Mingħand il-​Qarrejja

Id-​Dipressjoni fost l-​Adolexxenti Kemm fraħt meta rċivejt is-​serje t’artikli taʼ Stenbaħ! intitolata “Għajnuna għall-​Adolexxenti Dipressi”! (8 taʼ Settembru, 2001) Ilni nissielet maʼ din il-​marda għal bosta snin. Grazzi għal din l-​għajnuna fi żmien diffiċli.

L. D., Franza

Jien infermiera tat-​tfal. Ħafna huma dawk li ma jagħtux kas taʼ kemm hi mifruxa d-​dipressjoni, iżda mhux intom. Ordnajt mitt kopja taʼ din ir-​rivista. Bi ħsiebni nqassamhom mat-​tobba tat-​tfal u maʼ dawk kollha li jaħdmu fil-​qasam tas-​saħħa mentali f’dawn l-​inħawi.

B. P., Stati Uniti

Għandi għadd taʼ qraba li nstab li għandhom id-​dipressjoni jew il-​mard bipolari. Il-​fatt li dawn jintgħarfu bħala li huma mard iktar milli dgħjufijiet jgħin ferm biex ħafna nies jerġgħu jiksbu d-​dinjità li jkunu tilfu. Is-​suġġerimenti li tajtu se jgħinuna lkoll biex nagħdruhom u nappoġġawhom.

C. M., Kanada

Malli ġiet din ir-​rivista f’idejja, mill-​ewwel bdejt naqraha. Qabiżli d-​dmugħ bil-​ferħ meta rajt kemm tgħożżu lill-​adolexxenti u li ddedikajtu 12-il paġna għal dan is-​suġġett. Grazzi ħafna, ħafna!

M. M., Awstrija

Dan l-​artiklu tassew għenni nikkalma u nkun trankwilla. Barra minn hekk, ġagħalni nirrealizza li m’iniex l-​unika waħda li nbati b’din il-​marda. Nitlob lil Jehovah biex ifarraġ u jgħin lin-​nies kollha li qed ibatu bid-​dipressjoni.

Y. T., Ġappun

Se nżomm provvista taʼ din il-​ħarġa dejjem disponibbli. Hi eżattament dak li għandhom bżonn l-​adolexxenti tagħna, u nemmen li se tgħin lil ħafna minnhom u lill-​ġenituri tagħhom jgħaddu minn dik li intom spjegajtu sew bħala li hija marda. X’aktarx li se ssalva l-​ħajjiet.

R. F., Stati Uniti

Kemm striħajt meta sirt naf li dan l-​uġigħ emozzjonali ma jiġix minn xi dgħjufija spiritwali. Ħassejt qalbi trankwilla, u bkejt meta qrajt li “qrib il-​Mulej lejn dawk b’qalbhom maqsuma.”—Salm 34:19 (34:​18, NW).

A. I., Ġappun

Għandi 16-il sena, u ilni għal bosta snin ngħaddi minn mumenti taʼ dipressjoni. Din ir-​rivista kienet eżatt dak li kont neħtieġ! Dawn l-​artikli tawni l-​parir li kelli bżonn.

L. B., Awstralja

Bħala adolexxent kont inbati bid-​dipressjoni, u qatt m’għedt lill-​ġenituri tiegħi jew lil dawk li kont naf li ridt nagħmel suwiċidju. Dan kien żball gravi. Huwa importanti li tikseb l-​għajnuna meta tkun dipress. Grazzi talli wrejtu li tieħdu ħsieb iż-​żgħażagħ u turu konsiderazzjoni lejhom.

S.G.C., Stati Uniti