L-​Għerf Minn Alla Jipprovdi Gwida għall-​Ħajja

HUWA Ġeħova Ħakkiem għaref? Mod importanti kif inwieġbu din il-​mistoqsija hu billi nikkunsidraw il-​pariri tiegħu. Jaħdmu dawn? Veru li l-​ħajja tkun aħjar u jkollha iktar skop jekk jiġu applikati? L-​għaref Sultan Salamun kiteb mijiet taʼ proverbji. Dawn jolqtu kważi kull aspett tal-​ħajja. Ikkunsidra xi eżempji.

Fiduċja f’Alla. Il-​fiduċja hija vitali sabiex ikollna relazzjoni tajba maʼ Ġeħova. Salamun kiteb: “Afda f’Ġeħova b’qalbek kollha u tistrieħx fuq fehmtek stess. Agħti kasu fil-​mogħdijiet tiegħek kollha, u hu jiddrittalek triqatek.” (Proverbji 3:5, 6) Meta nafdaw f’Alla billi nfittxu l-​gwida tiegħu u nobduh, ħajjitna jkollha skop veru. Jekk bniedem jagħmel dan, ikun jistaʼ jferraħ qalb Alla u jagħti lil Ġeħova tweġiba għall-​kwistjonijiet li qajjem l-​għadu Tiegħu, Satana.—Proverbji 27:11.

Nużaw l-​għerf meta nittrattaw m’oħrajn. Il-​pariri t’Alla għall-​irġiel u n-​nisa miżżewġin u t-​tfal huma f’waqthom illum iktar minn qatt qabel. “Ifraħ b’mart żgħożitek,” jgħid Alla lir-​raġel, u b’hekk iħeġġu biex jibqaʼ leali lejn martu. (Proverbji 5:18-​20) Fil-​ktieb tal-​Proverbji n-​nisa miżżewġin isibu deskrizzjoni sabiħa taʼ mara kapaċi li tirbaħ l-​ammirazzjoni taʼ żewġha u wliedha. (Proverbji, kapitlu 31) U t-​tfal jintqalilhom biex jobdu lill-​ġenituri tagħhom. (Proverbji 6:20) Dan il-​ktieb juri wkoll kemm huma importanti l-​ħbiberiji, għaliex jekk wieħed jinqataʼ għalih isir egoist. (Proverbji 18:1) Il-​ħbieb jistgħu jinfluwenzawna għat-​tajjeb jew għall-​ħażin, u għalhekk jeħtieġ li nagħżluhom bil-​għaqal.—Proverbji 13:20; 17:17.

Ħu ħsieb tiegħek innifsek bl-​għerf. Il-​ktieb tal-​Proverbji fih pariri prezzjużi dwar li nevitaw l-​abbuż tal-​alkoħol, li niżviluppaw sentimenti li għandhom effett tajjeb fuq saħħitna u niġġieldu dawk li jeqirduha, u li nkunu ħaddiema beżlin. (Proverbji 6:6; 14:30; 20:1) Iwissi li jekk nafdaw fil-​ġudizzju uman mingħajr ma nqisu l-​pariri t’Alla se jkun taʼ diżastru għalina. (Proverbji 14:12) Iħeġġiġna biex inħarsu lil qalbna, il-​persuna li aħna minn ġewwa, biex ma tiġix influwenzata minn affarijiet li jħassruha, u jfakkarna li mill-​qalb “ġejjin is-​sorsi tal-​ħajja.”—Proverbji 4:23.

Miljuni taʼ nies madwar id-​dinja kollha sabu li billi jsegwu dawn il-​pariri jkollhom ħajja aħjar. Għaldaqstant, għandhom mitt elf raġun biex jaċċettaw lil Ġeħova bħala l-​Ħakkiem tagħhom.

—Ibbażat fuq il-​​ktieb tal-​Proverbji.