Għala Hawn Tant Nies li Jbatu mid-​Deni tal-​Ħuxlief ?

Minn kittieb għal Stenbaħ! fi Spanja

GĦAJNEJK jibdew jikluk u jdemmgħu, tibda tagħtas il-​ġurnata kollha, imnieħrek il-​ħin kollu jqattar, u tħoss nifsek maqtugħ. X’inhu jiġrilek? Forsi għandek riħ. Iżda jekk jaqbduk dawn is-​sintomi meta tkun fejn jinstab il-​polline, jew it-​trab tad-​dakkir, għandek mnejn li qed tbati mid-​deni tal-​ħuxlief li hu magħruf iktar bħala hay fever. Jekk inhu hekk, m’intix waħdek. In-​numru taʼ nies li jiskopru li għandhom il-​hay fever qed jiżdied kull sena.

“Il-​hay fever m’hu xejn ħlief reazzjoni esaġerata taʼ ġismek kontra sustanza li jikkunsidraha bħala li hi perikoluża,” tirrapporta r-​rivista Mujer de Hoy. “Is-​sistema taʼ l-​immunità tan-​nies li għandhom l-​allerġiji tirrifjuta dawk is-​sustanzi kollha li tikkunsidrahom bħala li huma barranin​—inkluż it-​trab tad-​dakkir​—avolja fir-​realtà dawn m’humiex taʼ ħsara.” U meta s-​sistema taʼ l-​immunità tirreaġixxi żżejjed b’dan il-​mod, din tikkaġuna s-​sintomi irritanti li ġew deskritti fil-​bidu.

Fl-1819, it-​Tabib Ingliż John Bostock kien l-​ewwel wieħed li ddeskriva l-​hay fever. Bostock semma fid-​dettall is-​sintomi irritanti li hu kien ikollu fl-​istaġun tal-​hay fever. Hu kien jemmen li dawn is-​sintomi kienu jiġu meta kien jinqataʼ l-​ħuxlief, jew tiben, frisk, u għalhekk din il-​kundizzjoni ġiet msejħa deni tal-​ħuxlief jew bl-​Ingliż hay fever. Iktar tard skoprew li r-​reazzjoni allerġika kienet titqanqal minn bosta tipi differenti taʼ trab tad-​dakkir. Fil-​bidu tas-​seklu 19, Bostock sab verament ftit każijiet madwar l-​Ingilterra kollha.

Madankollu, illum il-​ġurnata, għala hawn ħafna li jbatu mill-​hay fever? It-​Tabib Javier Subiza, direttur taċ-​Ċentru għall-​Ażżma u l-​Allerġiji f’Madrid, Spanja, isemmi żewġ teoriji li r-​riċerkaturi qegħdin jinvestigaw. Skond teorija minnhom huma l-​magni li jaħdmu bid-​diesel li jikkaġunaw il-​hay fever. Huwa maħsub li l-​partiċelli li joħorġu mid-​diesel maħruq jistgħu jqanqlu l-​azzjoni taʼ l-​allerġeni, sustanzi li joħolqu reazzjoni allerġika. Skond it-​Tabib Juan Kothny Pommer, speċjalista fl-​istudju taʼ l-​allerġiji, “f’pajjiżi żviluppati l-​effetti tal-​hay fever jeffettwaw sa 20 fil-​mija mill-​popolazzjoni, u l-​iktar lil dawk li jgħixu fil-​bliet.”

Teorija oħra tissuġġerixxi li l-​kaġun jistaʼ jkun sempliċement wisq iġjene. ‘Aħna nitwieldu f’ambjent sterilizzat fi sptar, nieklu ikel ħieles mill-​mikrobi, nitlaqqmu kontra ħafna mard, u meta nkunu ma nifilħux mill-​ewwel nibilgħu l-​antibijotiċi. Għalhekk, mit-​tfulija, is-​sistema taʼ l-​immunità tagħna tiġi f’kundizzjoni li tiżviluppa l-​allerġiji,’ jispjega t-​Tabib Subiza.

Jekk int vittma taʼ din ir-​reazzjoni eċċessiva taʼ l-​immunità, tiddisprax! Jekk tanalizza sew x’għandek u tieħu l-​kura t-​tajba, tistaʼ tikkontrolla u ttaffi s-​sintomi irritanti tal-​hay fever, u dawn jaqbduk inqas spiss.