Kun Fil-​ħin!

“PROBLEMA kronika fost id-​diretturi hija li ma jkunux fil-​ħin,” tirrapporta l-​gazzetta USA Today. Billi tikkwota stħarriġ li sar fuq 2,700 direttur, iżżid, “minn 10 laqgħat jaslu tard għal sitta minnhom.”

Fid-dinja tan-​negozju, meta persuna tasal tard tkun qed turi iktar milli nuqqas taʼ manjieri biss. Studju li sar fuq 81,000 applikant għal xogħol ikkonkluda: “It-​telf taʼ ħin minħabba li persuna tasal tard u li mingħajr permess ma tmurx għax-​xogħol huma l-​problemi prinċipali għal telf kbir finanzjarju.” M’għandniex xi ngħidu, mhux fid-​dinja tan-​negozju biss hemm il-​problema li wieħed ikun tard. Fi stħarriġ li sar fuq il-​kapijiet taʼ l-​iskejjel sekondarji, instab li “l-​problema primarja u l-​iktar frekwenti li kienet tingħata dixxiplina fuqha kienet għax l-​istudenti ma jaslux fil-​ħin.”

Il-Ħallieq tagħna kellu l-​ħsieb għalina li nkunu konxji tal-​ħin. Hu poġġa “ż-​żewġ imnariet il-​kbar”​—ix-​xemx u l-​qamar—f’posthom sabiex jgħinuna nkejlu l-​ħin. (Ġenesi 1:​14-16) Illum il-​ġurnata, hawn apparat modern li jippermettilna nkejlu l-​ħin bil-​minuti u bis-​sekondi. Madankollu, minkejja t-​teknoloġija, ħafna minna xorta nsibuha diffiċli biex inkunu fil-​ħin—għax-​xogħol, għall-​iskola, jew għall-​appuntamenti importanti oħra.

Hija l-​problema neċessarjament għax ma jkollniex biżżejjed ħin? Bla dubju, ix-​xogħol u l-​familja jistgħu jirrikjedu ħafna ħin. Minkejja dan, waħda omm li taħdem jisimha Wanda Rosseland tgħid: “Waqaft ingerger li m’għandix biżżejjed ħin meta rrealizzajt li lkoll kemm aħna għandna 24 siegħa kuljum. Ħsibt dwarha u ddeċidejt li fid-​dinja moderna tagħna, mhux m’għandniex biżżejjed ħin iżda għandna ħafna affarijiet xi jtellfuna.”

Ikkunsidra wkoll lil Renee,a omm taʼ ħamest itfal li hija waħda mix-​Xhieda taʼ Jehovah. Hi tiftakar: “Meta wliedi kienu żgħar, kienet sfida li llestihom għall-​iskola u għal-​laqgħat Kristjani. Madankollu, ma kelli l-​ebda problema biex inkun fil-​ħin. Iżda issa li kibru sew, żviluppajt il-​vizzju ikrah li nkun tard.” Għandek int ukoll dan il-​vizzju ikrah? Jekk iva, huwa possibbli li tinbidel! Dawn huma xi affarijiet li tistaʼ tagħmel.

● IKKUNSIDRA L-​KONSEGWENZI. Il-​vizzju li tkun tard jistaʼ jidher bħala problema żgħira. Iżda ikkunsidra l-​kliem tal-​Bibbja: “Bħalma d-​dubbien mejjet initten il-​fwieħa fil-​vażett, hekk il-​fama kbira taʼ l-​għaref tgħarraqha ftit tal-​bluha.” (Koħèlet 10:1) Iva, “ftit tal-​bluha” bħalma hi murija f’nuqqas taʼ konsiderazzjoni lejn oħrajn tistaʼ tħassar ir-​reputazzjoni tiegħek maʼ għalliem fl-​iskola jew mgħallem fuq ix-​xogħol.

Waqt li kienet qiegħda tieħu xi korsijiet f’kulleġġ tal-​post, waħda mara jisimha Marie nnotat li xi ftit minn sħabha tal-​klassi “ma kienx jimpurtahom mill-​ħin,” u taʼ spiss kienu jaslu tard fil-​klassi. “Iżda malajr kellhom jinbidlu,” tgħid hi. “Tnejn mill-​għalliema kienu pittmi fil-​ħin. Għalhekk, jekk xi studenti kienu jkunu kemm kemm tard, kienu jiġu mmarkati bħala assenti. U l-​fatt li kienu jitniżżlu diversi drabi bħala li fallew kien jirriżulta f’marki baxxi.”

Il-vizzju li tasal tard jistaʼ wkoll iħassar ir-​reputazzjoni tiegħek kemm mal-​ħbieb kif ukoll maʼ sħabek. Raġel taʼ mezz’età jismu Joseph jiftakar lil sieħbu Kristjan li kien jafu snin ilu. Għalkemm dan ir-​raġel kien rispettat għall-​abbiltajiet tiegħu bħala għalliem, hu kellu nuqqas imbarazzanti. “Kien dejjem tard,” jiftakar Joseph. “Jiġifieri kien tard għal kollox! U donnu li qatt ma kien jinkwieta dwar dan. Xi wħud kienu jiċċajtaw dwar l-​ittardjar tiegħu.” Bdew in-​nies jirreferu għalik bħala dak ix-​xi ħadd li dejjem jasal tard? Jekk inhu hekk, jistgħu jibdew faċilment jinjoraw il-​kwalitajiet tajbin tiegħek.

● IKKUNSIDRA LIL OĦRAJN. Meta xi ħadd jasal tard ikun pastaż u anki jtellef lil oħrajn. U tistaʼ tagħti l-​impressjoni li għandek attitudni superjuri. Billi spjega għala ħafna diretturi tan-​negozji għandhom it-​tendenza li jkunu tard għal-​laqgħat, wieħed negozjant ammetta: “Il-​biċċa l-​kbira minna aħna sempliċement arroganti.” Għall-​kuntrarju, il-​Kristjani jqisu lil oħrajn li huma superjuri minnhom. (Filippin 2:3) Huma japplikaw ukoll ir-​Regola tad-​Deheb u jittrattaw lil xulxin bħalma jixtiequ jiġu trattati. (Mattew 7:12) Ma tirritax ruħek meta jkollok tistenna lil xi ħadd? Għalhekk, tħallix lil ħaddieħor jistenniek.

● TGĦALLEM KIF TQASSAM IL-​ĦIN. Għandek int il-​vizzju li titnikker u tagħmel kollox taʼ malajr fl-​aħħar ħin? Tippjana int li jkollok ħafna affarijiet x’tagħmel f’daqqa u tipprova tagħmilhom fi ftit ħin? Il-​prinċipju taʼ Koħèlet 3:1 jistaʼ jkun taʼ għajnuna: “Kollox għandu żmienu.” Li jkollok iż-​‘żmien’ għall-​affarijiet jgħinek biex tagħmilhom bl-​ordni.

L-​ewwel, niżżel l-​affarijiet kollha li għandek bżonn tagħmel. Imbagħad, segwi l-​prinċipju mniżżel f’Filippin 1:10: ‘Agħrfu agħżlu l-​aħjar.’ Iva, agħmel il-​prijoritajiet. X’hemm bżonn li jsir bilfors? X’inhuma xi affarijiet li jistgħu jsiru iktar tard mingħajr problema? Fl-​aħħar, ipprova ara kemm għandek bżonn ħin biex tlesti ċerti affarijiet u meta tistaʼ tagħmilhom. Kun realistiku, u evita li tippjana biex tagħmel ħafna affarijiet fi ftit wisq ħin.

Mara jisimha Dorothy tfaħħar lill-​ġenituri tagħha talli għallmuha biex tkun puntwali. Hi tirrakkonta: “Jekk kellna nkunu għal-​laqgħa fis-​7:30 p.m., ommi kienet tibda tlestina siegħa u tliet kwarti qabel. Kellu jkollna ħin biżżejjed biex nieklu, naħslu l-​platti, nilbsu, u nivvjaġġaw għal-​laqgħa. Saret parti normali minn ħajjitna li nkunu fil-​ħin.” Xi drabi jgħin ukoll li tħalli l-​ħin għal dak li jistaʼ jinqalaʼ. Dorothy tiftakar: “Dan l-​aħħar kelli ngħaddi għal xi wħud biex immorru l-​laqgħa. Aħna u sejrin kelli panċer. Irnexxieli nsewwih u xorta mort għall-​aħwa fil-​ħin. Jien dejjem nipprova nħalli ħin għal dak li jistaʼ jinqalagħlha l-​karozza jew għat-​traffiku li nistaʼ nsib.”

● ĦU SUĠĠERIMENTI MINGĦAND OĦRAJN. Fi Proverbji 27:​17, il-​Bibbja tgħid: “Kif il-​ħadid isinn il-​ħadid, hekk bniedem jirfina lil sieħbu.” Fi qbil maʼ dan il-​prinċipju, tkellem maʼ oħrajn li ċ-​ċirkustanzi tagħhom huma simili għal tiegħek​—iżda li jirnexxilhom ikunu fil-​ħin. Taʼ spiss jistgħu jkollhom għadd taʼ suġġerimenti tajbin.

Renee, li ssemmiet iktar kmieni, hija determinata li taqtaʼ l-​vizzju tagħha li tkun tard. Hi tgħid: “Dan l-​aħħar iddeċidejt li mmur għall-​aħjar. Għalkemm dan ma kienx faċli, qed nagħmel ftit progress.” Anki int tistaʼ. B’attitudni xierqa u bi sforz, tistaʼ titgħallem biex tkun fil-​ħin!

[Nota taʼ taħt]

[Stampi f’paġna 16]

Il-​vizzju li tkun dejjem tard jistaʼ jagħti impressjoni ħażina lill-​imgħallem u juri nuqqas taʼ konsiderazzjoni għal oħrajn

[Stampa f’paġna 17]

Organizzar persunali tajjeb jistaʼ jgħinek ma taħlix ħin