Sultan Ħażin Jaħkem l-Eġittu

L-​IRĠIEL hawnhekk qed iġiegħlu lin-​nies jaħdmu. Ħares lejn dak ir-​raġel li qed isawwat lil wieħed mill-​ħaddiema bi frosta! Il-​ħaddiema huma mill-​familja taʼ Ġakobb, u jissejħu Iżraelin. U l-​irġiel li qed iġegħluhom jaħdmu huma Eġizzjani. L-​Iżraelin saru l-​ilsiera tal-​Eġizzjani. Dan kif ġara?

Għal ħafna snin, il-​familja kbira taʼ Ġakobb għexu fil-​paċi fl-​Eġittu. Ġużeppi, li kien l-​iktar raġel importanti fl-​Eġittu wara l-​Fargħun, ħa ħsiebhom. Imma mbagħad, Ġużeppi miet. U Fargħun ġdid, li ma kienx iħobb lill-​Iżraelin, sar is-​sultan fl-​Eġittu.

Għalhekk, dan il-​Fargħun ħażin għamel lill-​Iżraelin ilsiera. U poġġa xi rġiel fuqhom li kienu kattivi u bla qalb. Huma ġiegħlu lill-​Iżraelin jaħdmu iebes ħafna ħalli jibnu bliet għall-​Fargħun. Imma xorta baqgħu jiżdiedu l-​Iżraelin. Wara xi żmien, l-​Eġizzjani bdew jibżgħu li l-​Iżraelin kienu se jiżdiedu wisq u jsiru b’saħħithom ħafna.

Allura taf x’għamel il-​Fargħun? Tkellem man-​nisa li kienu jgħinu lill-​ommijiet Iżraelin biex ikollhom it-​trabi, u qalilhom: ‘Tridu toqtlu kull tarbija tifel li jitwieled.’ Imma dawn kienu nisa tajbin, u ma kinux joqtlu lit-​trabi.

Għalhekk, il-​Fargħun ta dan il-​kmand lill-​poplu kollu tiegħu: ‘Ħudu t-​trabi subien tal-​Iżraelin u oqtluhom. Biss, it-​trabi bniet ħalluhom ħajjin.’ Dan kien kmand tassew tal-​biżaʼ, hux veru? Ejja naraw kif wieħed mit-​trabi subien ġie salvat.