Kapitlu 12

Irreżisti l-​Forzi taʼ l-​Ispirti mill-​Agħar

1. Ġesù kif irreaġixxa meta ltaqaʼ maʼ spirti mill-​agħar?

PREĊIŻ wara l-​magħmudija tiegħu, Ġesù Kristu mar fix-​xagħri tal-​Ġudea biex jitlob u jimmedita. Hemmhekk Satana x-​Xitan ipprova jġiegħlu jikser il-​liġi t’Alla. Madankollu, Ġesù rrifjuta l-​lixka tax-​Xitan u ma nqabadx fin-​nasba tiegħu. Ġesù ffaċċja spirti mill-​agħar oħrajn matul il-​ministeru tiegħu fuq l-​art. Madankollu, darba wara l-​oħra, hu ċanfarhom u rreżistiehom.—Luqa 4:1-13; 8:26-34; 9:37-43.

2. Liema mistoqsijiet se nikkunsidraw?

² Ir-​rakkonti Bibliċi li jiddeskrivu dawk il-​konfronti għandhom jikkonvinċuna li l-​forzi taʼ l-​ispirti mill-​agħar tassew jeżistu. Huma jipprovaw jiżvijaw lin-​nies. Madankollu, aħna nistgħu nirreżistuhom lil dawn l-​ispirti mill-​agħar. Imma l-​ispirti mill-​agħar minfejn jiġu? Għala jipprovaw iqarrqu bin-​nies? U liema metodi jużaw biex jiksbu l-​finijiet taʼ moħħhom? Li ssib it-​tweġibiet għal mistoqsijiet bħal dawn se jgħinek tirreżisti lill-​forzi taʼ l-​ispirti mill-​agħar.

L-​ISPIRTI MILL-​AGĦAR—L-​ORIĠINI U L-​MIRA TAGĦHOM

3. Satana x-​Xitan kif sar hekk?

³ Alla Jehovah għamel għadd kbir taʼ ħlejjaq spirti ħafna qabel ma ħalaq lill-​bnedmin. (Ġob 38:4, 7) Bħalma ġie spjegat f’Kapitlu 6, wieħed minn dawn l-​anġli żviluppa xewqa li jkollu l-​bnedmin iqimu lilu minflok ma jqimu lil Jehovah. Billi segwa dak l-​oġġettiv, dan l-​anġlu mill-​agħar irreżista u kkalunnja lill-​Ħallieq, saħansitra billi lill-​ewwel mara ssuġġerielha li Alla kien giddieb. B’mod xieraq, allura, dan il-​ħlejqa spirtu ribelluż sar magħruf bħala Satana (wieħed li jirreżisti) x-​Xitan (kalunnjatur).—Ġenesi 3:1-5; Ġob 1:6.

4. Ċerti anġli kif dinbu fi żmien Noè?

⁴ Iktar tard, anġli oħrajn marru fuq in-​naħa taʼ Satana x-​Xitan. Fi żmien ir-​raġel twajjeb Noè, xi wħud minn dawn abbandunaw is-​servizz tagħhom fis-​sema u libsu iġsma tal-​laħam biex jissodisfaw il-​kilba tagħhom għal relazzjonijiet sesswali maʼ nisa taʼ l-​art. Satana bla dubju influwenza lil dawk l-​anġli biex jaqbdu dik il-​korsa diżubbidjenti. Dan wassal għal li huma saru missirijiet taʼ nisel bagħal imsejjaħ Nefilim, li saru bulijiet vjolenti. Meta Jehovah ikkaġuna l-​Għarqa l-​kbira, din qerdet lill-​umanità li kienet ġiet korrotta u lil din il-​ġenerazzjoni mhix naturali t’anġli diżubbidjenti. L-​anġli ribellużi skappaw il-​qerda billi neżgħu l-​iġsma tal-​laħam tagħhom u rritornaw lejn il-​qasam taʼ l-​ispirti. Imma Alla rażżan lil dawn id-​demonji billi ttrattahom bħala eżiljati fi dlam spiritwali. (Ġenesi 6:1-7, 17; Ġuda 6) Satana, “il-​prinċep tax-​xjaten,” u l-​anġli mill-​agħar tiegħu minkejja dan baqgħu sejrin bl-​irvell tagħhom. (Luqa 11:15) X’inhi l-​mira tagħhom?

5. Satana u d-​demonji tiegħu liema oġġettiv għandhom, u x’jużaw biex jonsbu lin-​nies?

⁵ L-​oġġettiv mill-​agħar taʼ Satana u d-​demonji huwa li jdawru lin-​nies kontra Alla Jehovah. Għalhekk, dawn l-​uħud mill-​agħar ilhom jiżvijaw, ibeżżgħu, u jassaltaw lin-​nies matul l-​istorja umana kollha. (Apokalissi 12:9) Eżempji taż-​żmien modern jikkonfermaw li l-​agressjoni mid-​demonji hija iktar kattiva issa milli qatt kienet qabel. Biex jonsbu lin-​nies, id-​demonji taʼ spiss jużaw l-​ispiritiżmu fil-​forom kollha tiegħu. Id-​demonji kif jużawha din il-​lixka, u kif tistaʼ int tiddefendi lilek innifsek?

KIF L-​ISPIRTI MILL-​AGĦAR JIPPROVAW JIŻVIJAWK

6. X’inhu l-​ispiritiżmu, u liema huma xi forom tiegħu?

⁶ X’inhu l-​ispiritiżmu? Huwa involviment mad-​demonji, jew spirti mill-​agħar, kemm direttament u kemm permezz taʼ medju uman. L-​ispiritiżmu jagħmel għad-​demonji dak li l-​lixka tagħmel għall-​kaċċaturi: Tattira l-​priża. U sewwa sew bħalma kaċċatur juża varjetà taʼ lixki biex jiġbed lill-​annimali għal ġon-​nasba tiegħu, hekk ukoll l-​ispirti mill-​agħar jinkuraġġixxu diversi forom taʼ spiritiżmu biex iġibu lill-​bnedmin taħt il-​kontroll tagħhom. (Qabbel Salm 119:110.) Xi wħud minn dawn il-​forom huma t-​teħbir, il-​maġija, it-​tbassir, is-​seħer, il-​magħmul, l-​ikkonsultar mal-​medji, u l-​kuntatt mal-​mejtin.

7. Kemm huwa mifrux l-​ispiritiżmu, u għala jiffjorixxi saħansitra fl-​hekk imsejħin pajjiżi Kristjani?

⁷ Il-​lixka tirnexxi, għax l-​ispiritiżmu jattira nies minn madwar id-​dinja. Dawk li qegħdin jgħixu ġo villaġġi fil-​ġungla jmorru għand is-​sħaħar, u wħud li jaħdmu fl-​uffiċini fl-​ibliet jikkonsultaw l-​astroloġi. L-​ispiritiżmu jiffjorixxi saħansitra fl-​hekk imsejħin pajjiżi Kristjani. Ir-​riċerka tindika li fl-​Istati Uniti biss, madwar 30 rivista li flimkien iċ-​ċirkolazzjoni tagħhom hija taʼ ’l fuq minn 10,000,000, huma ddedikati għal diversi forom taʼ spiritiżmu. Il-​Brażiljani jonfqu ’l fuq minn 500 miljun dollaru fuq oġġetti spiritistiċi kull sena. Madankollu, 80 fil-​mija taʼ dawk li jiffrekwentaw ċentri spiritistiċi taʼ qima f’dak il-​pajjiż huma Kattoliċi mgħammdin li jmorru wkoll il-​Quddies. Minħabba l-​fatt li xi membri tal-​kleru jipprattikaw l-​ispiritiżmu, ħafna nies reliġjużi jaħsbu illi li jipprattikaw dan huwa aċċettabbli għal Alla. Imma huwa hekk?

GĦALA L-​BIBBJA TIKKUNDANNA L-​PRATTIKA TAʼ L-​ISPIRITIŻMU

8. Liema hija l-​ħarsa Skritturali dwar l-​ispiritiżmu?

⁸ Jekk int ġejt mgħallem li xi forom taʼ spiritiżmu huma mezzi biex tikkuntattja l-​ispirti tajbin, tistaʼ tibqaʼ sorpriż meta ssir taf dak li tgħid il-​Bibbja dwar l-​ispiritiżmu. In-​nies taʼ Jehovah kienu mwissijin: “La tmurx għand is-​saħħara li jsejħu l-​erwieħ u la tfittxux lil min jeħber; la tiċċap[p]sux bihom.” (Levitiku 19:31; 20:6, 27) Il-​ktieb Bibliku t’Apokalissi jagħti t-​twissija li s-​“saħħara [“dawk li jipprattikaw l-​ispiritiżmu,” NW]” se jispiċċaw fil-​“belliegħa tan-​nar iħegġeġ u tal-​kubrit; din hi t-​tieni [għal dejjem] mewt.” (Apokalissi 21:8; 22:15) Il-​forom kollha taʼ spiritiżmu huma diżapprovati minn Alla Jehovah. (Dewteronomju 18:10-12) Dak għala huwa hekk?

9. Għala nistgħu nikkonkludu li l-​messaġġi tal-​lum mid-​dinja taʼ l-​ispirti m’humiex mingħand Jehovah?

⁹ Jehovah bagħat spirti tajbin, jew anġli twajbin, biex jikkomunika maʼ xi bnedmin qabel ma tlestiet il-​Bibbja. Minn mindu din tlestiet, il-​Kelma t’Alla pprovdiet il-​gwida li l-​bnedmin jinħtieġu biex jaqdu lil Jehovah b’mod aċċettabbli. (2 Timotju 3:16, 17; Lhud 1:1, 2) Hu ma jinjorax il-​Kelma mqaddsa tiegħu billi jagħti messaġġi lill-​medji. Il-​messaġġi kollha tal-​preżent bħal dawn mid-​dinja taʼ l-​ispirti jiġu mingħand spirti mill-​agħar. Il-​prattika taʼ l-​ispiritiżmu tistaʼ twassal għal turment mid-​demonji jew saħansitra ppossessar mill-​ispirti mill-​agħar. Għalhekk, Alla bl-​imħabba kollha jwissina biex ma ninvolvux ruħna fi kwalunkwe prattiċi spiritistiċi. (Dewteronomju 18:14; Galatin 5:19-21) Iktar minn hekk, jekk inkomplu nipprattikaw l-​ispiritiżmu wara li nkunu sirna nafu l-​ħarsa taʼ Jehovah dwar dan, aħna nkunu qegħdin inżommu man-​naħa taʼ l-​ispirti mill-​agħar ribellużi u nkunu għedewwa t’Alla.—1 Samwel 15:23; 1 Kronaki 10:13, 14; Salm 5:5 (5:4, NW).

10. X’inhi d-​divinazzjoni, u għala għandna nevitawha?

¹⁰ Għamla popolari waħda taʼ spiritiżmu hija d-​divinazzjoni—li wieħed jipprova jitkixxef dwar il-​futur jew dak li mhux magħruf bil-​għajnuna taʼ l-​ispirti. Xi forom taʼ divinazzjoni huma l-​astroloġija, l-​iċċassar fil-​boċċa tal-​kristall, l-​interpretazzjoni tal-​ħolm, il-​qari taʼ l-​idejn, u l-​qari tax-​xorti bl-​użu tal-​karti tat-​tarot. Ħafna jqisu lid-​divinazzjoni bħala divertiment li ma jagħmilx ħsara, imma l-​Bibbja turi li dawk li jaqraw ix-​xorti u l-​ispirti mill-​agħar imorru id f’id. Per eżempju, Atti 16:16-19 isemmi ‘spirtu li jaqra x-​xorti’ li ta l-​abbiltà lil ċerta tfajla biex tipprattika t-​“teħbir.” Madankollu, l-​abbiltà tagħha li tbassar il-​futur intilfet meta d-​demonju ġie mkeċċi. B’mod ċar, id-​divinazzjoni hija lixka wżata mid-​demonji biex jiġbdu lin-​nies għal ġon-​nasba tagħhom.

11. L-​attentati biex wieħed jikkomunika mal-​mejtin kif iwasslu lil dak li jkun f’nasba?

¹¹ Jekk int tinsab imnikket minħabba l-​mewt taʼ xi membru maħbub tal-​familja jew xi ħabib tal-​qalb, tistaʼ faċilment tiġi miġbud minn lixka oħra. Medju taʼ l-​ispirti għandu mnejn jagħtik informazzjoni speċjali jew għandu mnejn jitkellem b’vuċi li tidher li hija dik tal-​persuna mejta. Attent! Attentati biex tikkomunika mal-​mejtin idaħħluk f’nasba. Għala? Għaliex il-​mejtin ma jistgħux jitkellmu. Bħalma bla dubju tiftakar, il-​Kelma t’Alla tgħid ċar u tond li mal-​mewt individwu “lejn l-​art jerġaʼ jmur; jintemmu dak in-​nhar ħsibijietu.” Il-​mejtin “ma jafu xejn.” (Salm 146:4; Koħelet 9:5, 10) Iktar minn hekk, huma attwalment id-​demonji li kienu u għadhom magħrufin li jimitaw il-​vuċi tal-​mejtin u li jagħtu lil medju taʼ l-​ispirti informazzjoni dwar il-​wieħed li jkun miet. (1 Samwel 28:3-19) Mela “min . . . jistħarreġ il-​mejtin” qiegħed jaqaʼ fin-​nasba taʼ l-​ispirti mill-​agħar u qiegħed jaġixxi kontra r-​rieda t’Alla Jehovah.—Dewteronomju 18:11, 12; Isaija 8:19.

MINN LI JATTIRAW GĦAL LI JATTAKKAW

12, 13. Liema evidenza hemm li d-​demonji jippersistu f’li jittantaw u jitturmentaw lin-​nies?

¹² Meta taġixxi fi qbil mal-​parir tal-​Kelma t’Alla rigward l-​ispiritiżmu, int tistmerr il-​lixka tad-​demonji. (Qabbel Salm 141:9, 10; Rumani 12:9.) Ifisser dan li l-​ispirti mill-​agħar se jieqfu milli jipprovaw jaħtfuk taħt idejhom? Bl-​ebda mod! Wara li ttanta lil Ġesù għal tliet darbiet, Satana “telaq minn ħdejh sa ma wasal il-​waqt.” (Luqa 4:13) Bl-​istess mod, spirti stinati mhux biss jattiraw lin-​nies imma wkoll jattakkawhom.

¹³ Ftakar meta iktar qabel ikkunsidrajna l-​attakk taʼ Satana fuq il-​qaddej t’Alla, Ġob. Ix-​Xitan ikkaġuna t-​telf tal-​bhejjem tiegħu u l-​mewt tal-​biċċa l-​kbira mill-​qaddejja tiegħu. Satana saħansitra qatel lit-​tfal taʼ Ġob. Imbagħad, laqat lil Ġob innifsu b’marda taʼ wġigħ. Imma Ġob żamm l-​integrità tiegħu lejn Alla u kien imbierek bil-​kbir. (Ġob 1:7-19; 2:7, 8; 42:12) Minn dak in-​nhar ’l hawn, id-​demonji għamlu lil xi nies muti u għomja u komplew jixxalaw bis-​sofferenza tal-​bnedmin. (Mattew 9:32, 33; 12:22; Mark 5:2-5) Illum, rapporti juru li d-​demonji jitturmentaw sesswalment lil xi wħud u jwasslu lil xi oħrajn biex jiġġennu. Huma jqanqlu jerġaʼ oħrajn għal qtil u suwiċidju, li huma dnubiet kontra Alla. (Dewteronomju 5:17; 1 Ġwann 3:15) Minkejja dan, eluf taʼ nies li darba kienu fin-​nassa taʼ dawn l-​ispirti mill-​agħar kellhom il-​ħila jeħilsu lilhom infushom. Dan kif kien possibbli għalihom? Għamlu dan billi ħadu passi vitali.

KIF TIRREŻISTI L-​ISPIRTI MILL-​AGĦAR

14. F’armonija maʼ l-​eżempju tal-​Kristjani Efesin taʼ l-​ewwel seklu, kif tistaʼ int tirreżisti lill-​ispirti mill-​agħar?

¹⁴ X’inhu mod wieħed li bih tistaʼ tirreżisti lill-​ispirti mill-​agħar u tipproteġi lilek innifsek u lill-​familja tiegħek min-​nases tagħhom? Il-​Kristjani taʼ l-​ewwel seklu f’Efesu li kienu pprattikaw l-​ispiritiżmu qabel ma saru kredenti ħadu passi pożittivi. Naqraw li “bosta minn dawk li qabel kienu jagħmlu s-​sħarijiet ġiebu l-​kotba tagħhom u ħarquhom quddiem kulħadd.” (Atti 19:19) Saħansitra jekk int ma pprattikajtx l-​ispiritiżmu, eħles minn kwalunkwe ħaġa li għandha użu spiritistiku jew xi ħaġa konnessa miegħu. Dan jinkludi kotba, rivisti, vidjos, kartelluni, siltiet mużikali, u oġġetti wżati għal skopijiet spiritistiċi. Inklużi wkoll huma l-​idoli, l-​amuleti u affarijiet oħrajn li jintlibsu għal protezzjoni, u xi għotjiet li ngħatawlek minn uħud li jipprattikaw l-​ispiritiżmu. (Dewteronomju 7:25, 26; 1 Korintin 10:21) Biex nagħtu eżempju: Koppja miżżewġa fit-​Tajlandja kienet ilha tiġi tturmentata mid-​demonji. Imbagħad ħelsu minn oġġetti assoċjati maʼ l-​ispiritiżmu. X’kien ir-​riżultat? Kisbu serħan mill-​attakki demoniċi u minn dak in-​nhar tassew għamlu progress spiritwali.

15. F’li wieħed jirreżisti lill-​forzi taʼ l-​ispirti mill-​agħar, liema huwa pass ieħor neċessarju?

¹⁵ Sabiex tirreżisti lill-​ispirti mill-​agħar, pass neċessarju ieħor huwa li tapplika l-​parir taʼ l-​appostlu Pawlu biex tilbes il-​libsa spiritwali sħiħa tal-​ħadid mogħtija minn Alla. (Efesin 6:11-17) Il-​Kristjani jridu jiffortifikaw id-​difiżi tagħhom kontra l-​ispirti mill-​agħar. Dan il-​pass x’jinkludi? “Fuq kollox,” [KŻ] qal Pawlu, “ħudu f’idejkom it-​tarka tal-​fidi, li biha tistgħu titfu l-​vleġeġ kollha tan-​nar tal-​ħażin.” Tabilħaqq, iktar ma tkun soda l-​fidi tiegħek, akbar se tkun l-​abbiltà tiegħek biex tirreżisti lill-​forzi taʼ l-​ispirti mill-​agħar.—Mattew 17:14-20.

16. Kif tistaʼ ssaħħaħ il-​fidi tiegħek?

¹⁶ Kif tistaʼ ssaħħaħ il-​fidi tiegħek? Billi tkompli tistudja l-​Bibbja u tapplika l-​pariri tagħha f’ħajtek. Kemm hija qawwija l-​fidi taʼ individwu jiddependi l-​iktar minn kemm hija soda l-​bażi tagħha—l-​għarfien dwar Alla. Ma taqbilx int li l-​għarfien eżatt li ksibt u ħadt bis-​serjetà hekk kif studjajt il-​Bibbja bena l-​fidi tiegħek? (Rumani 10:10, 17) Bla dubju, għalhekk, hekk kif tkompli dan l-​istudju u tagħmilha drawwa li tattendi l-​laqgħat tax-​Xhieda taʼ Jehovah, il-​fidi tiegħek se tiġi ffortifikata saħansitra iktar. (Rumani 1:11, 12; Kolossin 2:6, 7) Dan se jkun sur qawwi kontra l-​attakki tad-​demonji.—1 Ġwann 5:5.

17. Liema passi oħrajn jistgħu jkunu neċessarji f’li wieħed jirreżisti lill-​forzi taʼ l-​ispirti mill-​agħar?

¹⁷ Liema passi oħrajn jistgħu jittieħdu minn persuna li hi determinata li tirreżisti lill-​forzi taʼ l-​ispirti mill-​agħar? Il-​Kristjani Efesin kienu jeħtieġu protezzjoni minħabba li kienu jgħixu f’belt impestata bid-​demoniżmu. Għalhekk, Pawlu qalilhom: “Itolbu dejjem fl-​Ispirtu.” (Efesin 6:18) Ladarba qegħdin ngħixu f’dinja impestata bid-​demonji, li titlob b’mod intensiv għall-​protezzjoni t’Alla huwa essenzjali f’li tirreżisti lill-​ispirti mill-​agħar. (Mattew 6:13) T’għajnuna f’dan ir-​rigward hija l-​assistenza spiritwali u t-​talb t’anzjani maħturin fil-​kongregazzjoni Kristjana.—Ġakbu 5:13-15.

KOMPLI BIL-​ĠLIEDA TIEGĦEK KONTRA L-​ISPIRTI MILL-​AGĦAR

18, 19. X’jistaʼ jsir jekk id-​demonji jerġgħu jinkwetaw lil xi persuna?

¹⁸ Saħansitra wara li ħadu dawn il-​passi bażiċi, madankollu, xi wħud ġew imħabbtin minn spirti mill-​agħar. Per eżempju, wieħed raġel fil-​Côte d’Ivoire studja l-​Bibbja max-​Xhieda taʼ Jehovah u qered l-​amuleti tiegħu kollha. Minn dak in-​nhar, għamel progress ġmielu, iddedika ħajtu lil Jehovah, u tgħammed. Imma ġimgħa wara l-​magħmudija tiegħu, id-​demonji bdew jinkwetawh mill-​ġdid, u ilħna qalulu biex jabbanduna din il-​fidi li kien għadu kif sab. Li kieku dan ġara lilek, kien dak ifisser li int kont tlift il-​protezzjoni taʼ Jehovah? Mhux neċessarjament.

¹⁹ Għalkemm ir-​raġel perfett Ġesù Kristu kellu protezzjoni divina, hu samaʼ l-​leħen tal-​ħlejqa spirtu mill-​agħar Satana x-​Xitan. Ġesù wera x’irridu nagħmlu f’każ bħal dan. Hu qal lix-​Xitan: “Itlaq, Xitan!” (Mattew 4:3-10) Bl-​istess mod, int għandek tirrifjuta li tagħti widen għal ilħna mid-​dinja taʼ l-​ispirti. Irreżisti lill-​ispirti mill-​agħar billi ssejjaħ lil Jehovah għall-​għajnuna. Iva, itlob b’leħen għoli billi tuża l-​isem t’Alla. Proverbji 18:10 jgħid: “Isem il-​Mulej [Jehovah] hu torri qawwi; fih jistkenn il-​ġust b’moħħu mistrieħ.” Ir-​raġel Kristjan fil-​Côte d’Ivoire hekk għamel, u l-​ispirti mill-​agħar waqfu jitturmentawh.—Salm 124:8; 145:18.

20. Fil-​qosor, x’tistaʼ tagħmel int biex tirreżisti lill-​ispirti mill-​agħar?

²⁰ Jehovah ħalla l-​ispirti mill-​agħar jibqgħu jeżistu, imma hu juri l-​qawwa tiegħu, partikolarment għan-​nom tan-​nies tiegħu, u ismu qiegħed jiġi ddikjarat fl-​art kollha. (Eżodu 9:16) Jekk int tibqaʼ qrib t’Alla, m’għandekx għalfejn tibżaʼ mill-​ispirti mill-​agħar. (Numri 23:21, 23; Ġakbu 4:7, 8; 2 Pietru 2:9) Il-​qawwa tagħhom hija limitata. Huma ġew ikkastigati fi żmien Noè, ġew mitfugħin ’il barra mis-​sema fi żminijiet riċenti, u qegħdin issa jistennew il-​ġudizzju finali. (Ġuda 6; Apokalissi 12:9; 20:1-3, 7-10, 14) Fil-​fatt, huma jitkexkxu mill-​qerda li ġejja tagħhom. (Ġakbu 2:19) Mela kemm jekk l-​ispirti mill-​agħar jipprovaw jattirawk b’xi xorta taʼ lixka jew jattakkawk bi kwalunkwe mod, int tistaʼ tirreżistihom. (2 Korintin 2:11) Aħrab kull forma taʼ spiritiżmu, applika l-​parir tal-​Kelma t’Alla, u fittex l-​approvazzjoni taʼ Jehovah. Agħmel dan mingħajr dewmien, għax ħajtek tiddependi fuq li int tirreżisti lill-​forzi taʼ l-​ispirti mill-​agħar!

ITTESTJA L-​GĦARFIEN TIEGĦEK

L-​ispirti mill-​agħar kif jipprovaw jiżvijaw lin-​nies?

Il-​Bibbja għala tikkundanna l-​ispiritiżmu?

Persuna kif tistaʼ teħles mill-​forzi taʼ l-​ispirti mill-​agħar?

Għala għandek tibqaʼ tirreżisti lill-​ispirti mill-​agħar?

[Stampa f’paġna 110]

Int kif tqisu l-​ispiritiżmu fil-​ħafna forom tiegħu?