Riżultati tal-​ippritkar—‘L-​għelieqi huma bojod għall-​ħsad’

1, 2. (a) Id-​dixxipli għala huma mħawdin? (b) Ġesù dwar liema tip taʼ ħsad qed jitkellem?

ID-​DIXXIPLI huma mħawdin. Ġesù qalilhom: “Erfgħu għajnejkom u ħarsu lejn l-​għelieqi, kif inhuma bojod għall-​ħsad.” Huma jħarsu lejn id-​direzzjoni fejn qed jipponta Ġesù, imma l-​għelieqi mhumiex bojod imma ħodor—il-​kulur tax-​xgħir li għadu kif nibet. ‘Xi ħsad hu?’ abbli jaħsbu bejnhom u bejn ruħhom. ‘Għad baqaʼ xhur sakemm jasal żmien il-​ħsad.’—Ġw. 4:35.

² Imma Ġesù mhux qed jitkellem dwar ħsad letterali. Minflok, qed juża din l-​okkażjoni biex jgħallem lid-​dixxipli tiegħu żewġ lezzjonijiet importanti dwar ħsad spiritwali—ħsad jew ġbir tan-​nies. X’inhuma dawn il-​lezzjonijiet? Biex insiru nafu, ejja nikkunsidraw ir-​rakkont b’iktar dettall.

Jiġu motivati għal xogħol li se jferraħhom

3. (a) X’jistaʼ jkun li qanqal lil Ġesù biex jgħid: ‘L-​għelieqi huma bojod għall-​ħsad’? (Ara n-​nota addizzjonali.) (b) Ġesù kif spjega x’ried ifisser?

³ Ġesù kellu din il-​konversazzjoni mad-​dixxipli lejn l-​aħħar tas-​sena 30 EK, ħdejn il-​belt Samaritana Sikar. Waqt li d-​dixxipli tiegħu daħlu fil-​belt, Ġesù baqaʼ ħdejn bir. Hemmhekk qasam veritajiet spiritwali maʼ mara li malajr fehmet kemm kien importanti t-​tagħlim tiegħu. Meta d-​dixxipli reġgħu ġew ħdejn Ġesù, il-​mara b’ħeffa telqet lejn Sikar biex tgħid lill-​ġirien tagħha bl-​affarijiet meraviljużi li kienet tgħallmet. Dak li qalet qanqal ħafna interess, u ħafna mill-​ġirien tagħha malajr irħewlha lejn il-​bir biex jiltaqgħu maʼ Ġesù. Jistaʼ jkun li kien f’dan il-​waqt—hekk kif Ġesù ħares ’il bogħod, lil hinn mill-​għelieqi, u ra grupp Samaritani resqin lejh—li qal: “Ħarsu lejn l-​għelieqi, kif inhuma bojod għall-​ħsad.”a Imbagħad biex jispjega li ma riedx ifisser ħsad letterali, imma wieħed spiritwali, Ġesù żied: “Il-​ħassâd qed . . . jiġbor il-​frott għall-​ħajja taʼ dejjem.”—Ġw. 4:5-​30, 36.

4. (a) Liema żewġ lezzjonijiet importanti dwar il-​ħsad għallem Ġesù? (b) Liema mistoqsijiet se niddiskutu?

⁴ Liema żewġ lezzjonijiet importanti dwar il-​ħsad spiritwali għallem Ġesù? L-​ewwel li x-​xogħol hu urġenti. Ġesù qal li ‘l-​għelieqi huma bojod għall-​ħsad’ biex jimmotiva lis-​segwaċi tiegħu. Sabiex jenfasizza kemm kien urġenti x-​xogħol, Ġesù żied jgħid hekk lid-​dixxipli tiegħu: “Il-​ħassâd qed jitħallas.” Iva, il-​ħsad diġà kien beda—ma kienx hemm ħin għal dewmien! It-​tieni lezzjoni hi li l-​ħaddiema huma ferħanin. Min jiżraʼ u min jaħsad se “jifirħu flimkien,” qal Ġesù. (Ġw. 4:35b, 36) Bħalma Ġesù żgur li feraħ meta ra li “ħafna mis-​Samaritani . . . poġġew il-​fidi fih,” hekk ukoll id-​dixxipli tiegħu kienu se jifirħu bil-​kbir hekk kif ħadmu b’ruħhom kollha fil-​ħsad. (Ġw. 4:39-​42) Dan ir-​rakkont tal-​ewwel seklu hu importanti ħafna għalina għax jagħti stampa taʼ x’inhu jiġri llum matul l-​akbar ħsad li qatt kien hawn. Dan il-​ħsad taʼ żmienna meta beda? Min jieħu sehem fih? X’kienu r-​riżultati?

Is-​Sultan jieħu t-​tmexxija fl-​akbar ħsad li qatt kien hawn

5. Min jieħu t-​tmexxija fil-​ħsad globali, u l-​viżjoni taʼ Ġwanni kif tagħti x’tifhem li x-​xogħol hu urġenti?

⁵ F’viżjoni mogħtija lill-​appostlu Ġwanni, Ġeħova jirrivela li inkariga lil Ġesù biex jieħu t-​tmexxija fil-​ħsad tan-​nies fid-​dinja kollha. (Aqra Rivelazzjoni 14:14-​16.) F’din il-​viżjoni Ġesù għandu kuruna u minġel. ‘Il-​kuruna tad-​deheb fuq ras Ġesù’ tikkonferma li qed jaħkem bħala Sultan. Il-​“minġel misnun f’idu” juri li hu l-​Ħassad. Billi jgħid permezz t’anġli li “l-​prodott taʼ l-​art misjur għalkollox,” Ġeħova jenfasizza li x-​xogħol hu urġenti. Tabilħaqq, “waslet is-​siegħa” biex Ġesù jibda jaħsad—m’hemmx ħin għal dewmien! Alla jikkmanda: “Daħħal il-​minġel tiegħek,” u Ġesù jobdi. Hu jdaħħal il-​minġel u jaħsad l-​art—jiġifieri, jaħsad jew jiġbor in-​nies tal-​art. Din il-​viżjoni eċċitanti tfakkarna li għal darb’oħra ‘l-​għelieqi huma bojod għall-​ħsad.’ Tgħinna nifhmu din il-​viżjoni meta beda dan il-​ħsad globali? Iva!

6. (a) “Żmien il-​ħsad” meta beda? (b) Il-​ħsad tal-​art meta beda? Spjega.

⁶ Fil-​viżjoni taʼ Ġwanni f’​Rivelazzjoni kapitlu 14 naraw lil Ġesù, il-​Ħassad, liebes kuruna (vers 14). Mela l-​ħatra tiegħu bħala Sultan fl-​1914 diġà seħħet. (Dan. 7:13, 14) Xi żmien wara dan, Ġesù jiġi kmandat li jibda l-​ħsad (vers 15). Naraw li l-​affarijiet żvolġew bl-​istess mod fit-​tixbiha taʼ Ġesù dwar il-​ħsad tal-​qamħ, fejn jgħid: “Il-​ħsad hu l-​konklużjoni taʼ sistema.” Għaldaqstant, żmien il-​ħsad u l-​konklużjoni taʼ din is-​sistema bdew fl-​istess żmien—fl-​1914. Kien iktar tard “fi żmien il-​ħsad” li beda x-​xogħol tal-​ħsad. (Mt. 13:30, 39) Issa, li fi żmienna nistgħu nifhmu iktar ċar, nistgħu naraw li l-​ħsad beda ftit snin wara li Ġesù beda jaħkem bħala Sultan. L-​ewwel, mill-​1914 sal-​bidu tal-​1919, Ġesù naddaf lis-​segwaċi midlukin tiegħu. (Mal. 3:1-​3; 1 Pt. 4:17) Imbagħad fl-​1919, beda l-​ħsad tal-​art. Mingħajr dewmien, Ġesù uża l-​ilsir leali li kien għadu kif ġie maħtur biex jgħin lil ħutna jifhmu l-​urġenza tax-​xogħol tal-​ippritkar. Ejja naraw x’ġara.

7. (a) Liema studju għen lil ħutna jaraw l-​urġenza tax-​xogħol tal-​ippritkar tagħna? (b) Ħutna x’ġew inkuraġġiti jagħmlu?

⁷ F’Lulju tal-​1920, It-​Torri tal-​Għassa qal: “Jidher ċar minn studju tal-​Iskrittura li l-​kongregazzjoni ngħatat privileġġ kbir, dak li twassal messaġġ dwar is-​Saltna.” Pereżempju, il-​kliem profetiku taʼ Isaija għenet lill-​aħwa jaraw li l-​aħbar dwar is-​Saltna kellha tixxandar mad-​dinja kollha. (Is. 49:6; 52:7; 61:1-​3) Ma kinux jafu kif setgħu jwettqu xogħol bħal dan, imma fdaw li Ġeħova kien se jwittilhom it-​triq. (Aqra Isaija 59:1.) Minħabba din il-​fehma iktar ċara dwar l-​urġenza tax-​xogħol tal-​ippritkar, ħutna ġew inkuraġġiti jżidu fl-​ippritkar tagħhom. L-​aħwa kif irreaġixxew?

8. Fl-​1921, liema żewġ fatti dwar ix-​xogħol tal-​ippritkar fehmu ħutna?

⁸ F’Diċembru tal-​1921, It-​Torri tal-​Għassa ħabbar: “Kienet l-​aħjar sena li kellna s’issa; u iktar nies semgħu bil-​messaġġ tal-​verità matul l-​1921 minn kwalunkwe sena oħra.” Ir-​rivista żiedet: “Baqaʼ ħafna xi jsir . . . Ejja nagħmluh b’qalb mimlija ferħ.” Innota kif l-​aħwa fehmu l-​istess żewġ fatti importanti dwar ix-​xogħol tal-​ippritkar li kien enfasizza Ġesù lill-​appostli tiegħu: Ix-​xogħol hu urġenti, u l-​ħaddiema huma ferħanin.

9. (a) Fl-​1954, It-​Torri tal-​Għassa x’qal dwar ix-​xogħol tal-​ħsad, u għala? (b) Liema żieda globali fin-​numru taʼ pubblikaturi kien hemm fl-​aħħar 50 sena? (Ara t-​tabella “Żieda madwar id-​dinja.”)

⁹ Mill-​1930 ’il quddiem, wara li ħutna fehmu li folla kbira taʼ nagħaġ oħra kienu se jilqgħu l-​messaġġ tas-​Saltna, ix-​xogħol tal-​ippritkar żdied saħansitra iktar. (Is. 55:5; Ġw. 10:16; Riv. 7:9) X’kien ir-​riżultat? In-​numru taʼ dawk li kienu qed jippritkaw il-​messaġġ tas-​Saltna żdied minn 41,000 fl-​1934 sa 500,000 fl-​1953! It-​Torri tal-​Għassa tal-​1 taʼ Diċembru 1954, bir-​raġun ikkonkluda: “Hu l-​ispirtu taʼ Ġeħova u l-​qawwa taʼ Kelmtu li wettqu dan il-​ħsad kbir globali.”b—Żak. 4:6.

Ir-​riżultat tal-​ħsad—Imbassar f’tixbihat memorabbli

10, 11. Fit-​tixbiha taż-​żerriegħa tal-​mustarda, liema aspetti taʼ tkabbir taż-​żerriegħa nistgħu naraw?

¹⁰ Fit-​tixbihat tiegħu dwar is-​Saltna, Ġesù bassar bi kliem memorabbli r-​riżultat tax-​xogħol tal-​ħsad. Ejja nikkunsidraw tixbiha dwar iż-​żerriegħa tal-​mustarda u oħra dwar il-​ħmira. Se niffokaw partikularment fuq kif twettqu fiż-​żmien tat-​tmiem.

¹¹ It-​tixbiha taż-​żerriegħa tal-​mustarda. Raġel jiżraʼ żerriegħa tal-​mustarda. Din tikber u ssir siġra li fiha jistkennu l-​għasafar. (Aqra Mattew 13:31, 32.) Liema aspetti taʼ tkabbir taż-​żerriegħa nistgħu naraw f’din it-​tixbiha? (1) It-​tkabbir innifsu hu rimarkevoli. “L-​iżgħar miż-​żrieragħ kollha” ssir siġra bi “friegħi kbar.” (Mk. 4:31, 32) (2) It-​tkabbir hu garantit. “Wara li [ż-​żerriegħa] tinżeraʼ, titlaʼ.” Ġesù ma qalx, “Forsi titlaʼ.” Le, hu jgħid: “Titlaʼ.” Ħadd u xejn ma jistaʼ jwaqqaf dan it-​tkabbir. (3) Is-​siġra li qed tikber tattira lill-​għasafar u tipprovdilhom post fejn joqogħdu. “L-​għasafar tas-​sema” jiġu u “joqogħdu għad-​dell tagħha.” Dawn it-​tliet aspetti kif japplikaw għall-​ħsad spiritwali li qed iseħħ fi żmienna?

12. It-​tixbiha taż-​żerriegħa tal-​mustarda, kif tapplika għall-​ħsad li qed iseħħ fi żmienna? (Ara wkoll it-​tabella “Numru li dejjem jiżdied taʼ studji tal-​Bibbja.”)

¹² (1) It-​tkabbir: It-​tixbiha tenfasizza t-​tkabbir tal-​messaġġ tas-​Saltna u tal-​kongregazzjoni Kristjana. Mill-​1919, il-​ħaddiema żelużi tal-​ħsad inġabru fil-​kongregazzjoni Kristjana rfinuta. F’dak iż-​żmien, l-​għadd taʼ ħaddiema kien żgħir, imma żdied b’rata mgħaġġla. Infatti, dan it-​tkabbir—mill-​bidu tas-​seklu 20 sa żmienna—kien fenomenali. (Is. 60:22) (2) Garanzija: Ħadd u xejn ma rnexxielu jwaqqaf it-​tkabbir tal-​kongregazzjoni Kristjana. Minkejja kemm l-​għedewwa t’Alla opponew u pprovaw joħonqu lil din iż-​żerriegħa żgħira, din xorta waħda baqgħet tikber u għelbet kull sfida. (Is. 54:17) (3) Post fejn joqogħdu: “L-​għasafar tas-​sema” li jsibu post fejn joqogħdu fis-​siġra jirrappreżentaw lill-​ħafna miljuni taʼ wħud b’attitudni xierqa minn xi 240 pajjiż li wieġbu għall-​messaġġ tas-​Saltna billi saru parti mill-​kongregazzjoni Kristjana. (Eżek. 17:23) Hemmhekk, jirċievu ikel spiritwali, serħan, u protezzjoni.—Is. 32:1, 2; 54:13.

13. Liema aspetti taʼ tkabbir jiġu enfasizzati fit-​tixbiha tal-​ħmira?

¹³ It-​tixbiha tal-​ħmira. Wara li mara tħallat xi ħmira mad-​dqiq, il-​ħmira tħemmer l-​għaġna kollha. (Aqra Mattew 13:33.) Liema aspetti taʼ tkabbir jiġu enfasizzati f’din it-​tixbiha? Ejja nikkunsidraw tnejn minnhom. (1) It-​tkabbir jikkaġuna bidla. Il-​ħmira ‘tħemmer l-​għaġna kollha.’ (2) It-​tkabbir hu mifrux. Il-​ħmira tħemmer “tliet seat [xi 10 kilogrammi] dqiq”—l-​għaġna kollha. Dawn iż-​żewġ aspetti kif japplikaw għall-​ħsad spiritwali li qed iseħħ fi żmienna?

14. It-​tixbiha tal-​ħmira kif tapplika għall-​ħsad li qed isir fi żmienna?

¹⁴ (1) Bidla: Il-​ħmira tirrappreżenta l-​messaġġ tas-​Saltna, u l-​għaġna tagħti stampa tal-​umanità. Bħalma l-​ħmira tikkaġuna bidla fid-​dqiq meta t-​tnejn jitħalltu flimkien, hekk ukoll il-​messaġġ tas-​Saltna jikkaġuna bidla f’qalb l-​individwi wara li jaċċettaw dan il-​messaġġ. (Rum. 12:2) (2) Mifrux: Il-​fatt li l-​ħmira tinfirex tirrappreżenta l-​fatt li l-​messaġġ tas-​Saltna jinfirex. Il-​ħmira tinfirex sakemm tħemmer l-​għaġna kollha. Bl-​istess mod, il-​messaġġ tas-​Saltna nfirex “sa l-​iktar parti mbiegħda taʼ l-​art.” (Atti 1:8) Dan l-​aspett tat-​tixbiha jagħtina x’nifhmu wkoll li anke f’pajjiżi fejn xogħolna hu projbit, il-​messaġġ tas-​Saltna xorta se jinxtered. Dan se jiġri anke jekk l-​ippritkar tagħna f’dawn il-​pajjiżi ma jagħtix fl-​għajn.

15. Il-​kliem li nsibu f’​Isaija 60:5, 22, kif twettaq? (Ara wkoll il-​kaxxi “Ġeħova għamilha possibbli,” u “Kif il-​‘wieħed ċkejken’ sar ‘ġens setgħan.’”

¹⁵ Xi 800 sena qabel ma Ġesù qal dawn it-​tixbihat, Ġeħova, permezz t’Isaija, bassar bi kliem memorabbli l-​kobor tal-​ħsad spiritwali li qed iseħħ fi żmienna u l-​ferħ li jġib miegħu dan il-​ħsad.c Ġeħova jiddeskrivi nies “mill-​bogħod” jiffollaw lejn l-​organizzazzjoni tiegħu. Ġeħova jitkellem maʼ “mara”, li llum hi rappreżentata mill-​fdal midluk fuq l-​art, u jgħid: “Int se tara u wiċċek jixgħel, u qalbek titriegħed u tikber, għax l-​għana tal-​baħar se jiġi lejk; ir-​riżorsi tal-​ġnus se jiġu għandek.” (Is. 60:1, 4, 5, 9) Kemm hu minnu dan il-​kliem! Illum, il-​qaddejja taʼ Ġeħova li ilhom jaqduh għandhom wiċċhom qed jixgħel bil-​ferħ hekk kif jaraw kif l-​għadd taʼ pubblikaturi tas-​Saltna f’pajjiżhom żdied minn ftit għal ħafna eluf!

Raġunijiet biex il-​qaddejja kollha taʼ Ġeħova jifirħu

16, 17. X’inhi waħda mir-​raġunijiet għala “min jiżraʼ u min jaħsad jifirħu flimkien”? (Ara wkoll il-​kaxxa “Kif żewġ fuljetti messew żewġt iqlub fl-​Amażonja.”)

¹⁶ Ftakar li Ġesù qal lill-​appostli: “Il-​ħassâd qed . . . jiġbor il-​frott għall-​ħajja taʼ dejjem, u b’hekk min jiżraʼ u min jaħsad jifirħu flimkien.” (Ġw. 4:36) Kif ‘nifirħu flimkien’ fil-​ħsad globali? B’diversi modi. Ejja nikkunsidraw tlieta minnhom.

¹⁷ L-​ewwel, nifirħu għax naraw l-​irwol taʼ Ġeħova fix-​xogħol. Meta nippritkaw il-​messaġġ tas-​Saltna, niżirgħu ż-​żerriegħa. (Mt. 13:18, 19) Meta ngħinu lil xi ħadd isir dixxiplu taʼ Kristu, inkunu qed naħsdu l-​frott. U lkoll kemm aħna nħossuna ferħanin se ntiru meta bi stagħġib naraw kif Ġeħova jġiegħel iż-​żerriegħa tas-​Saltna “tinbet u tikber.” (Mk. 4:27, 28) Xi żerriegħa li nxerrdu, tinbet iktar tard u tinħasad minn ħaddieħor. Jistaʼ jkun li kellek esperjenza simili għal dik taʼ Joan, oħt Kristjana fil-​Britannja li tgħammdet 60 sena ilu. Hi qalet: “Iltqajt maʼ individwi li qaluli li żrajt żerriegħa fi qlubhom meta tajthom xhieda ħafna snin ilu. Bla ma kont naf, Xhieda oħra mbagħad studjaw il-​Bibbja magħhom u għenuhom isiru qaddejja taʼ Ġeħova. Inħossni ferħana li ż-​żerriegħa li żrajt kibret u nħasdet.”—Aqra l-​1 Korintin 3:6, 7.

18. Skont l-​1 Korintin 3:8, x’inhi t-​tieni raġuni għala għandna nifirħu?

¹⁸ It-​tieni raġuni għala nibqgħu ħaddiema ferħanin hi għax inżommu f’moħħna dak li qal Pawlu: “Kull wieħed jirċievi l-​premju tiegħu skond il-​ħidma tiegħu.” (1 Kor. 3:8) Il-​premju jingħata skont ix-​xogħol, mhux skont ir-​riżultati tax-​xogħol. Dan tassew iserraħ moħħ dawk l-​aħwa li qed jippritkaw f’territorji fejn ma tantx qed jintwera interess! F’għajnejn Alla, kull Xhud li b’qalbu kollha jieħu sehem fix-​xogħol taż-​żrigħ qed ‘jagħti ħafna frott,’ u għalhekk għandu għal xiex jifraħ.—Ġw. 15:8; Mt. 13:23.

19. (a) Il-​profezija taʼ Ġesù f’​Mattew 24:14, kif tagħtina raġuni biex nifirħu? (b) X’għandna nżommu f’moħħna anke jekk personalment ma jirnexxilniex nagħmlu dixxiplu?

¹⁹ It-​tielet raġuni għala nifirħu hi għax ix-​xogħol tagħna jwettaq il-​profezija. Ikkunsidra t-​tweġiba li Ġesù ta lill-​appostli tiegħu meta saqsew: “X’se jkun is-​sinjal tal-​preżenza tiegħek u tal-​konklużjoni tas-​sistema?” Hu qalilhom li aspett mis-​sinjal kien se jkun xogħol globali taʼ ppritkar. Kien hu qed jitkellem dwar ix-​xogħol taʼ li nagħmlu d-​dixxipli? Le. Hu qal: “Din l-​aħbar tajba tas-​saltna tiġi pridkata fl-​art abitata kollha bħala xiehda.” (Mt. 24:3, 14) Għalhekk, l-​ippritkar tas-​Saltna, jiġifieri ż-​żrigħ taż-​żerriegħa, hu aspett tas-​sinjal. Għaldaqstant, hekk kif nippritkaw l-​aħbar tajba tas-​Saltna, niftakru li anke jekk ma jirnexxilniex nagħmlu dixxiplu, xorta waħda jirnexxilna nagħtu “xiehda.”d Iva, iwieġbu kif iwieġbu n-​nies, għandna sehem f’li nwettqu l-​profezija taʼ Ġesù u għandna l-​privileġġ li naqdu bħala “ħaddiema sħab m’Alla.” (1 Kor. 3:9) X’raġuni tajba biex nifirħu!

“Minn tlugħ ix-​xemx sa nżulha”

20, 21. (a) Kif qed jitwettaq il-​kliem taʼ Malakija 1:11? (b) Rigward ix-​xogħol tal-​ħsad, x’int determinat li tagħmel, u għala?

²⁰ Fl-​ewwel seklu, Ġesù għen lill-​appostli tiegħu jifhmu li x-​xogħol tal-​ħsad kien urġenti. Mill-​1919 ’il quddiem, Ġesù għen lid-​dixxipli tiegħu biex jifhmu l-​istess ħaġa. In-​nies t’Alla rreaġixxew billi żiedu fl-​attivitajiet tagħhom. Infatti, ix-​xogħol tal-​ħsad wera li ma jistaʼ jitwaqqaf b’xejn. Bħalma bassar il-​profeta Malakija, ix-​xogħol tal-​ippritkar illum qed isir “minn tlugħ ix-​xemx sa nżulha.” (Mal. 1:11) Iva, minn tlugħ ix-​xemx sa nżulha—mil-​Lvant sal-​Punent, ikunu fejn ikunu fuq l-​art—dawk li jiżirgħu u dawk li jaħsdu jaħdmu u jifirħu flimkien. U minn tlugħ ix-​xemx sa nżulha—minn filgħodu sa filgħaxija, jew il-​ġurnata kollha—naħdmu b’sens t’urġenza.

²¹ Hekk kif illum inħarsu lura lejn l-​aħħar 100 sena u naraw kif grupp żgħir taʼ qaddejja t’Alla kiber u sar “ġens setgħan,” qalbna tassew “titriegħed u tikber,” jew tfur, bil-​ferħ. (Is. 60:5, 22) Jalla l-​ferħ u l-​imħabba għal Ġeħova, “Sid il-​ħsad,” iqanqlu lil kull wieħed u waħda minna biex jibqaʼ jagħti sehmu fl-​akbar ħsad li qatt kien hawn.—Lq. 10:2.