Kapitlu Tmienja

“X’Qed Jitlob Minnek Ġeħova?”

1, 2. Għala tistaʼ tqawwi qalbek jekk toqgħod attent għal kif Ġeħova rreaġixxa għat-​taħsir morali tal-​poplu li kellu fil-​qedem?

IMMAĠINA din ix-​xena: Tifla tinħasad meta tismaʼ lil xi ħadd iħabbat b’mod vjolenti fuq il-​bieb. Hi tibżaʼ li wara l-​bieb hemm in-​negozjant korrott li jrid minnufih il-​flus li l-​familja tagħha għandha tagħtih. Hu sfrutta lil ħafna billi uża miżien qarrieq u talab interessi illegali. Biex ma jiġix kastigat, ixaħħam lill-​mexxejja tal-​belt, u dawn jinjoraw l-​għajat għall-​għajnuna tal-​vittmi. It-​tifla tħoss li m’għandhiex min jiddefendiha; missierha abbanduna l-​familja tagħha biex jieħu mara iżgħar fl-​età. Hi u ommha jistgħu jinbiegħu bħala lsiera.

² Din ix-​xena tinkludi ftit mill-​prattiki mmaqdrin mit-​12-il profeta. (Għamos 5:12; 8:4-6; Mikea 6:10-12; Sofonija 3:3; Malakija 2:13-16; 3:5) Kieku kont tgħix dak iż-​żmien, kif kont tirreaġixxi? Għalkemm is-​sitwazzjoni tidher negattiva, int tistaʼ tqawwi qalbek minħabba l-​karatteristiki pożittivi taʼ Ġeħova meta aġixxa mal-​poplu tiegħu fi żmien dawn il-​profeti. Iva, tistaʼ tara minn dawn it-​12-il ktieb li Alla enfasizza kwalitajiet u attitudnijiet taʼ min jammirahom. L-​inkuraġġiment tiegħu jistaʼ jsaħħaħlek il-​morali, jimmotivak biex tagħmel it-​tajjeb, u jqanqlek biex tfaħħru. Peress li l-​jum taʼ ġudizzju taʼ Ġeħova riesaq bil-​ħeffa, il-​fatt li toqgħod attent għall-​messaġġ pożittiv li hemm f’dawn il-​kotba jistaʼ jagħtik id-​dehen dwar x’qed jitlob minnek Alla. Ibda billi tħares lejn żmien Mikea, fit-​tmien seklu Q.E.K.

X’QED JITLOB MINNEK ĠEĦOVA?

3, 4. (a) Liema talba bil-​ħrara li tiġbdek hi inkluża fil-​ktieb taʼ Mikea? (b) Kif int effettwat personalment bil-​mistoqsija li hemm f’Mikea 6:8?

³ Meta taqra l-​ktieb taʼ Mikea, għall-​ewwel forsi tħoss li hu xi litanija, jew lista twila, t’akkużi kontra l-​Israelin ribellużi. Naturalment, Ġeħova m’għalaqx għajnejh għat-​taħsir morali tal-​poplu dedikat tiegħu, inkluż dawk li ddeskriva bħala li ‘jobogħdu dak li hu tajjeb u jħobbu l-​ħażen.’ (Mikea 3:2; 6:12) Xorta waħda, flimkien mad-​denunzja, hemm waħda mit-​twissijiet tal-​Bibbja li l-​iktar li tiġbdek u timmotivak. Mikea jiffoka fuq is-​Sors tal-​livelli ġusti u jistaqsi din il-​mistoqsija li tqanqal il-​ħsieb: “X’qed jitlob minnek Ġeħova ħlief li tkun ġust u li tħobb il-​qalb tajba u li tkun modest fil-​mixi tiegħek m’Alla?”—Mikea 6:8.

⁴ Qed tinduna int li din hija talba bil-​ħrara mingħand il-​Ħallieq tagħna? Qed niġu mfakkrin bl-​imħabba dwar attitudnijiet pożittivi li nistgħu nadottaw minflok ma nħallu lilna nfusna niġu żvijati mill-​ħafna ħażen li hawn madwarna. Ġeħova jaf li, bħala bnedmin leali, aħna nixtiequ nikkultivaw kwalitajiet divini, u hu għandu fiduċja sħiħa fina. Kif kont twieġeb int kieku staqsewk personalment: “X’qed jitlob minnek Ġeħova?” Tistaʼ tidentifika xi aspetti f’ħajtek li fihom il-​livelli morali t’Alla qed jagħmlu—jew suppost li qed jagħmlu—differenza? Ir-​relazzjoni tiegħek m’Alla u l-​kwalità taʼ ħajtek jitjiebu bil-​kbir hekk kif tkompli tilħaq dawn il-​livelli. B’ġenna taʼ l-​art eżatt quddiemek, agħmel il-​kuraġġ b’din it-​twissija: “Iżirgħu bis-​sewwa; aħsdu skond il-​qalb tajba bl-​imħabba. Aħdmu l-​art li hi tajba għall-​ħrit, meta għad hemm ħin biex tfittxu lil Ġeħova sakemm jiġi u jistruwikom dwar is-​sewwa.” (Ħosea 10:12) Issa ejja neżaminaw xi punti fundamentali fil-​pariri mill-​aħjar taʼ Mikea 6:8.

“KUN MODEST”

5. Għala hu importanti li ‘nkunu modesti’ fil-​mixi tagħna m’Alla?

⁵ B’mod sinifikanti, Mikea jgħid li Ġeħova qed jitlobna ‘nkunu modesti fil-​mixi tagħna’ Miegħu. Il-​modestja tistaʼ tkun biss taʼ ġid għalina għaliex “l-​għerf hu mal-​modesti.” (Proverbji 11:2) Il-​modestja tinkludi li nkunu konxji tal-​limitazzjonijiet li d-​dnub taʼ Adam għabbiena bihom. Il-​fatt li nammettu li twelidna bid-​dnub huwa l-​ewwel pass vitali biex nistinkaw ħalli nevitaw kwalunkwe dnub apposta.—Rumani 7:24, 25.

6. Kif nistgħu nibbenefikaw jekk nirrikonoxxu bil-​modestja l-​konsegwenzi tad-​dnub?

⁶ Il-​modestja, flimkien maʼ l-​umiltà, għala hi daqshekk importanti biex nevitaw id-​dnub apposta? Sewwa, individwu modest jirrikonoxxi l-​qawwa li għandu d-​dnub. (Salm 51:3) Ħosea jgħinna nifhmu li d-​dnub jistaʼ jħajjarna u li, fl-​aħħar mill-​aħħar, dejjem iġib riżultati li jħarbtuna. Per eżempju, Ġeħova wiegħed li ‘jitlob kont’ tad-​diżubbidjenza tal-​poplu li kellu fil-​qedem. Taħseb li dan jagħti l-​impressjoni li l-​midinbin immodesti setgħu jiskansaw il-​konsegwenzi kollha? Forsi hekk ittamaw, ladarba d-​dnub spiss iqarraq bil-​midneb u ijassru. Iktar importanti, id-​dnub jifred lill-​midinbin minn Alla, u għandu mnejn iġegħelhom jaslu sa dan l-​estrem: “L-​aġir tagħhom ma jippermettilhomx jerġgħu lura lejn Alla tagħhom.” Id-​dnub li jsir apposta jgħawwar is-​saħħa morali tal-​midneb u jittrasformah f’wieħed ‘li jipprattika dak li hu ħażin.’ Iżjed minn hekk, bid-​dnub, il-​ħajja tal-​midneb ma jkollhiex suċċess. Huwa minnu li għal xi żmien jistaʼ jidher li għamel suċċess, imma l-​midneb li ma jindimx ma jistax jippretendi li jkollu l-​approvazzjoni t’Alla.—Ħosea 1:4; 4:11-13; 5:4; 6:8.

7. Nies modesti kif iwieġbu għad-​direzzjoni taʼ Ġeħova?

⁷ Nies modesti jammettu wkoll li jeħtieġu d-​direzzjoni t’Alla biex jevitaw il-​konsegwenzi li jnikktu tad-​dnub. Mikea ra bil-​quddiem żmien—żmienna—meta kotriet taʼ nies kellhom ifittxu bil-​ħerqa li jiġu ‘mgħallmin dwar it-​triqat taʼ Ġeħova’ u li ‘jimxu fil-​mogħdijiet tiegħu.’ Dawn il-​ġwejdin ifittxu l-​“liġi” u “l-​kelma taʼ Ġeħova.” Int x’aktarx li tinsab hieni fost dawk li jixtiequ ‘jimxu f’isem Ġeħova’ billi jwieġbu għall-​ħtiġijiet tiegħu. Xorta waħda, bħal Mikea, forsi jinteressak li tkun taf modi oħrajn kif tibqaʼ “safi” moralment. (Mikea 4:1-5; 6:11) Se jkun t’għajnuna kbira għalik li tfittex bil-​modestja li tagħmel dak li qed jitlob minnek Ġeħova.

RAWWEM MORALI GĦOLJIN

8. Xi nnotajt int dwar il-​morali tad-​dinja llum?

⁸ Biex jgħinna nkunu b’saħħitna spiritwalment u fiżikament, Ġeħova jitlobna nkunu safjin moralment minkejja t-​taħsir li hemm fid-​dinja taʼ madwarna. (Malakija 2:15) Aħna nirċievu ħafna messaġġi mimlijin kontenut sesswali. Ħafna nies iħossu li l-​fatt li jaraw stampi u films pornografiċi, jaqraw dwar attivitajiet sesswali oxxeni, u jisimgħu diski b’lirika provokanti hu parti mill-​ħajja normali. Iktar minn hekk, hemm ħafna rġiel li ma jirrispettawx lin-​nisa, billi jqisuhom bħala sempliċi oġġetti sesswali. Jew iż-​żgħażagħ fl-​iskola għandhom mnejn iżewqu diskorshom b’ċajt oxxen u bi kliem doppju sens. Kif tistaʼ int tirreżisti dawn l-​influwenzi korrotti?

9. Ħafna kif naqsu li jappoġġaw il-​livelli taʼ Ġeħova matul iż-​żmien tat-​12-il profeta?

⁹ It-​12-il profeta li qed nikkunsidraw jagħtuna twissijiet prezzjużi. Huma għexu qabel l-​era tat-​teatri kbar taċ-​ċinema, fejn jintwerew iktar minn film wieħed, u tal-​ħwienet li jbigħu l-​vidjos, u madankollu fi żmienhom kien hemm simboli falliċi, l-​hekk imsejħa prostituzzjoni sagra, u taħlit sesswali bla mistħija. (1 Slaten 14:24; Isaija 57:3, 4; Ħabakkuk 2:15) Int tistaʼ tara evidenza taʼ dan f’dak li kitbu l-​profeti: “Għax l-​irġiel jitilqu għal rashom mal-​prostituti, u joffru sagrifiċċji mal-​prostituti nisa tat-​tempju.” “Raġel u missieru marru għand l-​istess tfajla, bl-​iskop li jkasbru l-​isem qaddis tiegħi.” Xi wħud kienu b’mod regulari “jħallsu lill-​prostituti” f’riti taʼ fertilità.a L-​adulterju kien komuni minħabba li l-​miżżewġin żleali kienu ‘jmorru wara l-​maħbubin appassjonati tagħhom.’—Ħosea 2:13; 4:2, 13, 14; Għamos 2:7; Mikea 1:7, Contemporary English Version.

10. (a) X’inhu l-​kaġun prinċipali tal-​kondotta immorali? (b) Il-​poplu li kellu Alla fil-​qedem kif sar ħati taʼ żína spiritwali?

¹⁰ Int x’aktarx tirrealizza li l-​immoralità sesswali tirrifletti l-​attitudni u l-​motivi taʼ persuna. (Marku 7:20-22) Ġeħova qal dwar il-​poplu immorali tiegħu li “l-​ispirtu taż-​żína [“ix-​xenqa għas-​sess,” CEV] ġegħelhom jiżvijaw” u li huma ma kienu “jwettqu xejn ħlief kondotta laxka.” (Ħosea 4:12; 6:9)b Żakkarija semma “l-​ispirtu taʼ nuqqas taʼ ndafa.” (Żakkarija 13:2) Il-​mod taʼ ħajja tan-​nies kien jinvolvi attitudni sfaċċata, billi kienu jinjoraw jew saħansitra jistmerru l-​livelli u l-​awtorità taʼ Ġeħova. B’hekk, sabiex jikkoreġi l-​motivi tiegħu, wieħed ried ibiddel għalkollox il-​ħsibijiet tiegħu u l-​kundizzjoni taʼ qalbu. Billi jirrealizzaw dan, il-​Kristjani għandhom ikunu saħansitra iktar grati għall-​għajnuna li jirċievu biex jevitaw l-​immoralità u l-​konsegwenzi traġiċi tagħha.

AĦDEM BIEX IŻŻOMM IS-​SAFA MORALI

11. X’inhuma xi konsegwenzi taʼ l-​immoralità sesswali?

¹¹ Forsi int rajt li l-​morali laxki spiss ikissru l-​familji, iċaħħdu lit-​tfal mill-​gwida tal-​ġenituri, iwasslu għal mard moqżież u għal iktar aborti li jeqirdu l-​ħajja. Dawk li jinjoraw lill-​Ħallieq fi kwistjonijiet taʼ sesswalità spiss iġarrbu ħsara fiżika u emozzjonali. Mikea kiteb: “Minħabba l-​fatt li [persuna] ma baqgħetx nadifa, hemm it-​tifrik; u x-​xogħol tat-​tifrik hu taʼ wġigħ.” (Mikea 2:10) Il-​fatt li jafu dan isaħħaħ id-​deċiżjoni taʼ nies devoti. Peress li ma joqogħdux jaħsbu fuq ħsibijiet impuri, huma jevitaw li jniġġsu lil qalbhom u lil moħħhom.—Mattew 12:34; 15:18.

12. Kif nibbenefikaw meta naċċettaw il-​ħarsa taʼ Ġeħova lejn is-​sess?

¹² Il-​Kristjani ma jirreaġixxux sempliċement għax jibżgħu mill-​mard jew għax inisslu xi wild illeġittimu. Huma jaraw il-​valur taʼ li jrawmu mħabba għal-​liġi t’Alla u li jadottaw il-​ħarsa tiegħu lejn il-​morali sesswali. Ġeħova poġġa fil-​bnedmin xewqa normali għal relazzjonijiet sesswali bħala espressjoni taʼ l-​imħabba fiż-​żwieġ. Dan kien parti mill-​iskop kreattiv t’Alla. Meta jinżamm fil-​kuntest xieraq tiegħu—fiż-​żwieġ—is-​sess ikun taʼ benefiċċju, billi jgħaqqad lil raġel u mara flimkien u kultant jirriżulta fil-​prokreazzjoni. Minkejja dan, meta jsir is-​sess barra ż-​żwieġ issir ħsara kbira, kif jintwera minn dak li qalu t-​12-il profeta. Prattiki tas-​sess immorali wasslu għad-​diżapprovazzjoni t’Alla. Dan kien prezz għoli ħafna li kellu jitħallas f’dak iż-​żmien, u jkun daqstant prezz għoli li kwalunkwe individwu jkollu jħallas illum.

13. Kif nistgħu aħna, sa ċertu punt, ‘inwarrbu ż-​żína’ u nevitaw it-​tentazzjoni?

¹³ Ħosea talab bil-​ħniena lin-​nies taʼ żmienu biex ineħħu, jew ‘iwarrbu, iż-​żína minn quddiemhom,’ li kien ifisser li riedu jieħdu azzjoni konkreta biex jipproteġu l-​morali tagħhom. (Ħosea 2:2) Fil-​każ tagħna, huwa għaqli li nwarrbu minn kwalunkwe sitwazzjoni li tistaʼ twassal għal kompromess. Per eżempju, forsi spiss qed tħabbat wiċċek maʼ xi tentazzjoni fl-​iskola jew fl-​akkwata tiegħek. Forsi ma tistax tbiddel l-​iskola jew id-​dar fejn toqgħod, imma jistaʼ jkun hemm modi oħrajn kif titbiegħed mit-​tentazzjoni, u b’hekk ‘twarrab iż-​żína minn quddiemek.’ Għarraf lil oħrajn li int Kristjan veru, wieħed mix-​Xhieda taʼ Ġeħova. B’mod ċar u bir-​rispett, spjega l-​valuri u t-​twemmin tiegħek. Kun ċert li oħrajn ikunu jafu li int deċiż li żżomm mal-​livelli għoljin taʼ Ġeħova. (Għamos 5:15) Mod ieħor kif “twarrab iż-​żína” hu billi tevita l-​pornografija u d-​divertiment dubjuż. Dan jistaʼ jinvolvi li tarmi xi rivista jew li ssib ħbieb ġodda—dawk li jħobbu lil Ġeħova u li jaqblu li int għandek tagħmel dak li qed jitlob minnek. (Mikea 7:5) Iva, bl-​għajnuna taʼ Ġeħova, int tistaʼ tevita li titniġġes bl-​immoralità tad-​dinja!

“ĦOBB IL-​QALB TAJBA”

14, 15. (a) Xi jfisser li ‘tħobb il-​qalb tajba’? (b) Il-​fatt li nkunu nħobbu l-​qalb tajba kif jgħinna nkunu bla ħtija?

¹⁴ Mikea enfasizza li Ġeħova jitlobna ‘nħobbu l-​qalb tajba.’ Il-​fatt li nuru qalb tajba jinvolvi li nagħmlu affarijiet tajbin minflok affarijiet li jagħmlu l-​ħsara. Il-​qalb tajba hi assoċjata mill-​qrib mat-​tjubija u l-​eċċellenza morali. Teħtieġ minna li nkunu onesti u ġusti fil-​kwistjonijiet persunali tagħna u fir-​relazzjoni tagħna m’oħrajn. F’Kapitlu 6 taʼ dan il-​ktieb, eżaminajna aspetti importanti tal-​ħajja, bħalma huma l-​kwistjonijiet tan-​negozju u tal-​flus, li fihom il-​ġustizzja u l-​onestà għandhom irwol vitali. Imma dawn m’humiex l-​uniċi aspetti tal-​ħajja li fihom għandna nkunu ġusti, onesti, u qalbna tajba.

¹⁵ Nies li jħobbu l-​qalb tajba u li jridu jagħmlu l-​ġid lil oħrajn jistinkaw biex ikunu bla ħtija. Ġeħova qal lill-​Israelin li ma kinux qed iwettqu l-​obbligi materjali tagħhom lejn il-​qima safja: “Intom tisirquni.” (Malakija 3:8) Taf int b’xi modi kif wieħed jistaʼ jkun qed ‘jisraq’ lil Alla llum? Xi ngħidu jekk Kristjan ikollu aċċess għall-​fondi mogħtijin għall-​avanz taʼ l-​interessi tas-​Saltna fil-​kongregazzjoni lokali jew f’xi setting ieħor? Taʼ min huma l-​flus? Dawn il-​fondi huma fl-​aħħar mill-​aħħar taʼ Ġeħova, ladarba ngħataw għall-​avanz tal-​qima tiegħu. (2 Korintin 9:7) Għandu xi ħadd jaħseb li jistaʼ “jissellef” dawn il-​flus biex jużahom għal xi emerġenza persunali jew inkella juża fondi dedikati mingħajr l-​awtorizzazzjoni xierqa? Dażgur li le. Dan ikun bħallikieku wieħed jisraq lil Alla! U żgur li ma jkunx qed jaġixxi b’qalb tajba jew bil-​ġustizzja maʼ dawk li kkontribwew dawn il-​fondi għax-​xogħol t’Alla.—Proverbji 6:30, 31; Żakkarija 5:3.

16, 17. (a) Xi wħud kif urew ir-​regħba fi żmien Għamos u Mikea? (b) Alla kif iħares lejn ix-​xenqa b’għira?

¹⁶ Ukoll, il-​qalb tajba u t-​tjubija jqanqlu lill-​Kristjani biex jevitaw ix-​xenqa b’għira. Fi żmien Għamos, ir-​regħba estrema kienet komuni. Predaturi bla xabaʼ kienu lesti “jbigħu lill-​ġust”—aduratur seħibhom stess—“għall-​fidda”! (Għamos 2:6) L-​istess kien jiġri fi żmien Mikea, meta l-​għonja taʼ Ġuda ħatfu l-​proprjetà mingħand dawk li kienu dgħajfin wisq biex jiddefendu ruħhom, u jekk kien ikun hemm bżonn kienu jiħduha bil-​forza. (Mikea 2:2; 3:10) Meta kienu jaħtfu l-​art taʼ sħabhom, dawn l-​individwi rgħibin kienu jiksru l-​Liġi taʼ Ġeħova: inkluż l-​aħħar waħda mill-​Għaxar Kelmiet u r-​regolamenti kontra li xi ħadd ibigħ b’mod permanenti l-​art li jkun wiret.—Eżodu 20:13, 15, 17; Levitiku 25:23-28.

¹⁷ Forsi llum m’huwiex daqshekk komuni li l-​bnedmin jinbiegħu jew jitjassru bħalma kien fi żmien il-​profeti. Madankollu, xi ngħidu dwar li wieħed jieħu vantaġġ finanzjarju jew jipprofitta ruħu minn oħrajn? Kristjan li jħobb il-​qalb tajba żgur li mhux se jipprofitta ruħu minn aduraturi sħabu. Per eżempju, hu jirrealizza li la jkun xieraq u lanqas ikun taʼ qalb tajba li jibda xi negozju jew jippromwovi xi skema taʼ investiment bil-​mira li sħabu fit-​twemmin ikunu l-​konsumaturi prinċipali. Dan ikun qed juri li hu rgħib, xi ħaġa li l-​Kristjani huma mwissijin kontriha, jekk jippjana li jsir sinjur malajr minn fuq dahar Kristjani sħabu. (Efesin 5:3; Kolossin 3:5; Ġakbu 4:1-5) Ir-​regħba tistaʼ tidher fl-​imħabba għall-​flus, fix-​xewqa għall-​poter jew għall-​ġid, saħansitra fil-​kilba għall-​ikel u x-​xorb, is-​sess, jew affarijiet oħrajn. Mikea wera li nies rgħibin li jaqdu l-​interessi tagħhom stess akkost taʼ kollox ‘ma jixbgħux.’ Dan hu minnu llum ukoll.—Mikea 6:14.

18, 19. (a) X’qalu xi wħud mit-​12-il profeta dwar il-​fatt li Ġeħova jieħu ħsieb ir-​“resident barrani”? (b) Il-​fatt li turi interess bl-​imħabba lejn oħrajn kif jistaʼ jtejjeb ir-​relazzjonijiet fejn tgħix int?

¹⁸ Ġeħova istruwixxa lill-​poplu tiegħu biex ma ‘jimbrolja lil ebda resident barrani.’ U permezz taʼ Malakija, Alla ddikjara: ‘Nersaq lejkom għall-​ġudizzju, kontra dawk li jkeċċu lir-​resident barrani.’ (Żakkarija 7:10; Malakija 3:5) Qiegħed il-​post fejn toqgħod int jinbidel minħabba li daħlu ħafna immigranti jew oħrajn taʼ nazzjonalità, razza, jew sfond differenti? Forsi huma ġew hemmhekk biex ifittxu s-​sigurtà, ix-​xogħol, jew kundizzjonijiet aħjar fejn jgħixu. Kif tħares int lejn nies li l-​lingwa u l-​istil taʼ ħajja tagħhom huma differenti minn tiegħek? Għandek xi tendenzi lejn il-​preġudizzju, li fil-​fatt ikunu preċiżament l-​oppost tal-​qalb tajba?

¹⁹ Aħseb ftit kemm se jirreaġixxu b’mod pożittiv in-​nies jekk int turi li dawk li huma minn pajjiżi jew sfondi oħrajn jistħoqqilhom daqsek li jisimgħu bil-​verità Kristjana. Ukoll, il-​qalb tajba ma tħallix li jinbet ġo fik xi sentiment li dawn l-​uħud ġodda qed jieħdu dak li mhux tagħhom għax jużaw is-​Sala tas-​Saltna jew riżorsi oħrajn. L-​appostlu Pawlu fakkar lil xi Kristjani Lhud taʼ l-​ewwel seklu, li kellhom xi preġudizzju lejn dawk li ma kinux Lhud, li attwalment ħadd ma kien jistħoqqlu s-​salvazzjoni; kien biss permezz tal-​qalb tajba mhix mistħoqqa t’Alla li sar possibbli li xi ħadd jasal għas-​salvazzjoni. (Rumani 3:9-12, 23, 24) Il-​qalb tajba lejn oħrajn tqanqalna nithennew bil-​fatt li l-​imħabba t’Alla issa qiegħda tasal għand ħafna nies li qabel ma tantx kellhom opportunità li jisimgħu l-​aħbar tajba. (1 Timotju 2:4) Nies minn pajjiżi jew sfondi oħrajn spiss ikunu żvantaġġati, u għalhekk għandna nuruhom interess u qalb tajba, billi nilqgħuhom fostna u nittrattaw lil kull wieħed minnhom “bħal wieħed imwieled fil-​pajjiż.”—Levitiku 19:34.

IMXI MAʼ L-​ALLA L-​VERU

20. Xi Israelin lejn min daru għal direzzjoni?

²⁰ Mikea enfasizza wkoll li għandna nimxu m’Alla, nafdawh bħala l-​Alla l-​veru billi nfittxu l-​gwida tiegħu. (Proverbji 3:5, 6; Ħosea 7:10) Wara li l-​Lhud ġew lura mill-​eżilju, xi wħud daru lejn dawk li jeħbru, dawk li jbassru l-​ġrajjiet, u l-​allat foloz, forsi għall-​għajnuna waqt xi nixfa. Fir-​realtà, huma sejħu lill-​forzi taʼ l-​ispirti mill-​agħar biex jgħinuhom, minkejja li Ġeħova kien ikkundanna b’mod ċar dawn il-​prattiki kollha. (Dewteronomju 18:9-14; Mikea 3:6, 11; 5:12; Ħaggaj 1:10, 11; Żakkarija 10:1, 2) Dawk il-​Lhud kienu qed jinvolvu ruħhom mal-​ħlejjaq spirti li jopponu lill-​Alla l-​veru!

21, 22. (a) Liema forom taʼ spiritiżmu huma komuni fejn toqgħod int? (b) Il-​qaddejja veri taʼ Ġeħova għala ma jinvolvux ruħhom fl-​okkult?

²¹ Illum xi wħud jaħsbu li l-​ispirti mill-​agħar imsemmijin fl-​Iskrittura huma sempliċement simbolu tal-​ħażen. Madankollu, il-​Bibbja tirrivela li d-​demonji huma reali u qegħdin wara l-​astroloġija, is-​seħer, u xi tipi taʼ maġija. (Atti 16:16-18; 2 Pietru 2:4; Ġuda 6) Il-​perikli taʼ l-​ispiritiżmu huma daqstant reali. In-​nies f’ħafna kulturi jistrieħu fuq ix-​xamani, jew uħud li jfejqu bil-​maġija u li jsostnu li għandhom qawwiet misterjużi, u fuq is-​sħaħar. Oħrajn ifittxu d-​direzzjoni mill-​oroskopju jew karti tat-​tarot, bsaten tat-​teħbir, Ouija boards, jew kristalli speċjali. Hu komuni wkoll li xi wħud jipprovaw jikkomunikaw maʼ l-​ispirti tal-​mejtin. Jingħad li xi ħakkiema jduru għall-​astroloġija u medji taʼ l-​ispirti biex jgħinuhom meta jkunu se jieħdu xi deċiżjoni. Jidher ċar li dan kollu huwa kuntrarju għall-​parir taʼ Mikea biex nimxu maʼ l-​Alla l-​veru billi nsegwu l-​gwida tiegħu.

²² Żgur li int—bħala qaddej veru taʼ Ġeħova—trid titbiegħed minn dawn il-​prattiki. Tistaʼ tkun ċert li Alla qatt ma juża l-​maġija jew l-​okkult biex jirrivela r-​rieda tiegħu jew biex jeżerċita l-​qawwa tiegħu. Minflok, bħalma jassigurana Għamos 3:7, Ġeħova ‘jirrivela l-​ħaġa kunfidenzjali tiegħu lill-​qaddejja tiegħu l-​profeti.’ Iktar minn hekk, il-​fatt li wieħed jinvolvi ruħu fl-​okkult jistaʼ jġibu taħt l-​effett u fil-​kontroll tal-​mexxej tad-​demonji, Satana, li hu giddieb u li l-​istrateġija tiegħu hi li jqarraq bin-​nies. Hu u dawk li huma kompliċi miegħu huma determinati li jagħmlu l-​ħsara, billi minn dejjem kienu u għadhom kefrin, saħansitra joqtlu lin-​nies. (Ġob 1:7-19; 2:7; Marku 5:5) Nistgħu nifhmu għala Mikea kkundanna t-​teħbir u s-​sħaħar meta ħeġġiġna biex nimxu maʼ l-​Alla l-​veru.

23. Min biss jistaʼ jissodisfa dak li hu xieraq nitolbu għalih?

²³ L-​ispiritwalità vera tinsab biss maʼ Ġeħova u l-​qima pura tiegħu. (Ġwanni 4:24) “Itolbu lil Ġeħova,” kiteb il-​profeta Żakkarija. (Żakkarija 10:1) Saħansitra jekk tesperjenza attakki jew tentazzjonijiet kaġunati mill-​forzi taʼ l-​ispirti mill-​agħar, ftakar li “kulmin isejjaħ isem Ġeħova jsalva.” (Ġoel 2:32) Din l-​assiguranza hi sinifikanti hekk kif inżommu qrib f’moħħna l-​jum il-​kbir tiegħu.

24. X’lezzjonijiet tieħu minn Mikea 6:8?

²⁴ Jidher ċar li l-​kliem f’Mikea 6:8 fih x’tomgħod. Biex ikollna moralità b’saħħitha jeħtieġ li jkollna motivi xierqa u kwalitajiet divini. Ħosea inkuraġġixxa lil dawk minna li qed ngħixu “fl-​aħħar parti tal-​jiem.” Hu qal li matul żmienna, nies li għandhom il-​biżaʼ t’Alla kellhom ifittxu t-​tjubija taʼ Ġeħova. (Ħosea 3:5) Għamos ikkonferma l-​istedina t’Alla għalina biex nagħmlu eżatt hekk: “Fittxu dak li hu tajjeb, . . . sabiex tibqgħu tgħixu.” Niġu mħeġġin ukoll: “Ħobbu dak li hu tajjeb.” (Għamos 5:14, 15) Jekk nagħmlu hekk, se nesperjenzaw serħan billi nagħmlu dak li Ġeħova qed jitlob minna.

[Noti taʼ taħt]

X’TISTAʼ TITGĦALLEM

• mill-​appell taʼ Ġeħova biex int tgħix skond il-​livelli tiegħu?—Żakkarija 6:15; Malakija 3:16, 18.

• billi timmedita dwar x’inhu d-​dnub u l-​konsegwenzi taʼ niket li jġib miegħu?—Malakija 4:1; Rumani 6:12-14; 1 Korintin 6:18.

• mill-​iżbalji morali tal-​poplu li kellu Alla fil-​qedem?—Ħosea 8:7; 10:12; 14:9.

KIF TISTAʼ TIBBENEFIKA

• billi tadotta l-​ħarsa taʼ Ġeħova lejn il-​moralità sesswali?—Ħosea 3:3; 4:11.

• billi tapplika t-​twissijiet tat-​12-il appostlu kontra r-​regħba u li wieħed jaqdi l-​interessi tiegħu stess?—Mikea 7:5-7; Filippin 2:4.

• billi tgħasses kontra l-​ispiritiżmu u l-​prattiki taʼ l-​okkult?—Mikea 5:12; Naħum 3:4; Malakija 3:5.

[Kaxxa f’paġna 100]

EŻEMPJU TAʼ MODESTJA U SINĊERITÀ

Ġona wera sinċerità u modestja li ma ssibhomx fost kittieba li m’humiex Bibliċi. Hu tkellem bla tlaqliq dwar id-​diżubbidjenza tiegħu stess u dwar episodji meta naqsitlu l-​fiduċja tiegħu f’Ġeħova. Ma pprovax jgħatti l-​attitudni mhix xierqa tiegħu lejn l-​inkarigu li ngħata jew lejn il-​fatt li Alla ħelisha lin-​Ninwin. X’eżempju mill-​aħjar taʼ modestja biex nimitawh!

[Stampa f’paġna 98]

Ġeħova m’għalaqx għajnejh għall-​korruzzjoni u l-​inġustizzja

[Stampa f’paġna 104]

Il-​fatt li tgħarraf lil oħrajn b’mod ċar dwar it-​twemmin Kristjan tiegħek se jkun taʼ protezzjoni għalik

[Stampa f’paġna 106]

Ħafna Kristjani bi mħabba jieħdu ħsieb il-​ħtiġijiet spiritwali tal-​barranin

[Stampi f’paġna 109]

Il-​qaddejja t’Alla jridu jitbiegħdu minn prattiki taʼ l-​okkult