Kif Jiġu Segwiti l-Prinċipji Tajbin
RIEDA tajba, fratellanza, u paċi fid-dinja kollha—min ma jfaħħarhomx prinċipji nobbli bħal dawn? Il-Baruni Pierre de Coubertin, dak li reġaʼ ta l-ħajja lill-Olimpijadi, kien jemmen li dan il-logħob kien se jegħleb il-mibegħda bejn il-ġnus. Dan kien se jseħħ billi jqanqal rispett kbir lejn min jikkompeti minkejja r-razza u r-reliġjon tiegħu, sew jekk ikun raġel u sew jekk mara. Il-Baruni Pierre de Coubertin kien iħoss li “dinja aħjar setgħu jġibuha biss individwi aħjar.” Imma jistaʼ l-isport tassew iġib il-paċi fid-dinja? Jekk inqisu dak li ġara s’issa, ikollna ngħidu le.
Filwaqt li l-isport għandu loku, l-edukazzjoni mill-Bibbja hija l-fattur li jġib il-paċi vera. Tabilħaqq, il-prinċipji Bibliċi jistgħu jipproduċu “individwi aħjar,” bħalma qal Coubertin. Ikkunsidra ftit skritturi li jekk in-nies japplikawhom jistaʼ jkollhom il-paċi, tkun xi tkun in-nazzjonalità tagħhom.
“Minn dan jagħraf kulħadd li intom dixxipli tiegħi, jiġifieri, jekk ikollkom l-imħabba bejnietkom.”—Ġwann 13:35.
“Jekk jistaʼ jkun, sakemm ikun ġej minnkom, għixu fil-paċi maʼ kulħadd.”—Rumani 12:18.
“Dment li għandna ż-żmien ħa nagħmlu l-ġid maʼ kulħadd.”—Galatin 6:10.
“Tagħmlu xejn b’pika taʼ partit, anqas għall-ftaħir fieragħ; imma kunu umli u kull wieħed minnkom iqis lill-ieħor aħjar minnu.”—Filippin 2:3.
“It-taħriġ tal-ġisem ftit jiswa, waqt li t-tjieba tiswa għal kollox billi fiha għandha l-wegħda tal-ħajja taʼ issa u taʼ dik li għad trid tiġi.”—1 Timotju 4:8.
Il-prinċipji tajbin li jinsabu f’dawn l-iskritturi veru huma effettivi? Ikkunsidra x’ġara f’Munich, il-Ġermanja. Fl-1974, sentejn biss wara, il-Logħob Olimpiku li sar f’dik il-belt tħarbat minħabba t-terroriżmu u l-qtil. Ix-Xhieda taʼ Jehovah kellhom konvenzjoni internazzjonali fl-Istejdjum Olimpiku. Fost dawk li attendew kien hemm gruppi mill-Greċja u mit-Turkija—pajjiżi li kienu qed jiġġieldu kontra xulxin. Fil-fatt, matul dak is-sajf stess, it-truppi Griegi u Torok kienu fl-inkwiet bejniethom minħabba l-gżira taʼ Ċipru. Kien dan se jeffettwa lill-Kristjani li kienu qed jattendu din il-konvenzjoni? Le! Kemm kien iqanqallek qalbek li tara l-Griegi u t-Torok jitgħannqu u jsejħu lil xulxin ħija u oħti!
Ix-Xhieda taʼ Jehovah huma magħrufin mad-dinja kollha bħala wħud li jgawdu relazzjonijiet paċifiċi bejniethom illi m’humiex imfixklin min-nazzjonalità, mill-grupp etniku, jew mit-tribù taʼ dak li jkun. M’għandniex xi ngħidu, ma jippretendux li diġà għandhom unità u kooperazzjoni perfetta mad-dinja kollha. Bħal kulħadd, huma jridu jaħdmu iebes biex isegwu l-parir taʼ l-appostlu Kristjan Pawlu sabiex ‘jinżgħu l-bniedem il-qadim bl-għemil kollu tiegħu, u jilbsu l-bniedem il-ġdid.’ (Kolossin 3:9, 10) Madankollu, huma jemmnu ħafna li jekk in-nies isegwu l-prinċipji tal-Bibbja jistgħu ‘jfittxu s-sliem u jqisu li jiksbuh.’—1 Pietru 3:11.
B’dispjaċir ngħidu li l-Olimpijadi—minkejja l-prinċipji sbieħ li kellhom fil-bidu—kixfu kwalitajiet ħżiena f’ħafna nies. F’kuntrast maʼ dan, il-Kelma qawwija t’Alla ġġiegħel lin-nies jiżviluppaw l-isbaħ kwalitajiet, u ġġib ’il quddiem rieda tajba u paċi internazzjonali.
[Stampi f’paġna 8]
L-Olimpijadi jġibu ’l quddiem il-kompetizzjoni
[Sors]
Aus dem Fundus der MÜNCHNER OLYMPIAPARK GMBH, München
[Stampi f’paġna 9]
Il-Bibbja ġġib ’il quddiem il-paċi