Il-​Ħarsa tal-​Bibbja

Għandu ż-​Żwieġ Ikun Għaqda Dejjiema?

HEMM għalfejn nistaqsuha din il-​mistoqsija? Wara kollox, fil-​wegħda li ssir fi żwiġijiet tal-​Punent ma jintqalx, “fit-​tajjeb u fil-​ħażin” u “sakemm il-​mewt tifridna”? Iva, ġeneralment il-​wegħda taż-​żwieġ tgħid li l-​għarus u l-​għarusa se jidħlu f’rabta dejjiema. Imma ħafna wħud m’għadhomx iqisu lilhom infushom marbutin b’din il-​wegħda solenni. Hija ħaġa tal-​biżaʼ kemm hemm koppji miżżewġin li qed jinfirdu—min wara ftit xhur, u min wara snin twal taʼ żwieġ. Ir-​rispett lejn l-​arranġament taż-​żwieġ għala qiegħed jonqos? Il-​Bibbja tagħti t-​tweġiba.

Jekk jogħġbok eżamina t-​2 Timotju 3:​1-3, u qabbel dan maʼ dak li tara madwarek fid-​dinja llum. F’parti minnhom, dawk il-​versi jgħidu: “L-​aħħar tad-​dinja jkun żmien iebes. Il-​bnedmin jingħataw għall-​imħabba tagħhom infushom u tal-​flus; . . . bla gratitudni, bla tjieba [“m’humiex leali,” NW], bla qalb, bla ħniena [“m’huma lesti għal ebda ftehim,” NW], . . . bla rażan.” Ħaġa taʼ l-​iskantament kemm hija eżatta din il-​profezija. Dawn l-​attitudnijiet ħassru u dgħajfu r-​relazzjonijiet taż-​żwieġ madwar id-​dinja kollha, u xiehda taʼ dan huma r-​rati għolja taʼ divorzju.

Huwa ċar li ħafna nies m’għadx baqgħalhom rispett lejn iż-​żwieġ. Meta nqisu dan, għandna mnejn nistaqsu: “Għandu ż-​żwieġ jittieħed daqshekk bis-​serjetà? Teżisti l-​qdusija taż-​żwieġ? Il-​Kristjani kif għandhom iqisuh iż-​żwieġ? Illum il-​Bibbja x’għajnuna toffrilhom lill-​koppji miżżewġin?

Il-​Ħarsa t’Alla Nbidlet?

Fil-​bidu, Alla ma tkellimx dwar l-​għaqda taż-​żwieġ bħala xi ħaġa temporanja. Ir-​rakkont taʼ meta għaqqad lill-​ewwel raġel u mara fiż-​żwieġ insibuh f’Ġenesi 2:​21-24, u hemmhekk ma tissemma l-​ebda għażla taʼ divorzju jew separazzjoni. Minflok, vers 24 jgħid: “Ir-​raġel iħalli lil missieru u lil ommu u jingħaqad maʼ martu u jsiru ġisem wieħed.” Xi tfisser din l-​iskrittura?

Ikkunsidra l-​ġisem tal-​bniedem, il-​mod kif il-​partijiet differenti tiegħu huma minsuġin flimkien mingħajr ma jidher xejn u l-​mod kif kull għadma hija magħquda m’oħra permezz taʼ l-​għekiesi b’saħħithom li ma jħokkux waħda maʼ l-​oħra. X’unità! X’sodizza! Imma x’agunija jkun hemm meta dan il-​ġisem li m’hawnx bħalu jġarrab ġrieħi gravi! Għaldaqstant, f’Ġenesi 2:​24, il-​frażi “ġisem wieħed” tenfasizza l-​intimità u l-​permanenza tar-​rabta taż-​żwieġ. Twissi b’mod ċar ukoll li jistaʼ jkun hemm uġigħ kbir jekk din ir-​rabta tinħall.

Għalkemm matul il-​millennji li għaddew in-​nies biddlu u reġgħu biddlu l-​ħarsa tagħhom dwar din il-​ħaġa, Alla xorta għadu jqis iż-​żwieġ bħala rabta dejjiema. Madwar 2,400 sena ilu, xi rġiel Lhud ħaduha drawwa li jabbandunaw lill-​ewwel mara tagħhom u jiżżewġu nisa iżgħar fl-​età. Alla kkundannah dan l-​aġir, u ddikjara hekk permezz tal-​profeta tiegħu Malakija: “Ħarsu rwieħkom, mela, u qisu li ħadd ma jqarraq bil-​mara taʼ żgħożitu. ‘Għax jiena d-​divorzju nobogħdu,’ jgħid il-​Mulej, Alla taʼ Iżrael.”—Malakija 2:​15, 16.

Iktar minn erbaʼ sekli wara, Ġesù reġaʼ saħħaħ il-​ħarsa oriġinali t’Alla dwar iż-​żwieġ meta kkwota Ġenesi 2:24 u mbagħad ta d-​direzzjoni: “Dak li għaqqad Alla ma għandux jifirdu l-​bniedem.” (Mattew 19:​5, 6) Snin wara l-​appostlu Pawlu għallem li “mara ma għandhiex tħalli lil żewġha” u li “raġel ma għandux jitlaq lil martu.” (1 Korintin 7:​10, 11) Dawn l-​iskritturi juru bl-​eżatt x’inhi l-​ħarsa t’Alla dwar iż-​żwieġ.

Allura hemm każi meta l-​Bibbja tippermetti li ż-​żwieġ jinħall? Iva, iż-​żwieġ jispiċċa meta s-​sieħeb jew is-​sieħba jmutu. (1 Korintin 7:39) Iż-​żwieġ jistaʼ jinħall ukoll jekk iseħħ adulterju u l-​parti innoċenti fiż-​żwieġ tiddeċiedi li jsir hekk. (Mattew 19:9) Altrimenti, il-​Bibbja tinkuraġġixxi lill-​koppji biex jibqgħu flimkien.

Kif Ikollok Żwieġ Dejjiemi

Alla jixtieq li ż-​żwieġ ikun dejjiemi, iżda jixtiequ li jkun bħal vjaġġ sabiħ u mhux bħal ġlieda għall-​ħajja. Hu jixtieq li r-​raġel u l-​mara jsolvu l-​problemi taʼ bejniethom u jitgħaxxqu bil-​kumpanija taʼ xulxin. Il-​Kelma tiegħu tipprovdi gwidi għal żwieġ hieni u dejjiemi. Jekk jogħġbok ara l-​iskritturi li ġejjin.

Efesin 4:​26: “Tħallux ix-​xemx tgħib fuq il-​korla tagħkom.”a Wieħed raġel li jinsab kuntent fiż-​żwieġ tiegħu jħoss li din l-​iskrittura tgħin lilu u lil martu biex isolvu n-​nuqqas taʼ qbil li jkollhom minnufih. “Jekk ma tkunx tistaʼ torqod wara li jkollok xi tgħid, hemm xi ħaġa li mhux qegħda sew. Ma tistax tħalli l-​problema tibqaʼ għaddejja,” hu jgħid. Xi drabi hu u martu jibqgħu jiddiskutu l-​problemi tagħhom sa tard bil-​lejl. Imma dan ġabilhom suċċess. Hu jżid: “Jekk tapplika l-​prinċipji tal-​Bibbja jkollok riżultati mill-​isbaħ.” Billi għamlu hekk, dawn it-​tnejn ilhom 42 sena miżżewġin u kuntenti.

Kolossin 3:​13: “Stabru b’xulxin, u, . . . aħfru lil xulxin.” Wieħed raġel jispjega kif hu u martu applikaw dan il-​parir: “Il-​miżżewġin jistgħu jirritaw lil xulxin mingħajr ma forsi jagħmlu xi ħaġa ħażina, ladarba kulħadd għandu xi dgħjufija jew vizzju li jdejjaq lil ħaddieħor. Aħna nistabru b’xulxin billi ma nħallux dawn l-​affarijiet ibegħduna minn xulxin.” M’hemmx dubju li dan il-​ħsieb għen lil din il-​koppja matul l-​54 sena li ilhom miżżewġin!

L-applikar taʼ prinċipji Skritturali bħal dawn isaħħaħ ir-​rabta li tgħaqqad raġel u mara fiż-​żwieġ. B’hekk iż-​żwieġ tagħhom jistaʼ jkun wieħed ferrieħi, sodisfaċenti, u dejjiemi.

[Nota taʼ taħt]