Manjiera Rpożata

HUWA komuni li kelliemi jħossu ansjuż qabel taħdita, speċjalment jekk ma jagħtix taħditiet spiss. Pubblikatur jistaʼ jħossu xi ftit ansjuż meta jagħmel l-​ewwel ftit żjajjar tal-​ġurnata fil-​ministeru tal-​għalqa. Meta ġie inkarigat biex ikun profeta, Ġeremija wieġeb: “Jien ma nafx nitkellem, għax m’iniex ħlief naqra taʼ tifel.” (Ġer. 1:5, 6) Ġeħova għen lil Ġeremija, u se jgħin lilek ukoll. Maż-​żmien, int ukoll tistaʼ tiżviluppa manjiera rpożata.

Kelliemi rpożat hu kelliemi rilassat u li jkollu kontroll. Dan jidher mill-​qagħda tiegħu. Din tkun naturali u adattata għall-​okkażjoni. Iċ-​ċaqliq taʼ jdejh għandu sinifikat. Il-​vuċi tiegħu hi espressiva u kontrollata.

Għalkemm tistaʼ tħossok li d-​deskrizzjoni taʼ persuna rpożata ma tgħoddx għalik, tistaʼ titjieb. Kif? Ejja nikkunsidraw għala kelliemi jħossu ansjuż u ma jkunx irpożat. Il-​kaġun jistaʼ jkun wieħed fiżiku.

Meta tiffaċċja sfida u tkun trid tmur tajjeb imma m’intix ċert jekk dan iseħħx, int tħossok ansjuż. B’hekk, il-​moħħ jibgħat sinjali lill-​ġisem biex jipproduċi iktar adrenalina. Iż-​żieda fl-​adrenalina ġġiegħel lil qalbek tħabbat iktar, tibdillek ir-​rata tan-​nifs, iġġiegħlek togħroq iktar, jew saħansitra jdejk, irkopptejk, u leħnek jibdew jirtogħdu. Ġismek qed jistinka biex jgħinek tkampa mas-​sitwazzjoni tiegħek billi jżid il-​livell tal-​enerġija. L-​isfida hi li tkun taf kif tidderieġi din iż-​żieda fl-​enerġija biex tibda taħseb b’mod prattiku u tagħti t-​taħdita b’entużjażmu.

Kif Tnaqqas l-​Ansjetà. Ftakar li hu normali li tħossok xi ftit ansjuż. Madankollu, sabiex tibqaʼ rpożat, trid tkun kapaċi tnaqqas il-​livell taʼ ansjetà u tittratta s-​sitwazzjoni tiegħek b’mod kalm u dinjituż. Kif tistaʼ tagħmel dan?

Ipprepara sew. Investi l-​ħin biex tipprepara t-​taħdita tiegħek. Kun żgur li tifhem sewwa s-​suġġett li għandek. Jekk it-​taħdita tiegħek hija waħda li fiha tagħżel il-​punti li se tkopri, żomm f’moħħok dak li l-​udjenza diġà taf dwar is-​suġġett u dak li int tixtieq twettaq. Dan se jgħinek tagħżel il-​materjal li hu l-​iktar taʼ valur. Jekk għall-​ewwel issibha diffiċli, iddiskuti l-​problema maʼ kelliemi tal-​esperjenza. Hu jistaʼ jgħinek tagħmel analisi utli tal-​materjal u tal-​udjenza tiegħek. Meta tkun ċert li għandek materjal li hu taʼ benefiċċju għall-​udjenza tiegħek u int ikollok dan ċar f’moħħok, ix-​xewqa li taqsmu maʼ oħrajn se tibda tegħleb l-​ansjetà li tistaʼ tħoss dwar l-​għoti tat-​taħdita.

Agħti attenzjoni speċjali għall-​introduzzjoni tiegħek. Kun af kif se tibda. Ladarba t-​taħdita tiegħek tkun bdiet, l-​ansjetà x’aktarx li se tbatti.

L-​istess passi bażiċi japplikaw għal meta tipprepara għall-​ministeru tal-​għalqa. Tikkunsidrax biss is-​suġġett li tippjana li tiddiskuti iżda anki t-​tip taʼ nies li se tagħtihom xhieda. Ippjana l-​introduzzjoni tiegħek bir-​reqqa. Ibbenefika mill-​esperjenza taʼ pubblikaturi maturi.

Għandek mnejn tħoss li se tkun iktar irpożat jekk tuża manuskritt meta tagħti taħdita quddiem grupp taʼ nies. Fil-​fatt, dan jistaʼ jirriżulta f’iktar ansjetà kull darba li tagħti taħdita. Huwa minnu li xi kelliema jużaw ħafna noti, waqt li oħrajn jużaw ftit. Iżda dak li se jgħinek tiffoka l-​ħsieb tiegħek iktar fuq il-​materjal li għandek minflok fuqek innifsek, u b’hekk tnaqqas il-​livell taʼ ansjetà, mhuwiex il-​kliem fuq il-​karta iżda l-​konvinzjoni f’qalbek li dak li ppreparajt għall-​udjenza tiegħek hu verament taʼ valur.

Ipprattika t-​taħdita tiegħek b’leħen għoli. Dan l-​ipprattikar se jagħtik il-​kunfidenza li tistaʼ tpoġġi l-​ħsibijiet tiegħek fi kliem. Int u tipprattika, se tibni f’moħħok l-​ideat bażiċi tat-​taħdita li se tiftakarhom faċilment meta tagħti t-​taħdita. Agħmel is-​sessjoni tiegħek taʼ prattika waħda realistika. Ġib l-​udjenza quddiem għajnejk. Poġġi bilqiegħda mal-​mejda jew oqgħod bilwieqfa, bħalma tagħmel meta tagħti t-​taħdita.

Itlob lil Ġeħova għall-​għajnuna. Se jwieġeb hu talb bħal dan? “Din hi l-​fiduċja li għandna fih, li, kulma nitolbuh skond ir-​rieda tiegħu, hu jismagħna.” (1 Ġw. 5:14) Jekk tixtieq tonora lil Alla u tgħin lin-​nies jibbenefikaw mill-​Kelma tiegħu, hu żgur se jwieġeb it-​talba tiegħek. Din l-​assiguranza tistaʼ tgħinek ħafna biex tissaħħaħ ħalli twettaq l-​inkarigu tiegħek. Iktar minn hekk, hekk kif tikkultiva l-​frott tal-​ispirtu—l-​imħabba, l-​hena, il-​paċi, il-​ħlewwa, u r-​rażan—int se tiżviluppa l-​attitudni mentali meħtieġa biex tittratta sitwazzjoni b’manjiera rpożata.—Gal. 5:22, 23.

Ikseb l-​esperjenza. Iktar ma tieħu sehem fis-​servizz tal-​għalqa, inqas se tkun ansjuż. Iktar ma tikkummenta fil-​laqgħat tal-​kongregazzjoni, iktar se jkun faċli li titkellem quddiem oħrajn. Hekk kif jikber l-​għadd taʼ taħditiet li tagħti fil-​kongregazzjoni, l-​ammont taʼ ansjetà li tħoss qabel kull taħdita x’aktarx li se jonqos. Tixtieq ikollok iktar opportunitajiet biex titkellem? Mela offri ruħek biex tagħmel xi taħdita fl-​iskola meta oħrajn ma jkunux jistgħu jwettqu l-​inkarigi tagħhom.

Wara li tkun ħadt dawn il-​passi li semmejna, int se ssibha taʼ benefiċċju li teżamina s-​sintomi li juru bla dubju li ma tħossokx kalm. Se tiġi megħjun titkellem b’manjiera rpożata jekk tidentifika s-​sintomi u titgħallem kif tkampa magħhom. Is-​sintomi jistgħu jkunu fiżiċi jew tal-​leħen.

Sintomi Fiżiċi. Jekk għandekx manjiera rpożata jew le jintwera mill-​qagħda fiżika tiegħek u mill-​mod li tuża jdejk. Ikkunsidra l-​ewwel l-​idejn. L-​idejn wara d-​dahar, miżmumin b’mod riġidu fil-​ġnub, jew iggranfati mal-​istand tal-​kelliemi; idejn deħlin u ħerġin fil-​bwiet, jagħlqu u jħollu l-​buttuni tal-​ġakketta, imissu bla bżonn il-​ħaddejn, l-​imnieħer, jew in-​nuċċali; idejn jilagħbu maʼ xi arloġġ, lapes, ċurkett, jew in-​noti; ġesti skossati jew mhux kompluti—dan kollu juri manjiera li mhijiex irpożata.

In-​nuqqas taʼ kunfidenza jistaʼ jidher ukoll meta toqgħod il-​ħin kollu tkaxkar saqajk, tbandal ġismek minn naħa għal oħra, toqgħod bilwieqfa f’pożizzjoni li hi wisq riġida, tintelaq, spiss tilgħaq xofftejk, tiblaʼ r-​riq il-​ħin kollu, u tieħu nifsijiet qosra u mgħaġġlin.

Bi sforz dawn it-​turijiet taʼ ansjetà jistgħu jiġu kontrollati. Aħdem fuq waħda biss kull darba. Identifika l-​problema, u kkunsidra bil-​quddiem dak li għandek bżonn tagħmel biex tevitaha. Jekk tagħmel dan l-​isforz se turi li int irpożat fil-​qagħda fiżika tiegħek.

Sintomi tal-​Leħen. L-​ansjetà fil-​leħen tistaʼ tinkludi vuċi b’ton ogħla min-​normal jew vuċi titriegħed. Forsi int il-​ħin kollu tqaħqaħ jew titkellem b’ritmu mgħaġġel wisq. Dawn il-​problemi u l-​vizzji jistgħu jiġu megħlubin bi sforz ħabrieki biex tikkontrolla l-​vuċi tiegħek.

Jekk tħossok ansjuż, ħu pawsa biex tieħu ftit nifsijiet fil-​fond qabel tmur fuq il-​platform. Stinka biex tirrilassa ġismek kollu. Minflok ma taħseb dwar l-​ansjetà li qed tħoss, ikkonċentra fuq għala trid taqsam l-​affarijiet li ppreparajt mal-​udjenza tiegħek. Qabel tibda titkellem, ħu l-​ħin biex tħares lejn l-​udjenza tiegħek, agħżel wiċċ simpatiku, u tbissem. Tkellem bil-​mod fl-​introduzzjoni, u mbagħad kun ħsiebek biss fit-​taħdita tiegħek.

Dak li Għandek Tistenna. Tistenniex li s-​sentimenti taʼ ansjetà se jgħibu kollha. Ħafna kelliema bi snin taʼ esperjenza fuq il-​platform iħossuhom ansjużi qabel ma jitkellmu quddiem udjenza. Madankollu, huma tgħallmu jikkontrollaw l-​ansjetà tagħhom. Kelliemi li jesperjenza dan qal: “Għadu jkolli friefet fl-​istonku, iżda issa nikkontrolla kif itiru.”

Jekk tagħmel sforz sinċier biex ma tħallix l-​ansjetà tidher minn barra, l-​udjenza tiegħek se tħares lejk bħala kelliemi rpożat. Għandek mnejn xorta tħossok ansjuż, iżda huma forsi ma jindunaw xejn b’dan.

Ftakar, iż-​żieda fl-​adrenalina li tikkaġuna sintomi taʼ ansjetà tagħtik ukoll iżjed enerġija. Użaha biex titkellem b’sentiment.

M’hemmx għalfejn tistenna sakemm titlaʼ fuq il-​platform biex tipprattika dawn l-​affarijiet kollha. Tgħallem kun irpożat u kontrollat u tkellem b’sentiment xieraq fil-​ħajja tiegħek taʼ kuljum. Jekk tagħmel dan se tkun ħafna iktar kunfidenti fuq il-​platform u fil-​ministeru tal-​għalqa, fejn hu l-​iktar importanti.