L-​Għelieqi Huma Bojod għall-​Ħsad

1. Liema xogħol importanti qed iseħħ?

¹ Wara li Ġesù ta xhieda lil mara Samaritana, hu qal lid-​dixxipli tiegħu: “Erfgħu għajnejkom u ħarsu lejn l-​għelieqi, kif inhuma bojod għall-​ħsad.” (Ġw. 4:35, 36) Kien beda ħsad spiritwali, u Ġesù setaʼ jara kif dan ix-​xogħol kien se jkopri d-​dinja kollha. Mill-​pożizzjoni tiegħu fis-​sema, Ġesù jibqaʼ involut ħafna fil-​ħsad. (Mt. 28:19, 20) X’jindika li dan ix-​xogħol għadu qed jiżdied hekk kif jersaq lejn tmiemu?

2. Liema żviluppi juru li madwar id-​dinja x-​xogħol tal-​ħsad qed jiżdied?

² Ħsad Globali: Matul is-​sena taʼ servizz 2009, kien hemm żieda taʼ 3.2 fil-​mija fl-​għadd taʼ pubblikaturi madwar id-​dinja. Il-​pajjiżi fejn ix-​xogħol tal-​ippritkar hu projbit, raw żieda tʼ14 fil-​mija. L-​għadd taʼ studji tal-​Bibbja rapportati kull xahar qabżu s-​7,619,000—għadd akbar mill-​quċċata tal-​pubblikaturi u kważi nofs miljun iktar mill-​għadd taʼ studji li ġew rapportati s-​sena taʼ qabel. Hekk kif ix-​xogħol jikber bil-​ħeffa f’ħafna reġjuni, qed jintbagħtu iktar rikjesti għal missjunarji mħarrġin fl-​Iskola taʼ Gilegħad. L-​“għelieqi” tal-​lingwa barranija qed jipproduċu ħafna frott f’pajjiż wara l-​ieħor. Jidher li Ġeħova qed iħaffef ix-​xogħol matul il-​konklużjoni tal-​ħsad. (Is. 60:22) Tħares int b’mod pożittiv lejn l-​“għelieqi” fit-​territorju tiegħek?

3. Xi wħud x’għandhom mnejn jikkonkludu dwar il-​ħsad lokali tagħhom?

³ Il-​Ħsad Lokali Tiegħek: Xi wħud jgħidu: “It-​territorju tiegħi ma tantx irendi frott.” Huwa minnu li xi territorji donnhom ma jrendux daqs oħrajn jew ma jagħtux daqshekk frott bħalma kienu jagħtu fil-​passat. Għalhekk, xi Xhieda għandhom mnejn jikkonkludu li l-​ħsad laħaq il-​quċċata tiegħu f’dawk l-​inħawi u li issa xogħolhom hu biss li jlaqqtu l-​ftit li baqaʼ. Imma huwa dan tassew il-​każ?

4. Liema attitudni xierqa lejn il-​ministeru tagħna għandna nikkultivaw, u għala?

⁴ Mill-​bidu sal-​aħħar, il-​ħsad hu żmien t’attività kbira. Innota s-​sens t’urġenza f’dan il-​kliem taʼ Ġesù: “Il-​ħsad hu kbir, imma l-​ħaddiema huma ftit. Għalhekk, itolbu bil-​ħrara lil Sid il-​ħsad biex jibgħat il-​ħaddiema fil-​ħsad tiegħu.” (Mt. 9:37, 38) Ġeħova, Sid il-​Ħsad, huwa responsabbli għal meta u fejn jinkiseb il-​frott. (Ġw. 6:44; 1 Kor. 3:6-​8) X’inhu l-​inkarigu tagħna? Il-​Bibbja twieġeb: “Iżraʼ ż-​żerriegħa tiegħek fil-​għodu u tħallix idek tistrieħ sa fil-​għaxija.” (Ekk. 11:4-​6) Iva, meta l-​ħsad ikun qed jilħaq il-​quċċata tiegħu mhuwiex il-​waqt li niħduha bil-​lajma jew inħallu idna tistrieħ!

5. Għala għandna nkomplu nippritkaw biż-​żelu f’territorju li ma jidhirx produttiv?

⁵ Ibqaʼ Aħsad: Anki jekk it-​territorju tagħna nħadem diversi drabi u jidher li m’hemm ebda frott, hemm raġunijiet tajbin għala għandna naħdmu biż-​żelu u b’sens t’urġenza. (2 Tim. 4:2) Taqlib drammatiku fix-​xena dinjija jġiegħel lin-​nies jibdlu l-​attitudni tagħhom u jaħsbu iktar bis-​serjetà dwar il-​futur tagħhom. Hekk kif iż-​żgħażagħ jikbru, għandhom mnejn iħossu l-​bżonn li jsibu s-​sigurtà u l-​paċi tal-​moħħ. Jerġaʼ oħrajn għandhom mnejn jibqgħu impressjonati bil-​persistenza tagħna. Iva, dawk li ma semgħux fil-​passat għandhom mnejn iwieġbu għall-​messaġġ fil-​futur. Anki dawk li apposta jiċħdu l-​messaġġ tagħna jeħtieġ li jiġu mwissijin.—Eżek. 2:4, 5; 3:19.

6. Jekk it-​territorju tagħna hu taʼ sfida, x’se jgħinna nibqgħu żelużi?

⁶ Jekk it-​territorju tagħna hu taʼ sfida, x’se jgħinna nibqgħu żelużi? Forsi nistgħu nagħmlu forom oħrajn taʼ ministeru mal-​ippritkar tagħna minn dar għal dar, bħal xhieda f’territorju taʼ negozju jew bit-​telefon. Jew nistgħu nvarjaw il-​preżentazzjonijiet tagħna biex ikollna metodi ġodda. Nistgħu nibdlu l-​iskeda tagħna u nieħdu sehem fil-​ministeru filgħaxija jew f’ħinijiet oħrajn meta hemm ċans akbar li n-​nies ikunu d-​dar. Forsi nistgħu nirsistu biex nitgħallmu lingwa ġdida ħalli nilħqu iktar nies bl-​aħbar tajba. Forsi nkunu nistgħu nkabbru l-​ministeru tagħna billi naqdu bħala pijunieri regulari. Jew nistgħu mmorru ngħixu f’post fejn hemm inqas ħaddiema tal-​ħsad. Jekk ikollna l-​attitudni xierqa lejn il-​ħsad, se nistinkaw biex ikollna l-​akbar sehem possibbli f’dan ix-​xogħol importanti.

7. Sakemm għandna nkomplu bix-​xogħol tal-​ġbir tal-​ħsad?

⁷ Il-​bdiewa għandhom ammont taʼ żmien limitat biex jiġbru l-​ħsad, allura ma joqogħdux jistrieħu jew jiħduha bil-​lajma sakemm ikun tlesta x-​xogħol. Il-​ħsad spiritwali jeħtieġ l-​istess sens t’urġenza. Sakemm għandna nkomplu bix-​xogħol tal-​ġbir tal-​ħsad? Matul “il-​konklużjoni tas-​sistema” u sat-​“tmiem.” (Mt. 24:14; 28:20) Bħall-​aqwa Ministru taʼ Ġeħova, aħna rridu llestu x-​xogħol li ġie fdat lilna. (Ġw. 4:34; 17:4) Għalhekk, ejja nkomplu nwettqu l-​ministeru tagħna biż-​żelu, bil-​ferħ, u b’attitudni pożittiva sat-​tmiem. (Mt. 24:13) Il-​ħsad ma spiċċax!

[Kumment f’paġna 2]

Mill-​bidu sal-​aħħar, il-​ħsad hu żmien t’attività kbira