Ħarbu Minn Dilluvju!

Minn kittieb għal Stenbaħ! fl-​Isvizzera

F’OTTUBRU taʼ l-​2000, waslu rapporti minn partijiet differenti madwar id-​dinja dwar għargħar. Il-​ġnub tal-​muntanji kienu mifqugħin bl-​ilma minħabba x-​xita abbundanti li niżlet, u spiċċa li kien hemm ħafna ħamrija u ġebel li niżel minn magħhom u saħansitra siġar sħaħ!

Id-distrett taʼ Valais fin-​nofsinhar taʼ l-​Isvizzera kien ilpost taʼ diżastru bħal dan. Ix-​Xmara Rhône taqsam din il-​parti taʼ l-​art minn tulha. Din ix-​xmara tgħaddi lejn il-​punent tal-​glaċieri tas-​silġ taʼ Rhône fl-​Alpi Ċentrali għal-​Lag taʼ Ġinevra—madwar 170 kilometru ’l bogħod. L-​ilma mill-​muntanji fuq iż-​żewġ naħat tax-​xmara jgelgel fix-​xmara permezz taʼ diversi nixxigħat taʼ daqs differenti. Ġeneralment, din is-​sistema taħdem tajjeb. Iżda meta tagħmel ħafna xita din tgħatti l-​parti kollha, u dan taʼ spiss iwassal għal diżastru.

Dan hu dak li ġara f’Gondo, li qiegħed mal-​fruntiera taʼ l-​Italja. Dan ir-​raħal muntanjuż taʼ 150 abitant intlaqat minn valanga taʼ tajn u ġebel li qerdet parti kbira mir-​raħal. Partijiet oħra taʼ Valais malajr intlaqtu mix-​xita qalila. It-​toroq u l-​linji tal-​ferrovija ġew imblokkati, u d-​djar bdew jimtlew bit-​tajn u l-​ġebel. F’xi postijiet it-​tajn għola sa erbaʼ metri. Waħda mara rat valanga taʼ tajn, għolja iktar minn tletin metru, iġġorr blat kbir u siġar weqfin lejn ir-​raħal tagħha.

Markus u Tabitha, koppja miżżewġa, kienu qed joqogħdu f’Mörel meta sar id-​diżastru. “Qomna ftit wara s-​6:00 a.m. minħabba ħoss jirbombja u theżżiża,” jiftakar Markus. “Ħadt miegħi torċ biex ninvestiga, u bqajt ixxokkjat b’dak li rajt. Id-​djar u l-​pontijiet ġarrbu ħafna ħsarat minħabba l-​mases taʼ blat, u kien hemm karozza li ġiet mixħuta fuq id-​dar taʼ wieħed mill-​ġirien. Iktar ’l isfel wieħed mill-​ġirien u martu kienu maqbudin f’darhom. Għenthom jaħarbu ’l barra minn tieqa. Meta mort lura d-​dar, jien u Tabitha kellna ċans niġbru ftit mill-​affarijiet tagħna.”

Markus u Tabitha, li huma Xhieda taʼ Jehovah, sabu rifuġju maʼ sħabhom fit-​twemmin barra miż-​żona taʼ periklu. “Għalkemm ħrabna,” jgħid Markus, “Tabitha baqgħet tħoss ix-​xokk taʼ dak li kien ġara għal ġranet sħaħ.” X’kien li għenha tissaporti din il-​ġrajja trawmatika? “Il-​kumpanija u l-​għajnuna taʼ ħutna fil-​fidi,” twieġeb Tabitha, u żżid: “U anki l-​interess li wrew ħafna mill-​ġirien tagħna.”

Markus u Tabitha ġew imfakkrin fi Proverbji 18:​24, li jgħid, “ħabib tassew jintrabat miegħek aktar minn ħuk.” Kemm jistgħu jkunu prezzjużi ħbieb bħal dawn meta jkun hemm xi diżastru!

[Mappa f’paġna 24]

(Għall-formazzjoni sħiħa tat-​test, ara pubblikazzjoni)

Il-​parti li ġiet effettwata

Gondo

[Stampa f’paġna 24]

Markus u Tabitha

[Sors taʼ l-​Istampa f’paġna 24]

Mise à disposition par www.crealp.ch