Kapitlu 39
L-Imkabbrin u l-Umlin
WARA li jsemmi l-virtujiet taʼ Ġwanni l-Għammied, Ġesù jdawwar l-attenzjoni tiegħu lejn in-nies kburin u vojta li hawn madwaru. “Din il-ġenerazzjoni,” jiddikjara hu, “hi bħal tfal żgħar bil-qiegħda fis-swieq li jgħajtu lil sħabhom fil-logħob, igħidu, ‘Daqqejnielkom il-fifra, imma ma żfintux; waħwaħna, imma ma sawwattux lilkom infuskom bin-niket.’”
Ġesù x’irid ifisser? Huwa jispjega: “Ġwanni ġie la jiekol u lanqas jixrob, iżda n-nies igħidu, ‘Għandu demonju’; Bin il-bniedem ġie jiekol u jixrob, u xorta n-nies igħidu, ‘Ħares! Raġel ħanżir u mogħti għax-xorb tal-inbid, ħabib tal-kolletturi tat-taxxa u l-midinbin.’”
Hu impossibbli li tissodisfa lin-nies. Xejn ma jogħġobhom. Ġwanni għex ħajja taʼ għaks u taʼ ċaħda tiegħu nnifsu bħala wieħed Nażirit fi qbil mad-dikjarazzjoni tal-anġlu li “ma jrid jixrob assolutament l-ebda nbid u xorb qawwi.” U b’dana kollu n-nies jgħidu li hu ndemonjat. Mill-banda l-oħra, Ġesù jgħix bħal irġiel oħra, mingħajr ma jitgħakkes, u jiġi akkużat li hu ħali.
Kemm hu iebes biex togħġobhom lin-nies! Huma bħal tfal li jilagħbu flimkien, li xi wħud ma jkunux iridu jiżfnu meta tfal oħra jdoqqu l-fifra jew juru niket meta sħabhom iwaħwħu. Madankollu, Ġesù jgħid: “Il-għerf hu muri kemm hu twajjeb minn xogħlijietu.” Iva, l-evidenza—ix-xogħlijiet—tagħmilha ċara li l-akkużi kemm kontra Ġwanni u kemm kontra Ġesù huma foloz.
Ġesù jkompli billi jmaqdar speċifikament lit-tlett ibliet taʼ Korażin, Betsajda, u Kapernahum, fejn wettaq il-biċċa l-kbira tax-xogħlijiet tal-għaġeb tiegħu. Kieku għamel dawk ix-xogħlijiet fl-ibliet Feniċi taʼ Tir u Sidon, igħid Ġesù, kieku dawn l-ibliet kienu jindmu fl-ixkejjer u l-irmied. Waqt li jikkundanna lil Kapernahum, li milli jidher kien fejn mar jogħod Ġesù bħala bażi matul il-perijodu tal-ministeru tiegħu, Ġesù jiddikjara: “Se jkun iktar li tissaportih għall-art taʼ Sodom f’Jum il-Ġudizzju milli għalik.”
Ġesù mbagħad ifaħħar pubblikament lil Missieru tas-sema. Hu jħossu mqanqal li jagħmel hekk għaliex Alla jaħbi veritajiet spiritwali prezzjużi minn nies għorrief u intellettwali imma jikxef dawn l-affarijiet meraviljużi lil uħud umlin, lil trabi, biex ingħidu hekk.
Fl-aħħar, Ġesù jagħmel l-istedina li tant tappella: “Ejjew għandi, intom ilkoll li taħdmu iebes u mgħobbijin wisq, u jien se nserraħkom. Ħudu l-madmad tiegħi fuqkom u tgħallmu minni, għax jien ġwejjed u umli fil-qalb, u intom se ssibu serħan għal erwieħkom. Għax il-madmad tiegħi ħanin u t-tagħbija tiegħi ħafifa.”
Ġesù kif joffrih is-serħan? Dan jagħmlu billi jipprovdi ħelsien mit-tradizzjonijiet li jjassru u li bihom il-mexxejja reliġjużi għabbew lill-poplu, inklużi, per eżempju, regolamenti restrittivi dwar iż-żamma tas-Sibt. Hu juri wkoll il-mod taʼ serħan għal dawk li jħossu l-piż li jfarrak tad-dominanza minn awtoritajiet politici u għal dawk li jħossu t-toqol taʼ dnubiethom permezz taʼ kuxjenza milquta. Lil uħud milquta bħal dawn hu jurihom kif dnubiethom jistgħu jinħafru u kif huma jistgħu jgawdu relazzjoni prezzjuża maʼ Alla.
Il-madmad ħanin li joffri Ġesù hu wieħed taʼ dedikazzjoni sħiħa ’l Alla, billi nkunu nistgħu naqdu lil Missierna tas-sema li tant jagħder u jħenn. U t-tagħbija ħafifa li joffri Ġesù lil dawk li jiġu għandu hi li wieħed jobdi l-ħtiġijiet t’Alla għall-ħajja, li huma l-kmandamenti Tiegħu mniżżlin fil-Bibbja. U li wieħed jobdihom dawn ma hu xejn taʼ piż. Mattew 11:16-30; Luqa 1:15; 7:31-35; 1 Ġwann 5:3.
▪ In-nies kburin u vojta tal-ġenerazzjoni taʼ Ġesù kif inhuma bħat-tfal?
▪ Ġesù għala hu mqanqal li jfaħħar lil Missieru tas-sema?
▪ In-nies b’liema modi huma mtaqqlin, u liema serħan joffri Ġesù?