Tistaʼ Int Teżerċita l-Paċenzja?

JEHOVAH qal lil Abram: “Mur fi triqtek ’il barra minn pajjiżek . . . lejn il-​pajjiż li se nurik jien; u jien se nagħmel ġens kbir minnek u se nbierkek u se nagħmel lil ismek kbir.” (Ġenesi 12:1, 2) Abram dak in-​nhar kellu 75 sena. Hu obda u bil-​għaqal eżerċita l-​paċenzja għall-​bqija taʼ ħajtu, billi stenna fuq Jehovah.

Eventwalment, Alla għamel din il-​wegħda lil Abraham (Abram) li tant kien paċenzjuż: “Fiż-​żgur li fil-​barka se nbierkek, u fl-​immoltiplikar se nimmoltiplikak.” L-​appostlu Pawlu żied: “U b’hekk wara li Abraham kien wera l-​paċenzja, hu kiseb din il-​wegħda.”—Ebrej 6:13-15.

X’inhi l-​paċenzja? Id-​dizzjunarji jagħtu d-​definizzjoni tagħha bħala l-​abbiltà “li tistenna bil-​kalma kollha għal xi ħaġa” jew li turi “kontroll fuqek innifsek taħt provokazzjoni jew sforz mentali.” Mela l-​paċenzja tiegħek tiġi ttestjata meta jkollok tistenna lil xi ħadd jew xi ħaġa, jew meta tiġi pprovokat jew tkun taħt stress. F’sitwazzjonijiet bħal dawn l-​individwu paċenzjuż jibqaʼ trankwill; il-​wieħed bla paċenzja jibda jferfex u jirrita ruħu.

Id-​Dinja Moderna Tagħna Mingħajr Paċenzja

Speċjalment f’ħafna nħawi fl-​ibliet, tiġi mogħtija premura mhux lill-​paċenzja imma lill-​veloċità. Għal miljuni taʼ nies li qegħdin jgħixu fi bliet iffullati, kull ġurnata tibda meta jdoqq l-​iżveljarin fil-​għodu. Dak jagħti bidu għal tellieqa tal-​ġenn​—biex wieħed jasal xi mkien, biex jara lil xi ħadd, biex jikseb xi ħaġa. Taʼ min jistagħġeb li ħafna huma nervużi u bla paċenzja?

Tħossok int irritat meta tiġi ffaċċjat min-​nuqqasijiet taʼ oħrajn? “Jien ma niħux gost bin-​nuqqas taʼ puntwalità,” jgħid Albert. Il-​biċċa l-​kbira jaqblu li meta jkunu qegħdin jistennew lil xi ħadd li ttardja jinħoloq stress, speċjalment jekk wieħed ikun marbut bil-​ħin. Rigward id-​Duka taʼ Newcastle, politikant Britanniku tas-​seklu 18, intqal: ‘Jaħli nofs siegħa fil-​għodu, u b’hekk il-​ġurnata kollha jkollu jiġri wara l-​ħin biex jipprova jlaħħaq bla ma jirnexxilu.’ Li kieku kellek tiddependi minn individwu bħal dan jum wara l-​ieħor, kont tibqaʼ paċenzjuż?

Meta qiegħed issuq karozza, jitlagħlek malajr, tiddejjaq tistenna, jew tiġi ttantat biex issuq iżżejjed? F’ċirkostanzi bħal dawn, in-​nuqqas taʼ paċenzja taʼ spiss ikun ifisser diżastru. Matul l-​1989, f’dik li dak iż-​żmien kienet il-​Ġermanja tal-​Punent, iktar minn 400,000 inċident fit-​toroq prinċipali rriżultaw f’korriment jew mewt. Minn dawn, 1 minn kull 3 ġie kkaġunat b’sewqan jew eċċessiv jew qrib iżżejjed tal-​vettura taʼ quddiem. Għall-​inqas sa ċertu punt, għalhekk, in-​nuqqas taʼ paċenzja kien responsabbli għall-​korriment jew għall-​mewt taʼ iktar minn 137,000 persuna. Xi prezz dak għan-​nuqqas taʼ paċenzja!

“Jien insibha diffiċli biex nibqaʼ paċenzjuż meta xi ħadd jinterrompi l-​ħin kollu,” tilmenta Ann, “jew meta xi ħadd jiftaħar ħafna.” Karl-Hermann jammetti li l-​paċenzja tiegħu tiġi sfidata minn “żgħażagħ li m’għandhom ebda rispett għall-​anzjani.”

Dawn is-​sitwazzjonijiet u oħrajn jistgħu jġagħluk tkun bla paċenzja. Kif, allura, tistaʼ int tikkultiva iktar paċenzja?

Jehovah Jistaʼ Jsaħħaħ Il-​Paċenzja Tiegħek

Ħafna nies jaħsbu li l-​paċenzja tindika li wieħed huwa indeċiż jew dgħajjef. Għal Jehovah, madankollu, għandha s-​sinjifikat taʼ saħħa. Huwa nnifsu “hu paċenzjuż . . . għaliex ma jixtieqx li xi ħadd jinqered imma jixtieq li kulħadd jasal għall-​indiema.” (2 Pietru 3:9) Biex issaħħaħ il-​kontroll fuqek innifsek, għalhekk, aqbad maʼ Jehovah u strieħ fuqu b’qalbek kollha. Li ssaħħaħ ir-​relazzjoni tiegħek maʼ Alla huwa l-​uniku pass l-​iktar importanti lejn li tiżżviluppa attitudni paċenzjuża.

Barra minn hekk, huwa vitali li tkun taf l-​iskopijiet taʼ Jehovah għall-​art u għall-​umanità. Abraham “kien qiegħed jistenna l-​belt li għandha sisien veri [is-Saltna t’Alla], li l-​bennej tagħha u dak li għamilha hu Alla.” (Ebrej 11:10) Bl-​istess mod, se jkun taʼ benefiċċju li żżomm ħarsa ċara fuq il-​wegħdi divini u li tkun kuntent li tistenna fuq Jehovah. Int imbagħad se tirrealizza li l-​paċenzja, ’il bogħod milli tfisser inċertezza, attwalment tirbaħ lin-​nies lejn il-​qima vera. Għalhekk, ‘ikkunsidra l-​paċenzja tal-​Mulej tagħna bħala salvazzjoni.’—2 Pietru 3:15.

Xi ngħidu jekk iċ-​ċirkostanzi persunali tiegħek stess jittestjawlek il-​paċenzja kważi sal-​punt li ma tkunx tifilħu? Dawk li ma jemmnux ipoġġuk taħt sforz mentali sikkanti? Kont int marid għal żmien twil li jidher li ma jispiċċa qatt? F’dak il-​każ, daħħal f’qalbek dak li kiteb id-​dixxiplu Ġakbu. Wara li rrefera għall-​mudell li taw il-​profeti f’li eżerċitaw il-​paċenzja, hu rrivela s-​sigriet taʼ li wieħed jibqaʼ kalm taħt stress sever. Ġakbu qal: “Hemm xi ħadd li qiegħed isofri l-​ħażen fostkom? Ħalli jissokta fit-​talb.”—Ġakbu 5:10, 13.

Bil-ħeġġa dur lejn Alla fit-​talb biex isaħħaħlek il-​paċenzja u jgħinek tikkontrolla l-​ispirtu tiegħek waqt prova. Dur lejn Jehovah darba wara l-​oħra, u hu se jgħinek tidentifika ċ-​ċirkostanzi jew id-​drawwiet taʼ oħrajn li jkunu taʼ theddida partikulari għat-​trankwillità tiegħek. Li titlob qabel ma jiġu sitwazzjonijiet li jistgħu jkunu taʼ prova jistaʼ jgħinek biex iżżomm kalm.

Ħarsa Xierqa Tiegħek Innifsek u Taʼ Oħrajn

Biex iżżomm mentalità plaċida, trid tqis lilek innifsek u lil oħrajn b’manjiera xierqa. Dan hu possibbli permezz taʼ studju tal-​Bibbja, għax din turi li kulħadd wiret l-​imperfezzjonijiet u għalhekk għandu n-​nuqqasijiet. Barra minn hekk, għarfien Bibliku se jgħinek tikber fl-​imħabba. Din il-​kwalità hija essenzjali sabiex tintwera l-​paċenzja lejn oħrajn.—Ġwann 13:34, 35; Rumani 5:12; Filippin 1:9.

L-imħabba u l-​ħerqa biex taħfer jistgħu jikkalmawk meta tkun imbaqbaq. Jekk xi ħadd għandu drawwiet li jdejquk, l-​imħabba se tfakkrek li huma d-​drawwiet li qiegħed issib tedjanti, mhux il-​persuna. Ikkunsidra kemm taʼ spiss id-​djufijiet tiegħek stess żgur li jittestjaw il-​paċenzja t’Alla u jirrabjaw ferm lil oħrajn.

Ħarsa korretta tiegħek innifsek se tgħinek ukoll biex tistenna bil-​paċenzja. Per eżempju, qiegħed int tistinka għal privileġġi fis-​servizz taʼ Jehovah, biex wara kollox tibqaʼ ddiżappuntat? Tħoss int li l-​paċenzja tiegħek qiegħda tispiċċa maʼ kull sekonda li tgħaddi? Jekk inhu hekk, allura ftakar li ħafna nuqqas taʼ paċenzja għandu l-​għeruq tiegħu fil-​kburija. “Aħjar wieħed li għandu l-​paċenzja milli wieħed li huwa mkabbar fl-​ispirtu,” qal Salamun. (Ekkleżjasti 7:8) Iva, il-​kburija hija impediment serju għall-​ikkultivar tal-​paċenzja. M’huwiex veru li min hu umli jsibha eħfef li jistenna bil-​kalma? Għalhekk, ikkultiva l-​umiltà, u se tkun iktar kapaċi li taċċetta d-​dewmien bil-​paċi tal-​moħħ.—Proverbji 15:33.

Il-​Paċenzja Trodd Premjijiet Sbieħ

Abraham primarjament hu magħruf għall-​fidi tiegħu. (Rumani 4:11) Madankollu, il-​paċenzja għamlet lill-​fidi tiegħu dejjiema. X’kien il-​premju tiegħu għax stenna fuq Jehovah?

Abraham ġie mogħti l-​fiduċja li dejjem tiżdied taʼ Jehovah. Isem Abraham b’hekk sar kbir ħafna u d-​dixxendenti tiegħu ġens setgħan. Il-​ġnus kollha taʼ l-​art jistgħu jbierku lilhom infushom permezz taż-​żerriegħa tiegħu. Abraham qeda bħala l-​kelliemi għal Alla u saħansitra bħala tipiku tal-​Ħallieq. Setaʼ kien hemm xi premju akbar għall-​fidi u l-​paċenzja taʼ Abraham?

“Jehovah hu teneru ferm fl-​affezzjoni” lejn Kristjani li jissaportu provi bil-​paċenzja. (Ġakbu 5:10, 11) Individwi bħal dawn igawdu kuxjenza nadifa għaliex jagħmlu r-​rieda tiegħu. Fil-​każ tiegħek, allura, jekk int tistenna fuq Jehovah u bil-​paċenzja tissaporti l-​provi, il-​kontroll fuqek innifsek se jirriżulta fl-​approvazzjoni u l-​barka taʼ Jehovah.

Il-paċenzja taqdi sewwa lin-​nies t’Alla f’kull aspett tal-​ħajja. Tnejn mill-​qaddejja taʼ Jehovah, li jisimhom Christian u Agnes, skoprew dan meta ddeċidew li jitgħarsu. Huma ttardjaw l-​għerusija b’rispett lejn il-​ġenituri taʼ Christian, li kellhom bżonn iż-​żmien biex isiru jafu lil Agnes. X’effett kellu dan il-​ġest?

“Kien biss iktar tard li rrealizzajna kemm il-​paċenzja tagħna kienet tfisser għall-​ġenituri tiegħi,” jispjega Christian. “Li stennejna bil-​paċenzja kollha ma temmx ir-​relazzjoni taʼ bejn marti u jiena. Imma kienet l-​ewwel kantun fir-​relazzjoni tagħna mal-​ġenituri tiegħi.” Iva, il-​paċenzja troddlok imgħax tajjeb.

Il-paċenzja wkoll tippromwovi l-​paċi. Tal-​familja u l-​ħbieb se jkunu grati li int ma tagħmilx plejtu fuq kull nuqqas li jagħmlu. Il-​kalma u l-​mogħdrija tiegħek meta oħrajn jagħmlu xi żbalji se jevitaw xeni imbarazzanti. Proverbju Ċiniż jgħid: “Il-​paċenzja f’mument taʼ rabja se tiffrankalek mitt jum taʼ dieqa.”

Il-paċenzja ttejjeb il-​personalità tiegħek, fil-​fatt iżżommlok f’kundizzjoni tajba l-​kwalitajiet mill-​aħjar l-​oħrajn. Tagħmel lill-​fidi tiegħek dejjiema, il-​paci tiegħek iddum isservi, u l-​imħabba tiegħek ma titħarrikx. Li tkun paċenzjuż se jgħinek biex tkun ferrieħi waqt li tipprattika l-​qalb tajba, it-​tjubija, u l-​ħlewwa. Li teżerċita l-​paċenzja se jibni s-​saħħa essenzjali biex jiġi kkultivat is-​sabar fit-​tul u r-​rażna.

Stenna bil-​paċenzja għat-​twettieq tal-​wegħdi taʼ Jehovah, allura, u se tkun assigurat b’futur taʼ l-​għaġeb. Bħal Abraham, jalla int ‘permezz tal-​fidi u l-​paċenzja tiret il-wegħdi.’—Ebrej 6:12. (w94 5/15)