Eżerċita Fidi Bbażata Fuq Verità

“Mingħajr fidi hu impossibbli li togħġbu sewwa, għax dak li joqrob lejn Alla jrid jemmen li hu u li jsir dak li jħallas lil dawk li qed ifittxuh bil-​ħeġġa.”−EBREJ 11:6.

1, 2. Il-​fidi taʼ Adam kif tpoġġiet taħt prova, u b’liema riżultat?

IL-​FIDI titlob għal iktar minn li wieħed jemmen li Alla jeżisti. L-​ewwel raġel, Adam, ma kellu ebda dubju dwar l-​eżistenza taˈ Alla Jehovah. Alla kkomunika maˈ Adam, wisq probabbli permezz taˈ Ibnu, il-​Kelma. (Ġwann 1:1-3; Kolossin 1:15-17) Iżda, Adam tilef il-​prospett taˈ ħajja eterna għaliex hu naqas li jobdi lil Jehovah u li jeżerċita fidi fih.

² Il-​hena futura taˈ Adam dehret li ġiet f’diffikultà meta martu, Eva, ma obdietx lil Jehovah. Iva, il-​ħsieb biss li jitlifha kien taˈ prova għall-​fidi tal-​ewwel raġel! Setaʼ Alla jsolvi din il-​problema b’tali mod li jiżżgura l-​hena u r-​riżq kontinwi taˈ Adam? Billi ngħaqad maˈ Eva fid-​dnub, Adam wera li hu milli jidher ma ħasibx hekk. Hu pprova jsolvi l-​problema bil-​mod tiegħu, minflok ma fittex bil-​ħeġġa kollha għal gwida divina. Billi naqas li jeżerċita fidi f’Jehovah, Adam ġab il-​mewt fuqu nnifsu u fuq nislu kollu.−Rumani 5:12.

X’Inhi l-​Fidi?

3. Id-​definizzjoni fil-​Bibbja tal-​fidi kif inhi differenti minn dik mogħtija minn dizzjunarju wieħed?

³ Dizzjunarju wieħed jiddefinixxi l-​fidi bħala “twemmin sod f’xi ħaġa li għaliha m’hemmx prova. “Il-​Bibbja mhux talli ma tappoġġjax din l-​idea, anzi tenfasizza preċiż l-​oppost. Il-​fidi hija bbażata fuq fatti, fuq realtajiet, fuq verità. L-​Iskrittura tgħid: “Il-​fidi hija l-​istennija assigurata taʼ affarijiet ittamati, il-​wirja evidenti taʼ realtajiet għalkemm ma jintlemħux.” (Ebrej 11:1) Wieħed li għandu l-​fidi għandu garanzija li kull ħaġa mwiegħda minn Alla hija ċerta daqs li kieku twettqet. Tant hija qawwija l-​prova konvinċenti taʼ realtajiet li ma jidhrux li l-​fidi jingħad li hija ekwivalenti għal dik l-​evidenza.

4. Xogħol wieħed taʼ referenza kif jappoġġja d-​definizzjoni Biblika tal-​fidi?

⁴ Fin-​New World Translation, il-​forma kawżattiva tal-​verb Ebrajk ’‏a·manʹ hija xi drabi tradotta “teżerċita fidi.” Skond it-​Theological Wordbook of the Old Testament, “fil-​qalba tat-​tifsir tal-​għerq hemm l-​idea taʼ ċertezza . . . f’kuntrast maʼ kunċetti moderni tal-​fidi bħala xi ħaġa possibbli, forsi veru, imma mhix ċerta.” L-​istess ktieb igħid: “Id-​derivattiv ’āmēn ‘tassew’ jinġieb ’il quddiem fit-​Testment il-​Ġdid fil-​kelma amēn li hi [l-]kelma Ngliża ‘amen.’ Ġesù uża l-​kelma taʼ spiss (Mt 5:18, 26, eċċ.) biex jenfasizza ċ-​ċertezza taʼ xi ħaġa.” Il-​kelma tradotta “fidi” fl-​Iskrittura Kristjana Griega tfisser ukoll twemmin f’xi ħaġa bbażat b’mod sod fuq fatt jew verità.

5. Il-​kelma Griega tradotta “stennija assigurata” f’​Ebrej 11:1 kif kienet tintuża f’dokumenti tal-​qedem tan-​negozju, u x’sinjifikat għandu dan għall-​Kristjani?

⁵ Il-​kelma Griega (hy·poʹsta·sis) tradotta “stennija assigurata” f’​Ebrej 11:1 kienet spiss tintuża f’dokumenti tal-​papiru tan-​negozju biex tagħti l-​idea taʼ xi ħaġa li tiggarantixxi pussess futur. L-​istudjużi Moulton u Milligan jissuġġerixxu t-​traduzzjoni: “Il-​fidi hija l-​kuntratt taʼ affarijiet ittamati.” (Vocabulary of the Greek Testament) Ovvjament, jekk wieħed jippossjedi l-​kuntratt għal propjetà, hu jistaʼ jkollu l-​“istennija assigurata” li xi darba t-​tama tiegħu biex jakkwistaha se tkun imwettqa.

6. X’inhu s-​sinjifikat tal-​kelma Griega tradotta “wirja evidenti” f’​Ebrej 11:1?

⁶ F’​Ebrej 11:1, il-​kelma Griega tradotta “wirja evidenti” (eʹleg·khos) tagħti l-​idea taʼ li wieħed jippreżenta evidenza biex juri xi ħaġa, b’mod partikulari xi ħaġa kuntrarju għal dak li jidher li hu l-​każ. Evidenza pożittiva jew konkreta tagħmel ċar dak li qabel ma kienx qed jiġi nnotat, billi b’hekk jitwarrab dak li kien biss jidher li hu l-​każ. Mela kemm fl-​Iskrittura Ebrajka kif ukoll f’dik Griega, il-​fidi m’hi bl-​ebda mod “twemmin sod f’xi ħaġa li għaliha m’hemmx prova.” Għall-​kuntrarju, il-​fidi hija bbażata fuq il-​verità.

Ibbażata fuq Veritajiet Bażiċi

7. Pawlu u David kif jiddeskrivu lil dawk li jiċħdu l-​eżistenza t’Alla?

⁷ L-​appostlu Pawlu stqarr verità bażika meta kiteb li “l-​kwalitajiet inviżibbli [tal-Ħallieq] jidhru ċari mill-​ħolqien tad-​dinja ’l quddiem, għaliex jintgħarfu mill-​affarijiet li ntgħamlu, saħansitra l-​qawwa eterna u d-​Divinità tiegħu, b’mod li [dawk li jopponu l-​verità] ma jistgħux iġibu skuża.” (Rumani 1:20) Iva, “is-​smewwiet qed jiddikjaraw il-​glorja t’Alla,” u “l-​art mimlija bil-​produzzjonijiet [tiegħu].” (Salm 19:1; 104:24) Imma xi ngħidu jekk wieħed ma jkunx irid jikkunsidra l-​evidenza? Is-​salmista David qal: “Il-​wieħed mill-​agħar skond it-​tixmir taʼ mnieħru [“billi hu arroganti,” The New English Bible] ma jagħmel l-​ebda tfittxija; l-​ideat kollha tiegħu huma: ‘Ma hemm ebda Alla.’” (Salm 10:4; 14:1) F’parti, il-​fidi hija bbażata fuq il-​verità fundamentali li Alla jeżisti.

8. Dawk li jeżerċitaw il-​fidi jistgħu jkollhom liema ċertezza u fehma?

⁸ Jehovah mhux sempliċement jeżisti; huwa wkoll taʼ min jafdah, u aħna nistgħu nserrħu rasna fuq il-​wegħdiet tiegħu. Hu qal: “Żgur li bħalma stħajjilt jien, hekk irid jiġri; u sewwa sew bħalma tajt parir jien, dak hu li se jseħħ.” (Isaija 14:24; 46:9, 10) Dan mhux xi kliem bla sugu. Hemm prova ċara li mijiet taʼ profeziji miktubin fil-​Kelma t’Alla twettqu. B’dan it-​tidwil, dawk li jeżerċitaw fidi huma wkoll kapaċi jifhmu t-​twettieq kontinwu taʼ ħafna profeziji oħra tal-​Bibbja. (Efesin 1:18) Per eżempju, huma qed jaraw it-​twettieq tas-​“sinjal” tal-​preżenza taʼ Ġesù, inklużi l-​ippridkar imgħaġġel tas-​Saltna stabbilita, kif ukoll l-​espansjoni mħabbra tal-​qima vera. (Mattew 24:3-14; Isaija 2:2-4; 60:8, 22) Huma jafu li dalwaqt il-​ġnus se jgħajtu “Paċi u sigurtà!” u li ftit wara dan Alla se ‘jġib f’rovina lil dawk li qed jirrovinaw l-​art.’ (1 Tessalonkin 5:3; Rivelazzjoni 11:18) X’barka hi li jkollok fidi bbażata fuq veritajiet profetiċi!

Frotta tal-​Ispirtu Qaddis

9. X’inhi r-​relazzjoni bejn il-​fidi u l-​ispirtu qaddis?

⁹ Il-​verità li fuqha hi bbażata l-​fidi tinsab fil-​Bibbja, prodott tal-​ispirtu qaddis t’Alla. (2 Samwel 23:2; Żakkarija 7:12; Mark 12:36) Loġikament, allura, il-​fidi ma tistax teżisti apparti mill-​ħidma tal-​ispirtu qaddis. Kien għalhekk li Pawlu setaʼ jikteb: “Il-​frott tal-​ispirtu [jinkludi] . . . [l-]fidi.” (Galatin 5:22) Imma ħafna jirrifjutaw verità divina, billi jikkontaminaw il-​ħajjiet tagħhom b’xewqat tal-​laħam u b’ideat li jnikktu lill-​ispirtu t’Alla. B’hekk, “il-​fidi mhix pussess tan-​nies kollha,” għax m’għandhomx bażi fuqiex jiżżviluppawha.−2 Tessalonkin 3:2; Galatin 5:16-21; Efesin 4:30.

10. Xi qaddejja tal-​qedem taʼ Jehovah kif urew li kienu jeżerċitaw fidi?

¹⁰ Minn fost id-​dixxendenti taʼ Adam, madankollu, xi individwi eżerċitaw fidi. Ebrej kapitlu 11 isemmi lil Abel, Enok, Noè, Abraham, Sara, Iżakk, Ġakobb, Ġużeppi, Mosè, Raħab, Gideon, Barak, Sansun, Ġefta, David, u Samwel, flimkien maʼ ħafna qaddejja taʼ Jehovah li ma jissemmewx b’isimhom, li “kellhom xiehda mogħtija lilhom permezz tal-​fidi tagħhom.” Innota x’sar “bil-​fidi.” Kien bil-​fidi li Abel “offra ’l Alla sagrifiċċju” u Noè “bena arka.” Bil-​fidi Abraham “obda f’li ħareġ f’post li kien iddestinat li jirċevih bħala wirt.” U bil-​fidi, Mosè “telaq mill-​Eġittu.”−Ebrej 11:4, 7, 8, 27, 29, 39.

11. Atti 5:32 x’jindika rigward nies li jobdu lil Alla?

¹¹ Ovvjament, dawk il-​qaddejja kollha taʼ Jehovah għamlu iktar milli sempliċement emmnu fl-​eżistenza t’Alla. Billi eżerċitaw il-​fidi, huma fdaw fih bħala l-​Wieħed li huwa “dak li jħallas lil dawk li qed ifittxuh bil-​ħeġġa.” (Ebrej 11:6) Huma għamlu dak li l-​ispirtu t’Alla dderiġiehom biex jagħmlu, billi aġixxew fuq il-​għarfien eżatt tal-​verità li kien disponibbli dak in-​nhar, għalkemm kien limitat. X’differenza minn Adam! Hu ma aġixxiex bil-​fidi bbażata fuq il-​verità jew fi qbil mad-​direzzjoni tal-​ispirtu qaddis. Alla jagħti l-​ispirtu tiegħu biss lil dawk li jobdu lilu.−Atti 5:32.

12. (a) Fiex kellu fidi Abel, u kif wera dan? (b) Minkejja l-​fidi tagħhom, x’ma rċevewx xhieda taʼ Jehovah taʼ qabel il-​Kristjanità?

¹² Kuntrarju għal missieru Adam, it-​twajjeb Abel kellu l-​fidi. X’aktarx mingħand il-​ġenituri tiegħu, hu tgħallem dwar l-​ewwel profezija li qatt tlissnet: “Jien [Alla Jehovah] se nqiegħed għadwa bejnek u l-​mara u bejn iż-​żerriegħa tiegħek u ż-​żerriegħa tagħha. Hu se jbenġlek fir-​ras u int se tbenġlu fil-​għarqub.” (Ġenesi 3:15) Alla b’hekk wiegħed li jeqred il-​ħażen u li jirrestawra t-​tjieba. Kif kellha titwettaq din il-​wegħda, Abel ma kienx jaf. Imma l-​fidi tiegħu li Alla huwa Dak li jħallas lil dawk li Jfittxuh bil-​ħeġġa kienet qawwija biżżejjed biex tqanqlu ħalli joffri sagrifiċċju. Hu wisq probabbli kien ħaseb fil-​fond dwar il-​profezija u kien jemmen li t-​tixrid tad-​demm kien neċessarju biex iwettaq il-​wegħda u jerfaʼ lill-​umanità għall-​perfezzjoni. Għaldaqstant, is-​sagrifiċċju tal-​annimali minn Abel kien addattat. Minkejja l-​fidi tagħhom, madankollu, Abel u xhieda oħra taʼ Jehovah taʼ qabel il-​Kristjanità “ma ħadux it-​twettieq tal-​wegħda.”−Ebrej 11:39.

Nipperfezzjonaw il-​Fidi

13. (a) Abraham u David x’tgħallmu rigward it-​twettieq tal-​wegħda? (b) Għala jistaʼ jingħad li “l-​verità ġiet li sseħħ permezz taʼ Ġesù Kristu”?

¹³ Minn żmien għal żmien matul is-​sekli, Alla rrivela verità miżjuda dwar kif il-​wegħda rigward ‘iż-​żerriegħa tal-​mara’ kellha titwettaq. Lil Abraham intqallu: “Permezz taż-​żerriegħa tiegħek il-​ġnus kollha tal-​art ċertament li se jbierku lilhom infushom.” (Ġenesi 22:18) Iktar tard, lis-​Sultan David intqallu li ż-​Żerriegħa mwiegħed kien se jiġi permezz tal-​linja rjali tiegħu. Fid-​29 E.K., dak iż-​Żerriegħa deher fil-​persuna taʼ Ġesù Kristu. (Salm 89:3, 4; Mattew 1:1; 3:16, 17) F’kuntrast maʼ Adam li ma weriex fidi, “l-​aħħar Adam,” Ġesù Kristu, kien eżemplari f’li juri fidi. (1 Korintin 15:45) Hu għex ħajja taʼ servizz devot lil Jehovah u wettaq ħafna profeziji li jbassru l-​Messija. Ġesù b’hekk għamel il-​verità dwar iż-​Żerriegħa mwiegħed iktar ċara u poġġa l-​affarijiet iffigurati bil-​quddiem mil-​Liġi taʼ Mosè fil-​qasam tar-​realtà. (Kolossin 2:16, 17) Setaʼ għalhekk jingħad li “l-​verità ġiet li sseħħ permezz taʼ Ġesù Kristu.”−Ġwann 1:17.

14. Pawlu kif wera lill-​Galatin li l-​fidi kienet ħadet dimensjonijiet ġodda?

¹⁴ Issa li l-​verità ġiet li tkun permezz taʼ Ġesù Kristu, kien hemm pedament iżjed mifrux fuqiex tibbaża l-​fidi fil-​“wegħda.” Il-​fidi ntgħamlet iżjed soda, kienet ħadet dimensjonijiet ġodda, biex ingħidu hekk. F’dan ir-​rigward Pawlu qal lill-​Kristjani sħabu midlukin: “L-​Iskrittura wasslet l-​affarijiet kollha flimkien sal-​kustodja tad-​dnub biex il-​wegħda li tirriżulta mill-​fidi lejn Ġesù Kristu tistaʼ tingħata lil dawk li jeżerċitaw fidi. Madankollu, qabel ma waslet il-​fidi, aħna konna qed niġu mgħassin taħt il-​liġi, billi konna qed niġu mwasslin flimkien fil-​kustodja, billi konna qed inħarsu lejn il-​fidi li kienet iddestinata li tiġi rrivelata. Għaldaqstant il-​Liġi saret il-​għalliema tagħna li twassal għal Kristu, biex nistgħu niġu ddikjarati twajbin minħabba l-​fidi. Imma issa li l-​fidi waslet, m’għadniex iktar taħt għalliem. Intom ilkoll, fil-​fatt, ulied Alla permezz tal-​fidi tagħkom fi Kristu Ġesù.”−Galatin 3:22-26.

15. Kif biss setgħet il-​fidi tiġi pperfezzjonata?

¹⁵ L-​Iżraeliti kienu eżerċitaw fidi fil-​kuntatti t’Alla magħhom permezz tal-​patt tal-​Liġi. Imma issa din il-​fidi riedet tiżdied. Kif? Billi jeżerċitaw fidi f’Ġesù midluk bl-​ispirtu li lejh il-​Liġi kienet imfassla biex twassalhom. B’dak il-​mod biss setgħet il-​fidi taʼ qabel il-​Kristjanità tiġi pperfezzjonata. Kemm kien essenzjali għal dawk il-​Kristjani tal-​bidu li ‘jħarsu fissi lejn Ġesù, l-​Aġent Ewlieni u Dak li Jipperfezzjona l-​fidi tagħhom’! (Ebrej 12:2) Tabilħaqq, il-​Kristjani kollha għandhom jagħmlu dan.

16. Spirtu qaddis kif ġie b’mod intensifikat, u għala?

¹⁶ Minħabba għarfien miżjud taʼ verità divina u l-​fidi pperfezzjonata li tirriżulta, kien l-​ispirtu qaddis ukoll mistenni li jiġi b’mod intensifikat? Iva. F’Pentekoste tat-​33 E.K., l-​ispirtu t’Alla, il-​wieħed imwiegħed li jgħin u li dwaru kien tkellem Ġesù, ġie mferraʼ fuq id-​dixxipli tiegħu. (Ġwann 14:26; Atti 2:1-4) L-​ispirtu qaddis beda mbagħad jopera fuqhom b’mod kompletament ġdid bħala aħwa midlukin taʼ Kristu. Il-​fidi tagħhom, frotta tal-​ispirtu qaddis, ġiet imsaħħa. Dan forniehom għax-​xogħol vast li kellhom quddiemhom taʼ trawwim taʼ dixxipli.−Mattew 28:19, 20.

17. (a) Kif ġiet il-​verità u l-​fidi kif ġiet ipperfezzjonata mill-​1914 ’il hawn? (b) Liema evidenza għandna tal-​ħidma tal-​ispirtu qaddis mill-​1919 ’il hawn?

¹⁷ Il-​fidi waslet meta Ġesù ppreżenta lilu nnifsu bħala s-​Sultan tal-​futur iktar minn 1,900 sena ilu. Imma issa li huwa Sultan tas-​sema li qed jirrenja, il-​bażi tagħna għall-​fidi−verità rrivelata−kibret b’mod tremend, billi b’hekk ipperfezzjonat il-​fidi tagħna. Bl-​istess mod, il-​ħidma tal-​ispirtu qaddis intensifikat. Kien hemm evidenza ċara taʼ dan fl-​1919, meta spirtu qaddis ta l-​ħajja mill-​ġdid lill-​qaddejja ddedikati t’Alla minn qagħda taʼ kważi inattività. (Eżekjel 37:1-14; Rivelazzjoni 11:7-12) Il-​pedament ġie mbagħad imqiegħed għal ġenna spiritwali, li fis-​snin taʼ wara saret iktar ovvja u iktar glorjuża iktar ma gerbbu s-​snin. Setaʼ jkun hemm xi prova akbar tal-​ħidma tal-​ispirtu qaddis?

Għala Nanalizzaw il-​Fidi Tagħna?

18. L-​ispiji Iżraeliti kif kienu differenti minn xulxin rigward il-​fidi?

¹⁸ Ftit wara li l-​Iżraeliti nħelsu mill-​jasar fl-​Eġittu, 12-il raġel intbagħtu bħala spiji biex jitkixxfu l-​art taʼ Kangħan. Madankollu, għaxra minnhom ma kellhomx fidi, billi ddubitaw l-​abbiltà taʼ Jehovah f’li jwettaq il-​wegħda tiegħu li jagħti l-​art lil Iżrael. Huma kienu mqanqlin bil-​vista, b’affarijiet fiżiċi. Mit-​12, Ġożwè u Kaleb biss urew li kienu jimxu bil-​fidi, mhux bil-​vista.​—(Qabbel 2 Korintin 5:7.) Talli eżerċitaw fidi, huma biss minn fost dawk l-​irġiel baqgħu ħajjin biex jidħlu fl-​Art Imwiegħda.−Numri 13: 1-33; 14:35-38.

19. Il-​pedament li fuqu tinbena l-​fidi kif inhu iżjed profond illum minn qatt qabel, u madankollu x’għandna nagħmlu?

¹⁹ Illum, aħna weqfin fil-​fruntieri tad-​dinja ġdida taʼ tjieba t’Alla. Jekk irridu nidħlu fiha, il-​fidi hija essenzjali. B’ferħ, il-​pedament taʼ verità li fuqu nibbażaw dik il-​fidi huwa profond ħafna iktar minn qatt qabel. Aħna għandna l-​Kelma t’Alla kollha kemm hi, l-​eżempju taʼ Ġesù Kristu u tas-​segwaċi midlukin tiegħu, l-​appoġġ taʼ miljuni taʼ aħwa spiritwali rġiel u nisa, u l-​appoġġ tal-​ispirtu qaddis t’Alla b’ammont li qatt ma kien hawn bħalu. Iżda, aħna nagħmlu tajjeb li nanalizzaw il-​fidi tagħna u nieħdu passi biex insaħħuha waqt li għadna nistgħu.

20. X’mistoqsijiet ikun xieraq li nistaqsu lilna nfusna?

²⁰ ‘O, jien nemmen li din hi l-​verità,’ forsi tgħid int. Imma kemm hi qawwija l-​fidi tiegħek? Staqsi lilek innifsek: ‘Hija s-​Saltna tas-​sema taʼ Jehovah reali għalija daqs kemm hu gvern uman? Nirrikonoxxi jien u nappoġġja bis-​sħiħ lill-​organizzazzjoni viżibbli taʼ Jehovah u lill-​Ġemgħa li Tiggverna tagħha? B’għajnejn tal-​fidi, nistaʼ jien nara li l-​ġnus qegħdin issa jiġu mmanuvrati f’pożizzjoni finali għal Armageddon? Titqabbel il-​fidi tiegħi b’mod favorevoli maʼ dik tas-​“sħaba kbira taʼ xhieda” msemmija f’​Ebrej kapitlu 11?’−Ebrej 12:1; Rivelazzjoni 16:14-16.

21. Il-​fidi kif tqanqal lil dawk li jippossjeduha, u kif jiġu mberkin? (Inkludi kummenti mill-​kaxxa f’paġna 11.)

²¹ Dawk li jippossjedu fidi bbażata fuq il-​verità huma mqanqlin għall-​azzjoni. Bħas-​sagrifiċċju aċċettabbli offrut minn Abel, is-​sagrifiċċji tagħhom taʼ tifħir huma pjaċevoli għal Alla. (Ebrej 13:15, 16) Bħal Noè, predikatur tat-​tjieba li obda lil Alla, huma jsegwu korsa taʼ tjieba bħala predikaturi tas-​Saltna. (Ebrej 11:7; 2 Pietru 2:5) Bħal Abraham, dawk bil-​fidi bbażata fuq il-​verità jobdu lil Jehovah minkejja inkonvenjenzi u saħansitra taħt l-​iktar ċirkostanzi taʼ prova. (Ebrej 11:17-19) Bħall-​qaddejja leali taʼ Jehovah tal-​qedem, dawk li għandhom fidi llum huma mberkin b’mod għani u mħarsin minn Missierhom tas-​sema kollu mħabba.−Mattew 6:25-34; 1 Timotew 6: 6-10.

22. Il-​fidi kif tistaʼ tiġi msaħħa?

²² Jekk int qaddej taʼ Jehovah imma ssib li l-​fidi tiegħek hi dgħajfa f’xi aspett, x’tistaʼ tagħmel? Saħħaħ il-​fidi tiegħek billi tistudja bil-​għaqal il-​Kelma t’Alla u billi tħalli lil fommok inixxi ’l barra l-​ilmijiet taʼ verità li jimlew lil qalbek. (Proverbji 18:4) Jekk il-​fidi tiegħek ma tiġix imsaħħa regolarment, tistaʼ ssir dgħajfa, inattiva, saħansitra mejta. (1 Timotew 1:19; Ġakbu 2:​20-26) Kun determinat li dan qatt ma jiġri lill-​fidi tiegħek. Mur għand Jehovah għall-​għajnuna, billi titlob: “Għinni fejn għandi bżonn fidi!”−Mark 9:24.

XˈInhuma t-​Tweġibiet Tiegħek?

◻ X’inhi l-​fidi?

◻ Il-​fidi għala ma tistax teżisti mingħajr verità u spirtu qaddis?

◻ Ġesù Kristu kif sar Dak li Jipperfezzjona l-​fidi tagħna?

◻ Għala għandna nanalizzaw kemm hi qawwija l-​fidi tagħna?

[Kaxxa f’paġna 11]

DAWK LI GĦANDHOM FIDI. . .

◻ Jitkellmu dwar Jehovah.−2 Korintin 4:13.

◻ Jagħmlu xogħlijiet bħal dawk taʼ Ġesù.−Ġwann 14:12.

◻ Huma sorsi taʼ inkuraġġiment għal oħrajn.−Rumani 1:8, 11, 12.

◻ Jikkonkwistaw lid-​dinja.−1 Ġwann 5:5.

◻ M’għandhomx għalfejn jibżgħu.−Isaija 28:16.

◻ Huma f’linja għall-​ħajja taʼ dejjem. −Ġwann 3:16.