L-​Isfidi li Jiffaċċjaw l-​Ommijiet

“Id-​doveri fundamentali taʼ l-​umanità huma d-​doveri konnessi mad-​dar. . . . Jekk l-​omm ma tagħmilx id-​dover tagħha, ma jkunx hemm ġenerazzjoni oħra, jew inkella jkun hawn ġenerazzjoni li tkun agħar milli kieku ma kinitx teżisti.”​—Theodore Roosevelt, is-​26 president taʼ l-​Istati Uniti.

JIDHER ċar li l-​omm hija essenzjali għall-​ħajja umana, iżda l-​irwol tagħha jinvolvi ferm iktar milli sempliċement iġġib it-​tfal fid-​dinja. Rigward l-​irwol taʼ l-​ommijiet fil-​biċċa l-​kbira mid-​dinja llum, kittieb osserva: “Hija l-​protettriċi ewlenija tas-​saħħa, l-​edukazzjoni, l-​intellett, il-​personalità, il-​karattru, u l-​istabbilità emozzjonali taʼ kull tifel u tifla.”

Wieħed mill-​ħafna rwoli taʼ l-​omm hu dak li tgħallem lil uliedha. L-​ewwel ftit kliem taʼ tarbija u l-​mod kif titkellem titgħallimhom mingħand ommha. Ġeneralment, l-​omm tqattaʼ iktar ħin kuljum maʼ wliedha mis-​sieħeb tagħha, u għalhekk għandu mnejn li hi l-​għalliema ewlenija tagħhom kif ukoll dik li tiddixxiplinahom prinċipalment. B’hekk, il-​proverbju Messikan, “L-​edukazzjoni tibda mal-​ħalib taʼ l-​omm,” iġib unur lill-​irwol importanti taʼ l-​ommijiet.

Il-Ħallieq tagħna, Alla Ġeħova, ukoll jonora lill-​ommijiet. Fil-​fatt, wieħed mill-​Għaxar Kmandamenti, miktubin fuq twavel tal-​ġebel “bis-​sabaʼ taʼ Alla,” iħeġġeġ lit-​tfal biex jonoraw lil missierhom u lil ommhom. (Eżodu 20:12; 31:18; Dewteronomju 9:​10) Iktar minn hekk, proverbju mill-​Bibbja jirreferi għal-​liġi jew ‘it-​tagħlim t’ommok.’ (Proverbji 1:8) Illum kważi kulħadd jirrikonoxxi l-​importanza li tgħallem lit-​tfal matul l-​ewwel tliet snin taʼ ħajjithom, żmien meta l-​biċċa l-​kbira minnhom ikunu fil-​ħarsien taʼ l-​omm.

X’Inhuma Ftit mill-​Isfidi?

Il-​pressjoni biex jaħdmu xogħol sekulari ħalli jgħinu lill-​familja finanzjarjament hija taʼ sfida għal ħafna ommijiet biex jgħallmu lil uliedhom matul is-​snin kruċjali meta jkun qed jifforma l-​karattru tagħhom. Statistiki miġburin mill-​Ġnus Magħquda juru li f’ħafna pajjiżi żviluppati, iktar min-​nofs l-​ommijiet li għandhom tfal taħt it-​tliet snin huma impjegati.

Barra minn dan, l-​ommijiet spiss ikollhom iġorru r-​responsabbiltà tat-​trobbija tat-​tfal waħedhom minħabba li żwieġhom ikunu telqu mid-​dar biex isibu xogħol f’xi belt jew pajjiż ieħor. Per eżempju, huwa rapportat li f’xi reġjuni fl-​Armenja, kważi terz mill-​irġiel siefru biex ifittxu x-​xogħol. Ommijiet oħra jitħallew irabbu t-​tfal waħedhom għaliex ir-​raġel tagħhom ikun abbandunahom jew miet.

F’xi pajjiżi, sfida oħra għal ħafna ommijiet hi li ma jafux skola. Id-​Dipartiment taʼ l-​Affarijiet Ekonomiċi u Soċjali tal-​ĠM jikkalkula li żewġ terzi mit-​876 miljun ruħ fid-​dinja li ma jafux jaqraw huma nisa. Fil-​fatt, skond l-​UNESCO, iktar minn 60 fil-​mija min-​nisa fl-​Afrika, fil-​pajjiżi Għarab, u fl-​Asja t’Isfel u tal-​Lvant huma illetterati. Barra minn hekk, għadd kbir taʼ rġiel jemmnu li lin-​nisa m’hemmx għalfejn tgħallimhom l-​iskola u jemmnu wkoll li dan jagħmilhom mhux addattati għall-​irwol tagħhom li jġibu t-​tfal fid-​dinja.

Ir-rivista Outlook tgħid li f’distrett fl-​istat taʼ Kerala fl-​Indja, fejn it-​tfajliet normalment isiru ommijiet taʼ 15-il sena, l-​ebda raġel ma jrid għarusa li tkun taf l-​iskola. Fil-​Pakistan, pajjiż li hu viċin l-​Indja, it-​tfal subien jingħataw prijorità. It-​trobbija tagħhom tħejjihom biex isibu impjiegi tajbin sabiex ikunu jistgħu jieħdu ħsieb il-​ġenituri tagħhom meta dawn jixjieħu. Mill-​banda l-​oħra, skond il-​ktieb Women’s Education in Developing Countries, “il-​ġenituri ma jonfqux flus fl-​edukazzjoni taʼ wliedhom bniet għax ma jistennewx li dawn se jkunu kapaċi jagħtu kontribut ekonomiku lill-​familja.”

Imbagħad hemm l-​isfida taʼ kif in-​nisa jittrattaw maʼ l-​użanzi lokali. Per eżempju, f’xi pajjiżi, omm hi mistennija li taqbel maʼ użanzi bħalma huma l-​bejgħ taʼ tfajliet żgħar għaż-​żwieġ u l-​qtugħ taʼ l-​organi ġenitali tat-​tfal bniet. Hemm ukoll l-​użanza li tipprojbixxi omm milli tgħallem u tiddixxiplina lil uliedha subien. Għandha omm issegwi użanzi bħal dawn u tħalli t-​tagħlim taʼ wliedha subien f’idejn ħaddieħor?

Fl-artikli li jmiss, se naraw kif xi ommijiet qed jegħlbu dawn l-​isfidi. Se nipprovaw napprezzaw iktar lill-​ommijiet u l-​istat tagħhom u niksbu ħarsa bilanċjata taʼ l-​irwol taʼ l-​omm bħala għalliema taʼ wliedha.

[Kaxxa/Stampa f’paġna 4]

“L-​irwol taʼ l-​omm hu vitali fejn għandu x’jaqsam l-​inkuraġġiment għall-​intelliġenza u l-​kurżità tat-​tfal, kif ukoll għall-​iżvilupp tal-​kreattività tagħhom.”​—Summit Reġjonali fuq id-​Drittijiet tat-​Tfal, Burkina Faso, 1997.

[Stampi f’paġna 3]

L-​ommijiet għandhom sehem importanti fis-​saħħa, l-​edukazzjoni, il-​personalità, u l-​istabbilità emozzjonali taʼ kull tifel u tifla