Nidentifikaw lir-​“Raġel taʼ Bla Liġi”

“Il-​wieħed taʼ bla liġi se jinkixef, li lilu l-​Mulej Ġesù se jwarrab.”—2 TESSALONKIN 2:8.

1, 2. Għala huwa vitali li nidentifikaw lir-​raġel taʼ bla liġi?

AĦNA ngħixu f’era taʼ bla liġi. Huwa fenomenu dinji. Kullimkien hemm il-​biżaʼ taʼ ħallelin bla liġi u t-​theddida li jippreżentaw għal persunitna u l-​propjetà tagħna. Madankollu, hemm element taʼ bla liġi bil-​wisq iżjed qarrieq li ilu jaħdem għal ħafna sekli. Fil-​Bibbja jissejjaħ “ir-​raġel taʼ bla liġi.”

² Huwa vitali li aħna nidentifikaw lil dan ir-​raġel taʼ bla liġi. Għala? Għax hu determinat li jherri l-​waqfa tagħna maʼ Alla u t-​tama tagħna taʼ ħajja taʼ dejjem. Kif? Billi jġagħalna nabbandunaw il-​verità u nemmnu l-​gideb minflokha, billi b’hekk idawwarna milli nqimu lil Alla “bl-​ispirtu u l-​verità.” (Ġwann 4:23) Huwa evidenti mill-​azzjonijiet tiegħu li dan l-​element partikulari taʼ bla liġi jopponi lil Alla u l-​għanijiet tiegħu, kif ukoll lill-​poplu ddedikat tiegħu.

3. Il-​Bibbja kif tiġbed l-​attenzjoni tagħna lejn il-​wieħed taʼ bla liġi?

³ Il-​Bibbja titkellem dwar dan ir-​raġel taʼ bla liġi fit-​2 Tessalonkin 2:3. Imnebbaħ mill-​ispirtu t’Alla, l-​appostlu Pawlu kiteb: “Tħallu lil ħadd jisseduċikom b’xi manjiera, għaliex [il-jum taʼ Jehovah biex iġib qerda fuq il-​ħżiena] mhux se jiġi jekk l-​ewwel ma tiġix l-​apostasija u jinkixef ir-​raġel taʼ bla liġi.” Hawn Pawlu pprofetizza li l-​apostasija kellha tiżviluppa u raġel taʼ bla liġi kellu jidher qabel tmiem din is-​sistema. Fil-​fatt, Pawlu qal f’vers 7: “Il-​misteru taʼ dan in-​nuqqas taʼ ħarsien tal-​liġi diġà qed jaħdem.” Għalhekk fl-​ewwel seklu, dan il-​wieħed taʼ bla liġi kien beda juri ruħu.

L-​Oriġini tar-​Raġel taʼ Bla Liġi

4. Min hu dak li oriġina u li jappoġġa lir-​raġel taʼ bla liġi?

⁴ Min oriġina u jappoġġa lil dan ir-​raġel taʼ bla liġi? Pawlu jwieġeb: “Il-​preżenza tal-​wieħed taʼ bla liġi hi skond l-​operazzjoni taʼ Satana b’kull xogħol taʼ qawwa u sinjali giddieba u egħliem u b’kull qerq taʼ nuqqas taʼ tjieba għal dawk li qed jintilfu, bħala tpattija talli ma laqgħux l-​imħabba tal-​verità biex jistgħu jsalvaw.” (2 Tessalonkin 2:9, 10) Mela Satana hu l-​missier u dak li jmantni lir-​raġel taʼ bla liġi. U bħalma Satana jopponi lil Jehovah, il-​għanijiet Tiegħu, u lill-​poplu Tiegħu, l-​istess jagħmel ir-​raġel taʼ bla liġi, kemm jekk dan jirrealizzah jew le.

5. Liema tmiem jistenna lill-​wieħed taʼ bla liġi u lil dawk li jsegwuh?

⁵ Dawk li jimxu mar-​raġel taʼ bla liġi se jkollhom l-​istess tmiem bħalu—il-​qerda: “Il-​wieħed taʼ bla liġi se jinkixef, li lilu l-​Mulej Ġesù se jwarrab . . . u jġibu fix-​xejn bil-​manifestazzjoni tal-​preżenza tiegħu.” (2 Tessalonkin 2:8) Dak iż-​żmien għall-​qerda tar-​raġel taʼ bla liġi u taʼ dawk li jappoġġawh (“dawk li qed jintilfu”) se jiġi dalwaqt “mar-​rivelazzjoni tal-​Mulej Ġesù mis-​sema mal-​anġli setgħana tiegħu f’nar iħeġġeġ, fil-​waqt li jġib vendetta fuq dawk li ma jafux lil Alla u dawk li ma jobdux l-​aħbar tajba dwar il-​Mulej tagħna Ġesù. Dawn l-​istess uħud se jieħdu l-​kastig ġudizzjarju tal-​qerda għal dejjem.”−2 Tessalonkin 1:6-9.

6. Liema informazzjoni oħra jagħti Pawlu dwar il-​wieħed taʼ bla liġi?

⁶ Pawlu jissokta jiddeskrivi lil dan il-​wieħed taʼ bla liġi, billi jgħid: “Hu qiegħed f’oppożizzjoni u jerfaʼ lilu nnifsu ’l fuq minn kulħadd li hu msejjaħ “alla” jew oġġett taʼ reverenza, biex hu jpoġġi bil-​qiegħda fit-​tempju taʼ Dak Alla, pubblikament juri li hu nnifsu hu alla.” (2 Tessalonkin 2:4) Mela Pawlu jwissi li Satana kien se jqajjem xi ħadd taʼ bla liġi, oġġett falz taʼ reverenza, li kien saħansitra se jpoġġi lilu nnifsu ’l fuq mil-​liġi t’Alla.

Nidentifikaw lil Wieħed taʼ Bla Liġi

7. Għala ma nikkonkludux li Pawlu kien qed jitkellem dwar individwu wieħed, u r-​raġel taʼ bla liġi x’jiffigura?

⁷ Kien Pawlu qed jitkellem dwar individwu wieħed? Le, għax hu qal li dan ir-​“raġel” kien evidenti fi żmien Pawlu u kellu jibqaʼ jeżisti sakemm Jehovah jeqirdu fit-​tmiem taʼ din is-​sistema. B’hekk, hu eżista għal ħafna sekli. Ovvjament, l-​ebda raġel litterali qatt ma għex daqshekk. Mela l-​espressjoni r-​“raġel taʼ bla liġi” trid tapplika għal ġemgħa, jew klassi, taʼ nies.

8. Min hu r-​raġel taʼ bla liġi, u liema huma xi fatturi li jidentifikawh?

⁸ Min huma? L-​evidenza turi li huma l-​ġemgħa taʼ rġiel tal-​kleru mkabbra u ambizzjużi tal-​Kristjaneżmu, li matul is-​sekli waqqfu lilhom infushom bħala liġi fihom infushom. Dan jistaʼ jidher mill-​fatt li hemm eluf taʼ reliġjonijiet u setet differenti fil-​Kristjaneżmu, kull waħda bil-​kleru tagħha, madankollu kollha f’konflitt bejniethom f’xi aspett taʼ duttrina jew drawwa. Dan l-​istat maqsum huwa evidenza ċara li huma ma jsegwux il-​liġi t’Alla. Ma jistgħux ikunu minn Alla. (Qabbel Mikea 2:12; Mark 3:24; Rumani 16:17; 1 Korintin l:l0.) Dak li dawn ir-​reliġjonijiet għandhom komuni hu li ma jżommux sod mat-​tagħlim tal-​Bibbja, billi kisru r-​regola: “Tmorrux aktar ’il bogħod mill-​affarijiet miktuba.”−1 Korintin 4:6; ara wkoll Mattew 15:3, 9, 14.

9. Liema twemmin mhux skritturali ssostitwixxa l-​wieħed taʼ bla liġi flok veritajiet Bibliċi?

⁹ B’hekk, dan il-​wieħed taʼ bla liġi huwa persuna komposta: il-​kleru reliġjuż tal-​Kristjaneżmu. Ilkoll kemm huma, kemm jekk papiet, qassisin, patrijarki, jew predikaturi Protestanti, jaqsmu r-​responsabbiltà tad-​dnubiet reliġjużi tal-​Kristjaneżmu. Huma bidlu l-​veritajiet t’Alla maʼ gideb pagan, billi għallmu duttrini mhux skritturali bħalma huma l-​immortalità tar-​ruħ umana in-​nar tal-​infern, il-​purgatorju, u t-​Trinità. Huma bħall-​mexxejja reliġjużi li lilhom Ġesù qal: “Intom minn missierkom ix-​Xitan u tixtiequ tagħmlu x-​xewqat taʼ missierkom. . . . Hu giddieb u missier il-​gidba.” (Ġwann 8:44) Id-​drawwiet tagħhom ukoll jikxfuhom bħala bla liġi, għax huma jipparteċipaw f’attivitajiet li jiksru l-​liġijiet t’Alla. Lil uħud bħal dawn Ġesù jgħid: “Morru ’1 bogħod minni, intom ħaddiema taʼ bla liġi.”−Mattew 7:21-23.

Igħollu Lilhom Infushom

10. Liema relazzjoni kellu l-​wieħed taʼ bla liġi mal-​mexxejja politiċi?

¹⁰ L-​istorja turi li dawk f’din il-​klassi tar-​raġel taʼ bla liġi wrew tant kburija u arroganza li huma saħansitra taw ordnijiet lill-​mexxejja tad-​dinja. Bl-​iskuża tad-​duttrina tad-​‘dritt divin tas-​slaten,’ il-​kleru ddikjara lilu nnifsu bħala l-​medjatur essenzjali bejn il-​mexxejja u Alla. Huma nkurunaw slaten u imperaturi u kienu kapaċi jdawru l-​popolazzjoni favur jew kontra l-​mexxejja. Fil-​fatt, huma qalu, bħalma qalu l-​qassisin ewlenin Lhud li rrifjutaw lil Ġesù: “M’għandna l-​ebda sultan ħlief lil Ċesri.” (Ġwann 19:15) Madankollu, Ġesù għallem b’mod ċar: “Is-​saltna tiegħi m’hi ebda parti minn did-dinja.”−Ġwann 18:36.

11. Il-​Kleru kif għolla lilu nnifsu?

¹¹ Biex jelevaw lilhom infushom saħansitra iktar ’il fuq min-​nies komuni, din il-​klassi bla liġi adottat ilbies differenti, normalment iswed. Iktar minn hekk, huma żejnu lilhom infushom b’kull xorta taʼ tiżjin irjali grandjuż, flimkien maʼ kuruni, slaleb, u mitri. (Qabbel Mattew 23:5, 6.) Iżda Ġesù u s-​segwaċi tiegħu ma kellhomx ilbies bħal dan; huma kienu jilbsu bħan-​nies komuni. Il-​kleru ħadu wkoll għalihom infushom titli bħalma huma “Missier,” “Missier Qaddis,” “Reverendu,” “Il-​wisq Reverendu,” “L-​Eċċellenza Tiegħu,” u “L-​Eminenza Tiegħu,” li jżidu mal-​fatt li ‘jgħollu lilhom infushom fuq kulħadd.’ Madankollu, Ġesù għallem rigward titli reliġjużi: “Issejħu lil ħadd missierkom fuq l-​art.” (Mattew 23:9) B’mod simili, Eliħu, biex jirribatti lill-​farraġa ipokriti taʼ Ġob, qal: “Tħallunix, jekk jogħġobkom, nuri parzjalità lejn raġel; u fuq bniedem tal-​art m’inix se nqiegħed titlu.”−Ġob 32:21.

12. Pawlu lil min qal li l-​kleru kien fil-​fatt qed jaqdi?

¹² Meta Pawlu lura fi żmienu qal li r-​raġel taʼ bla liġi kien diġà beda l-​attivita tiegħu, hu qal ukoll rigward dawk li jirriflettu l-​attitudni taʼ bla liġi tiegħu: “Għax irġiel bħal dawn huma appostli foloz, ħaddiema qarrieqa, jitrasformaw lilhom infushom f’appostli taʼ Kristu. U ma nistagħġbux, għax Satana nnifsu jibqaʼ jitrasforma lilu nnifsu f’anġlu tad-​dawl. Mhix xi ħaġa kbira għalhekk jekk il-​ministri tiegħu wkoll jibqgħu jitrasformaw lilhom infushom f’ministri taʼ tjieba. Iżda t-​tmiem tagħhom se jkun skond xogħlijiethom.”−2 Korintin 11:13-15.

Irvell Kontra l-​Qima Vera

13. X’kienet l-​apostasija li ħabbar dwarha Pawlu?

¹³ Pawlu qal li dan ir-​raġel taʼ bla liġi kellu jiżviluppa flimkien mal-​apostasija. Fil-​fatt, l-​ewwel ħjiel li tana Pawlu dwar l-​identità taʼ din il-​klassi taʼ bla liġi hu li “l-​jum taʼ Jehovah [meta Jehovah jeqred lil din is-​sistema ħażina taʼ affarijiet] . . . mhux se jiġi jekk l-​ewwel ma tiġix l-​apostasija.” (2 Tessalonkin 2:2, 3) Iżda xi tfisser l-​“apostasija”? F’dan il-​kuntest, ma tfissirx sempliċement li titfixkel jew taqaʼ minħabba djufija spiritwali. Il-​kelma Griega wżata hawn għal “apostasija” kienet tfisser, fost affarijiet oħra, “ħrib” jew “rewwixta.” Għadd taʼ traduzzjonijiet jagħtuha bħala “rvell.” Il-​verżjoni taʼ William Barclay tgħid: “Dak il-​jum ma jistax jiġi sakemm ma jkunx seħħ l-​Irvell il-​Kbir.” Il-​Jerusalem Bible issejjaħlu “r-​Rewwixta l-​kbira.” Għalhekk, fil-​kuntest taʼ dak li Pawlu qed jiddiskuti “apostasija” tfisser rewwixta kontra l-​qima vera.

14. L-​apostasija meta bdiet tiżviluppa bil-​qawwa?

¹⁴ Din l-​apostasija, dan l-​irvell, kif żviluppa? Fit-​2 Tessalonkin 2:6, Pawlu kiteb, rigward żmienu, dwar “il-​ħaġa li taġixxi bħala rażna” fuq il-​wieħed taʼ bla liġi. Dik x’kienet? Kienet il-​forza li trażżan tal-​appostli. Il-​preżenza tagħhom, bir-​rigali taʼ qawwa tagħhom mogħtija mill-​ispirtu qaddis, żammet lura l-​apostasija milli f’dak iż-​żmien issir epidemija. (Atti 2:l-4; 1 Korintin 12:28) Iżda meta l-​appostli kienu mietu, sa madwar it-​tmiem tal-​ewwel seklu, il-​qawwiet li jrażżnu tneħħew.

Klassi taʼ Kleru Mhix Skritturali Tiżviluppa

15. Liema arranġament ġie stabbilit minn Ġesù għall-​kongregazzjoni Kristjana?

¹⁵ Il-​kongregazzjoni li stabbilixxa Ġesù żviluppat matul l-​ewwel seklu taħt il-​gwida taʼ anzjani (indokraturi) u qaddejja ministerjali. (Mattew 20:25-27; 1 Timotew 3:l-13. Titus 1:5-9) Dawn kienu meħudin mill-​kongregazzjoni. Huma kienu rġiel spiritwali kapaċi mingħajr taħriġ teoloġiku speċjali, l-​istess bħalma Ġesù ma kellu ebda taħriġ bħal dan. Tabilħaqq, l-​opponenti tiegħu stagħġbu: “Dar-raġel kif għandu għarfien tal-​ittri, meta ma studjax fl-​iskejjel?” (Ġwann 7:15) U rigward l-​appostli, il-​mexxejja reliġjużi osservaw l-​istess ħaġa: “Issa meta lemħu l-​mod miftuħ li bih tkellmu Pietru u Ġwanni, u ndunaw li kienu nies komuni u bla skola, bdew jitħassbu. U bdew jagħrfu dwarhom li kienu jkunu maʼ Ġesù.”−Atti 4:13.

16. L-​apostasija kif ikkaġunat li jiġi mwarrab il-​mudell Kristjan tal-​ewwel seklu rigward organizzazzjoni tal-​kongregazzjoni?

¹⁶ Madankollu, l-​apostasija ġabet idejat meħudin mill-​kleru Lhudi u eventwalment mis-​sistema reliġjuża pagana taʼ Ruma. Hekk kif għadda ż-​żmien u seħħet il-​waqgħa mill-​vera fidi, klassi taʼ kleru mhux skritturali żviluppat. Papa nkurunat beda jaħkem fuq kulleġġ taʼ kardinali, li jkunu magħżulin minn mijiet taʼ isqfijiet u arċisqfijiet, li mill-​banda l-​oħra jkunu promossi minn qassisin b’taħriġ tas-​seminarju. B’hekk, mhux wisq wara l-​ewwel seklu, klassi mistika taʼ kleru ddominat il-​Kristjaneżmu. Din il-​klassi ma kinetx imfassla fuq l-​anzjani u l-​qaddejja ministerjali Kristjani tal-​ewwel seklu iżda kienet imfassla fuq sistemi reliġjużi pagani.

17. Meta, b’mod speċjali, ġie msaħħaħ il-​poter tal-​wieħed taʼ bla liġi?

¹⁷ Diġà saħansitra fit-​tielet seklu E.K., uħud li jemmnu ordinarji kienu ġew relegati għall-​istat taʼ klassi sekondarja taʼ lajċi. Ir-​raġel taʼ bla liġi apostat bil-​mod il-​mod assuma r-​riedni tal-​poter. Dan il-​poter ġie msaħħaħ matul ir-​renju tal-​imperatur Ruman Kostantinu, b’mod speċjali wara l-​konċilju taʼ Niċea fit-​325 E.K. Imbagħad il-​knisja u l-​Istat ingħaqdu ħaġa waħda. B’hekk, ir-​raġel taʼ bla liġi—il-​kleru tal-​Kristjaneżmu—sar linja taʼ apostati matul ħafna sekli f’rewwixta kontra l-​veru Alla, Jehovah. Il-​liġijiet u l-​arranġamenti li segwew huma tagħhom infushom u mhux taʼ Alla.

Tagħlim Pagan

18. X’tagħlim pagan midgħi addotta l-​wieħed taʼ bla liġi?

¹⁸ Hekk kif ir-​raġel taʼ bla liġi beda jiżviluppa huwa ssellef ukoll tagħlim pagan. Per eżempju, alla Trinitàrjan misterjuż u mhux mifhum ġie mibdul minflok Dak il-​Wieħed li jgħid: “Jiena Jehovah. Dak hu ismi; u lil ħadd ieħor ma se nagħti l-​glorja tiegħi stess.” “Jiena Jehovah, u m’hemm ħadd ieħor. Bl-​eċċezzjoni tiegħi m’hemm ebda Alla.” (Isaija 42:8; 45:5) Dan il-​bdil taʼ idejat umani, saħansitra pagani, minflok il-​veritajiet t’Alla ġie mifrux biex jinkludi jerġa dagħwa oħra: il-​venerazzjoni tal-​umli Marija tal-​Bibbja bħala “Omm Alla” tal-​Kristjaneżmu. B’hekk, dawk li avvanzaw dan it-​tagħlim falz, il-​klassi tal-​kleru, saru “l-​ħaxix ħażin” mill-​iktar abbundanti miżrugħ minn Satana biex jipprova jifga ż-​żerriegħa mill-​aħjar miżrugħa minn Kristu.—Mattew 13:36-39.

19. Il-​Kristjaneżmu kif tkisser f’biċċiet matul is-​sekli, iżda x’baqaʼ jiġi ppreservat?

¹⁹ Hekk kif xiżmi u qasmiet seħħew, il-​Kristjaneżmu tkisser f’mijiet taʼ reliġjonijiet u setet. Iżda kull reliġjon jew setta ġdida, bi ftit eċċezzjonijiet, żammet il-​firda tagħha bejn kleru u lajċi. B’hekk, il-​klassi tar-​raġel taʼ bla liġi ġiet preservata sal-​ġurnata tal-​lum. U għadha tgħolli lilha nfisha fuq in-​nies komuni bl-​ilbies distintiv tagħha u bit-​titli bombastiċi tagħha. B’mod ċar, Pawlu ma esaġerax meta qal li l-​klassi tar-​raġel taʼ bla liġi kellha tigglorifika lilha nfisha u tgħolli lilha nfisha għal pożizzjoni taʼ xi alla.

Il-​Pożizzjoni taʼ Papa

20. Sors Kattoliku kif jiddeskrivi lill-​papa?

²⁰ Eżempju taʼ glorifikazzjoni bħal din hi dik tal-​pożizzjoni tal-​papa taʼ Ruma. Dizzjunarju ekkleżjastiku minn Lucio Ferraris, ippubblikat fl-​Italja, jiddeskrivi lill-​papa “taʼ tant dinjità u altezza li hu mhux sempliċi bniedem iżda, daqs li kieku, Alla, u l-​Vigarju taʼ Alla.” Il-​kuruna tiegħu hija waħda trippla “bħala sultan tas-​sema, tal-​art u tal-​infern.” L-​istess dizzjunarju jissokta: “Il-​papa hu, bħal li kieku, Alla fuq l-​art, l-​uniku prinċep tal-​fidili taʼ Kristu, l-​akbar sultan tas-​slaten kollha.” Hu jżid: “Il-​papa jistaʼ xi drabi jikkontrolla l-​liġi divina.” Ukoll, The New Catholic Dictionary jistqarr dwar il-​papa: “L-​ambaxxaturi tiegħu għandhom preċedenza fuq membri oħra tal-​korp diplomatiku.”

21. Agħmel f’kuntrast l-​azzjonijiet tal-​papa maʼ dawk taʼ Pietru u taʼ wieħed anġlu.

²¹ Kuntrarju għad-​dixxipli taʼ Ġesù, il-​papa taʼ spiss jilbes ilbies elaborat ħafna u jilqaʼ t-​tifħir mill-​bnedmin. Il-​papa jħalli lin-​nies imilu quddiemu, ibusu ċ-​ċurkett tiegħu, u jġorruh fuq spallejhom f’siġġu speċjali. X’vanità urew il-​papiet matul is-​sekli! Tabilħaqq kuntrast qawwi mas-​sempliċità umli taʼ Pietru, li qal lil Korneljus, l-​uffiċċjal tal-​armata Rumana li miel f’riġlejn Pietru biex jurih reverenza: “Qum bil-​wieqfa, . . . Jien biss raġel wara kollox”! (Atti 10:25, 26, il-​verżjoni Kattolika Jerusalem Bible) U x’kuntrast mal-​anġlu li ta lill-​appostlu Ġwanni r-​Rivelazzjoni! Ġwanni prova joqgħod għarkobbtejh b’mod taʼ qima quddiem dak l-​anġlu, iżda l-​anġlu ddikjara: “Oqgħod attent! Tagħmilx hekk! Kulma jien hu rsir sieħeb tiegħek u taʼ ħutek li huma profeti u taʼ dawk li qegħdin iħarsu l-​kliem taʼ dan ir-​romblu. Qim ’l Alla.”−Rivelazzjoni 22:8, 9.

22. Permezz taʼ liema regola Skritturali jistaʼ jiġi identifikat il-​wieħed taʼ bla liġi?

²² Hija din l-​istima tal-​klassi tal-​kleru ħarxa ħafna? Aħna nistgħu niddeterminaw dan billi napplikaw ir-​regola li ta Ġesù biex nidentifikaw lill-​profeti foloz: “Mill-​frott tagħhom se tagħrfuhom.” (Mattew 7:15, 16) X’kien, mela, il-​frott tal-​kleru matul is-​sekli u fl-​istess seklu 20 tagħna stess? X’se jkun it-​tmiem taʼ dan ir-​raġel taʼ bla liġi, u min se jaqsam miegħu dak it-​tmiem? X’responsabbiltà għandhom dawk li verament jibżgħu minn Alla rigward dan il-​wieħed taʼ bla liġi? L-​artikli li jmiss se jiddiskutu dawn il-​punti.

Mistoqsijiet Għal Reviżjoni

◻ X’inhu r-​raġel taʼ bla liġi, u meta sar manifest?

◻ Il-​Bibbja kif tidentifika l-​awtur taʼ din il-​klassi taʼ bla liġi?

◻ Il-​kleru kif għolla lilu nnifsu ’l fuq min-​nies?

◻ Liema tagħlim u drawwiet apostati ġew żviluppati mill-​kleru?

◻ L-​attitudni tal-​papiet kif inhi f’kuntrast maʼ dik taʼ Pietru u taʼ wieħed anġlu?