Il-​Ħarsa tal-​Bibbja

Innamra bil-​Ħsieb li Tiżżewweġ

Julie u Lee kienu qed joħorġu flimkien u kienu determinati li jibqgħu nodfa moralment.a Imma lejla minnhom meta kienu waħedhom, is-​sentimenti sesswali tagħhom bdew jiżdiedu. Fortunatament ġew f’sensihom qabel ma kien tard wisq u evitaw li jagħmlu xi dnub serju.

IL-​QIMA vera tinvolvi iktar milli sempliċement tattendi laqgħa reliġjuża kull ġimgħa. Hi mod taʼ ħajja li jinfluwenza l-​kondotta u l-​livelli morali taʼ dak li jkun. Ġesù Kristu qal li dawk biss li ‘jagħmlu r-​rieda’ t’Alla ħaqqhom l-​approvazzjoni Tiegħu. (Mattew 7:21) Biex nogħġbu lil Alla, għandna bżonn inżommu r-​relazzjoni tagħna mas-​sess oppost onorabbli u ninnamraw bil-​ħsieb li niżżewġu.

Kif tistaʼ żżomm ir-​relazzjoni tiegħek nadifa f’għajnejn Alla, speċjalment meta tqis il-​pressjoni tremenda li hemm fuq il-​koppji biex ma jżommux ir-​relazzjoni tagħhom safja? L-​ewwel, irrikonoxxi li l-​livelli t’Alla ġew stabbiliti fl-​aħjar interess tagħna. It-​tieni, aċċetta l-​verità dwar in-​natura umana. It-​tielet, agħmel limiti ċari għall-​imġiba xierqa. U r-​rabaʼ, żomm lil Alla fir-​relazzjoni tagħkom. Ikkunsidra dawn il-​punti wieħed wieħed.

Livelli Mfasslin għall-​Benefiċċju Tagħna

F’Isaija 48:17, 18, naqraw: “Jien, Ġeħova, jien Alla tiegħek, li ngħallmek għall-​ġid tiegħek, li mmexxik fit-​triq li għandek timxi. O li kieku fil-​fatt tagħti kas il-​kmandamenti tiegħi! Imbagħad il-​paċi tiegħek tkun bħal xmara, u s-​sewwa tiegħek bħall-​mewġ tal-​baħar.”

Iva, il-​kmandamenti u l-​prinċipji li nkitbu fil-​Kelma ispirata t’Alla, il-​Bibbja Mqaddsa, huma għall-​benefiċċju tagħna. (2 Timotju 3:16, 17) Huma evidenza li l-​Ħallieq tagħna verament jimpurtah minna u jridna nkunu ferħanin u nirnexxu fl-​aspetti kollha tal-​ħajja. (Salm 19:7-​10) Hekk tħossok int f’qalbek? Jekk inhu hekk, qed turi l-​għerf veru.

Aċċetta l-​Verità Dwarek Innifsek

Bħal ħabib taʼ veru, Ġeħova hu onest magħna; jgħidilna l-​verità dwarna nfusna. Pereżempju, il-​Kelma tiegħu twissina li “l-​qalb qarrieqa iktar minn kull ħaġa oħra u hi ddisprata. Min jistaʼ jifhimha?” (Ġeremija 17:9) Il-​Bibbja tgħid ukoll: “Min jafda lil qalbu stess hu stupidu, imma dak li jimxi bl-​għerf jeħlisha.”—Proverbji 28:26.

Koppja li qed jinnamraw kif jistgħu juru li qed jafdaw f’qalbhom stess? Mod wieħed hu billi jħallu lilhom infushom jidħlu f’ċirkustanzi fejn ikunu mħajrin li jsiru intimi żżejjed, bħalma għamlu l-​koppja li semmejna fuq. Mod ieħor hu billi ma jagħtux kas il-​pariri għaqlin taʼ ġenituri li jibżgħu minn Alla. Ġenituri bħal dawn jafu li s-​sentimenti sesswali, speċjalment matul iż-​żgħożija, jistgħu jkunu bħal magna b’saħħitha li għandha tiġi kontrollata sew.

Għalhekk, żgħażagħ li ‘jimxu bl-​għerf divin’ jieħdu l-​gwida mingħand il-​ġenituri bis-​serjetà. Iva, jgħożżu l-​pariri taʼ ġenituri li jħobbuhom biżżejjed biex jgħidulhom affarijiet li wliedhom għandhom mnejn ma jkunux iridu jisimgħu. Naturalment, dak li jħobbok l-​iktar hu Missierek tas-​sema, Alla Ġeħova, li jagħtik il-​parir biex ‘tneħħi d-​dwejjaq minn qalbek, u tbiegħed l-​għali minn ġismek.’ (Ekkleżjasti 11:9, 10) Kif tistaʼ tagħmel dan? Billi ma ċċedix għal xewqat mhux xierqa.

Agħmlu Limiti Ċari għall-​Imġiba Tagħkom

“L-​għerf qiegħed ma’ dawk li jikkonsultaw flimkien.” (Proverbji 13:10) Mill-​bidu tar-​relazzjoni tagħhom, koppji għaqlin japplikaw dan il-​kliem billi jaqblu fuq espressjonijiet taʼ affezzjoni li huma xierqa Skritturalment, u billi jkunu determinati li ma jaqbżux dawk il-​limiti. Jekk ikollhom kunfidenza żejda maʼ xulxin jew jafdaw iżżejjed fihom infushom ikunu bħallikieku qed isuqu b’mod perikoluż. Ikun tard wisq li tagħmel riżoluzzjonijiet dwar is-​sigurtà fis-​sewqan meta jkunu qed joħorġuk minn karozza mfarrka.

“Min hu bil-​għaqal jara l-​għawġ u jwarrab” tgħid il-​Bibbja. “Min hu moħħu ħafif jidħol fih u jħallas għalih.” (Proverbji 22:3, Għaqda Biblika Maltija) Il-​koppji jistgħu jevitaw ħafna inkwiet billi joħorġu flimkien maʼ grupp taʼ nies maturi jew maʼ xi ħadd ieħor li jistgħu jafdaw. Il-​ħlas għall-​bluha matul in-​namur jistaʼ jinkludi kuxjenza mtebbgħa, nuqqas taʼ rispett għalik innifsek u għall-​persuna l-​oħra, u mistħija għal kull min ikun involut, inkluż il-​membri tal-​familja. Għalhekk, kunu għaqlin; ftiehmu li tapplikaw il-​livelli Skritturali u żommu magħhom!

Agħmel lil Ġeħova Parti mill-​“Ħabel bi Tlieta”

Iż-​żwieġ qisu ħabel bi tlieta, u Alla hu l-​parti primarja. “Ħabel bi tlieta ma jinqatax malajr fi tnejn,” jgħid Ekkleżjasti 4:12. L-​istess prinċipju jistaʼ japplika għall-​koppji li qed joħorġu flimkien. Dawk li jridu l-​barka t’Alla fuq ir-​relazzjoni tagħhom jirċievu dik il-​barka meta jibqgħu qrib Alla b’mod individwali. Salm 1:1-​3 jgħid: “Hieni l-​bniedem li ma mexiex fuq il-​parir tal-​ħżiena . . . Imma li l-​għaxqa tiegħu hi fil-​liġi taʼ Ġeħova, u lejl u nhar jaqra u jimmedita fuq il-​liġi tiegħu . . . , u jirnexxi f’kulma jagħmel.”

Iva, suċċess veru fil-​ħajja, inkluż suċċess fl-​għerusija u ż-​żwieġ, jiġi meta nagħmlu l-​affarijiet bil-​mod kif iridhom Ġeħova. Wara kollox, hu l-​Ħallieq tagħna, u l-​attrazzjoni romantika u ż-​żwieġ huma għotjiet prezzjużi mingħandu. Għalhekk, jixraq li nagħtuhom l-​akbar rispett.—Ġakbu 1:17.

[Nota taʼ taħt]

QATT ĦSIBT DWAR DAN?

● Kif nafu li Alla jrid l-​aħjar għalina? —Isaija 48:17, 18.

● Liema verità dwarna nfusna għandna naċċettaw?—Ġeremija 17:9.

● X’inhu s-​sigriet għal suċċess matul in-​namur u, iktar tard, fiż-​żwieġ? —Salm 1:1-​3.

[Stampa f’paġna 31]

Mill-​bidu tar-​relazzjoni tagħhom, koppji għaqlin jaqblu fuq espressjonijiet taʼ affezzjoni li huma xierqa Skritturalment u jkunu determinati li ma jaqbżux dawk il-​limiti