Żagħżugħ li Hu Kburi bir-​Reliġjon Tiegħu

META kellu 13-il sena, Andrew intalab jagħmel proġett taʼ l-​iskola fuq is-​suġġett tal-​wirt kulturali. “Għall-​ewwel,” jgħid hu, “kelli l-​ħsieb nikteb fuq nannuwi, imma mbagħad ħsibt: ‘Stenna ftit! Jien wieħed mix-​Xhieda taʼ Jehovah. Din hija opportunità sabiħa biex nitkellem dwar il-​fidi tiegħi!’

“Il-​proġett tiegħi tajtu t-​tema ‘Stand Firm’ (Jieqfu Sodi), u għamilt kartellun kbir li wera l-​persekuzzjoni ħarxa li ffaċċjaw ix-​Xhieda taʼ Jehovah fil-​Ġermanja Nazista. Il-​mezzi viżivi li użajt kienu jinkludu replika taʼ uniformi bi trijanglu vjola, stampi differenti, u ittri mingħand il-​familja Kusserow.a Bħala volantin, kelli kopji taʼ l-​ittra mibgħuta mix-​Xhieda taʼ Jehovah lill-​gvern tal-​Ġermanja. Din l-​ittra b’mod newtrali imma sod maqdret l-​atti inġusti li saru kontra x-​Xhieda taʼ Jehovah. Waqt il-​proġett, il-​vidjo Jehovah’s Witnesses Stand Firm Against Nazi Assault (Ix-Xhieda taʼ Jehovah Jieqfu Sodi Kontra l-​Attakki tan-​Nazi) kien qed jintwera l-​ħin kollu. Kelli wkoll Bibbji, browxers, u fuljetti għall-​wiri.

“Il-​proġetti tagħna ntwerew l-​ewwel fil-​ġinnasju lill-​istudenti kollha u lil kulmin jaħdem fl-​iskola. L-​għada fil-​għaxija ġew mistiedna l-​familjari u l-​ħbieb. Ħafna staqsewni xi mistoqsijiet, għax ma kinux jafu li x-​Xhieda taʼ Jehovah kienu ġew persegwitati min-​Nazi.”

Andrew jammetti li kien jinħtieġ kuraġġ kbir biex jitkellem dwar il-​fidi tiegħu. “Kont naf li xi wħud kienu se jwaqqgħuni għaċ-​ċajt,” jgħid hu, “imma kont inħossni mdejjaq kieku ma tkellimtx. Dan il-​proġett kien jiffoka fuq nies li taw ħajjithom biex jiddefendu l-​fidi li kellhom f’Jehovah, u għalhekk ikkonkludejt li l-​iċken ħaġa li stajt nagħmel kienet li nissaporti ftit kritika.”

Fl-aħħar, Andrew kien kuntent li ħataf din l-​opportunità biex jagħti xiehda. Hu jgħid: “Kelli ħafna diskussjonijiet dwar għala ma mmorrux għall-​gwerra, u ħallejt Bibbji, kotba, u fuljetti maʼ wħud li wrew interess.” U jżid: “Ma stajtx niftakar f’okkażjoni oħra meta ħassejtni daqshekk kburi li jien wieħed mix-​Xhieda taʼ Jehovah.”

[Nota taʼ taħt]