Tibda Ħajja Iebsa

BARRA l-​ġnien tal-​Għeden, Adam u Eva kellhom ħafna problemi. Kellhom jaħdmu iebes biex jieklu. Minflok siġar tal-​frott mill-​isbaħ, raw ħafna xewk u ħaxix ħażin jikber madwarhom. Hekk ġara meta Adam u Eva m’obdewx lil Alla u ma baqgħux il-​ħbieb Tiegħu.

Imma agħar minn hekk, Adam u Eva bdew imutu. Ftakar li Alla kien wissiehom li kienu se jmutu jekk jieklu l-​frott mis-​siġra li qalilhom ma jiħdux minnha. Allura, dakinhar stess li kielu bdew imutu. Kemm kienu boloh li ma semgħux minn Alla!

It-​tfal t’Adam u Eva kollha twieldu wara li Alla tefaʼ l-​ġenituri tagħhom ’il barra mill-​ġnien tal-​Għeden. Dan ifisser li t-​tfal ukoll kellhom jixjieħu u jmutu.

Jaħasra, li kieku Adam u Eva semgħu minn Ġeħova, il-​ħajja kienet se tkun mimlija ferħ kemm għalihom u kemm għat-​tfal tagħhom! Kieku kienu jgħixu kollha għal dejjem ferħanin fuq l-​art. Ħadd ma kien se jkollu jixjieħ, jimrad, u jmut.

Alla jrid li n-​nies jgħixu ferħanin għal dejjem, u Hu jwiegħed li xi darba hekk se jiġri. Mhux biss l-​art kollha se tkun sabiħa ħafna, imma n-​nies kollha se jkunu fʼsaħħithom. U kulħadd fuq l-​art se jkun ħabib tajjeb maʼ kulħadd u m’Alla.

Imma Eva ma baqgħetx ħabiba t’Alla. Għalhekk, kien diffiċli ħafna għaliha biex ikollha t-​tfal. Għaddiet minn ħafna wġigħ. Żgur li ġabet ħafna niket fuqha nfisha għaliex m’obdietx lil Ġeħova, hux veru?

Adam u Eva kellhom ħafna tfal. Meta twieled l-​ewwel tifel tagħhom, huma semmewh Kajjin. It-​tieni tifel semmewh Abel. Xi ġralhom dawn it-​tfal? Int taf?