Għala Qed Tikber il-​Problema?

KONT taf li t-​traffikar tal-​bnedmin jirrappreżenta t-​tielet l-​akbar attività kriminali fid-​dinja, superata biss mit-​traffikar tad-​drogi u taʼ l-​armamenti? Skond l-​Organizzazzjoni Edukattiva, Xjentifika, u Kulturali tal-​Ġnus Magħquda, hemm żjieda kontinwa f’kull xorta taʼ prostituzzjoni.

F’pajjiż Latin-Amerikan, Kumitat taʼ Inkjesta tal-​Kungress irrapporta li hemm iktar minn 500,000 prostituta minorenni, avolja l-​prostituzzjoni hija illegali.

F’pajjiż ieħor, hemm madwar 300,000 prostituta taħt l-​età jiġru fit-​toroq, speċjalment fi nħawi fejn hemm it-​traffikar tad-​drogi.

F’pajjiżi Asjatiċi huwa rapportat li madwar miljun tifla qed jintużaw bħala prostituti f’kundizzjonijiet imqabblin mal-​jasar. Xi pajjiżi huma magħrufin bħala ċentri tal-​prostituzzjoni tal-​minorenni u tat-​turiżmu marbut mas-​sess.

Minħabba ż-​żjieda fil-​mard trasmess sesswalment, bħall-​AIDS, il-​klijenti lesti li jħallsu prezzijiet ferm ogħla għat-​tfal għax jaħsbu li iktar hemm ċans li dawn ikunu verġni, u b’hekk x’aktarx li ma jkunux infettati. “Il-​biżaʼ mill-​AIDS ġagħal lill-​irġiel biex dejjem ifittxu bniet u subien iżgħar, u dan qiegħed saħansitra jkabbar il-​problema,” tispjega Luíza Nagib Eluf mill-​Ministeru tal-​Ġustizzja fil-​Brażil. Hi qalet: “L-​isfruttar sesswali tal-​bniet u l-​adolexxenti huwa l-​iktar problema soċjali serja fost in-​nisa fqar fil-​Brażil.”

Il-​Faqar u l-​Prostituzzjoni tal-​Minorenni

Il-​prostituzzjoni tal-​minorenni toktor f’ambjent taʼ miżerja u faqar. Skond ma qalet rappreżentanta tal-​gvern, l-​isfruttar u l-​prostituzzjoni tal-​minorenni f’pajjiżha huma “marbutin b’mod ċar mat-​tkissir tal-​familji u huma r-​riżultat tal-​miżerja u l-​ġuħ.” Xi ġenituri jsostnu li l-​faqar wassalhom biex ibigħu lil uliedhom għall-​prostituzzjoni. Tfal li jgħixu fit-​toroq jagħtuha għall-​prostituzzjoni għaliex jarawha bħala l-​uniku mezz li għandhom biex ma jmutux bil-​ġuħ.

Il-gazzetta O Estado de S. Paulo tispjega li tifla tistaʼ tispiċċa bħala prostituta meta din tingħaqad maʼ xi klikka li tiġġerra fit-​toroq. Sabiex takkwista xi ħaġa x’tiekol, tistaʼ tibda tisraq u forsi kultant tbigħ ġisimha. Imbagħad tispiċċa bħala prostituta professjonali.

Xi drabi, xi adolexxenti jintbagħtu f’pajjiżi oħrajn biex jaħdmu bħala prostituti. “Il-​flus li jintbagħtu minn prostituti emigranti lill-​familji tagħhom spiss ikunu somom konsiderevoli meta tqis il-​faqar taʼ xi pajjiżi Asjatiċi u Afrikani,” jirrapportaw UNESCO Sources. “Il-​prostituzzjoni f’dawn il-​pajjiżi wkoll tiġi inkuraġġita, minħabba t-​turisti minn pajjiżi għonja li jiġu apposta biex jieħdu vantaġġ mis-​‘servizzi’ provduti minn żgħażagħ u tfal.”

Waqt li tiddeskrivi l-​perikli li huma esponuti għalihom il-​prostituti minorenni li jiġġerrew fit-​toroq f’belt Latina-Amerikana, ir-​rivista Time tirrapporta: “Uħud mill-​prostituti għad għandhom biss 12-il sena. Spiss dawn ikunu ġejjin minn familji mkissrin, u jorqdu fi kwalunkwe post li jistgħu jsibu matul il-​ġurnata, u bil-​lejl iħufu fid-​diskoteki, fejn ipoġġu l-​baħrin.”

Taħt l-​influwenza tad-​drogi, prostituta taħt l-​età għandha mnejn tiġi mġagħla toqgħod għal atti taʼ mistħija li normalment ma tkunx lesta li tagħmel. Per eżempju, skond ir-​rivista Veja, il-​pulizija sabu 92 vidjotejp rekordjati minn tabib mediku u li kien fihom sessjonijiet taʼ tortura kiefra fuq iktar minn 50 mara, li xi wħud minnhom kienu taħt l-​età.

Minkejja din ir-​realtà li tkexkex, prostituta żagħżugħa qalet: “Jekk nipprova nsib naħdem, ma nkunx nistaʼ naqlaʼ biżżejjed biex niekol għax m’għandix sengħa. Il-​familja tiegħi taf b’kollox, u ma rridx nieqaf minn din il-​ħajja. Ġismi tiegħi u nagħmel bih li rrid jien.”

Madankollu, dawn it-​tfajliet qatt ma ppjanaw li jsiru prostituti. Skond social worker mara, ħafna prostituti żgħażagħ “jixtiequ jiżżewġu” u joħolmu dwar ir-​raġel ideali. Filwaqt li hemm sitwazzjonijiet komplikati li jwassluhom biex jaqbdu l-​ħajja taʼ prostituta, waħda riċerkatriċi ssostni: “L-​akbar skandlu hu li l-​maġġuranza ġew stuprati f’darhom stess.”

Jeżisti Tmiem għall-​Prostituzzjoni tal-​Minorenni?

Iżda hemm tama għal dawn it-​tfal sfortunati. Kien hemm prostituti taʼ kull età li biddlu ħajjithom. (Ara l-​kaxxa “In-​Nies Jistgħu Jinbidlu,” f’paġna 7.) Il-​Kelma t’Alla, il-​Bibbja, għenet miljuni taʼ nies mad-​dinja kollha biex isiru ġirien tajbin u membri leali tal-​familja. Rigward nies li qabel kienu żienja, adulteri, ħallelin, rgħiba, sakranazzi, naqraw: “Minn dawn kienu xi wħud minnkom. Imma issa tnaddaftu, tqaddistu u ġejtu ġġustifikati fl-​isem taʼ Sidna Ġesù Kristu u fl-​Ispirtu taʼ Alla tagħna.”—1 Korintin 6:​9-11.

Illum, bħal fiż-​żminijiet Bibliċi, hemm individwi li qed ibiddlu ħajjithom għall-​aħjar. Xorta waħda, jeħtieġ ħafna iktar biex jitrażżan l-​isfruttament sesswali. Xi gvernijiet u organizzazzjonijiet oħrajn qed jiġġieldu kontra t-​turiżmu marbut mas-​sess u l-​prostituzzjoni tal-​minorenni. Imma rridu nkunu realistiċi u nammettu li l-​bniedem ftit li xejn jistaʼ jagħmel biex jelimina l-​miżerja u l-​faqar. Dawk li jagħmlu l-​liġijiet ma jistgħux iwaqqfu l-​ħsibijiet u l-​attitudnijiet li huma l-​għeruq taʼ l-​immoralità.

Madankollu, m’humiex l-​isforzi umani iżda mezz ieħor li se jsolvi dawn il-​problemi kollha—is-​Saltna t’Alla. L-​artiklu li jmiss se jispjega.

[Kumment f’paġna 6]

Il-​faqar spiss jikkontribwixxi għall-​prostituzzjoni tal-​minorenni

[Kaxxa f’paġna 6]

Prezz Għoli

Meta kellha biss sitt snin, Daisy ġiet abbużata sesswalment minn wieħed minn ħutha. Minħabba f’hekk, hi marret toqgħod maʼ ħuha l-​kbir sakemm, t’14-il sena, bdiet taħdem f’nightclub. Wara ftit ġranet, Daisy mardet. Meta fieqet, is-​sidien tan-​nightclub qalulha li kellha tagħtihom xi flus u ġagħluha taħdem bħala prostituta. Xi sena wara, kienet għadha ma ħelsitx mid-​dejn, u kien donnu jidher li qatt ma kienet se teħles minnu. Madankollu, wieħed baħri ħallas il-​bqija tad-​dejn li kellha, u ħadha f’belt oħra, fejn kien jistmaha taʼ lsira. Minħabba f’hekk telqitu, u iktar tard bdiet tgħix maʼ raġel ieħor. Wara tliet snin iżżewġu, iżda minħabba li kellhom ħafna problemi serji fiż-​żwieġ tagħhom, hi pprovat tikkommetti suwiċidju tliet darbiet.

Maż-​żmien, kemm hi u kemm żewġha bdew jistudjaw il-​Bibbja. Imma Daisy ma ħassithiex denja li ssir waħda mix-​Xhieda taʼ Jehovah. Meta wrewha mill-​Bibbja li Alla Jehovah jaċċetta lil dawk li jagħmlu l-​bidliet meħtieġa, hi ddedikatlu ħajjitha. Daisy għamlet sforzi kbar biex tagħmel dak li hu sewwa, iżda ma kinitx tħoss li hu biżżejjed, u b’hekk għaddiet minn perijodi taʼ dipressjoni. B’ferħ, iżda, hi aċċettat l-​għajnuna biex tegħleb il-​ħsara emozzjonali li ġarrbet minħabba l-​abbuż sesswali u l-​esperjenza tagħha bħala prostituta minorenni, kif ukoll biex tikseb u żżomm il-​bilanċ mentali.

[Kaxxa f’paġna 7]

In-​Nies Jistgħu Jinbidlu

Meta Ġesù kien fuq l-​art, hu ġietu ħniena għan-​nies imnikktin u midinbin. Hu fehem li l-​prostituti, hi x’inhi l-​età tagħhom, setgħu jbiddlu l-​istil taʼ ħajjithom. Ġesù saħansitra qal lill-​mexxejja reliġjużi: “Tassew, ngħidilkom, li l-​pubblikani u n-​nisa tat-​triq deħlin qabilkom fis-​Saltna taʼ Alla.” (Mattew 21:31) Għalkemm mistmerra minħabba l-​mod kif kienu jgħixu ħajjithom, uħud bħal dawn li f’qalbhom kienu jħobbu s-​sewwa rċivew il-​maħfra permezz tal-​fidi tagħhom fl-​Iben t’Alla. Midinbin li nidmu kienu lesti li jabbandunaw ħajjithom bħala prostituti sabiex jirċievu l-​barkiet tas-​Saltna t’Alla. Wara komplew jgħixu fi qbil mal-​livelli sewwa u ġusti t’Alla. Illum ukoll, nies taʼ kull xorta jaċċettaw il-​verità mill-​Kelma t’Alla u jbiddlu ħajjithom.

Ikkunsidra xi ġralhom Maria, Carina, u Estela, li ssemmew fl-​ewwel artiklu. Minbarra li kellha tirreżisti l-​pressjoni minn ommha biex tibqaʼ prostituta, Maria kellha tissara bil-​qawwa kollha biex taqtaʼ l-​vizzju tad-​drogi. Hi tispjega: “Kont nieħu d-​drogi biex noħnoq is-​sentimenti taʼ stmerrija li kont inħoss għalija nnifsi minħabba l-​ħajja li kont ngħix bħala prostituta.” Maria titkellem dwar kif ġiet milqugħa mill-​kongregazzjoni Kristjana tax-​Xhieda taʼ Jehovah: “Bqajt impressjonata bl-​imħabba li wrewni l-​membri tal-​kongregazzjoni. Tfal u adulti, kulħadd ittrattani bir-​rispett. Osservajt li l-​irġiel miżżewġin kienu leali lejn in-​nisa tagħhom. Ferħana ħafna li ġejt aċċettata bħala l-​ħabiba tagħhom.”

Meta Carina kellha 17-il sena, ġew iżuruha x-​Xhieda taʼ Jehovah. Hi bdiet tistudja l-​Bibbja, għalkemm għal xi żmien baqgħet taħdem bħala prostituta. Ftit ftit, bdiet tapprezza l-​veritajiet tal-​Bibbja. Għalhekk, iddeċidiet li tmur toqgħod f’belt ’il bogħod, u hemm saret waħda mix-​Xhieda taʼ Jehovah.

Estela, li meta kienet żgħira kienet involuta fil-​prostituzzjoni, ix-​xalar, u x-​xorb bla rażan, bdiet tinteressa ruħha fil-​Bibbja. Madankollu, hi kkonkludiet li Alla qatt ma kien se jaħfrilha. Iżda maż-​żmien bdiet tifhem li Alla Jehovah tassew jaħfer lil nies li jindmu. Issa hi membru tal-​kongregazzjoni Kristjana, miżżewġa, u qed trabbi tlett itfal. Estela tgħid: “Jien ferħana u grata lejn Jehovah talli ħariġni mill-​ħama u aċċettani fl-​organizzazzjoni nadifa tiegħu.”

Dawn ir-​rakkonti jappoġġaw dak li tgħid il-​Bibbja, li r-​rieda t’Alla hi li kull xorta taʼ rġiel u nisa “jsalvaw u jaslu biex jagħrfu l-​verità.”—1 Timotju 2:4.

[Stampa f’paġna 7]

Prostituti taħt l-​età spiss ikunu involuti fid-​drogi

[Sors taʼ l-​Istampa f’paġna 5]

© Jan Banning/Panos Pictures, 1997