Il-​Ħarsa tal-​Bibbja

Meta l-​Maħbubin Tiegħek Ma Jkunux taʼ l-​Istess Twemmin

SKOND kalkolu wieħed, fid-​dinja hemm iktar minn 10,000 reliġjon u setta. F’pajjiż wieħed madwar 16 fil-​mija mill-​popolazzjoni adulta, xi darba f’ħajjitha, bidlet ir-​reliġjon. Għalhekk, mhux taʼ b’xejn li jkun hemm nuqqas taʼ qbil dwar it-​twemmin reliġjuż bejn il-​qraba u l-​ħbieb. Kultant dan jirriżulta f’relazzjonijiet mimlijin tensjoni. Għalhekk tqum il-​mistoqsija, Kif għandhom il-​Kristjani jittrattaw lill-​maħbubin tagħhom li m’humiex taʼ l-​istess twemmin?

Relazzjoni Speċjali

Per eżempju, ikkunsidra x’tgħid il-​Bibbja dwar ir-​relazzjoni speċjali bejn il-​ġenituri u wliedhom. Il-​kmand li nsibu f’Eżodu 20:12 biex ‘tweġġaħ lil missierek u lil ommok’ qatt ma jieqaf japplika. Fil-​fatt, meta Ġesù tkellem dwar dan il-​kmand, imniżżel f’Mattew 15:​4-6, jidher ċar li kien qed jitkellem dwar l-​unur li l-​ulied adulti għandhom jagħtu lill-​ġenituri tagħhom.

Il-ktieb Bibliku taʼ Proverbji jwissi kontra d-​diżrispett lejn il-​ġenituri taʼ dak li jkun. Proverbji 23:22 jagħtik il-​parir biex ma “tmaqdarx ’l ommok meta tixjieħ.” Proverbji 19:26 iwissi li “min jgħakkes lil missieru u jkeċċi ’l barra ’l ommu, hu iben bla ġieħ u kollu għajb.”

Jidher ċar mill-​Iskrittura li m’għandniex nittraskuraw lill-​ġenituri tagħna. Il-​fatt li l-​ġenituri ma jaċċettawx ir-​reliġjon tagħna ma jannullax ir-​relazzjoni taʼ bejnietna. Dawn il-​prinċipji tal-​Bibbja japplikaw bl-​istess mod għall-​qraba u għall-​imseħbin tagħna fiż-​żwieġ. Jidher ċar li l-​Kristjani jibqgħu obbligati moralment u Skritturalment biex iħobbu lil qrabathom.

Ir-​Raġunevolezza Hija Vitali

M’għandniex xi ngħidu, il-​Bibbja twissi kontra ħbiberija ħażina, u din l-​influwenza tistaʼ tkun ġejja minn qraba immedjati taʼ l-​individwu. (1 Korintin 15:33) Fil-​passat, ħafna qaddejja leali t’Alla żammew maʼ dak li hu tajjeb avolja l-​ġenituri tagħhom ma kinux jaqblu magħhom. Dan kien minnu tabilħaqq dwar ulied Koraħ. (Numri 16:​32, 33; 26:​10, 11) Il-​Kristjani veri m’għandhomx jikkompromettu l-​fidi tagħhom sabiex jogħġbu lil oħrajn, lanqas għal qrabathom.—Atti 5:29.

F’ċerti sitwazzjonijiet, xi ġenituri jew maħbubin oħra jopponu bl-​aħrax it-​twemmin tal-​Kristjan. Xi wħud saħansitra jsiru għedewwa tal-​Kristjanità vera. F’każijiet bħal dawn il-​Kristjani jieħdu passi raġunevoli biex jipproteġu l-​ispiritwalità tagħhom. Ġesù qal b’mod xieraq: “Il-​bniedem ikollu n-​nies taʼ daru stess għedewwa tiegħu. Min iħobb lil missieru jew lil ommu iżjed minni ma jistħoqqlux li jkun miegħi; min iħobb lil ibnu jew lil bintu iżjed minni ma jistħoqqlux li jkun tiegħi.”—Mattew 10:​36, 37.

Madankollu, f’ħafna każijiet il-​Kristjani ma jiffaċċjawx oppożizzjoni ħarxa mingħand il-​maħbubin tagħhom. Il-​qraba tagħhom sempliċement ma jifhmux it-​tagħlim tal-​Bibbja bl-​istess mod. L-​Iskrittura Mqaddsa tħeġġeġ lis-​segwaċi taʼ Kristu biex jittrattaw lil dawk li ma jemmnux “bil-​ħlewwa” u “bir-​rispett.” (2 Timotju 2:​25, 1 Pietru 3:16 [3:​15, NW]) Il-​Bibbja twissi b’mod xieraq: “Min hu qaddej tal-​Mulej m’għandux joqgħod jitlewwem; imma għandu jkun ħlejju maʼ kulħadd.” (2 Timotju 2:24) Ukoll l-​appostlu Pawlu ta l-​parir lill-​Kristjani “biex ma jkasbru ’l ħadd, jaħarbu t-​tilwim, ikunu umli, jimxu bil-​ħlewwa maʼ kulħadd.”—Titu 3:2.

Żomm Kuntatt u Esprimi Mħabbtek

Il-​Kristjani jingħataw dan l-​inkuraġġiment fl-​1 Pietru 2:12: “Ġibu rwieħkom sewwa qalb il-​pagani [dawk li ma jemmnux] biex . . . jaraw sewwa l-​għemil tajjeb tagħkom u jsebbħu ’l Alla meta jasal jum iż-​żjara tiegħu.” Taʼ spiss, il-​maħbubin li ma jħaddnux l-​istess twemmin jaraw il-​bidliet li l-​Bibbja għamlet f’ħajjitna. Ftakar li ħafna li kienu indifferenti jew saħansitra li kienu jopponu l-​verità tal-​Bibbja biddlu fehmithom. Forsi xi wħud damu ħafna snin josservaw il-​kondotta tajba tas-​sieħeb fiż-​żwieġ jew taʼ wliedhom sabiex jinvestigaw ir-​raġuni wara din il-​kondotta. Jekk xi persuni ma jaċċettawx il-​veritajiet tal-​Bibbja, jalla ma jkunx minħabba li xi qarib Kristjan ikun traskurahom.

Huwa minnu li ċ-​ċirkustanzi jvarjaw, u xi Xhieda Kristjani jgħixu ’l bogħod mill-​ġenituri tagħhom. Forsi ma jkunx possibbli għalihom li jżuruhom kemm jixtiequ. Iżda kuntatt bl-​ittri, bit-​telefon, jew kuntatt regulari b’modi oħra se jiżgura lill-​maħbubin tagħna li aħna nħobbuhom. Ħafna li m’humiex Kristjani jħobbu lill-​ġenituri tagħhom u lil qrabathom oħrajn u jikkomunikaw magħhom regolarment minkejja d-​differenza fit-​twemmin tagħhom. M’għandhomx ix-​Xhieda Kristjani jagħmlu l-​istess?

[Stampa f’paġna 30]

Jekk iżżomm kuntatt mal-​maħbubin tiegħek se tiżgurahom li tħobbhom