Aħbarijiet tas-​Saltna Nru. 36

Il-​Millennju l-​Ġdid—X’Qed Joffrilek il-​Futur?

Il-​Millennju l-​Ġdid—Il-​Bidu taʼ Era Ġdida?

NHAR il-​31 taʼ Diċembru, 1999, mat-​tokki taʼ nofsillejl, is-​seklu 20 ġie fi tmiemu.a Kien seklu li ra taqlib kbir, iżda li ra wkoll it-​twelid taʼ teknoloġiji ġodda, il-​progress taʼ l-​għaġeb fil-​mediċina, iż-​żjieda kbira f’dik li hi informazzjoni, u t-​tkabbir mgħaġġel fl-​ekonomija dinjija. Għaldaqstant, ħafna laqgħu l-​millennju l-​ġdid bħala simbolu taʼ tama u bidla. Jistaʼ jkun li f’dan il-​millennju se naraw it-​tmiem tal-​gwerer, tal-​faqar, tat-​tniġġis taʼ l-​ambjent, u tal-​mard?

Ħafna hekk jittamaw. Imma x’ċans hemm li l-​millennju l-​ġdid se jġib bidliet li huma taʼ ġid għalik—bidliet li se jagħmlulek ħajtek u dik tal-​familja tiegħek ħielsa minn kull periklu? Ikkunsidra daqsxejn kemm huma kbar ftit mill-​problemi li qegħdin inħabbtu wiċċna magħhom.

It-Tniġġis

Il-pajjiżi industrijalizzati qegħdin “joħolqu ħsara ambjentali fuq skala globali u tniġġis maʼ kullimkien u tħarbit fis-​sistemi ekoloġiċi.” Jekk ikomplu sejrin hekk, l-​ambjent naturali se jkun jiflaħ inqas u inqas għal din il-​ħsara.—“Global Environment Outlook—2000,” United Nations Environment Programme.

Il-Mard

Illum il-​mard li ma jittiħidx huwa l-​kaġun taʼ inqas minn nofs l-​imwiet f’pajjiżi li qed jiżviluppaw. Imma, sas-​sena 2020 dan il-​mard hu mistenni li jikkaġuna sebgħa minn kull għaxar imwiet.—“The Global Burden of Disease,” Harvard University Press, 1996.

Xi esperti jsostnu li “sa l-​2010, it-​23 pajjiż li għandhom l-​iktar epidemiji serji taʼ l-​[AIDS] se jkollhom 66 miljun inqas nies [ħajjin].”—“Confronting AIDS: Evidence From the Developing World,” rapport mill-​Kummissjoni Ewropea u l-​Bank Dinji.

Il-Faqar

“Kważi 1.3 elf miljun persuna jridu jgħaddu b’inqas minn dollaru [38ċ ] kuljum, u kważi elf miljun ma jistgħux ilaħħqu mal-​ħtiġijiet bażiċi tagħhom taʼ l-​ikel.”—“Human Development Report 1999,” United Nations Development Programme.

Il-Gwerer

F’għadd taʼ pajjiżi, il-​vjolenza tistaʼ tiżdied iktar minn qatt qabel. Il-​vjolenza mqanqla minn differenzi razzjali, kulturali, tribwali, u reliġjużi se tkun l-​iktar tip taʼ konflitt komuni għal dawn il-​ħamsa u għoxrin sena li ġejjin, u se taħsad il-​ħajjiet taʼ mijiet t’eluf taʼ nies kull sena.—“New World Coming: American Security in the 21st Century,” U.S. Commission on National Security/21st Century.

Għalhekk, moħbi wara l-​għagħa u l-​eċċitament kollu minħabba l-​millennju l-​ġdid hemm il-​fatt li t-​tniġġis, il-​mard, il-​faqar, u l-​gwerer qatt ma kienu taʼ theddida daqs kemm huma llum. L-​għeruq taʼ dawn il-​problemi huma r-​rgħiba, in-​nuqqas taʼ fiduċja, u l-​egoiżmu—kwalitajiet li mhux la kemm teħles minnhom bir-​riċerka xjentifika, bit-​teknoloġija, jew bil-​politika.

Il-​Millennju li Se Jġib Barkiet fuq l-​Umanità

ŻMIEN twil ilu wieħed kittieb osserva: “Triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu.” (Ġeremija 10:23) Il-​bniedem mhux talli m’huwiex kapaċi jmexxi d-​dinja talli lanqas għandu d-​dritt li jagħmel hekk. Il-​Ħallieq tagħna, Alla Jehovah biss, għandu d-​dritt u jaf kif isolvi l-​problemi tal-bniedem.—Rumani 11:​33-36; Apokalissi 4:11.

Imma meta? Kif? Hemm wisq evidenza li aħna qegħdin noqorbu lejn it-​tmiem taʼ “l-​aħħar tad-​dinja.” Jekk jogħġbok, iftaħ il-​Bibbja tiegħek, u aqra t-​2 Timotju 3:​1-5. Hawnhekk għandna deskrizzjoni ħajja tal-​kwalitajiet li n-​nies se juru matul dan iż-​“żmien iebes.” Mattew 24:​3-14 u Luqa 21:​10, 11 ukoll jiddeskrivu “l-​aħħar tad-​dinja.” Hemmhekk l-​enfasi hija fuq il-​ġrajjiet fiżiċi li ilhom iseħħu mill-​1914, bħal gwerer mad-​dinja kollha, mard li jittieħed, u ġuħ maʼ kullimkien.

Dan iż-​żmien taʼ “l-​aħħar tad-​dinja” dalwaqt jiġi fi tmiemu. Danjel 2:44 jgħid: “Alla tas-​sema jqajjem saltna li ma tinqered qatt. . . . Hija tfarrak u ttemm is-​saltniet l-​oħra kollha [taʼ l-​art], waqt li hi tibqaʼ wieqfa għal dejjem.” B’hekk, ġie mbassar li Alla kien se jwaqqaf Saltna, jew gvern, biex taħkem fuq l-​art. Skond Apokalissi 20:​4, dan il-​gvern imexxi għal elf sena—millennju! Ikkunsidra ftit mill-​modi kif il-​kundizzjonijiet tal-​ħajja se jitjiebu għall-​bnedmin kollha matul dan il-​Millennju glorjuż:

L-Ekonomija. “Huma għad jibnu djarhom u jgħammru fihom, iħawwlu d-​dwieli u jieklu frotthom. Ma jibnux biex jgħammar ħaddieħor, u ma jħawwlux biex jiekol ħaddieħor; għax il-​poplu tiegħi jgħix daqs kemm jgħixu s-​siġar, u l-​magħżulin tiegħi jistgħallu [jew, igawdu] xogħol idejhom.”—Isaija 65:​21, 22.

Is-Saħħa. “Mbagħad jinfetħu għajnejn l-​għomja, jinfetħu widnejn it-​torox. Mbagħad iz-​zopp jaqbeż bħal għażżiela u lsien l-​imbikkma jinħall bil-​ferħ.” “U ħadd minn min jgħammar hemm ma jgħid: ‘Jien marid.’”​—Isaija 33:24; 35:​5, 6.

L-Ambjent. Alla se jeqred lil “dawk li qegħdin jeqirdu d-​dinja.”—Apokalissi 11:18.

Ir-Relazzjonijiet bejn il-​Bnedmin. “Ma jagħmlux aktar deni u anqas ħsara fuq il-​muntanja qaddisa kollha tiegħi, għax mimlija hi l-​art bl-​għarfien tal-​Mulej.”—Isaija 11:9.

Il-fidi f’dak li qed twiegħed il-​Bibbja għenet lil miljuni taʼ nies jiksbu ħarsa ottimista u pożittiva lejn il-​futur. Bħala riżultat, huma jistgħu jkampaw aħjar mal-​pressjonijiet u l-​problemi tal-​ħajja. Int, kif tistaʼ tħalli l-​Bibbja tiggwidalek ħajtek?

Għarfien Li Jwassal għall-​Ħajja!

Ħafna drabi nistgħu nintilfu fuq ix-​xjenza u t-​teknoloġija. Madankollu, l-​għarfien tal-​bniedem ma ġabx il-​ferħ u s-​sigurtà fil-​ħajja tal-​biċċa l-​kbira tan-​nies. L-​uniku għarfien li jistaʼ jwettaq dan huwa deskritt fil-​Bibbja fi Ġwann 17:3. Dan jgħid: “Din hi l-​ħajja taʼ dejjem, li jagħrfu lilek, Alla waħdek veru, u lil Ġesù Kristu, li inti bgħatt.”

Dan l-​għarfien nistgħu nsibuh fil-​paġni tal-​Bibbja. Ħafna nies għandhom l-​opinjoni tagħhom dwar dan il-​ktieb sagru, u mhux la kemm taqbad u ddawwarhielhom. Però, ftit huma dawk li tabilħaqq fittxew bir-​reqqa xi tgħid il-​Bibbja. Xi ngħidu għalik? Huwa veru li trid tagħmel daqsxejn taʼ sforz mhux ħażin biex taqra l-​Bibbja, imma kemm jiswa! Il-​Bibbja hija l-​uniku ktieb ‘imnebbaħ minn Alla, u jiswa biex wieħed jgħallem, iċanfar, iwiddeb u jrawwem fis-​sewwa.’—2 Timotju 3:16.

Għalhekk, x’tistaʼ tagħmel biex tibda ssir midħla tal-​Bibbja? Għax ma taċċettax l-​għajnuna tax-​Xhieda taʼ Jehovah? Huma jgħallmu lil miljuni taʼ nies fi djarhom stess u dan jagħmluh bla ħlas. Biex jgħinuk, huma jużaw diversi pubblikazzjonijiet ibbażati fuq il-​Bibbja, bħall-​browxer Alla X’Jirrikjedi Minna? Dan il-​browxer jagħtik fil-​qosor it-​tweġibiet għal ħafna mill-​mistoqsijiet li forsi għandek dwar il-​Bibbja, bħal: Min hu Alla? X’inhu l-​iskop t’Alla għall-​art? X’inhi s-​Saltna t’Alla? Kif tistaʼ l-​Bibbja tgħinek tkun membru tal-​familja aħjar?

Jekk tixtieq li xi ħadd mix-​Xhieda taʼ Jehovah jiġi d-​dar tiegħek, jekk jogħġbok imla l-​kupun t’hawn taħt. Huma żgur li se jieħdu gost jagħtuk iktar tagħrif dwar ir-​Renju t’Elf Sena glorjuż tas-​Saltna t’Alla!

□ Nixtieq nirċievi l-​browxer Alla X’Jirrikjedi Minna? Indika x’lingwa tippreferi

□ Jekk jogħġobkom ikkuntattjawni dwar studju tal-​Bibbja fid-​dar bla ħlas

[Nota taʼ taħt]