Kemm Se Ddum il-Paċenzja t’Alla?

MADWAR 3,000 sena ilu, raġel għaref kiteb: “Raġel iddomina raġel bi ħsara għalih.” (Ekkleżjasti 8:9) Minn mindu għamel dik l-​osservazzjoni, l-​affarijiet ma marrux għall-​aħjar. Matul l-​istorja, individwi jew gruppi ħatfu l-​poter, wieħed wara l-​ieħor, iddominaw u esplojtaw lil bnedmin oħra. Alla Jehovah bil-​paċenzja kollha ssaporta dan.

Jehovah kien u għadu paċenzjuż waqt li gvernijiet bagħtu miljuni jmutu fil-​gwerra u ħallew inġustizzji ekonomiċi kbar. Il-​lum, hu għadu juri l-​paċenzja hekk kif il-​bniedem jeqred l-​ozone layer u jniġġeż l-​atmosfera u l-​baħar. Kemm żgur li jħossu mweġġaʼ meta jara r-​rovina taʼ art tajba u produttiva u l-​qerda sfrenata taʼ foresti u l-​annimali selvaġġi!

Alla Għala Huwa Daqshekk Paċenzjuż?

Tixbieha sempliċi tistaʼ tgħinna biex inwieġbu din il-​mistoqsija. Ikkunsidra l-​effett fuq negozju meta impjegat jiġi dejjem tard. Is-​sid x’għandu jagħmel? Sempliċi ġustizzja tistaʼ tirrikjedi li jkeċċi immedjatament lill-​impjegat. Imma forsi jiftakar il-​proverbju tal-​Bibbja: “Dak li bil-​mod biex jirrabja hu abbundanti fid-​dehen, imma wieħed bla paċenzja qed jeżalta fil-​bluha.” (Proverbji 14:29) Id-​dehen jistaʼ jġiegħlu jistenna qabel ma jaġixxi. Hu jistaʼ jiddeċiedi li jħalli ftit taż-​żmien biex wieħed li jissostitwih jiġi mħarreġ sabiex in-​negozju ma jiġix imfixkel saħansitra iktar.

Li jkun wieħed li jħoss għal oħrajn ukoll jistaʼ jġiegħlu jistenna. Xi ngħidu dwar li jwissi lill-​impjegat traskurat biex jara jekk jirranġax? Għala ma jkellmux biex jara jekk id-​drawwa tiegħu taʼ li jkun tard hijiex ikkaġunata minn xi problema li tistaʼ tiġi solvuta jew jekk hijiex ġejja minn attitudni ħażina bla fejqan? Waqt li sid in-​negozju jistaʼ jiddeċiedi biex jeżerċita paċenzja, il-​paċenzja tiegħu, madankollu, ma tkunx bla limitu. L-​impjegat jew ikollu jirranġa jew fl-​aħħar mill-​aħħar jiffaċċja t-​tkeċċija. Hekk ikun xieraq għan-​negozju nnifsu u għall-​impjegati li jsegwu r-​regoli.

B’mod kważi simili, Alla Jehovah jeżerċita l-​paċenzja meta jkun iffaċċjat bil-​ħażin sabiex iħalli żmien biex ikun hemm soluzzjoni ġusta għal ċerti problemi. Barra minn hekk, il-​paċenzja tiegħu tagħti opportunità lil dawk li jagħmlu l-​ħażin biex ibiddlu l-​mogħdijiet tagħhom u jakkwistaw benefiċċji eterni. B’hekk, il-​Bibbja tinkuraġġixxi lilna biex ma nkunux imdejqin bil-​paċenzja t’Alla. Minflok, tgħidilna: “Ikkunsidraw il-​paċenzja tal-​Mulej tagħna bħala salvazzjoni.”−2 Pietru 3:15.

Eżempju tal-​Paċenzja t’Alla

Alla Jehovah kien paċenzjuż qabel id-​Dulluvju l-​kbir taʼ żmien Noè. Id-​dinja taʼ dak iż-​żmien kienet mimlija bil-​vjolenza u kienet ħażina ħafna. Naqraw: “Jehovah ra li l-​ħażen tal-​bniedem kien kotran fl-​art . . . Mela Jehovah qal: ‘Jien sejjer niknes lill-​bnedmin li lilhom jien ħlaqt lil hemm minn fuq wiċċ l-​art.’” (Ġenesi 6:5, 7) Iva, Jehovah kellu f’moħħu soluzzjoni aħħarija għall-​problema tal-​ħażen lura f’dak iż-​żmien: it-​tneħħija tan-​nies ħżiena. Imma hu ma aġixxiex immedjatament. Għala le?

Għaliex mhux kulħadd kien ħażin. Noè u l-​familja tiegħu kienu twajbin f’għajnejn Alla. Għalhekk minħabba fihom, Jehovah stenna bil-​paċenzja kollha biex iħalli lil dawk il-​ftit individwi twajbin biex jagħmlu l-​preparamenti għas-​salvazzjoni. Barra minn hekk, dik l-​istennija twila tat l-​opportunità lil Noè biex ikun “predikatur tat-​tjieba,” billi ta lil dawk in-​nies mill-​agħar l-​opportunità li jbiddlu mogħdijiethom. Il-​Bibbja tgħid: “[I]l-paċenzja t’Alla kienet qiegħda tistenna f’jiem Noè, waqt li l-​arka kienet qiegħda tinbena, li fiha ftit nies, jiġifieri, tmien erwieħ, inġarru qawwijin u sħaħ minn ġol-​ilma.”−2 Pietru 2:5; 1 Pietru 3:20.

Alla Għala Huwa Paċenzjuż Issa

Illum, is-​sitwazzjoni hija simili. Id-​dinja għal darb’oħra hija mimlija bil-​vjolenza. Kif kien fi żmien Noè, Alla diġà ġġudika lil din id-​dinja, li, il-​Bibbja tgħid, hija ‘merfugħa għal jum il-​ġudizzju u taʼ qerda għan-​nies taʼ mingħajr Alla.’ (2 Pietru 3:7) Meta jiġri dan, ma jkunx hemm iktar rovinar tal-​ambjent, oppressjoni tad-​dgħajfin, jew abbuż rgħib tal-​poter.

Alla għala, allura, ma qeridx lil nies taʼ mingħajr Alla żmien ilu? Minħabba li kien hemm kwistjonijiet li riedu jiġu solvuti u affarijiet importanti biex jiġu rranġati. Tabilħaqq, Jehovah qed joqrob lejn soluzzjoni permanenti għall-​problema tal-​ħażen li tinvolvi ħafna affarijiet, inkluża s-​salvazzjoni taʼ bnedmin taʼ qalb tajba mill-​irbit tal-​mard u l-​mewt.

B’dan tal-​aħħar f’moħħu, Jehovah kellu l-​għan li jipprovdi Salvatur li kellu joffri rahan għal dnubietna. Dwaru, il-​Bibbja tgħid: “Alla tant ħabb lid-​dinja li ta l-​Iben uniġenitu tiegħu, sabiex kulmin jeżerċita fidi fih jistaʼ ma jinqeridx imma jkollu l-​ħajja taʼ dejjem.” (Ġwann 3:16) Ħa eluf taʼ snin biex jipprepara l-​mogħdija għal Ġesù biex jiġi u jissagrifika ħajtu f’isem l-​umanità. Matul dawk is-​snin kollha, Alla kien paċenzjuż bl-​imħabba kollha. Imma ma kienx taʼ min jistennieh provvediment bħal dan?

Ġesù pprovda r-​rahan għall-​umanità kważi elfejn sena ilu. Alla għala, allura, għadu jeżerċita l-​paċenzja? L-​ewwelnett, għax il-​mewt taʼ Ġesù tat bidu għal kampanja edukattiva. Il-​bnedmin riedu jitgħallmu dwar dan il-​provvediment taʼ mħabba u jingħataw l-​opportunità biex jaċċettawh jew jirrifjutawh. Dak kien jieħu ż-​żmien, imma kien ikun żmien mhux moħli. Il-​Bibbja tgħid: “Jehovah ma jeħodhiex bil-​lajma rigward il-​wegħda tiegħu, bħalma xi nies jikkunsidraw il-​lajma, imma hu paċenzjuż magħkom għaliex ma jixtieqx li xi ħadd jinqered imma jixtieq li kulħadd jasal għall-​indiema.”−2 Pietru 3:9.

Il-​Kwistjoni taʼ Gvern

Kwistjoni importanti oħra kienet ukoll tieħu ż-​żmien. Kien hemm il-​ħtieġa biex tissolva l-​problema taʼ gvern għall-​umanità. Fil-​bidu, il-​bniedem kien taħt gvern divin. Imma fil-​ġnien taʼ Għeden, l-​ewwel ġenituri tagħna tawh daharhom. Huma għażlu li jkunu indipendenti minn Alla, billi riedu jaħkmu lilhom infushom. (Ġenesi 3:1-5) Verament, iżda, il-​bniedem ma ġiex maħluq biex jaħkem lilu nnifsu. Il-​profeta Ġeremija kiteb: “Jien naf sewwa, O Jehovah, li għall-​bniedem tal-​art il-​mogħdija tiegħu ma tappartjenix lilu. Ma jappartjenix lill-​bniedem li miexi saħansitra li jidderieġi l-​pass tiegħu.”−Ġeremija 10:23; Proverbji 20:24.

Minkejja dan, ladarba l-​kwistjoni taʼ gvern ġiet imqajma, Jehovah bil-​paċenzja ħalla żmien biex isolviha. Tabilħaqq, hu ħalla b’mod ġeneruż eluf taʼ snin biex il-​bniedem jipprova kull forma konċepibbli taʼ gvern. B’liema riżultat? Sar evidenti li l-​ebda gvern uman ma jistaʼ jneħħi l-​oppressjoni, l-​inġustizzja, jew kaġuni oħra taʼ dwejjaq.

Tabilħaqq, meta tħares lejn l-​istorja umana, jistaʼ xi ħadd verament jgħid li Alla huwa inġust meta jħabbar l-​intenzjoni tiegħu li jneħħi l-​gvernijiet umani kollha u jissostitwihom bi gvern tiegħu stess? Żgur li le! Aħna b’mod pożittiv nilqgħu t-​twettieq taʼ din il-​profezija tal-​Bibbja: “Fil-​jiem taʼ dawk is-​slaten dak Alla tas-​sema se jwaqqaf saltna li qatt ma se tinġieb f’rovina. U s-​saltna nfisha mhix se tiġi mgħoddija lil xi poplu ieħor. Hi se tfarrak u ġġib fi tmiem lil dawn is-​saltniet kollha, u hija nfisha se tieqaf għal żminijiet indefiniti.”−Danjel 2:44.

Is-Sultan tas-​sema taʼ dik is-​Saltna huwa Ġesù rxoxtat. Biex jippreparah għal dik il-​pożizzjoni—kif ukoll billi għażel bnedmin biex ikunu ħakkiema bi sħab miegħu—ħa ż-​żmien. Matul dak iż-​żmien kollu, Alla eżerċita l-​paċenzja.

Ibbenefika Issa mill-​Paċenzja t’Alla

Illum, miljuni taʼ individwi f’mhux inqas minn 212-il art jibbenefikaw mill-​paċenzja t’Alla. Huma saru magħqudin fix-​xewqa tagħhom li jobdu lil Alla u jaqdu lill-​gvern tas-​sema tiegħu. Meta huma jiltaqgħu flimkien fil-​Kingdom Halls, huma jitgħallmu kemm hu wisq aħjar li japplikaw il-​prinċipji tal-​Bibbja f’ħajjithom. Huma ma jiħdux sehem fil-​politika li tifred taʼ din id-​dinja, għalkemm huma jissottomettu rwieħhom għall-​gvernijiet umani sakemm Alla bil-​paċenzja kollha jħallihom jiffunzjonaw.—Mattew 22:21; Rumani 13:1-5.

Koperazzjoni bħal din fost tant nies tivvindika lil Jehovah bħala Dak li jistaʼ jġib l-​armonija fost in-​nies li huma liberi li jitgħallmu jħobbuh u li jridu jaqduh. Bla dubju int iltqajt maʼ dawn hekk kif huma jkomplu l-​istess xogħol li Ġesù nnifsu beda, dak taʼ li jippubblikaw l-​aħbar tajba tas-​Saltna t’Alla. Ġesù bassar il-​quċċata taʼ dan ix-​xogħol meta qal: “Din l-​aħbar tajba tas-​saltna se tkun ippridkata fl-​art abitata kollha għal xiehda lill-​ġnus kollha; u mbagħad se jiġi t-​tmiem.”—Mattew 24:14.

Ma Baqax Wisq Iktar!

Evidenza viżibbli tagħti prova li l-​arranġamenti għall-​gvern taʼ tjieba t’Alla biex jieħu f’idejh il-​ħakma minn jum għal jum tal-​art huma kważi kompluti. Wara li jiddeskrivi r-​riżultati terribbli tal-​falliment tal-​gvern mill-​bniedem li aħna rajna matul dan is-​seklu, Ġesù qal: “Meta taraw dawn l-​affarijiet iseħħu, kunu afu li s-​saltna t’Alla hija qrib.”−Luqa 21:10, 11, 31.

Dalwaqt, Alla se jneħħi l-​ħżiena minn fuq wiċċ l-​art. Il-​kliem tas-​salmista se jkollu applikazzjoni litterali: “Dawk li jagħmlu l-​ħażen infushom se jinqatgħu . . . Ftit ieħor biss, u l-​wieħed mill-​agħar mhux se jkun iżjed; u int ċertament li tagħti kas taʼ postu, u mhux se jkun.” (Salm 37:9, 10) Tistaʼ timmaġina dinja mingħajr ħażen? Min se jmexxi l-​affarijiet dak in-​nhar? Il-​Bibbja tgħid: “Sultan [Kristu Ġesù mqiegħed fuq it-​tron fis-​smewwiet] se jsaltan għat-​tjieba nfisha; u nkwantu għal prinċpijiet [il-maħturin leali tiegħu fuq l-​art], huma se jaħkmu bħala prinċpijiet għall-​ġustizzja nfisha. U x-​xogħol tat-​tjieba vera jrid isir paċi; u s-​servizz tat-​tjieba vera, kwiet u sigurtà għal żmien indefinit. U l-​poplu tiegħi jrid igħammar f’post li jżomm il-​paċi u f’residenzi taʼ fiduċja sħiħa u f’postijiet taʼ mistrieħ bla tfixkil.”−Isaija 32:1, 17, 18.

B’hekk, il-​gvern tas-​sema t’Alla se jirranġa l-​effetti ħżiena tal-​ħażen li għamel il-​bniedem u jorganizza lil dawk li jittamaw fiH f’soċjetà umana armonjuża. Billi tiddeskrivi din l-​armonija, il-​Bibbja tgħid: “Il-​lupu se jgħammar attwalment għal ftit żmien mal-​ħaruf, u mal-​gidi se jimtedd il-​lijupard innifsu, u l-​għoġol u l-​iljun żagħżugħ muxgħar u l-​annimal mitmugħ sewwa lkoll flimkien; u naqra taʼ tifel ċkejken se jkun mexxej fuqhom . . . Ma se jagħmlu ebda ħsara jew jikkaġunaw xi rovina fuq il-​muntanja qaddisa kollha tiegħi; għaliex l-​art ċertament li se tkun mimlija bil-​għarfien taʼ Jehovah bħalma l-​ilmijiet qed jiksu lill-​istess baħar.”−Isaija 11:6-9.

X’riżultat meraviljuż talli Alla eżerċita l-​paċenzja! B’hekk, minflok ma tilmenta li Alla stenna żżejjed, għala ma tiħux opportunità mill-​paċenzja tiegħu biex tissottometti ruħek lejn is-​Saltna tiegħu? Tgħallem mill-​Bibbja x’inhuma l-​livelli tiegħu u imxi magħhom. Issieħeb maʼ oħrajn li huma sottomessi b’mod armonjuż lejh. Imbagħad, il-​paċenzja t’Alla se tirriżulta f’barkiet dejjiema għalik.