Il-​Biżaʼ Għala Jaħkem lid-​Dinja?

MIN irid jgħix fil-​biżaʼ? Il-​persuna medja tixtieq is-​sigurtà, mingħajr theddida għal ħajjitha jew għal dak li tippossjedi. Għalhekk, ħafna jitilqu minn inħawi mifnijin bil-​kriminalità. Madankollu, kawżi għall-​biżaʼ jeżistu kullimkien.

Perikli minn armi nukleari u inċidenti f’reatturi jqanqlu biżaʼ taʼ qerda għall-​umanità. Vjolenza m’għola s-​sema tippromwovi l-​biżaʼ. Ħafna huma beżgħanin li l-​AIDS se ssir l-​iktar epidemija qattiela tas-​seklu. Il-​qerda taʼ l-​ambjent tagħna hi fost kawżi oħra taʼ biżaʼ. Huma dawn il-​biżgħat sinjifikanti b’mod speċjali? U nistgħu xi darba nittamaw li ngħixu f’dinja mingħajr biżaʼ bħal dan?

Biżaʼ Mad-​Dinja Kollha Sinjifikanti

Il-​biżaʼ maʼ kullimkien taʼ llum hu sinjifikanti minħabba dak li bassret il-​Bibbja. Fil-​profezija tiegħu dwar l-​aħħar jiem, Ġesù Kristu semma kundizzjonijiet li jqanqlu l-​biżaʼ. Hu qal: “Ġens se jqum kontra ġens u saltna kontra saltna, u se jkun hemm nuqqas taʼ ikel u terremoti f’post wara ieħor.” Ġesù tkellem ukoll dwar “[i]ż-żjieda fl-​illegalità.” Sa mill-​1914, gwerer li qatt ma kien hawn bħalhom, ġuħ, terremoti, u illegalità rriżultaw f’biżaʼ kbir u telf taʼ ħajja.—Mattew 24:7-14.

Saħansitra l-​attitudnijiet tan-​nies ikabbru l-​biżaʼ llum. Fit-​2 Timotew 3:1-4, naqraw il-​kelmiet profetiċi taʼ l-​appostlu Pawlu: “Fl-​aħħar jiem żminijiet kritiċi li iebes biex issib tarfhom se jkunu hawn. Għax il-​bnedmin se jkunu jħobbu lilhom infushom, iħobbu l-​flus, faħħarin, kburin, midgħajja, ma jobdux lill-​ġenituri, ma jroddux ħajr, m’humiex leali, m’għandhom ebda affezzjoni naturali, m’huma lesti għal ebda ftehim, kalunnjaturi, mingħajr kontroll fuqhom infushom, feroċi, mingħajr imħabba lejn it-​tjubija, tradituri, rashom iebsa, minfuħin bil-​kburija, iħobbu l-​pjaċiri minflok ma jħobbu ’l Alla.” La darba aħna mdawrin b’nies bħal dawn f’dawn l-​aħħar jiem, mhux taʼ b’xejn hawn daqshekk biżaʼ!

X’Tistaʼ Tistenna Din Id-​Dinja

Ġesù qabbel dan il-​perijodu maʼ l-​aħħar żminijiet tad-​dinja taʼ żmien Noè. Bla dubju, l-​biżaʼ dak in-​nhar kien kbir, għax ir-​rekord storiku tal-​Bibbja jgħid: “L-​art ġiet li hi rrovinata fil-​ħarsa taʼ dak Alla veru u l-​art saret mimlija bil-​vjolenza.” Għalhekk, “Alla qal lil Noè: ‘It-​tmiem tal-​laħam kollu ġie quddiemi, għaliex l-​art mimlija vjolenza.’” (Ġenesi 6:11, 13) Dik id-​dinja mill-​agħar kienet tant vjolenti li Alla ġab tmiem fuqha permezz tad-​Dilluvju globali. B’imħabba, madankollu, Alla Jehovah ippreserva lit-​twajjeb Noè u lill-​familja tiegħu.—2 Pietru 2:5.

Għalhekk x’tistaʼ tistenna d-​dinja vjolenti preżenti? Sewwa, Alla jistmerr in-​nuqqas vjolenti taʼ rispett lejn l-​interessi taʼ ħaddieħor. Dan hu evidenti mill-​kliem tas-​salmista: “Jehovah innifsu jeżamina lill-​wieħed twajjeb kif ukoll lill-​wieħed mill-​agħar, u lil kulmin iħobb il-​vjolenza Ruħu ċertament li tobgħod.” (Salm 11:5) Jehovah ġab tmiem għad-​dinja vjolenti taʼ żmien Noè. Mela, allura, m’għandniex aħna nistennew li Alla jġib tmiem għal din id-​dinja mifnija minn vjolenza li tqanqal il-​biżaʼ?

L-appostlu Pietru kien spirat b’mod divin biex jitkellem dwar il-​preżenza taʼ Kristu u biex jipprofetizza gwaj għad-​dinja ħażina preżenti. Hu kiteb: “Fl-​aħħar jiem se jiġu dawk li jwaqqgħu għaċ-​ċajt bit-​twaqqigħ għaċ-​ċajt tagħhom, jissoktaw skond ix-​xewqat tagħhom stess u jgħidu: ‘Fejn hi din il-​preżenza mwiegħda tiegħu? Iva, minn dak in-​nhar li missirijietna tal-​qedem raqdu fil-​mewt, l-​affarijiet kollha qegħdin ikomplu eżatt bħal mill-​bidu tal-​ħolqien.’” Pietru mbagħad uża t-​terminu “smewwiet” biex jirrappreżenta s-​sistema taʼ ħakma imperfetta fuq l-​umanità u l-​kelma “art” għas-​soċjetà umana taʼ mingħajr tjieba. “Għax,” qal hu, “skond ix-​xewqa tagħhom, dan il-​fatt jaħrab l-​attenzjoni tagħhom, li kien hemm smewwiet mill-​qedem u art wieqfa marsusa ’l barra mill-​ilma u f’nofs l-​ilma bil-​kelma t’Alla; u b’dawk il-​mezzi d-​dinja taʼ dak iż-​żmien [żmien Noè] sofriet qerda meta kienet mgħarrqa bl-​ilma. Imma bl-​istess kelma s-​smewwiet u l-​art li huma issa huma maħżunin għan-​nar u qegħdin jiġu merfugħin għal jum il-​ġudizzju u taʼ qerda għan-​nies taʼ mingħajr Alla.”—2 Pietru 3:3-7.

Fi qbil maʼ dan, Pawlu ħareġ il-​punt li Kristu u l-​anġli qawwijin tiegħu sejrin iġibu “vendetta fuq dawk li ma jafux lil Alla u dawk li ma jobdux l-​aħbar tajba dwar il-​Mulej tagħna Ġesù. Dawn l-​istess uħud se jieħdu l-​kastig ġudizzjarju taʼ qerda għal dejjem.” (2 Tessalonkin 1:6-9) L-​aħħar ktieb tal-​Bibbja jitkellem dwar il-​ġbir tan-​nazzjonijiet “għall-​gwerra tal-​jum il-​kbir t’Alla li Jistaʼ Kollox” u jassigurana li Jehovah se “jġib f’rovina lil dawk li qegħdin jirrovinaw l-​art.”—Rivelazzjoni 11:18; 16:14-16.

Żmien Taʼ Ferħ, Mhux Biżaʼ

Minflok ma jkunu mwerwrin b’dak li l-​Bibbja tbassar għal din id-​dinja, nies retti għandhom raġun jifirħu. Jehovah dalwaqt iġib tmiem għal din id-​dinja mill-​agħar, imma dan se jsir għall-​ġid taʼ dawk li jħobbu t-​tjieba. X’se jsegwi t-​tmiem divin tas-​sistema preżenti taʼ affarijiet? Iva, sistema ġdida taħt is-​Saltna t’Alla tas-​smewwiet, li għaliha Ġesù għallem lis-​segwaċi tiegħu biex jitolbu! Hu qal: “Tridu titolbu, allura, b’dan il-​mod: ‘Missierna fis-​smewwiet, ħa jitqaddes ismek. Ħa tiġi saltnatek. Ħa tintgħamel ir-​rieda tiegħek, kif fis-​sema, ukoll fuq l-​art.’” (Mattew 6:9, 10) Liema tibdiliet jistgħu jiġu mistennijin meta r-​rieda t’Alla tkun magħmula fuq l-​art?

Il-gwerra u t-​terruri tagħha se jkunu spiċċaw. Salm 46:9 jgħid: “[Alla Jehovah] qiegħed iġiegħel li l-​gwerer jieqfu sa l-​estremità taʼ l-​art. Il-​qaws hu jaqsam fi tnejn u tassew ikisser il-​lanza f’biċċiet; il-​vaguni [tal-gwerra] jaħraqhom fin-​nar.” Imbagħad in-​nies “attwalment se jpoġġu bil-​qiegħda, kull wieħed taħt id-​dielja tiegħu u taħt is-​siġra tat-​tin tiegħu, u ma se jkun hemm ħadd li jġigħelhom jitriegħdu.”—Mikea 4:4.

Mardiet qattelin ma jikkaġunawx iktar biżaʼ u jaħsdu ħajjiet. Il-​wegħda divina hi: “Ebda resident ma se jgħid: ‘Jien marid.’” (Isaija 33:24) X’raġuni għal ferħ!

Biżgħat assoċjati mal-​kriminalità u l-​vjolenza se jkunu wkoll affarijiet tal-​passat. Salm 37:10, 11 iwiegħed: “Ftit ieħor biss, u l-​wieħed mill-​agħar mhux se jkun iżjed; u int ċertament li se tagħti kas taʼ postu, u hu mhux se jkun. Imma l-​ġwejdin infushom se jkollhom pussess taʼ l-​art, u tabilħaqq se jsibu l-​għaxqa bnina tagħhom fl-​abbundanza taʼ paċi.”

Kif sejrin il-​paċi vera u s-​sigurtà jieħdu post il-​biżgħat tal-​ġurnata preżenti? Permezz taʼ gvern wieħed taʼ tjieba​—is-​Saltna t’Alla. Rigward żmienna, Danjel 2:44 jistqarr: “Fil-​jiem taʼ dawk is-​slaten dak Alla tas-​sema se jwaqqaf saltna li qatt ma se tinġieb f’rovina. U s-​saltna nfisha mhix se tiġi mgħoddija lil xi poplu ieħor. Din se tgħaffeġ u ġġib tmiem għal dawn is-​saltniet kollha, u hi nfisha se tieqaf għal żminijiet indefiniti.” Is-​Sultan maħtur taʼ Jehovah, Ġesù Kristu, ‘irid jaħkem sakemm Alla jkun qiegħed l-​għedewwa kollha taħt saqajh.’ (1 Korintin 15:25) Ir-​Renju taʼ Elf Sena taʼ Ġesù ħa jwettaq l-​iskop oriġinali t’Alla li jkollu art magħmula ġenna abitata għal dejjem minn bnedmin ferħanin.—Luqa 23:43; Rivelazzjoni 20:6; 21:1-5.

F’dik l-​art magħmula Ġenna, se jkun hemm biżaʼ wieħed li jsaħħaħ. Ikun “il-​biżaʼ taʼ Jehovah.” (Proverbji 1:7) Fil-​fatt, għandu jkollna dan il-​biżaʼ saħansitra issa, għax hu reverenza profonda u rispett flimkien maʼ tkexkix li ma nogħġbux lil Alla għax napprezzaw il-​qalb tajba bl-​imħabba u t-​tjubija tiegħu. Dan il-​biżaʼ jirrikjedi fiduċja assoluta f’Jehovah u ubbidjenza leali.—Salm 2:11; 115:11.

Ġrajjiet tal-​biżaʼ jimmarkaw dawn bħala l-​aħħar jiem. Jekk nagħtu prova taʼ l-​imħabba tagħna għal Alla, madankollu, nistgħu nifirħu minflok ma nkunu beżgħanin. Profeziji bibliċi juru li l-​konklużjoni divina taʼ din id-​dinja hi fil-​qrib. Postha se jittieħed mid-​dinja ġdida taʼ tjieba mwiegħda minn Alla Jehovah. (2 Pietru 3:13) Tabilħaqq, taħt il-​ħakma tas-​Saltna dalwaqt se jkun hemm dinja mingħajr biżaʼ li ma jagħmilx ġid. (w94 7/15)

[Stampa f’paġna 6]

Taħt il-​ħakma tas-​Saltna minn Ġesù Kristu, qatt iktar il-​biżaʼ ma se jaħkem lid-​dinja