Kif Inċident Biddilli Ħajti

KIF RAKKONTAT MINN STANLEY OMBEVA

Fl-​1982, tajritni karozza li kienet għaddejja b’veloċità kbira. Tawni l-​kura u malajr erġajt bdejt ir-​rutina taʼ l-​attivitajiet taʼ kuljum, minkejja li minn żmien għal żmien kont inkun muġugħ minħabba li kelli disk tas-​sinsla spostat bejn għonqi u sidri. Madankollu, 15-il sena wara, ġejt wiċċ imbwiċċ maʼ l-​iktar esperjenza f’ħajti li kienet taʼ sfida għall-​fidi tiegħi.

QABEL u, sa ċertu punt, wara l-​inċident, kont mimli enerġija. Fir-​rutina tajba taʼ eżerċizzju li kelli, kont immur niġġoggja għal madwar għaxar sa tlettax-il kilometru fi tmiem il-​ġimgħa, nilgħab skwoxx, u nagħmel xogħol manwali iebes. Kont ngħin fil-​bini tas-​Swali tas-​Saltna tax-​Xhieda taʼ Jehovah kif ukoll għent f’dak taʼ Sala taʼ l-​Assemblea kbira ġo Najrobi, il-​Kenja, fejn noqogħdu.

Imbagħad, fl-​1997, il-​weġgħat f’sidri bdew ikunu iktar regulari u qawwijin. Eżami mediku wera li disk bejn l-​irkiekel ħareġ minn postu u kien qed jagħfas il-​mudullun tas-​sinsla taʼ dahri. Dan kollu kien konsegwenza taʼ l-​inċident li ssemma fil-​bidu.

Qabel ma saħħti marret għall-​agħar, kont sibt xogħol bħala bejjiegħ. Dan ix-​xogħol inkluda polza t’assigurazzjoni għas-​saħħa tal-​familja. Il-​prospetti tiegħi fid-​dinja tan-​negozju kienu jidhru li se jkunu eċċellenti. Imma f’nofs l-​1998, ma bqajtx inħoss iktar il-​parti taʼ ġismi minn sidri sa saqajja. Jum wara l-​ieħor, saħħti bdiet tmur lura.

Ftit wara dan, tlift ix-​xogħol, bil-​benefiċċji kollha tiegħu. Kellna żewġt ibniet, Sylvia u Wilhelmina. Waħda kellha 10 snin u l-​oħra 13-il sena. Peress li ma kellix xogħol ridna niddependu biss minn dak li marti, Joyce, kienet iġġib id-​dar fl-​aħħar tax-​xahar. B’dawn iċ-​ċirkustanzi ġodda maʼ wiċċna, kellna naddattaw ħajjitna billi ma nonfqux flus fuq affarijiet li ma kellniex bżonn. B’hekk irnexxielna nkampaw.

Sentimenti Negattivi

Irrid nammetti li hekk kif bdejt nifhem sewwa r-​realtà tas-​sitwazzjoni tiegħi, sirt negattiv, moħħni fija nnifsi, u kollox beda jdejjaqni. Kultant kont inkun irrabjat u niħodha kontra kulħadd, u nagħmel għaġeb minn kull ħaġa żgħira. Kont dejjem inkun fix-​xifer li taqbadni dipressjoni. Ħadd fil-​familja ma ħelisha mill-​istress. Marti u wliedi ġew iffaċċjati b’sitwazzjoni unika li ftit li xejn kienu jafu dwarha.

Dak iż-​żmien kont naħseb li kelli raġun inħossni hekk. Żidt ħafna piż. Kelli diffikultajiet serji biex nikkontrolla l-​bżonnijiet naturali tiegħi. Ħafna drabi kont nistħi bil-​kbir. Mhux l-​ewwel darba li kont tarani waħdi f’rokna, b’għajnejja mimlijin dmugħ. Xi drabi kważi kien ikun tad-​daħq tant kemm kont nirrabja. Kont naf li mhux qed nirreaġixxi kif suppost għas-​sitwazzjoni li kont fiha.

Bħala anzjan fil-​kongregazzjoni Kristjana tiegħi tax-​Xhieda taʼ Jehovah, kemm-il darba tajt il-​parir lil sħabi l-​Kristjani biex qatt ma jwaħħlu f’Jehovah għall-​ebda tip taʼ tbatija. Madankollu, sibt lili nnifsi nistaqsi​—u mhux darba—‘Jehovah għala ppermetta xi ħaġa bħal din tiġri lili?’ Għalkemm użajt skritturi bħall-​1 Korintin 10:​13 biex isaħħu u jinkuraġġixxu lil oħrajn, ħassejt li dak li kont għaddej minnu jien kien iebes wisq biex nissaportih!

Sfida Medika

Biex nikseb trattament mediku tajjeb kien sfida. Kont immur għall-​fiżjoterapija, nagħmel il-​messaġġi għall-​ġogi, u mmur għall-​agupuntura, kollha f’ġurnata waħda. Is-​serħan, jekk kien hemm, kien ikun għal ftit ħin biss. Ikkonsultajt diversi tobba, fosthom kirurgu ortopediku u newrokirurgu. Kollha qablu fuq punt wieħed: Kien hemm bżonn taʼ kirurġija biex jittaffa l-​uġigħ tad-​disk tas-​sinsla spostat. Minħabba t-​twemmin tiegħi bbażat fuq il-​Bibbja, jien spjegajt biċ-​ċar lil dawn l-​esperti mediċi li ebda demm m’għandu jintuża fuqi taħt l-​ebda ċirkustanza.​—Atti 15:​28, 29.

L-ewwel kirurgu qal li kieku kellu jopera kien se jaqsam minn dahri. Spjegawli li din il-​proċedura tkun daqsxejn riskjuża. Madankollu, il-​kirurgu ma setax jiggarantili li ma kien se jintuża l-​ebda demm. Ma rġajtx mort għandu.

It-tieni wieħed qal li setaʼ jilħaqli s-​sinsla minn għonqi. Din il-​proċedura kienet tinstemaʼ li twaħħax. Għalkemm ma kellu l-​ebda problema biex ma jagħtinix demm, hu ried li l-​operazzjoni ssir immedjatament u ma tantx tani dettalji. M’għażiltx lilu lanqas.

Madankollu, bl-​għajnuna tax-​Xhieda taʼ Jehovah li jaħdmu fil-​Kumitat tagħna taʼ Koordinazzjoni maʼ l-​Isptarijiet stajt insib tabib li jikkoopera. Il-​proċedura li ssuġġerixxa t-​tielet kirurgu kienet tixbah lil dik li offra t-​tieni wieħed; kienet tinvolvi qasma mill-​għonq. Ir-​riskji, spjegalna hu, kienu ftit.

It-turija dettaljata taʼ kif kienet se ssir il-​kirurġija werwritni. Imma l-​iktar li beżżagħni kien il-​fatt li l-​operazzjoni kienet se ssir madwar organi delikati tal-​ġisem bħalma huma l-​qalb u l-​pulmun. Kont se noħroġ ħaj mill-​operazzjoni? Ovvjament, ħsibijiet negattivi bħal dawn ma tantx għenuni negħleb il-​biżgħat tiegħi.

Fil-25 taʼ Novembru, 1998, għamilt operazzjoni taʼ erbaʼ sigħat fl-​isptar taʼ Najrobi li kienet suċċess. Il-​kirurġija kienet tinvolvi li titneħħieli biċċa mill-​għadma tal-​pelvi taħt iż-​żaqq. Il-​biċċa mbagħad ġiet ifformata u mwaħħla maʼ fejn kien effettwat permezz taʼ pjanċa tal-​metall bil-​viti. Dan għen. Imma ma neħħiex il-​problemi kollha tiegħi. Kont nimxi b’ħafna skumdità. Taʼ spiss, xorta għadni ma nkunx nistaʼ nħoss partijiet minn ġismi.

Attitudni Pożittiva

Kif semmejt qabel, jien qattajt ħafna mill-​ħin tiegħi nitħasseb u ninkwieta fuq is-​sitwazzjoni kerha tiegħi. Ironikament, ħafna minn dawk fil-​qasam mediku kienu jfaħħruni għall-​kalma u l-​attitudni pożittiva li kont nuri. Għalfejn kienu jħossuhom hekk? Għax huma setgħu jaraw li waqt li kont muġugħ ħafna, xorta bqajt inkellimhom dwar il-​fidi tiegħi f’Alla.

Għalkemm xi drabi kont inkun irrabjat u diżappuntat bil-​kbir minħabba dak li kont għaddej minnu, xorta striħajt fuq Jehovah. Hu dejjem għenni f’dak li kont għaddej minnu​—tant li xi drabi kont nitkaża bija nnifsi. Għamilt ukoll wegħda soda miegħi nnifsi li naqra u nimmedita fuq skritturi li kont naf li huma inkuraġġanti għas-​sitwazzjoni tiegħi. Ftit minnhom huma dawn:

Apokalissi 21:4: “[Alla] jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed.” Il-​ħsieb dwar il-​wegħda fil-​Bibbja taʼ dinja ġdida fejn id-​dmugħ u t-​tbatija se jkunu spiċċaw għal dejjem farraġni mhux ftit.

Lhud 6:10: “Alla m’hux se jkun hekk inġust li jinsa dak li intom għamiltu u l-​imħabba li wrejtu lejn ismu.” Għalkemm issa sirt fiżikament limitat, naf li Jehovah jgħożż l-​isforzi tiegħi fis-​servizz tiegħu.

Ġakbu 1:13: “Waqt li tkunu mġarrbin, araw li ħadd ma jgħid: ‘Alla qiegħed iġarrabni’ għax Alla ma jistax jiġġarrab għall-​ħażin, u anqas m’hu se jġarrab lil ħadd.” Kemm hu veru! Għalkemm Jehovah ippermetta t-​tbatija tiegħi, bl-​ebda mod ma kien hu l-​wieħed li kkaġunaha.

Filippin 4:​6, 7: “Tħabbtu raskom b’xejn. Fit-​talb kollu tagħkom itolbu u uru lil Alla xi jkollkom bżonn, u iżżuh ħajr. U s-​sliem taʼ Alla, sliem li jgħaddi kull ma l-​moħħ jistaʼ jifhem, iżommilkom qalbkom u moħħkom sħaħ fi Kristu Ġesù.” It-​talb għenni biex ikolli s-​serħan tal-​moħħ li tant kelli bżonn sabiex inkun nistaʼ nittratta s-​sitwazzjoni b’iktar għaqal.

Jien kont użajt dawn l-​iskritturi biex infarraġ lil oħrajn li kienu għaddejjin minn żmien diffiċli​—u veru kienu t’għajnuna! Però, irrealizzajt li dak iż-​żmien ma kontx napprezza l-​valur sħiħ tagħhom. Kelli nkun marid bħalma jien biex nifhem l-​umiltà u biex nitgħallem nistrieħ kompletament fuq Jehovah.

Sorsi Oħrajn taʼ Faraġ

Ħafna jitkellmu dwar is-​sħubija Kristjana bħala li hija pilastru u għajnuna fi żminijiet diffiċli. Imma kemm huwa faċli li nonqsu li napprezzaw biżżejjed lil ħutna rġiel u nisa Kristjani! Veru, jistgħu jkunu limitati f’dak li jistgħu jagħmlu biex jgħinu, imma dejjem qegħdin hemm għalina. Dan kien minnu fil-​każ tiegħi. Ma kinitx xi ħaġa rari li ssibhom qrib is-​sodda tiegħi fl-​isptar, xi drabi anki kmieni ħafna fil-​għodu. Huma saħansitra offrew li jgħinuni biex inħallas il-​kontijiet għall-​kura medika. Jien grat minn qiegħ qalbi għal dawk kollha li tqanqlu minħabba l-​istat ikrah tiegħi u ġew jagħtuni l-​għajnuna.

Fil-kongregazzjoni lokali tiegħi, ix-​Xhieda issa jafu li jiena limitat f’dak li nistaʼ nagħmel. Bħalissa naqdi bħala l-​indokratur li jippresiedi u naħdem flimkien maʼ ġemgħa t’anzjani Kristjani li jikkooperaw ħafna. Qatt ma sirt irregulari fix-​xogħol taʼ l-​ippridkar. Matul l-​iktar żmien diffiċli li kelli, għent lil tnejn min-​nies sal-​punt li ddedikaw ħajjithom lil Jehovah. Wieħed qiegħed jaqdi bħala qaddej ministerjali f’kongregazzjoni tax-​Xhieda taʼ Jehovah ġewwa Najrobi.

Għadni ma nistax insib kliem biżżejjed biex nirringrazzja lil marti, li għenitni matul din il-​prova kollha. Hi ssaportiet ir-​rabja tiegħi, il-​bidla fil-​burdati, meta ma kontx inkun raġunevoli, u l-​frustrazzjonijiet tiegħi. Kulmeta kont inkun muġugħ jew imbikki hi qawwietli qalbi u kkonslatni. Jien għadni mistagħġeb bil-​kuraġġ li wriet u għall-​fatt li ma ħalliet xejn jaqtagħlha qalbha. Hi kienet verament ‘ħabiba kull ħin.’—Proverbji 17:17.

Iż-żewġt ibniet tagħna tgħallmu jkampaw mas-​sitwazzjoni. Jagħmlu li jistgħu biex jgħinuni. Huma jifhmu l-​bżonnijiet tiegħi u jgħinuni minnufih, u jkunu ċerti li ninsab tajjeb meta ma jkunx hemm ommhom. Sylvia saret il-​“bastun” tiegħi, billi fid-​dar tgħinni mmur fejn ikolli bżonn meta nħossni dgħajjef.

U xi ngħidu dwar Mina, iż-​żgħira? Darba minnhom niftakar li waqajt id-​dar u ma stajtx inqum. Hi biss kien hemm id-​dar. Għalhekk, billi użat is-​saħħa kollha tagħha, hi refgħetni u mexxietni bil-​mod sal-​kamra tiegħi. Għadha lanqas taf kif irnexxielha. Dik it-​turija taʼ kuraġġ ma nistaʼ ninsieha qatt.

Li nkampa maʼ din is-​sitwazzjoni kienet l-​iktar battalja qalila li qatt iġġilidt f’ħajti. Hija battalja li għadni niġġilidha s’issa. Xejn ma kien daqshekk taʼ sfida għal ħajti u għall-​fidi tiegħi. Tgħallimt ħafna dwar l-​umiltà, ir-​raġunevolezza, u l-​empatija. Fiduċja u fidi sħiħa f’Jehovah għenuni nibqaʼ nissaporti din il-​problema b’suċċess.

Tgħallimt kemm huma veri l-​kliem taʼ l-​appostlu Pawlu: “Dan it-​teżor qiegħed għandna f’ġarar tal-​fuħħar, ħalli b’hekk jidher sewwa li l-​kobor taʼ din il-​qawwa ġej minn Alla, u mhux minna.” (2 Korintin 4:7) Insib faraġ mill-​akbar fil-​wegħda t’Alla taʼ “smewwiet ġodda u art ġdida” li ġejjin. (2 Pietru 3:​13) Jien nitlob li Jehovah ikompli jappoġġani waqt li nistenna dik id-​dinja l-​ġdida, għax jien għadni dgħajjef u ftit li xejn nistaʼ nagħmel bis-​saħħa tiegħi.

[Stampi f’paġna 28]

Attività Kristjana mal-​familja tiegħi għenitni nissaporti