Kif il-​Miżżewġin Jistgħu Jevitaw il-​Vizzju li Ma Jkellmux lil Xulxin

L-​ISFIDA

Tnejn min-​nies li wiegħdu li jħobbu lil xulxin kif jaslu sal-​punt li ma jkellmux lil xulxin għal sigħat jew saħansitra għal ġranet sħaħ? Forsi bejnhom u bejn ruħhom jgħidu, ‘Għall-​inqas ma nkomplux niġġieldu.’ Imma xorta waħda, il-​kwistjoni ma tkunx ġiet solvuta, u t-​tnejn li huma ma jħossuhomx komdi.

GĦALA JIĠRI DAN

Tpattija. Xi miżżewġin jużaw is-​silenzju biex ipattuha lil xulxin. Pereżempju, ejja ngħidu li r-​raġel jagħmel pjanijiet għal tmiem il-​ġimgħa mingħajr ma jiddiskutihom maʼ martu. Meta hi ssir taf, tirrabja u takkużah li ma jimpurtahx mis-​sentimenti tagħha. Hu jgħidilha li hi tieħu għaliha mix-​xejn. Martu tirrabja u titlaq ’l hemm u ma tkunx trid tkellmu iżjed. Hi bħallikieku tkun qed tgħidlu, “Int weġġajtni u jien se npattihielek.”

Manipulazzjoni. Xi wħud jużaw is-​silenzju biex jieħdu dak li jridu. Pereżempju, immaġina li raġel u martu jippjanaw vjaġġ u l-​mara tkun trid tieħu lill-​ġenituri tagħha magħhom. Ir-​raġel joġġezzjona. Hu jgħidilha, “Jien lilek iżżewwiġt u mhux ’l ommok u ’l missierek.” Imbagħad hu ma jkunx irid ikellimha, u jinjoraha bit-​tama li ċċedi u tagħmel dak li jixtieq hu.

M’għandniex xi ngħidu, xi kultant meta tħoss li se titlef it-​tempra jkun tajjeb li ma tkomplix targumenta u tieħu l-​ħin biex tikkalma. Dan it-​tip taʼ silenzju jistaʼ jkun taʼ benefiċċju. Il-​Bibbja tgħid li hemm “żmien li toqgħod kwiet.” (Ekkleżjasti 3:7) Imma meta s-​silenzju jintuża biex tpatti jew timmanipula, il-​fatt li ma tkunx trid titkellem mhux talli ma jwaqqafx il-​ġlieda imma talli jġib fix-​xejn ir-​rispett li l-​koppja jkollhom lejn xulxin. Kif tistaʼ tevita li dan jiġri lilek?

DAK LI TISTAʼ TAGĦMEL

L-​ewwel pass biex tikser is-​silenzju taʼ bejnietkom hu li tagħraf eżattament għala tagħmel hekk. Din hi biss tattika li, l-​iktar l-​iktar, taħdem għal ftit imma ma ssolvix il-​problema. Veru, billi ma titkellimx tistaʼ tħoss li pattejtha jew ġegħelt lill-​parti l-​oħra ċċedi għal dak li tkun xtaqt int. Imma huwa dan il-​mod kif trid tittratta lil xi ħadd li wegħedtu li tħobbu? Hemm modi aħjar kif issolvi n-​nuqqas taʼ qbil.

Uża d-​Dixxerniment. Il-​Bibbja tgħid li l-​imħabba “ma tiġix provokata.” (1 Korintin 13:4, 5) Ibqgħu kalmi meta xi ħadd minnkom fir-​rabja jgħid xi affarijiet bħal: “Int qatt ma tismaʼ” jew “Int dejjem tard.” Minflok, ara x’verament ikun ifisser dan il-​kliem. Pereżempju, “Int qatt ma tismaʼ” jistaʼ jkun li jfisser “Inħoss li int ma tagħtix kas l-​opinjoni tiegħi.”—Prinċipju Bibliku: Proverbji 14:29.

Baxxi leħnek. Iktar ma tkompli targumenta, iktar ikompli jiħrax l-​argument. Mill-​banda l-​oħra, int tistaʼ tagħmel xi ħaġa biex ma tħallix id-​diskussjoni ssir waħda taħraq. X’tistaʼ tagħmel? Il-​ktieb Fighting for Your Marriage jgħid li żewġ affarijiet li huma t’għajnuna kbira biex tittaffa t-​tensjoni u biex il-​problema ma tikbirx huma li tbaxxi leħnek u tirrikonoxxi l-​opinjoni tal-​parti l-​oħra. Spiss hekk biss ikun hemm bżonn.—Prinċipju Bibliku: Proverbji 26:20.

Għid “aħna,” mhux “jien.” Il-​Bibbja tgħid: “Ħalli ħadd ma jibqaʼ jfittex dak li jaqbel lilu, imma dak li jaqbel lil ħaddieħor.” (1 Korintin 10:24) Jekk tqis lill-​parti l-​oħra fiż-​żwieġ bħala membru tal-​istess tim minflok bħala opponent, ikun hemm inqas ċans li tieħu għalik, li targumenta, u li mbagħad tispiċċa ma tkellimx lill-​parti l-​oħra.—Prinċipju Bibliku: Ekkleżjasti 7:9.

Il-​Bibbja tgħid: “Kull wieħed minnkom għandu jħobb lil martu bħalu nnifsu; mill-​banda l-​oħra, il-​mara għandu jkollha rispett profond lejn żewġha.” (Efesin 5:33) Meta tnejn miżżewġin ma jkellmux lil xulxin ikunu qed imorru kontra dan il-​parir. Għala ma tiftehmux bejnietkom biex ma tħallux dan jiġri fiż-​żwieġ tagħkom?