Kapitlu 121

Quddiem is-​Sinedriju, Imbagħad għand Pilatu

IL-​LEJL riesaq lejn it-​tmiem. Pietru ċaħad lil Ġesù għat-​tielet darba, u l-​membri tas-​Sinedriju temmew it-​taparsi ġuri tagħhom u xterdu. Madankollu, malli jisbaħ il-​jum tal-​Ġimgħa fil-​għodu, huma jerġgħu jiltaqgħu, din id-​darba fis-​sala tagħhom tas-​Sinedriju. L-​iskop tagħhom x’aktarx hu li jagħtu xi dehra taʼ legalità lill-​ġuri taʼ bil-​lejl. Meta Ġesù jinġieb quddiemhom, huma jgħidu, bħalma qalu matul il-​lejl: “Jekk int il-​Kristu, għidilna.”

“Saħansitra kieku għedtilkom, ma kontux temmnuh dan,” iwieġeb Ġesù. “Barra minn hekk, kieku staqsejtkom, ma kontux twieġbu.” Madankollu, Ġesù bil-​kuraġġ jipponta lejn l-​identità tiegħu, billi jgħid: “Minn issa ’l quddiem Bin il-​bniedem se jkun bil-​qiegħda fuq l-​id il-​leminija u qawwija t’Alla.”

“Inti, għalhekk, l-​Iben t’Alla?” ilkoll kemm huma jridu jkunu jafu.

“Intom infuskom qed tgħidu li jien,” iwieġeb Ġesù.

Għal dawn l-​irġiel li għandhom f’moħħhom li joqtluh, din it-​tweġiba hi biżżejjed. Huma jqisuha bħala dagħwa. “Għala għandna bżonn iktar xiehda?” jistaqsu huma. “Għax aħna nfusna smajna dan minn fommu stess.” Mela huma jorbtu lil Ġesù, jeħduh lil hemm, u jagħtuh f’idejn il-​gvernatur Ruman Ponzju Pilatu.

Ġuda, it-​traditur taʼ Ġesù, qed josserva x’inhu jsir. Meta jara li Ġesù ġie kkundannat, hu jħoss rimors. Mela hu jmur għand il-​qassisin ewlenin u l-​irġiel ixjeħ biex jagħti lura t-​30 biċċa tal-​fidda, billi jispjega: “Jiena dnibt meta ttradejt demm twajjeb.”

“X’għandna x’naqsmu? Int trid tarah dan!” huma jwieġbu bla qalb. Mela Ġuda jixħet il-​biċċiet tal-​fidda ġewwa t-​tempju u jitlaq ’il hemm u jipprova jitgħallaq. Madankollu, il-​fergħa li magħha Ġuda jorbot il-​ħabel mid-​dehra tinqasam, u l-​ġisem tiegħu jaqaʼ ’l isfel għal fuq il-​blat, fejn jinfetaħ fi tnejn.

Il-qassisin ewlenin ma jafux x’se jagħmlu bil-​biċċiet tal-​fidda. “Ma hux skond il-​liġi li nitfgħuhom fit-​teżor sagru,” huma jikkonkludu, “għaliex huma prezz id-​demm.” Mela, wara li jikkonsultaw flimkien, huma jixtru bil-​flus il-​għalqa tal-​fuħħari biex jidfnu lill-​barranin. Il-​għalqa b’hekk issir tissejjaħ “Għalqa tad-​Demm.”

Għadu kmieni fil-​għodu meta Ġesù jittieħed lejn il-​palazz tal-​gvernatur. Imma l-​Lhud li ġew miegħu jirrifjutaw li jidħlu għaliex jemmnu li intimità bħal din mal-​Ġentili se tniġġishom. Mela biex jakkomodahom, Pilatu joħroġ hu. “Liema akkuża ġġibu kontra dan ir-​raġel?” hu jistaqsi.

“Kieku dan ir-​raġel ma kienx wieħed li jagħmel il-​ħażen, kieku ma konniex inġibuh u nagħtuh f’idejk,” iwieġbu huma.

Billi jixtieq li ma jindaħalx fil-​kwistjoni, Pilatu jwieġeb: “Ħuduh intom infuskom u ġġudikawh skond il-​liġi tagħkom.”

Billi jirrivelaw il-​ħsieb qattiel tagħhom, il-​Lhud isostnu: “Skond il-​liġi aħna ma nistgħu noqtlu lil ħadd.” Tabilħaqq, jekk joqtlu lil Ġesù waqt il-​Festa tal-​Qbiż, x’aktarx li dan jikkaġuna rewwixta mill-​poplu, ladarba ħafna għandhom opinjoni tajba ħafna taʼ Ġesù. Imma jekk jistgħu jġiegħlu lir-​Rumani joqtluh fuq akkuża politika, dan se jeħlishom mir-​responsabbiltà quddiem in-​nies.

Mela l-​mexxejja reliġjużi, billi ma jsemmux il-​ġuri taʼ qabel tagħhom li matulu huma kkundannaw lil Ġesù għad-​dagħa, issa jivvintaw akkużi differenti. Huma jagħmlu l-​akkuża maqsuma fi tliet partijiet: “Lil dan ir-​raġel sibnieh [1] jaqleb lill-​ġens tagħna u [2] jipprojbixxi l-​ħlas taʼ taxxi lil Ċesri u [3] jgħid li hu nnifsu hu Kristu sultan.”

Hija l-​akkuża li Ġesù jsostni li hu sultan li tikkonċerna lil Pilatu. Hu, għalhekk, jerġaʼ jidħol fil-​palazz, isejjaħ lil Ġesù għandu, u jistaqsi: “Inti s-​sultan tal-​Lhud?” Fi kliem ieħor, ksirt int il-​liġi billi ddikjarajt li inti sultan f’oppożizzjoni lejn Ċesri?

Ġesù jrid ikun jaf kemm Pilatu diġà semaʼ dwaru, u għalhekk jistaqsi: “Huwa minn żniedek li tgħidu dan, jew qalulek oħrajn dwari?”

Pilatu jistqarr li ma jaf xejn dwaru u jixtieq li jsir jaf il-​fatti. “Jien m’inix Lhudi, hux hekk?” hu jwieġeb. “Ġensek stess u l-​qassisin ewlenin tawk f’idejja. X’għamilt int?”

Ġesù bl-​ebda mod ma jipprova jaħrab mill-​kwistjoni, li hi dik dwar stat taʼ sultan. It-​tweġiba li Ġesù jagħti issa bla dubju tissorprendi lil Pilatu. Luqa 22:66–23:3; Mattew 27:​1-11; Mark 15:1; Ġwann 18:​28-35; Atti 1:​16-20.

▪ Is-​Sinedriju għal liema skop jerġaʼ jiltaqaʼ fil-​għodu?

▪ Ġuda kif imut, u x’isir mit-​30 biċċa tal-​fidda?

▪ Minflok ma joqtluh huma stess, il-​Lhud għala jridu lir-​Rumani joqtlu lil Ġesù?

▪ Il-​Lhud liema akkużi jġibu kontra Ġesù?