Jinżamm il-​Ħin bir-​Reqqa, Jitqassam Sew

WAQT li l-​enfasi prinċipali għandha titpoġġa fuq il-​kwalità tat-​tagħlim tiegħek, il-​kalkolu tal-​ħin tat-​taħditiet tiegħek jistħoqqlu l-​attenzjoni wkoll. Il-​laqgħat tagħna għandhom skeda speċifika tal-​ħinijiet li fihom jibdew u jintemmu. Biex dan jinkiseb hemm bżonn tal-​kooperazzjoni taʼ kull min ikollu sehem fil-​programm.

Fiż-​żminijiet tal-​Bibbja, il-​ħarsa tan-​nies lejn il-​ħajja kienet differenti minn dik tan-​nies f’ħafna postijiet illum. Il-​ħin kien jiġi kalkulat b’termini mhux eżatti bħal “madwar it-​tielet siegħa” jew “madwar l-​għaxar siegħa.” (Mt. 20:3-​6; Ġw. 1:39) Rari kienu jinkwetaw dwar xi ħin preċiż għall-​attivitajiet taʼ kuljum. Illum, f’xi partijiet tad-​dinja għad għandhom l-​istess ħarsa lejn il-​ħin.

Madankollu, avolja d-​drawwa lokali jew il-​preferenza persunali tistaʼ ġġiegħel lin-​nies ikunu kemxejn rilassati dwar il-​ħin, nistgħu nibbenefikaw jekk nitgħallmu kif nagħtuh l-​attenzjoni xierqa. Meta jkun hemm diversi partijiet fi programm, irid jiġi kunsidrat il-​ħin imwarrab għal kull parti tal-​programm. Il-​prinċipju “ħa jsir kollox bid-​deċenza u bl-​ordni” jistaʼ tassew japplika għal meta jinżamm il-​ħin fl-​inkarigi tal-​laqgħat tagħna.—1 Kor. 14:40.

Kif Iżżomm Sew mal-​Ħin. Il-​preparazzjoni hi fundamentali. Ġeneralment, il-​kelliema li jsibuha diffiċli biex iżommu mal-​ħin ma jkunux ippreparaw biżżejjed. Forsi jkunu kunfidenti żżejjed. Jew forsi sempliċement iħallu l-​preparazzjoni għall-​aħħar minuta. Il-​bażi fundamentali biex iżżomm sew mal-​ħin hi li tapprezza l-​inkarigu tiegħek u li tkun lest li tipprepara sew.

Għandek inkarigu taʼ qari? L-​ewwel, irrivedi Studji 4 sa 7, li jinvolvu l-​fatt li tkun fluwenti, il-​pawsi, l-​enfasi biex tagħti s-​sens, u li tenfasizza l-​ideat prinċipali. Imbagħad applika dawn il-​pariri int u taqra b’leħen għoli l-​materjal inkarigat lilek. Żomm il-​ħin. Għandek bżonn taqra iktar malajr ħalli tispiċċa fil-​ħin li ngħatalek? Żid il-​pass fil-​porzjonijiet li huma inqas importanti, imma kompli uża l-​pawsi u naqqas il-​pass meta tenfasizza ideat importanti. Ipprattika għal darba wara l-​oħra. Hekk kif issir iktar fluwenti, se jkun iktar faċli għalik li tirregola l-​ħin.

Se titkellem bl-​għajnuna tan-​noti? M’għandekx għalfejn tagħmel noti dettaljati ħafna—kważi manuskritt—biex tkun ċert li żżomm mal-​ħin. Meta ħdimt fuq Studju 25, int tgħallimt mod aħjar. Żomm f’moħħok dawn il-​ħames punti: (1) Ħejji materjal tajjeb, imma tħejjix iżżejjed. (2) Żomm l-​ideat prinċipali ċari f’moħħok, imma titgħallimx bl-​amment sentenzi sħaħ. (3) Fuq l-​outline tiegħek immarka kemm ħin qed tippjana li tuża għal kull parti tat-​taħdita tiegħek jew kemm għandu jkun għadda ħin meta tkun wasalt għal ċerti punti. (4) Meta tipprepara, ikkunsidra liema dettalji tistaʼ tneħħi jekk tara li tkun se taqbeż il-​ħin. (5) Ipprattika kif se tagħti t-​taħdita.

Huwa importanti li tipprattika minn qabel. Int u tipprattika, ara kemm qed tieħu ħin għal kull sezzjoni tat-​taħdita tiegħek. Irrivedi t-​taħdita tiegħek għal darba wara l-​oħra sakemm it-​taħdita kollha tidħol eżatt fil-​ħin mogħti. Ipprova ddaħħalx iżżejjed materjal. Ħalli ftit ħin żejjed għaliex meta tagħti t-​taħdita tiegħek quddiem udjenza tistaʼ tieħu ftit iktar ħin milli meta tipprattikaha fil-​privat.

Kif Tqassam il-​Partijiet tat-​Taħdita. Il-​fatt li żżomm tajjeb mal-​ħin hu konness mill-​qrib maʼ li tqassam il-​partijiet tat-​taħdita tiegħek kif suppost. Ħafna mill-​ħin għandu jintuża għall-​qalba tat-​taħdita. Dan hu meta tiddiskuti l-​punti prinċipali taʼ istruzzjoni. L-​introduzzjoni għandha tkun twila biżżejjed biex tilħaq it-​tliet miri diskussi fi Studju 38. Il-​qalba tat-​taħdita m’għandhiex tkun tant twila li ma jkunx hemm biżżejjed ħin għal konklużjoni effettiva, fi qbil maʼ Studju 39.

L-​isforzi tiegħek biex iżżomm sew mal-​ħin se jirriżultaw f’taħdita aħjar u int se turi r-​rispett tiegħek lejn oħrajn li għandhom sehem fil-​programm kif ukoll lejn il-​kongregazzjoni kollha.