Kapitlu 10

L-​Ispirti Mill-​Agħar Huma Potenti

1. Għala ħafna nies jemmnu li jistgħu jitkellmu mal-​mejtin?

TAʼ SPISS xi nies jgħidu li tkellmu mal-​mejtin. Il-​mejjet James A. Pike, li kien isqof Episkopali prominenti, qal li kien tkellem maʼ ibnu l-​mejjet, Jim. Skond Pike, ibnu qallu: “Jien għandi folol sħaħ taʼ nies madwari u jdejn bħal li kieku qegħdin jgħolluni ’l fuq . . . Kont tant imdejjaq sakemm stajt ninformak.”

2. (a) Għala ħadd ma jistaʼ jitkellem mal-​mejtin? (b) Mela liema mistoqsijiet iqumu?

² Ladarba esperjenzi bħal dawn huma tant komuni, huwa evidenti li ħafna nies tkellmu maʼ xi ħadd mid-​dinja taʼ l-​ispirti. Imma ma tkellmux mal-​mejtin. Il-​Bibbja hija ċara ħafna meta tgħid: “Inkwantu għall-​mejtin, m’huma konxji taʼ xejn affattu.” (Ekkleżjasti 9:5) Mela jekk m’humiex il-​mejtin li qegħdin jitkellmu mid-​dinja taʼ l-​ispirti, min huma dawk li qegħdin jitkellmu? Min huma dawk li qegħdin jagħmluha taʼ bir-​ruħhom li huma persuni mejtin?

3. (a) Min huma dawk li jagħmluha taʼ bir-​ruħhom li huma persuni mejtin, u għala? (b) L-​ispirti mill-​agħar lil min taʼ spiss jagħtu tagħrif?

³ L-ispirti mill-​agħar. Dawn l-​ispirti, jew demonji, huma l-​anġli li ngħaqdu maʼ Satana fl-​irvell kontra Alla. Għala jagħmluha taʼ bir-​ruħhom li huma nies li mietu? Huwa biex iġibu ’l quddiem l-​idea li l-​mejtin għadhom ħajjin. L-​ispirti mill-​agħar ukoll wasslu lil ħafna biex jemmnu l-​gidba li l-​mewt hija biss bidla għal ħajja oħra. Biex iferrxu din il-​gidba, l-​ispirti mill-​agħar jipprovdu lil medji taʼ l-​ispirti, lil dawk li jaqraw ix-​xorti u lis-​sħaħar, b’għarfien speċjali li donnu jkun ġej mingħand persuni li jkunu mietu.

JAGĦMEL TAʼ BIR-​RUĦU LI HUWA L-​MEJJET SAMWEL

4. (a) Is-Sultan Sawl għala kien iddisprat għall-​għajnuna? (b) X’kienet tgħid il-​liġi t’Alla rigward il-​medji taʼ l-​ispirti u dawk li jaqraw ix-​xorti?

⁴ Hemm eżempju fil-​Bibbja taʼ spirtu mill-​agħar li għamel taʼ bir-​ruħu li kien il-​profeta mejjet t’Alla, Samwel. Dan kien fis-​sena 40 tar-​renju tas-​Sultan Sawl. Armata potenti taʼ Filistej kienet ġiet kontra l-​armata Iżraelita taʼ Sawl u dan kien beżgħan ħafna. Sawl kien jaf il-​liġi t’Alla: “Iddurux lejn il-​medji taʼ l-​ispirti, u tikkonsultawx maʼ dawk li b’mod professjonali jbassru ġrajjiet, sabiex issiru mhux nodfa bihom.” (Levitiku 19:31) Maż-​żmien, madankollu, Sawl tbiegħed minn Jehovah. Għalhekk Samwel, li f’dak iż-​żmien kien ħaj, irrifjuta li jarah iżjed. (1 Samwel 15:35) U issa, f’dan iż-​żmien taʼ inkwiet, is-​Sultan Sawl ma kienx jaf fejn se jaqbad jagħti rasu għaliex Jehovah ma kienx qiegħed jismaʼ l-​agħjat tiegħu għall-​għajnuna.

5. (a) Sawl fejn mar għall-​għajnuna? (b) Il-​medju taʼ l-​ispirti x’kellha l-​ħila tagħmel?

⁵ Sawl tant kien ħerqan biex ikun jaf x’se jiġri li mar għand medju taʼ l-​ispirti f’En-dor. Hi kellha l-​ħila ġġib forma taʼ bniedem li hi setgħet tara. Mid-​deskrizzjoni tagħha taʼ dik il-​forma, Sawl identifikaha bħala “Samwel.” Għal dan, l-​ispirtu, li kien qiegħed jilgħabha taʼ Samwel, tkellem: “Għala ddisturbajtni billi ġibtni hawn fuq?” Sawl wieġeb: “Qiegħed f’qagħda mwiegħra ferm, peress li l-​Filistej qegħdin jiġġieldu kontra tiegħi.” L-​ispirtu wieġeb: “Għala, allura, tistaqsi lili, meta Jehovah innifsu telqek u jagħti prova li hu l-​avversarju tiegħek?” L-​ispirtu mill-​agħar, li kien qiegħed jippretendi li kien il-​mejjet Samwel, imbagħad issokta jgħid lil Sawl li kien se jinqatel fil-​battalja mal-​Filistej.​—1 Samwel 28:​3-19.

6. Għala ma setax kien Samwel li tkellem maʼ Sawl?

⁶ Ovvjament, ma kienx tassew lil Samwel li l-​medju taʼ l-​ispirti kienet ikkuntattjat. Samwel kien mejjet, u mal-​mewt dak li jkun “jerġaʼ lura lejn l-​art tiegħu; f’dak il-​jum ħsibijietu tassew jgħibu.” (Salm 146:4) Ftit tal-​ħsieb fuq din il-​kwistjoni jkompli jurina li l-​leħen ma kienx tassew dak tal-​mejjet Samwel. Samwel kien il-​profeta t’Alla. Mela kien oppona lill-​medji taʼ l-​ispirti. U, bħalma rajna, waqt li kien ħaj ma riedx jitkellem iktar maʼ Sawl id-​diżubbidjent. Mela, allura, kieku Samwel kien għadu ħaj, kien iħalli lill-​medju taʼ l-​ispirti tirranġalu biex jiltaqaʼ maʼ Sawl? Aħseb ukoll: Jehovah ma kien ried jagħti ebda tagħrif lil Sawl. Setgħet medju taʼ l-​ispirti ġġiegħel lil Jehovah jagħti messaġġ lil Sawl permezz tal-​mejjet Samwel? U kieku l-​ħajjin setgħu fil-​fatt jitkellmu mal-​maħbubin tagħhom li mietu, żgur li Alla taʼ mħabba ma kienx se jgħidilhom li kienu saru “mniġġsin” għax daru lejn medju taʼ l-​ispirti.

7. Alla liema twissija ta biex jipproteġi lill-​poplu tiegħu mill-​ispirti mill-​agħar?

⁷ Il-fatt huwa li spirti mill-​agħar huma determinati li jagħmlu ħsara lill-​bnedmin, u għalhekk Jehovah jagħti twissijiet biex jipproteġi lill-​qaddejja tiegħu. Aqra t-​twissija li ġejja lill-​ġens taʼ Iżrael. Din tagħtik idea taʼ xi metodi li jużaw id-​demonji biex jiżvijaw lin-​nies. Il-​Bibbja tgħid: “M’għandux jinstab ġo fik . . . xi ħadd li juża t-​tbassir, xi ħadd li jipprattika l-​maġija jew xi ħadd li jfittex għal għeliem jew xi saħħâr, jew wieħed li jagħmel magħmul lil oħrajn jew xi ħadd li jikkonsulta maʼ medju taʼ l-​ispirti jew maʼ bassâr tal-​ġrajjiet professjonali jew xi ħadd li jistħarreġ mingħand il-​mejtin. Għax kulmin qiegħed jagħmel dawn l-​affarijiet hu ħaġa moqżieża għal Jehovah.” (Dewteronomju 18:​10-12) Għandna nkunu rridu nfittxu kif l-​ispirti mill-​agħar qegħdin jagħmlu l-​ħsara lil xi nies illum u kif nistgħu nipproteġu rwieħna minnhom. Imma qabel ma nsiru nafu dwar dan, ejjew nikkunsidraw meta u kif dawn l-​ispirti mill-​agħar ingħataw bidu.

ANĠLI LI SARU SPIRTI MILL-​AGĦAR

8. (a) Satana lil min ġiegħel ukoll jirribella kontra Alla? (b) Wara li waqfu minn xogħolhom fis-​sema, fejn marru?

⁸ Billi gideb lil Eva fil-​ġnien t’Għeden, ċertu ħlejqa anġelika għamel lilu nnifsu l-​ispirtu mill-​agħar Satana x-​Xitan. Wara beda jipprova jġiegħel lil anġli oħrajn biex huma wkoll iduru kontra Alla. Maż-​żmien irnexxielu. Xi anġli waqfu mix-​xogħol li Alla kien tahom biex jagħmlu fis-​sema, u niżlu fuq l-​art u għamlu għalihom infushom iġsma tal-​laħam bħal dawk tal-​bnedmin. Id-​dixxiplu Kristjan Ġuda kiteb dwarhom meta semmaʼ “l-​anġli li ma żammewx il-​pożizzjoni oriġinali tagħhom imma abbandunaw il-​post xieraq tagħhom stess fejn jgħammru.” (Ġuda 6) Għala ġew fuq l-​art? Liema xewqa żbaljata poġġielhom Satana f’qalbhom biex ġegħilhom iħallu l-​pożizzjonijiet mill-​aħjar li kellhom fis-​sema?

9. (a) L-anġli għala niżlu fl-​art? (b) Il-​Bibbja kif turi li dak li għamlu kien ħażin?

⁹ Il-Bibbja tgħarrafna meta tgħid: “Ulied dak Alla veru bdew jinnotaw lill-​ulied bniet tal-​bnedmin, li kienu sbieħ; u bdew jieħdu nisa għalihom infushom, jiġifieri, dawk kollha li għażlu.” (Ġenesi 6:2) Iva, l-​anġli libsu iġsma tal-​laħam, u ġew fuq l-​art biex ikollhom relazzjonijiet sesswali maʼ nisa sbieħ. Imma relazzjonijiet taʼ mħabba bħal dawn kienu żbaljati għall-​anġli. Dan kien att taʼ diżubbidjenza. Il-​Bibbja tindika li dak li għamlu kien żbaljat daqs l-​atti omosesswali tan-​nies taʼ Sodom u Gomorra. (Ġuda 6, 7) X’irriżulta?

10, 11. (a) L-anġli xi kwalità taʼ tfal kellhom? (b) L-​iġganti xi ġralhom meta ġie d-​dilluvju? (ċ) L-​anġli xi ġralhom fi żmien id-​dilluvju?

¹⁰ Sewwa, lil dawn l-​anġli u lin-​nisa tagħhom tweldulhom trabi. Imma dawn it-​trabi kienu differenti. Baqgħu jikbru u jikbru sakemm saru ġganti, iva, ġganti mill-​agħar. Il-​Bibbja ssejħilhom “uħud setgħanin li kienu mill-​qedem, l-​irġiel taʼ fama.” Dawn l-​iġganti pprovaw iġiegħlu lil kulħadd isir ħażin bħalma kienu huma. B’riżultat taʼ dan, il-​Bibbja tgħid li “l-​​ħażen tal-​bniedem kien kotran fl-​art u kull xaqliba tal-​ħsibijiet taʼ qalbu kienet biss ħażina l-​ħin kollu.” (Ġenesi 6:​4, 5) Għalhekk Jehovah ġab id-​dilluvju. L-​iġganti, jew “Nefilim,” u n-​nies mill-​agħar kollha ġew mgħarrqin. Imma xi ġralhom l-​anġli li kienu ġew fuq l-​art?

¹¹ Huma m’għerqux. Warrbu l-​iġsma tal-​laħam tagħhom u marru lura lejn is-​sema bħala spirti. Imma ma reġgħux tħallew isiru parti mill-​organizzazzjoni t’Alla t’anġli qaddisin. Minflok, il-​Bibbja tgħid li “Alla ma żammx lura milli jikkastiga lill-​anġli li dinbu, imma, billi tefagħhom ġewwa Tartarus, ikkunsinnahom f’ħofor taʼ dlam ċappa biex ikunu riservati għall-​ġudizzju.”​—2 Pietru 2:4.

12. (a) L-anġli mill-​agħar xi ġralhom meta marru lura fis-​sema? (b) Għala ma jistgħux jieħdu mill-​ġdid iġsma umani? (ċ) Mela issa x’qegħdin jagħmlu?

¹² Dawn l-​anġli mill-​agħar ma ġewx mitfugħin f’post litterali msejjaħ Tartarus. Minflok, il-​kelma Tartarus, li f’xi Bibbji hija tradotta b’mod żbaljat “infern,” tirreferi għall-​kundizzjoni umiljanti jew midinba taʼ dawn l-​anġli. Huma ġew maqtugħin mid-​dawl spiritwali taʼ l-​organizzazzjoni t’Alla, u għandhom biss qerda taʼ dejjem tistenniehom. (Ġakbu 2:19; Ġuda 6) Mid-​dilluvju ’l hawn, Alla ma ppermettiex lil dawn l-​anġli demoniċi li jieħdu iġsma tal-​laħam, u għalhekk ma jistgħux jissodisfaw direttament ix-​xewqat sesswali u mhux naturali tagħhom. Madankollu, għadhom jistgħu jeżerċitaw qawwa perikoluża fuq l-​irġiel u n-​nisa. Fil-​fatt, bil-​għajnuna taʼ dawn id-​demonji Satana qiegħed “jiżvija lill-​art abitata kollha kemm hija.” (Rivelazzjoni 12:9) Iż-​żjieda kbira llum fil-​kriminalità sesswali, vjolenza u għemil ħażin ieħor turi l-​bżonn tagħna li ngħassu biex ma niġux żvijati minnhom.

KIF L-​ISPIRTI MILL-​AGĦAR JIŻVIJAW

13. (a) L-ispirti mill-​agħar kif jiżvijaw? (b) X’inhu l-​ispiritiżmu, u l-​Bibbja x’tgħid dwaru?

¹³ Iktar kmieni tgħallimna li Satana, bħala “l-​alla taʼ din is-​sistema t’affarijiet,” juża l-​gvernijiet dinjin u r-​reliġjon falza biex lin-​nies iżommhom fl-​għama għall-​veritajiet tal-​Bibbja. (2 Korintin 4:4) Mod importanti ieħor li bih l-​ispirti mill-​agħar jiżvijaw lill-​irġiel u n-​nisa huwa permezz taʼ l-​ispiritiżmu. X’inhu l-​ispiritiżmu? Huwa li wieħed jikkuntattja maʼ l-​ispirti mill-​agħar, jew direttament jew permezz taʼ medju uman. L-​ispiritiżmu jġib lil dak li jkun taħt l-​influwenza tad-​demonji. Il-​Bibbja twissina biex inżommu ħelsin minn kull drawwa li għandha x’taqsam maʼ l-​ispiritiżmu.​—Galatin 5:​19-21; Rivelazzjoni 21:8.

14. (a) It-tbassir x’inhu? (b) Il-​Bibbja x’tgħid dwaru?

¹⁴ It-tbassir huwa għamla komuni ħafna taʼ spiritiżmu. Huwa d-​drawwa taʼ li wieħed jipprova jitkixxef dwar il-​futur, jew dwar ħaġa m’hijiex magħrufa, bil-​għajnuna taʼ spirti li ma jidhrux. Dan jidher minn dak li kiteb id-​dixxiplu Kristjan Luqa: “Ċerta qaddejja bi spirtu, demonju taʼ tbassir, iltaqgħet magħna. Hi kienet tipprovdi ħafna qligħ lis-​sidien tagħha billi tipprattika l-​arti tat-​tbassir.” L-​appostlu Pawlu kellu l-​ħila jeħles lit-​tfajla mill-​qawwa taʼ dan l-​ispirtu mill-​agħar, u hi ma setgħetx iżjed tbassar il-​futur.​—Atti 16:​16-19.

15. (a) X’inhuma xi affarijiet li għandhom x’jaqsmu maʼ l-​ispiritiżmu? (b) Għala huwa perikoluż li tieħu sehem f’affarijiet bħal dawn?

¹⁵ Ħafna nies huma interessati fl-​ispiritiżmu minħabba li huwa misterjuż u stramb. Dan jaffaxxinahom. Għalhekk jinvolvu ruħhom fis-​seħer, fil-​prattika tal-​vudu, fl-​ipnotiżmu, fil-​maġija, fl-​astroloġija, fil-​Ouija boards jew xi ħaġa oħra li għandha x’taqsam maʼ l-​ispiritiżmu. Għandhom mnejn jaqraw xi kotba dwar dawn l-​affarijiet, jew imorru jaraw films jew jaraw programmi fuq it-​televixin dwarhom. Għandhom mnejn saħansitra jattendu f’xi laqgħa fejn il-​medju jipprova jikkuntattja lid-​dinja taʼ l-​ispirti. Imma dan kollu m’huwiex għaqli għal dak li jrid jaqdi lil dak Alla veru. Huwa wkoll perikoluż. Dan jistaʼ jwassal għal inkwiet kbir issa. Ukoll, Alla se jagħmel ħaqq u jwarrab minnu lil dawk kollha li jipprattikaw l-​ispiritiżmu.​—Rivelazzjoni 22:15.

16. Il-Bibbja kif turi li l-​Kristjani għandhom ġlieda kontra spirti mill-​agħar?

¹⁶ Saħansitra meta wieħed jagħmel kulma jistaʼ biex iżomm ħieles mill-​ispiritiżmu, xorta waħda jistaʼ jiġi attakkat minn spirti mill-​agħar. Ftakar li Ġesù Kristu semaʼ l-​leħen tax-​Xitan innifsu meta ttantah biex jikser il-​liġi t’Alla. (Mattew 4:​8, 9) Qaddejja t’Alla oħrajn ukoll ġew attakkati b’dan il-​mod. L-​appostlu Pawlu qal: “Għandna sarâr . . . kontra l-​forzi taʼ l-​ispirti mill-​agħar fl-​imkejjen tas-​sema.” Dan ifisser li kull qaddej t’Alla jrid ‘jieħu l-​libsa sħiħa tal-​ħadid mingħand Alla, biex [hu] jkun jistaʼ jirreżisti.’​—Efesin 6:​11-13.

NIRREŻISTU L-​ATTAKKI TAʼ SPIRTI MILL-​AGĦAR

17. X’għandek tagħmel jekk “leħen” mid-​dinja taʼ l-​ispirti jkellmek?

¹⁷ X’għandek tagħmel jekk “leħen” mid-​dinja taʼ l-​ispirti jkellmek? X’jiġri jekk dan il-​“leħen” jippretendi li huwa xi wieħed mill-​qraba li jkun miet jew xi spirtu tajjeb? Sewwa, x’għamel Ġesù meta l-​“ħakkiem tad-​demonji” kellmu? (Mattew 9:34) Hu qal: “Mur ’l hemm, Satana!” (Mattew 4:10) Int ukoll tistaʼ tagħmel bħalu. Ukoll, tistaʼ ssejjaħ lil Jehovah għall-​għajnuna. Itlob għajjat u uża l-​isem t’Alla. Ftakar li hu b’saħħtu iktar mill-​ispirti mill-​agħar. Segwi din il-​korsa għaqlija. Tagħtix widen għal ilħna bħal dawn mid-​dinja taʼ l-​ispirti. (Proverbji 18:10; Ġakbu 4:7) Dan ma jfissirx li kull min jismaʼ xi “ilħna” jkunu qegħdin ikellmuh id-​demonji. Xi drabi, is-​smigħ taʼ ilħna jistaʼ jiġi attribwit lil xi mard fiżiku jew mentali.

18. X’eżempju tal-​Kristjani bikrin f’Efesu huwa tajjeb li wieħed isegwi jekk irid jinqataʼ mill-​ispiritiżmu?

¹⁸ Għandu mnejn f’xi żmien int kont tieħu sehem f’xi drawwa taʼ l-​ispiritiżmu u issa trid tinqataʼ. X’tistaʼ tagħmel? Sewwa, ikkunsidra l-​eżempju taʼ Kristjani bikrin f’Efesu. Wara li aċċettaw il-​“kelma taʼ Jehovah” ippridkata mill-​appostlu Pawlu, il-​Bibbja tgħid: “Għadd sostanzjali minn dawk li pprattikaw l-​arti tal-​maġija ġabu l-​kotba tagħhom flimkien u ħarquhom quddiem kulħadd.” U dawn il-​kotba kienu jiswew 50,000 biċċa tal-​fidda! (Atti 19:​19, 20) Bħal dawk li saru segwaċi taʼ Kristu f’Efesu, jekk għandek xi oġġetti fil-​pussess tiegħek li għandhom x’jaqsmu direttament maʼ l-​ispiritiżmu l-​korsa għaqlija hija li teqridhom jiswew kemm jiswew.

19. (a) Il-biċċa l-​kbira tan-​nies li jieħdu sehem fl-​ispiritiżmu x’ma jafux? (b) Jekk irridu ngħixu għal dejjem fl-​hena fuq l-​art, x’irridu nagħmlu?

¹⁹ Ladarba llum hemm tant interess f’dak li huwa stramb u misterjuż, iktar u iktar nies qegħdin jinvolvu ruħhom fl-​ispiritiżmu. Il-​biċċa l-​kbira minn dawn, madankollu, ma jafux li fil-​fatt qegħdin jinvolvu ruħhom maʼ spirti mill-​agħar. Dan m’huwiex xi logħob innoċenti. L-​ispirti mill-​agħar għandhom qawwa li jweġġgħu u jagħmlu ħsara. Huma feroċi. U qabel ma Kristu jaqfilhom fil-​qerda għal dejjem, qegħdin jagħmlu kulma jistgħu biex iġibu lill-​bnedmin taħt il-​qawwa mill-​agħar tagħhom. (Mattew 8:​28, 29) Mela jekk trid tgħix għal dejjem fl-​hena fuq l-​art wara li jitneħħa l-​ħażen kollu, teħtieġ li żżomm ħieles mill-​qawwa tad-​demonji billi żżomm ’il bogħod minn kull xorta taʼ spiritiżmu.

[Stampa f’paġna 91]

Il-​medju taʼ l-​ispirti t’En-dor lil min ikkuntattjat?

[Stampi f’paġna 92, 93]

L-​ulied anġeliċi t’Alla nnotaw lill-​bniet tal-​bnedmin

[Stampa f’paġna 94]

L-​anġli li mmaterjalizzaw m’għerqux. Neħħew l-​iġsma tal-​laħam tagħhom u marru lura fis-​sema

[Stampa f’paġna 97]

Il-​Bibbja twissi: ‘Żomm ħieles minn kull xorta taʼ spiritiżmu’

[Stampa f’paġna 98]

Dawk li saru Kristjani f’Efesu ħarqu l-​kotba tagħhom dwar l-​ispiritiżmu​—eżempju mill-​aħjar għalina llum