X’Inhu l-Istress?

L-​istress hu r-​reazzjoni taʼ ġismek għal sitwazzjoni diffiċli. Moħħok jibgħat ħafna ormoni lejn il-​partijiet kollha taʼ ġismek. Dawn iżidulek it-​taħbit tal-​qalb, jgħollulek il-​pressjoni tad-​demm, jgħaġġlulek in-​nifs, u jwebbsulek il-​muskoli. Qabel ma tkun taf x’qed jiġri, ġismek ikun lest għall-​azzjoni. Meta l-​perjodu stressanti jkun għadda, ġismek ma jibqax fuq “allarm” u jerġaʼ lura għan-​normal.

STRESS TAJJEB U ĦAŻIN

L-​istress hu reazzjoni naturali li tgħinek tittratta maʼ sitwazzjonijiet taʼ sfida jew perikolużi. Ir-​reazzjoni tal-​istress tibda fil-​moħħ. Stress taʼ benefiċċju jgħinek taġixxi jew tirreaġixxi malajr. Ċertu ammont taʼ stress jistaʼ wkoll jgħinek tilħaq il-​miri tiegħek jew tagħmel l-​affarijiet aħjar, forsi matul xi eżami, intervista għal xogħol, jew xi attività sportiva.

Madankollu, stress fit-​tul, estrem, jew kroniku jistaʼ jkun taʼ ħsara għalik. Meta ġismek b’mod ripetut jew il-​ħin kollu jkun fuq “allarm,” int għandek mnejn tbati fiżikament, emozzjonalment, u mentalment. L-​imġiba tiegħek, inkluż il-​mod kif tittratta lil oħrajn, jistaʼ jkun li tinbidel. Nies li jbatu minn stress kroniku spiss jibdew jixorbu ħafna alkoħol, jużaw drogi illegali, jabbużaw mill-​mediċina, jieklu żżejjed, ipejpu, u jaqbdu vizzji oħra. Ukoll, jistaʼ jwassal għal dipressjoni, għeja kbira, jew ħsibijiet taʼ suwiċidju.

Waqt li l-​istress jistaʼ ma jaffettwax lil kulħadd bl-​istess mod, jistaʼ jwassal għal varjetà kbira taʼ mard. Ukoll, jistaʼ jaffettwa kważi kull parti tal-​ġisem.