“Att Kriminali Kiefer”
MARIAa saret prostituta meta kellha biss 14-il sena. Hi bdiet tgħix f’dan l-istil ikrah taʼ ħajja għax ommha insistitilha li tagħmel dan. Kienet tgħidilha li kienet sabiħa u li kienet se togħġobhom ħafna lill-irġiel. Kienet tgħidilha wkoll li kienet se taqlaʼ ħafna flus. Fil-għaxijiet omm Maria kienet tiħodha f’motel biex tiltaqaʼ maʼ l-irġiel. L-omm kienet tistenna qrib il-post biex tiġbor il-flus. Kull lejla, Maria kienet tmur maʼ tlieta jew erbat irġiel differenti.
Carina, li kienet toqgħod ftit ’il bogħod minn Maria, ukoll kienet imġiegħla taqbad il-prostituzzjoni meta kellha biss 13-il sena. Bħal ħafna familji oħrajn fil-komunità tagħha magħmula minn ħaddiema tal-kannamieli, il-ġenituri taʼ Carina ġagħluha tibda tbigħ ġisimha biex jaqilgħu xi ħaġ’oħra tal-flus biex ilaħħqu mal-ħajja. F’post ieħor, Estela ħarġet mill-iskola t’età żgħira, mingħajr ma tgħallmet taqra jew tikteb, u bdiet taħdem bħala prostituta fit-toroq. U Daisy kellha madwar sitt snin meta ġiet abbużata sesswalment minn wieħed minn ħutha—l-ewwel wieħed mill-ħafna abbużi sesswali li saru fuqha minn qrabatha. Hi saret prostituta fl-età t’14-il sena.
F’ħafna partijiet tad-dinja, il-problema tal-prostituzzjoni tal-minorenni hija realtà li twaħħax. Ir-riżultati huma traġiċi. Spiss, prostituti taħt l-età, kemm dawk li jieħdu sehem fil-prostituzzjoni kultant jew inkella full-time, jiġu involuti wkoll fil-kriminalità u l-abbuż tad-drogi. Ħafna minnhom iħossuhom mifxulin u bla dinjità, u ftit li xejn għandhom tama li jeħilsu mis-sitwazzjoni miżera li jinsabu fiha.
Xi personalitajiet influwenti jirrikonoxxu l-effetti qerrieda tal-prostituzzjoni tal-minorenni. Sewwa qal l-ex-President tal-Brażil, Fernando Henrique Cardoso: “Il-prostituzzjoni tal-minorenni hija att kriminali kiefer.” Gazzetta Brażiljana ppubblikat dan il-kumment li jqanqal il-ħsieb dwar il-prostituzzjoni tal-minorenni: “Pajjiżi fejn din il-prattika hija komuni, tollerata, aċċettata, u saħansitra mfittxija minħabba [il-flus] li ġġib, jesperjenzaw kuljum il-ħerba li din tikkaġuna. Kwalunkwe profitt finanzjarju li tistaʼ tipproduċi jitħassar b’mod inevitabbli bid-diżastri individwali, familjari, u soċjali li ġġib magħha din il-prattika.”
Madankollu, minkejja l-intenzjonijiet nobbli taʼ dawk li jridu jwaqqfu l-prostituzzjoni tal-minorenni, il-problema qiegħda tikber. Xi jwassal għal din is-sitwazzjoni tal-biżaʼ? Għala hawn tant li jittolleraw jew saħansitra jinkuraġġixxu din l-attività kriminali?
[Nota taʼ taħt]
a L-ismijiet f’dawn l-artikli tal-bidu ġew mibdulin.
[Kumment f’paġna 3]
“Il-prostituzzjoni tal-minorenni hija att kriminali kiefer.”—L-EX-PRESIDENT TAL-BRAŻIL FERNANDO HENRIQUE CARDOSO
[Kumment f’paġna 4]
“Kull xorta taʼ sfruttament sesswali jmur kontra d-dinjità umana, u għalhekk jikser id-drittijiet umani fundamentali, minkejja l-età, is-sess, ir-razza, il-grupp etniku jew l-istat soċjali tal-vittma.”—UNESCO SOURCES