienet f’sensiha u soda għall-​aħħar fid-​deċiżjoni tagħha li ma tiħux demm. Wara li għollejtilha l-​volum tad-​demm tagħha, għamiltilha endeskopija biex niċċekkjalha l-​intern. Imbagħad, dik il-​parti fejn kienet ġiet effettwata ħsilthielha b’taħlita kiesħa taʼ likwidu mielaħ biex ma tkomplix titlef demm. Għall-​ewwel qalbet għall-​aħjar. Imma f’daqqa waħda, wara 36 siegħa u waqt li kienet għadha fil-​kura intensiva, reġgħet bdiet titlef id-​demm. It-​tabib li kien xogħol dak il-​ħin għamel dak kollu li kien possibbli, imma ma setax jikkontrolla t-​telf taʼ demm u jżomm il-​volum tad-​demm milli jonqos, u t-​tfajla mietet.

Meta ġara dan il-​każ, ġejt sospiż mix-​xogħol mill-​kumitat taʼ l-​etika tat-​tobba. Dan irrefera l-​każ tiegħi lill-​kunsill reġjonali tal-​mediċina. Ġejt mixli li ksirt tliet artikli mill-​kodiċi taʼ l-​etika medika. Minħabba f’hekk stajt nitlef il-​liċenzja tiegħi taʼ tabib kif ukoll il-​mezz taʼ l-​għajxien tiegħi.

Kumitat wieħed tani 30 ġurnata li matulhom kelli nippreżenta d-​difiża tiegħi bil-​miktub. L-​avukati tiegħi ppreparaw argumenti legali u kostituzzjonali, u jien ippreparajt difiża teknika bl-​għajnuna tal-​Kumitat lokali taʼ Koordinazzjoni maʼ l-​Isptarijiet (Hospital Liaison Committee [HLC]). Dan huwa grupp taʼ Xhieda taʼ Jehovah li jipprova jtejjeb dejjem iktar il-​kooperazzjoni bejn l-​isptar u l-​pazjent. Fis-​seduta, il-​kumitat inkarigat li jiġbor id-​dikjarazzjonijiet minn dawk kollha involuti staqsa xi mistoqsijiet. L-​iktar li staqsa kien dwar il-​pożizzjoni tiegħi bħala tabib kif ukoll bħala Xhud taʼ Jehovah. Madankollu, id-​difiża tiegħi kienet ibbażata l-​iktar fuq argumenti mediċi u xjentifiċi u fuq rapporti minn kirurgi rispettati.

L-evidenza li ġiet preżentata kkonfermat li l-​pazjenta ma riditx taċċetta trasfużjoni tad-​demm u li jien m’għamilt xejn li setaʼ jġagħalha tieħu din id-​deċiżjoni. Fis-​seduta ġie stabbilit ukoll li mill-​erbaʼ tobba li kkonsultat il-​pazjenta, jien kont l-​uniku wieħed li bdejt nagħtiha xi tip taʼ kura li kienet taqbel max-​xewqat tagħha u mal-​qagħda medika li kellha.

Imbagħad il-​każ tiegħi deher quddiem kumitat li kien se jivvota f’seduta fejn kienu preżenti dawk kollha involuti. Għamilt difiża permezz taʼ taħdita t’għaxar minuti u erġajt enfasizzajt biss l-​aspetti mediċi, bħalma kont għamilt fid-​difiża bil-​miktub. Wara li semgħuni, żewġ membri tal-​kumitat semmew li għalkemm ma kontx użajt trasfużjonijiet, il-​kura li kont ordnajt lill-​pazjenta kienet ibbażata b’mod sod fuq ix-​xjenza. Tabib ieħor enfasizza li l-​kura bla demm hija effettiva u li biha jmutu inqas nies. L-​aħħar membru tal-​kumitat qal li ma kienx qed jiġi diskuss jekk it-​trasfużjonijiet tad-​demm kinux mediċina tajba jew le. Minflok, il-​kwistjoni kienet jekk tabib għandux jisforza lill-​pazjent tiegħu biex jieħu kura li ma jkunx irid. Hu ma qabilx li tabib għandu dan id-​dritt. B’hekk, il-​membri tal-​kumitat, b’maġġuranza taʼ tnax kontra tnejn, ivvotaw favur li titneħħa kull akkuża kontrija, u b’hekk ġejt meħlus minn kull akkuża.

Niddefendi d-​Drittijiet taʼ Pazjent

Xi awtoritajiet mediċi kemm-il darba kisbu ordnijiet mill-​qorti biex jisforzaw lill-​pazjenti li jkunu Xhieda taʼ Jehovah biex jaċċettaw it-​trasfużjonijiet tad-​demm. Xi drabi jien ippreżentajt evidenza f’seduti fil-​qorti li permezz tagħha dawn l-​ordnijiet ma ħarġux. Każ minnhom kien jinvolvi lil Xhud li kellu xi vini minfuħin fil-​kanal li jagħti mill-​ħalq għall-​istonku tiegħu, problema li biha kien jitlef ħafna demm mill-​istonku. Meta daħal l-​isptar, diġà kellu anemija—il-​livell t’emoglobina tiegħu kien 4.7 grammi għal kull deċilitru.a Għall-​ewwel, ma saritlu l-​ebda pressjoni biex jaċċetta d-​demm, u rċieva biss kura li ttaffilu l-​uġigħ.

Imbagħad, wara li kien ilu ġimgħa l-​isptar, il-​pazjent baqaʼ mistagħġeb meta uffiċjal tal-​qorti mar iżuru b’ordni biex jingħata trasfużjoni tad-​demm. Sadanittant il-​livell t’emoglobina kien laħaq telagħlu għal 6.4 grammi kull deċilitru, u kien stabbli klinikament. Milli jidher l-​imħallef ibbaża d-​deċiżjoni tiegħu fuq l-​ewwel livell t’emoglobina mhux fuq it-​tieni wieħed, li kien iktar għoli.

L-HLC offrew l-​għajnuna tagħhom. Il-​pazjent talabni neżaminah. Hekk għamilt, u wara rnexxieli nsiblu post fi sptar fejn setaʼ jingħata kura bla demm. Fl-​istess ħin, l-​avukati tiegħu sfidaw l-​ordni li ħarġet il-​qorti biex il-​pazjent jingħata trasfużjoni tad-​demm.

Sejħuli għal seduta quddiem l-​imħallef, li staqsietni dwar il-​qagħda tal-​pazjent. Matul is-​seduta, hi tatni l-​permess li nkompli nagħti l-​kura lill-​pazjent sakemm kien qed jiġi diskuss jekk l-​ordni mill-​qorti kinitx tajba jew le. Sat-​tieni seduta, il-​pazjent laħaq tjieb u kien intbagħat lura d-​dar. Meta ġejt imsejjaħ biex nerġaʼ nixhed, l-​avukat taʼ l-​isptar sfidani biex nuri jekk il-​kura li kont issuġġerejt kellhiex bażi xjentifika jew le. Ried l-​art tibilgħu meta wrejt artiklu li kien deher f’rivista medika pubblikata mill-​istess sptar li kien qed jirrappreżenta hu, u l-​artiklu kien qed jirrikkmanda din il-​kura!

Il-qorti ħadet id-​deċiżjoni, u aħna tgħidx kemm fraħna meta smajna li ħriġna rebbiħin bid-​deċiżjoni tagħna li nużaw kura medika oħra flok trasfużjoni tad-​demm. L-​isptar ġie ordnat li jħallas l-​ispejjeż kollha, inkluż l-​ispejjeż legali. Għalkemm l-​isptar appella, dan reġaʼ tilef.

Nieħdu Ħsieb il-​Familja Tagħna

Minn mindu sirt Xhud, kelli l-​appoġġ taʼ Vera Lúcia bħala sieħba devota u mara kapaċi, kif ukoll bħala omm eżemplari għal uliedna. Kif irnexxielha tkampa maʼ l-​isfidi kollha, tieħu ħsieb id-​dar u tgħin fit-​trobbija tat-​tfal, li issa huma żgħażagħ fuq tagħhom? Dan kien possibbli minħabba l-​imħabba kbira tagħha għal Jehovah u għall-​ministeru Kristjan.

Bħala ġenituri, aħna għallimna lil uliedna d-​duttrini u l-​prinċipji tal-​Bibbja minn mindu kienu żgħar ħafna. Minkejja li għandna ħajja mgħaġġla, aħna nagħmlu li nistgħu biex naqdu fil-​ministeru full-time għal ftit xhur kull sena. U nagħmlu l-​aħjar tagħna biex inżommu skeda li biha naqraw il-​Bibbja regolarment, niddiskutu vers mill-​Bibbja kuljum, u naqsmu t-​twemmin tagħna m’oħrajn fil-​ministeru Kristjan. Dan l-​aħħar, il-​familja tagħna taʼ spiss kienet qed tikkonduċi sa 12-il studju tal-​Bibbja kull ġimgħa maʼ nies li m’humiex Xhieda.

Jien u Vera Lúcia nipprovaw ukoll ninvolvu lis-​subien tagħna fl-​attivitajiet li jkollna waqt li fl-​istess ħin nirrispettaw il-​gosti persunali tagħhom. Aħna nemmnu li hemm tliet affarijiet bażiċi li l-​ġenituri għandhom bżonn biex jieħdu ħsieb sew tal-​familja. L-​ewwel, jinħtieġ tagħlim tajjeb, ibbażat fuq il-​Kelma t’Alla, il-​Bibbja. It-​tieni, iridu jagħtu eżempju tajjeb, biex b’hekk it-​tfal ikunu jistgħu jaraw biċ-​ċar li l-​ġenituri għandhom biżaʼ bnin minn Alla. U t-​tielet, hemm bżonn taʼ sħubija tajba maʼ Kristjani taʼ kull età u qagħda soċjali, li jistgħu jaqsmu mal-​membri tal-​familja varjetà taʼ għotjiet u abbiltajiet. Bħala koppja, aħna għamilnieha mira li nipprovdu lill-​familja tagħna dawn l-​affarijiet.

Meta nħarsu lura lejn kważi 30 sena taʼ servizz lil Jehovah, jien u marti nistgħu ngħidu bla dubju li hu tana l-​aqwa affarijiet fil-​ħajja u pprovdielna ħafna barkiet u affarijiet xi ngawdu. Għalkemm ma mortx għall-​Olimpijadi, xorta għadni nieħu gost ngħum għawma taʼ diversi kilometri kull ġimgħa. Veru, ħajti hija mimlija daqs bajda minħabba li jien tabib kif ukoll wieħed mix-​Xhieda taʼ Jehovah. Imma sibtha ħaġa verament premjanti li ngħin lil ħuti Kristjani biex jibqgħu fis-​servizz tagħhom lejn Alla meta jiffaċċjaw xi prova.

Taʼ spiss ikun hemm min jistaqsini jekk noqgħodx ninkwieta li se nitlef ix-​xogħol meta tiġi s-​sistema l-​ġdida t’Alla u ma jkunx hemm iktar mard. It-​tweġiba tiegħi hija li jien se nkun l-​ewwel wieħed li ntir bil-​ferħ meta “z-​zopp jaqbeż bħal għażżiela u lsien l-​imbikkma jinħall bil-​ferħ,” u meta “ħadd minn min jgħammar hemm ma jgħid: ‘Jien marid.’”—Isaija 33:24; 35:6.

[Nota taʼ taħt]

[Stampa f’paġna 15]

Waqt operazzjoni fuq pazjent

[Stampa f’paġna 15]

Maʼ Vera Lúcia, u l-​istudju tagħna tal-​familja