Il-​Premju taʼ Ġob—Sors taʼ Tama

“Jehovah . . . bierek it-​tmiem taʼ Ġob wara dan iktar mill-​bidu tiegħu.” —ĠOB 42:12.

1. Jehovah x’jagħmel għan-​nies tiegħu, saħansitra meta provi jdgħajfuhom ħafna?

JEHOVAH ‘isir dak li jippremja lil dawk li qegħdin ifittxuh bis-​serjetà.’ (Ebrej 11:6) Hu jqanqal ukoll lin-​nies devoti tiegħu biex jagħtu xiehda bil-​kuraġġ, saħansitra jekk xi provi għamluhom dgħajfin daqs uħud mejtin. (Ġob 26:5; Rivelazzjoni 11:3, 7, 11) Dak ta prova li kien veru fil-​każ tas-​sofferenti Ġob. Għalkemm infamat minn tliet farraġa foloz, ma ġiex imsikket mill-​biżaʼ tal-​bnedmin. Minflok, ta xiehda qalbiena.

2. Għalkemm sofrew persekuzzjoni u tbatija, ix-​Xhieda taʼ Jehovah kif ħarġu mill-​provi tagħhom?

² Ħafna Xhieda taʼ Jehovah taż-​żmien preżenti sofrew tant persekuzzjoni kbira u tbatija li kważi raw il-​mewt. (2 Korintin 11:23) Bħal Ġob, madankollu, urew imħabba għal Alla u pprattikaw it-​tjieba. (Eżekjel 14:14, 20) Ħarġu wkoll mill-​provi tagħhom determinati li jogħġbu lil Jehovah, imsaħħin biex jagħtu xiehda qalbiena, u mimlijin b’tama ġenwina.

Ġob Jagħti Xiehda Qalbiena

3. Ġob liema xorta taʼ xiehda ta fl-​aħħar diskors tiegħu?

³ Fid-​diskors finali tiegħu, Ġob ta saħansitra xiehda akbar milli kien ta qabel. Sikket għalkollox lill-​farraġa foloz tiegħu. B’sarkażmu qawwi, qal: ‘O kemm kontu taʼ għajnuna għal wieħed mingħajr qawwa!’ (Ġob 26:2) Ġob għolla lil Jehovah, li l-​qawwa tiegħu ddendel il-​globu taʼ l-​art tagħna fuq xejn fl-​ispazju u żżomm sħab mimli ilma ’l fuq mill-​art. (Ġob 26:7-9) Madankollu, Ġob qal li għeġubijiet bħal dawn ‘huma biss it-​trufijiet tal-​mogħdijiet taʼ Jehovah.’—Ġob 26:14.

4. Ġob x’qal dwar l-​integrità, u għala setaʼ jesprimi lilu nnifsu b’dak il-​mod?

⁴ Ċert dwar l-​innoċenza tiegħu, Ġob iddikjara: “Sakemm nintemm miniex se nneħħi l-​integrità tiegħi minni nnifsi!” (Ġob 27:5) Kuntrarju għall-​akkużi foloz li sarulu, ma kien għamel xejn biex jimmerita dak li ġie fuqu. Ġob kien jaf li Jehovah ma jismax it-​talb taʼ apostati imma se jippremja lil dawk li jżommu l-​integrità. Dan jistaʼ jfakkarna sewwa li dalwaqt il-​maltempata taʼ Armageddon se tixħet lil dawk mill-​agħar ’il barra mill-​post tagħhom taʼ poter, u m’humiex se jaħarbu l-​id li ma taħfirhiex t’Alla. Sa dak in-​nhar, in-​nies taʼ Jehovah se jimxu fl-​integrità tagħhom.—Ġob 27:11-23.

5. Ġob kif iddefinixxa l-​veru għerf?

⁵ Immaġina lit-​tlett irġiel b’għerf dinji jisimgħu hekk kif Ġob wera li l-​bniedem uża l-​kapaċitajiet tiegħu biex isib deheb, fidda, u teżori oħrajn fl-​art u fil-​baħar. “Imma,” qal hu, “barżakka mimlija għerf tiswa iktar minn waħda mimlija perli.” (Ġob 28:18) Il-​farraġa foloz taʼ Ġob ma setgħux jixtru l-​veru għerf. Is-​sors tiegħu hu l-​Ħallieq tar-​riħ, ix-​xita, is-​sajjetti, u r-​ragħad. Tabilħaqq, ‘il-​biżaʼ reverenzjali taʼ Jehovah​—dak huwa għerf, u li ddur lil hinn mill-​ħażen huwa fehma.’—Ġob 28:28.

6. Ġob għala tkellem dwar il-​ħajja bikrija tiegħu?

⁶ Minkejja s-​sofferenzi tiegħu, Ġob ma waqafx jaqdi lil Jehovah. Minflok ma dar lil hinn mill-​Iktar Għoli, dan ir-​raġel taʼ integrità xxennaq għall-​“intimità m’Alla” li kellu qabel. (Ġob 29:4) Ġob ma kienx qed jiftaħar meta rrakkonta kif ‘ħeles lill-​milqut, libbes lilu nnifsu bit-​tjieba, u kien missier veru għall-​foqra.’ (Ġob 29:12-16) Minflok, kien qed jikkwota l-​fatti taʼ ħajtu bħala qaddej leali taʼ Jehovah. Bnejt int rekord mill-​aħjar bħal dan? M’għandniex xi ngħidu, Ġob kien ukoll qed jikxef il-​falzità taʼ l-​akkużi magħmulin mit-​tlett imposturi kollhom qdusija.

7. Ġob x’tip taʼ persuna kien qabel?

⁷ Ġob ġie rredikolat minn irġiel iżjed żgħażagħ ‘li lil missirijiethom ma kienx saħansitra jpoġġihom mal-​klieb tal-​merħla tiegħu.’ Kien mistmerr u beżqu fuqu. Għalkemm kien milqut bl-​ikrah, Ġob ma ntwera l-​ebda konsiderazzjoni. (Ġob 30:1, 10, 30) Għaliex kien devot għal kollox lejn Jehovah, madankollu, kellu kuxjenza nadifa u setaʼ jgħid: “Hu se jiżinni f’miżien preċiż u Alla se jsir jaf l-​integrità tiegħi.” (Ġob 31:6) Ġob ma kienx xi adulteru jew wieħed li jikkomplotta, u ma naqasx li jgħin lil dawk fil-​bżonn. Għalkemm qabel kien sinjur, qatt ma fada fil-​ġid materjali. Barra minn hekk, Ġob ma ħax sehem f’idolatrija billi ta devozzjoni lil affarijiet bla ħajja bħalma huwa l-​qamar. (Ġob 31:26-28) Billi fada f’Alla, ta eżempju mill-​aħjar bħala wieħed li jżomm l-​integrità. Minkejja s-​sofferenzi kollha tiegħu u l-​preżenza taʼ farraġa foloz, Ġob għamel difiża taʼ ħila u ta xiehda splendida. Hekk kif kliemu ġie fit-​tmiem, hu ħares lejn Alla bħala l-​Imħallef tiegħu u Dak li Jippremjah.—Ġob 31:35-40.

Jitkellem Eliħu

8. Min kien Eliħu, u kif wera kemm rispett kif ukoll kuraġġ?

⁸ Fil-​qrib kien hemm iż-​żagħżugħ Eliħu, dixxendent taʼ Buż bin Naħor u b’hekk qarib mill-​bogħod tal-​ħabib taʼ Jehovah Abraham. (Isaija 41:8) Eliħu wera rispett lejn irġiel ixjeħ billi ta widen liż-​żewġ naħat tad-​dibattitu. Madankollu, tkellem bil-​kuraġġ rigward kwistjonijiet li dwarhom huma kienu fl-​iżball. Per eżempju, ir-​rabja tiegħu xegħlet meta Ġob ‘iddikjara lil ruħu stess twajba minflok Alla.’ B’mod speċjali l-​korla taʼ Eliħu kienet immirata kontra l-​farraġa foloz. L-​istqarrijiet tagħhom kienu qishom qegħdin jeżaltaw lil Alla imma verament kienu jmaqdruh billi żammew man-​naħa taʼ Satana fil-​kontroversja. “Mimli kliem” u mqanqal minn spirtu qaddis, Eliħu kien xhud imparzjali taʼ Jehovah.—Ġob 32:2, 18, 21.

9. Eliħu kif aċċenna lejn restawrar għal Ġob?

⁹ Ġob kien sar iżjed ikkonċernat dwar l-​ivvindikar tiegħu stess milli dak t’Alla. Fil-​fatt, kien ħadha m’Alla. Hekk kif ruħ Ġob resqet qrib tal-​mewt, madankollu, kien hemm indikazzjoni taʼ restawrar. Dan kif inhu hekk? Sewwa, Eliħu kien imqanqal biex jgħid li Jehovah iffavorixxa lil Ġob b’dan il-​messaġġ: “Ħallih jaħrab milli jinżel fil-​ħofra! Sibt rahan! Ħalli l-​laħam tiegħu jsir iktar frisk milli fiż-​żgħożija; ħallih imur lura lejn il-​jiem tal-​ħeġġa taʼ żgħożitu.”—Ġob 33:24, 25.

10. Ġob sa liema punt kellu jiġi ttestjat, imma dwar liema ħaġa nistgħu nkunu ċerti meta nqisu 1 Korintin 10:13?

¹⁰ Eliħu kkorreġa lil Ġob talli qal li m’hemmx profitt f’li titgħaxxaq b’Alla billi żżomm l-​integrità. Qal Eliħu: “’Il bogħod ikun għal dak Alla veru li jaġixxi b’mod mill-​agħar, u għal Dak li Jistaʼ Kollox li jaġixxi b’mod inġust! Għax skond il-​mod kif jaġixxi l-​bniedem taʼ l-​art se jippremjah hu.” Ġob aġixxa bla ħsieb f’li enfasizza t-​tjieba tiegħu stess, imma għamel hekk mingħajr għarfien u dehen biżżejjed. Eliħu żied: “Ħalli Ġob jiġi ttestjat sal-​limitu minħabba t-​tweġibiet tiegħu fost bnedmin li jikkaġunaw uġigħ.” (Ġob 34:10, 11, 35, 36) B’mod simili, il-​fidi u l-​integrità tagħna jistgħu jiġu pprovati bis-​sħiħ biss jekk aħna niġu ‘ttestjati sal-​limitu’ b’xi mod. Minkejja dan, Missierna taʼ mħabba tas-​sema mhux se jħallina niġu ttantati iktar milli nifilħu.—1 Korintin 10:13.

11. Meta niġu ttestjati bl-​aħrax, x’għandna niftakru?

¹¹ Hekk kif Eliħu ssokta, hu mill-​ġdid wera li Ġob kien qed jenfasizza żżejjed it-​tjieba tiegħu stess. Attenzjoni għandha tkun iffokata fuq il-Ħallieq Grandjuż tagħna. (Ġob 35:2, 6, 10) Alla “mhux se jżomm lil kulmin hu mill-agħar ħaj, imma l-​ġudizzju taʼ l-​uħud milqutin se jagħti,” qal Eliħu. (Ġob 36:6) Ħadd ma jistaʼ jitlob kont minn Alla u jgħid li hu kien bla tjieba. Hu eżaltat iżjed milli nistgħu nkunu nafu aħna, u s-​snin tiegħu huma bla tmiem b’mod mhux mifhum. (Ġob 36:22-26) Meta tiġi ttestjat b’mod iebes, ftakar li Alla tagħna li jgħix għal dejjem hu twajjeb u se jippremjana għall-​attivitajiet leali tagħna li jġibulu tifħir.

12. L-​espressjonijiet li kkonkluda bihom Eliħu x’jindikaw dwar l-​esekuzzjoni taʼ ġudizzju t’Alla fuq dawk mill-​agħar?

¹² Fil-​waqt li tkellem Eliħu, kienet qiegħda tqum maltempata. Hekk kif bdiet toqrob, qalbu bdiet taqbeż u titriegħed. Hu tkellem dwar affarijiet kbar magħmulin minn Jehovah u qal: “Tassew agħti widen għal dan, O Ġob; ieqaf dritt u uri ruħek attent għax-​xogħlijiet taʼ l-​għaġeb t’Alla.” Bħal Ġob, aħna għandna bżonn nikkunsidraw ix-​xogħlijiet taʼ l-​għaġeb u d-​dinjità li tispira biżaʼ t’Alla. “Inkwantu għal Dak li Jistaʼ Kollox, ma qbadniehx f’xi ħaġa,” qal Eliħu. “Hu eżaltat fil-​qawwa, u l-​ġustizzja u l-​abbundanza tat-​tjieba hu mhux se jċekkinhom. Għalhekk ħalli l-​bnedmin jibżgħu minnu.” (Ġob 37:1, 14, 23, 24) L-​espressjonijiet li Eliħu kkonkluda bihom jfakkruna li meta Alla dalwaqt jesegwixxi ġudizzju fuq dawk mill-​agħar, mhux se jċekken il-​ġustizzja u t-​tjieba u hu se jżomm ħajjin lil dawk li jibżgħu minnu bħala l-​adoraturi reverenzjali tiegħu. Xi privileġġ li tkun fost uħud li jżommu l-​integrità bħal dawn li jirrikonoxxu lil Jehovah bħala s-​Sovran Universali! Issaporti bħalma għamel Ġob, u qatt tħalli lix-​Xitan jiġbdek ’il bogħod mill-​post imbierek tiegħek fost dawn il-​qtajja ferħanin.

Jehovah Iwieġeb Lil Ġob

13, 14. (a) Jehovah dwar liema ħaġa beda jistaqsi lil Ġob? (b) Liema punti nistgħu nitgħallmu minn mistoqsijiet oħrajn li Alla staqsa lil Ġob?

¹³ Kemm żgur li stagħġeb Ġob meta Jehovah kellmu minn ġol-​maltempata tar-​riħ! Dik il-​maltempata kienet att t’Alla, mhux bħar-​riħ il-​kbir li Satana uża biex iwaqqaʼ d-​dar u joqtol lit-​tfal taʼ Ġob. Ġob kien bla kliem hekk kif Alla staqsa: “Fejn inzertajt li tkun int meta jien sejjist l-​art? . . . Min qiegħed il-​ġebla taʼ l-​għareb tagħha, meta l-​kwiekeb taʼ fil-​għodu mimlijin ferħ għajtu flimkien, u wlied Alla kollha bdew jgħajtu b’applaws?” (Ġob 38:4, 6, 7) Jehovah ippreżenta lil Ġob mistoqsija wara l-​oħra dwar il-​baħar, l-​għata tas-​sħab tiegħu, iż-​żerniq, ix-​xtiebi tal-​mewt, dawl u dlam, u l-​kostellazzjonijiet. Ġob ma setaʼ jgħid xejn meta ġie mistoqsi: “Sirt int taf l-​istatuti tas-​smewwiet?”—Ġob 38:33.

¹⁴ Mistoqsijiet oħrajn indikaw li qabel ma ġie maħluq il-​bniedem u ngħata dominanza fuq il-​ħut, tjur, bhejjem, u affarijiet li jitkaxkru, Alla kien qed jipprovdi għalihom​—mingħajr kwalunkwe għajnuna jew parir uman. Mistoqsijiet oħrajn taʼ Jehovah isemmu ħlejjaq bħalma huma l-​barri selvaġġ, in-​nagħma, u ż-​żiemel. Ġob ġie mistoqsi: “Huwa għall-​ordni tiegħek li ajkla ttir ’il fuq u tibni l-​bejta tagħha fl-​għoli?” (Ġob 39:27) Dażżgur li le! Immaġina r-​reazzjoni taʼ Ġob meta Alla staqsieh: “Għandu jkun hemm kwalunkwe tħaqqiq taʼ wieħed li jsib il-​ħtija maʼ Dak li Jistaʼ Kollox?” Mhux taʼ b’xejn li Ġob qal: “Ħares! Jien sirt niswa ftit. X’se nwieġeb lilek? Idi poġġejtha fuq fommi.” (Ġob 40:2, 4) Ladarba Jehovah hu dejjem fis-​sewwa, jekk qatt niġu ttantati li nilmentaw kontra tiegħu, għandna ‘npoġġu idna fuq fommna.’ Il-​mistoqsijiet t’Alla wkoll eżaltaw is-​superjorità, id-​dinjità, u s-​saħħa tiegħu, kif murijin fil-​ħolqien.

Beħemot u Levjatan

15. Beħemot huwa ġeneralment meqjus bħala li huwa liema annimal, u x’inhuma xi ftit mill-​karatteristiċi tiegħu?

¹⁵ Jehovah imbagħad isemmi lil Beħemot, ġeneralment meqjus li hu l-​ippopotamu. (Ġob 40:15-24) Magħruf għad-​daqs enormi, piż kbir, u ġilda xierfa tiegħu, dan l-​annimal erbivoru ‘jiekol ħaxix aħdar.’ Sorsi tal-​qawwa u enerġija tiegħu qegħdin f’ġenbejh u l-​għeruq taʼ żaqqu. L-​għadam taʼ saqajh b’saħħithom daqs “tubi tar-​ram.” Beħemot ma jaqbdux paniku f’ilmijiet torrenzjali imma faċilment jgħum kontra l-​kurrent.

16. (a) Id-​deskrizzjoni taʼ Levjatan taqbel maʼ liema ħlejqa, u liema huma xi fatti dwaru? (b) Il-​qawwa taʼ Beħemot u Levjatan tistaʼ tissuġġerixxi liema ħaġa dwar it-​twettieq taʼ inkarigi fis-​servizz taʼ Jehovah?

¹⁶ Alla staqsa wkoll lil Ġob: “Tistaʼ int tiġbed ’il barra lil Levjatan b’sunnara, jew b’ħabel tistaʼ int iżżomm ’l isfel lil ilsienu?” Id-​deskrizzjoni tal-​Levjatan tindika li huwa l-​kukkudrill. (Ġob 41:1-34) Dan ma jikkonkludi patt taʼ paċi maʼ ħadd, u ebda raġel għaqli m’hu tant sfiq li se jqajjem lil dan ir-​rettil. Il-​vleġeġ ma jkeċċuhx lil hinn, u “dan jidħak għaċ-​ċekċik taʼ ġavellott.” F’dagħdigħa l-​Levjatan jġiegħel il-profonditajiet jbaqbqu bħal borma fejn jissajjar l-​ingwent. Il-​fatt li Levjatan u Beħemot kienu bil-​wisq setgħanin iżjed minn Ġob għen biex jumiljah. Aħna wkoll irridu nirrikonoxxu b’umiltà li m’aħniex setgħanin fina nfusna. Neħtieġu għerf u saħħa mingħand Alla biex niżżgiċċaw in-​nejbiet taʼ Satana, is-​Serpent, u biex inwettqu l-​inkarigi tagħna fis-​servizz taʼ Jehovah.—Filippin 4:13; Rivelazzjoni 12:9.

17. (a) Ġob kif ‘lemaħ lil Alla’? (b) X’ġie pprovat mill-​mistoqsijiet li Ġob ma kienx kapaċi jwieġeb, u dan kif jistaʼ jgħinna?

¹⁷ Umiljat kompletament, Ġob irrikonoxxa l-​ħarsa żbaljata tiegħu u ammetta li kien tkellem mingħajr għarfien. Madankollu, hu kien esprima fidi li kien se ‘jilmaħ lil Alla.’ (Ġob 19:25-27) Dak kif setaʼ jiġri, ladarba ebda bniedem ma jistaʼ jara lil Jehovah u jibqaʼ jgħix? (Eżodu 33:20) Attwalment, Ġob ra l-​manifestazzjoni taʼ qawwa divina, samaʼ l-​kelma t’Alla, u kellu l-​għajnejn tal-​fehma tiegħu miftuħin biex jara l-​verità dwar Jehovah. Ġob għalhekk ‘irtira kliemu u nidem fit-​trab u l-​irmied.’ (Ġob 42:1-6) Il-​ħafna mistoqsijiet li ma kienx kapaċi jwieġeb kienu taw prova tas-​supremazija t’Alla u kienu wrew iċ-​ċokon tal-​bniedem, saħansitra wieħed devot lejn Jehovah bħalma kien Ġob. Dan jgħinna naraw li l-​interessi tagħna m’għandhomx jitpoġġew ’il fuq mit-​tqaddis taʼ isem Jehovah u l-​ivvindikar tas-​sovranità tiegħu. (Mattew 6:9, 10) It-​tħassib ewlieni tagħna għandu jkun li nżommu l-​integrità lejn Jehovah u li nonoraw lil ismu.

18. Il-​farraġa foloz taʼ Ġob x’kienu jeħtieġu li jagħmlu?

¹⁸ Xi ngħidu, iżda, dwar il-​farraġa foloz li riduha taʼ twajbin? Jehovah setaʼ bid-​dritt qatel lil Elifaż, Bildad, u Żofar talli ma tkellmux il-​verità dwaru, kif kien għamel Ġob. “Ħudu għalikom infuskom sebaʼ barrin u sebaʼ kbiex u morru għand il-​qaddej tiegħi Ġob,” qal Alla, “u tridu toffru sagrifiċċju maħruq għan-​nom tagħkom stess; u Ġob il-​qaddej tiegħi nnifsu se jitlob għalikom.” It-​tlett irġiel kellhom jumiljaw ruħhom biex jobdu. Ġob li kien żamm l-​integrità kellu jitlob għalihom, u Jehovah sab it-​talba tiegħu aċċettabbli. (Ġob 42:7-9) Imma xi ngħidu dwar mart Ġob, li kienet ħeġġitu biex jisħet lil Alla u jmut? Jidher li hi reġgħet irranġat miegħu bil-​ħniena t’Alla.

Premjijiet Imwegħdin Jagħtuna Tama

19. F’konnessjoni maʼ Ġob, Jehovah kif wera is-​superjorità Tiegħu fuq ix-​Xitan?

¹⁹ Hekk kif Ġob ma baqax jinkwieta dwar is-​sofferenzi tiegħu u ngħata l-​ħajja mill-​ġdid fis-servizz t’Alla, Jehovah biddel l-​affarijiet għalih. Wara li Ġob talab għat-​tlett irġiel, Alla ‘dawwar lura l-​kundizzjoni taʼ jasar tiegħu’ u tah ‘dak kollu li kien tiegħu f’ammont doppju.’ Jehovah wera s-​superjorità Tiegħu fuq ix-​Xitan billi waqqaf l-​id infettata bil-​mard taʼ Satana u b’mod mirakoluż fejjaq lil Ġob. Alla tefaʼ lura wkoll lill-​qtajja demoniċi u żammhom ’il bogħod billi mill-​ġdid qiegħed protezzjoni madwar Ġob permezz taʼ l-​akkampament anġeliku Tiegħu.—Ġob 42:10; Salm 34:7.

20. Jehovah b’liema modi ppremja u bierek lil Ġob?

²⁰ Ħut Ġob irġiel u nisa, u dawk li kienu jafuh qabel baqgħu ġejjin biex jieklu miegħu, jissimpatizzaw miegħu, u jfarrġuh minħabba l-​gwaj li Jehovah kien ippermetta li jiġi fuqu. Kull wieħed minnhom ta flus u ċurkett tad-​deheb lil Ġob. Jehovah bierek it-​tmiem taʼ Ġob iżjed mill-​bidu tiegħu, u għalhekk spiċċa biex ikollu 14,000 nagħġa, 6,000 ġemel, 1,000 par barrin, u 1,000 ħmara. Ġob ġie li jkollu wkoll sebaʼ subjien u tlett ibniet, l-​istess għadd li kellu qabel. Il-​bniet tiegħu​—Ġemima, Keżija, u Keren-ħappuċ—​kienu l-​iktar nisa sbieħ taʼ dik l-​art, u Ġob tahom wirt fost ħuthom subjien. (Ġob 42:11-15) Barra minn hekk, Ġob għex 140 sena oħra u ra erbaʼ ġenerazzjonijiet tan-​nisel tiegħu. Ir-​rakkont jikkonkludi: “Bil-​mod il-​mod Ġob miet, xiħ u sodisfatt bil-​jiem.” (Ġob 42:16, 17) L-​estensjoni taʼ ħajtu kienet ix-​xogħol mirakoluż t’Alla Jehovah.

21. Kif aħna mgħejjunin mir-​rakkont Skritturali rigward Ġob, u x’għandna nkunu ddeterminati li nagħmlu?

²¹ Ir-​rakkont Skritturali rigward Ġob jagħmilna iżjed konxji tal-​konfoffi taʼ Satana u jgħinna naraw kif sovranità universali hija relatata maʼ l-​integrità umana. Bħal Ġob, dawk kollha li jħobbu lil Alla se jiġu ttestjati. Imma aħna nistgħu nissaportu bħalma għamel Ġob. Hu ħareġ mill-​provi tiegħu b’fidi u tama, u l-​premjijiet tiegħu kienu ħafna. Bħala qaddejja taʼ Jehovah illum, aħna għandna fidi u tama veri. U x’tama grandjuża poġġa quddiem kull wieħed u waħda minna l-​Premjatur il-​Kbir! Li jżommu f’moħħhom il-​premju tas-​sema se jgħin lil uħud midlukin biex jaqdu lil Alla lealment għall-​bqija taʼ ħajjithom fuq l-​art. Ħafna bi prospetti għall-​art m’huma se jmutu qatt, imma dawk li jmutu se jiġu ppremjati bi rxoxt fil-​Ġenna fuq l-​art, flimkien maʼ Ġob innifsu. B’tama ġenwina bħal din fil-​qalb u fil-​moħħ, ħalli dawk kollha li jħobbu lil Alla joħorġu lil Satana taʼ giddieb billi jieqfu sodi man-​naħa taʼ Jehovah bħala wħud li jżommu l-​integrità u wħud li jappoġġjaw b’qawwa s-​sovranità universali tiegħu. (w94 11/15)

Kif Twieġeb Int?

◻ Liema kienu xi punti li Ġob għamel fit-​tweġiba finali tiegħu lill-​farraġa foloz tiegħu?

◻ Eliħu kif ta prova li kien xhud imparzjali taʼ Jehovah?

◻ Liema kienu xi ftit mill-​mistoqsijiet t’Alla lil Ġob, u x’effett kellhom?

◻ Kif ibbenefikajt int mir-​rakkont Skritturali rigward Ġob?