Il-​Wegħda taʼ Dinja Mingħajr Korruzzjoni

IL-​KORRUZZJONI ppenetrat kull livell tas-​soċjetà. Kemm jekk hija fl-​iggvernar, fix-​xjenza, fl-​isport, fir-​reliġjon, jew fin-​negozju, il-​korruzzjoni tidher li ma tistax tiġi kkontrollata.

F’pajjiż wara l-​ieħor, aħbarijiet dipressanti dwar skandli taʼ korruzzjoni jidhru fil-​mezzi tax-​xandir. Ħafna li għamlu wegħda li jaqdu l-​interessi tal-​poplu qegħdin jiġu mikxufin bħala li qegħdin jaqdu l-​interessi tagħhom stess billi jirċievu tixħim u rigali. L-​hekk imsejħa kriminalità tal-​puliti hija rampanti. Iktar u iktar nies taʼ stat soċjali jew ekonomiku għoli huma ħatjin taʼ vjolazzjonijiet etiċi u kriminali f’konnessjoni mal-​karigi regulari tagħhom.

Qiegħed jiżdied it-​tħassib dwar dik li ġurnal Ewropew jiddeskrivi bħala “‘korruzzjoni grandjuża’​—il-​prattika li permezz tagħha uffiċjali għoljin, ministri u, taʼ sikwit, kapijiet taʼ stat jesiġu ħlasijiet qabel japprovaw xirjiet u żviluppi kbar.” F’pajjiż wieħed “sentejn taʼ investigazzjonijiet mill-​pulizija u kważi arresti taʼ kuljum xorta għadhom ma skuraġġewx lill-​korrotti inkorreġġibbli,” tistqarr ir-​rivista Ingliża The Economist.

Minħabba korruzzjoni mifruxa maʼ kullimkien bħal din, ħafna llum iħossu li m’hemm ħadd li jistgħu jafdaw fih. Huma jidwu s-​sentimenti tal-​kittieb tal-​Bibbja David meta qal: “Huma lkoll daru lejn il-​ġenb, huma lkoll l-​istess korrotti; m’hemm ħadd li qiegħed jagħmel it-​tajjeb, lanqas saħansitra wieħed.”—Salm 14:3.

Int kif tkampa mar-​realtà tal-​korruzzjoni mifruxa maʼ kullimkien? Ħafna nies illum sempliċement jinjorawha. Imma saħansitra jekk tinjora l-​korruzzjoni, din xorta se tweġġgħek. Kif?

Il-​Korruzzjoni Teffettwak

Kemm il-​korruzzjoni fuq livell għoli kif ukoll dik fuq skala żgħira jżidu l-​għoli tal-​ħajja, ibaxxu l-​kwalità tal-​prodotti, u jirriżultaw f’inqas impjiegi u pagi iktar baxxi. Per eżempju, huwa stmat li kriminalità bħal misapproprijazzjoni u frodi jiswew mill-​inqas għaxar darbiet iktar milli jiswew id-​diversi tipi taʼ serq kollha f’daqqa. The New Encyclopædia Britannica (1992) tistqarr li “l-​ispiża taʼ kriminalità minn kumpaniji kbar fl-​Istati Uniti ġiet stmata għal $200,000,000,000 kull sena​—tliet darbiet daqs kemm tiswa l-​kriminalità organizzata.” Dan is-​sors jispjega li waqt li l-​effetti jistgħu ma jidhrux mill-​ewwel, “kriminalità bħal din għandha impatt qawwi fuq il-​ħarsien tas-​saħħa tal-​ħaddiema, tal-​konsumaturi, u taʼ l-​ambjent.”

Il-frott morr tal-​korruzzjoni jfakkarna fi kliem is-​Sultan Salamun: “Jien innifsi rritornajt biex inkun nistaʼ nara l-​atti kollha t’oppressjoni li qegħdin isiru taħt ix-​xemx, u, ħares! id-​dmugħ taʼ dawk li qegħdin jiġu oppressati, imma ma kellhom ebda farrâġ; u fuq in-​naħa taʼ l-​oppressuri tagħhom kien hemm il-​poter, tant li ma kellhom ebda farrâġ.”—Ekkleżjasti 4:1.

Għandna aħna, allura, nirrassenjaw ruħna għall-​korruzzjoni? Hija din inevitabbli? Hija dinja mingħajr korruzzjoni ħolma impossibbli? B’hena, le! Il-​Bibbja tgħallimna li l-​inġustizzja u l-​illegalità dalwaqt se jiġu eliminati.

Dak Li Tgħidilna L-​Bibbja

Il-​Bibbja tgħidilna li l-​korruzzjoni bdiet meta anġlu potenti rribella kontra Alla u ħajjar lill-​ewwel koppja umana biex jingħaqdu miegħu. (Ġenesi 3:1-6) L-​ebda ħaġa tajba ma ħarġet mill-​korsa midinba tagħhom. Minflok, minn dak in-​nhar li Adam u Eva dinbu kontra Alla Jehovah, huma bdew isofru l-​konsegwenzi ħżiena tal-​korruzzjoni. L-​iġsma tagħhom bdew il-​proċess bil-​mod il-​mod tad-​deterjorazzjoni, li jwassal għal mewt inevitabbli. (Ġenesi 3:16-19) Minn dak in-​nhar, l-​istorja hija miżgħuda b’eżempji taʼ tixħim, qerq, u frodi. Madankollu, ħafna li jiksru l-​liġi donnhom jgħadduha lixxa.

Kuntrarju għal dak li jiġrilhom il-​kriminali ordinarji, uħud f’karigi għoljin u politiċi rari jmorru l-​ħabs jew jirrifondu l-​qliegħ miksub b’qerq. Minħabba n-​natura klandestina tat-​tixħim, l-​għotjiet, u r-​rigali, huwa taʼ spiss diffiċli biex tesponi korruzzjoni taʼ livell għoli. Imma dan ma jfissirx li dinja mingħajr korruzzjoni hija ħolma impossibbli.

Salvâr mill-​korruzzjoni se jiġi mill-​Ħallieq tal-​bniedem, Alla Jehovah. Intervent divin huwa l-​unika soluzzjoni. Għala? Għaliex l-​għadu li ma jidhirx tal-​bnedmin, Satana x-​Xitan, ikompli jiżvija lill-​bnedmin. Bħalma naqraw fl-1 Ġwann 5:19, “[i]d-dinja kollha kemm hi qiegħda taħt il-​poter tal-​wieħed mill-​agħar.” X’hemm iktar li jistaʼ jispjega ż-​żjieda fil-​korruzzjoni​—ħafna minnha mwettqa mingħajr ma tiġi kkastigata?

L-ebda ammont taʼ sforz uman ma jistaʼ jegħleb lil Satana u lid-​demonji tiegħu. Intervent divin biss jistaʼ jiggarantixxi lill-​bnedmin ubbidjenti “l-​libertà glorjuża tat-​tfal t’Alla.” (Rumani 8:21) Jehovah iwiegħed li dalwaqt Satana se jkun ristrett sabiex ma jkunx jistaʼ jqarraq bil-​bnedmin iktar. (Rivelazzjoni 20:3) Sadanittant, jekk nixtiequ ngħixu fid-​dinja ġdida t’Alla ħielsa mill-​korruzzjoni, irridu nwarrbu l-​modi korrotti taʼ din id-​dinja.

In-​Nies Jistgħu Jitbiddlu

Fi żmien Ġesù Kristu, kien hemm dawk li abbużaw mill-​poter tagħhom u oppressaw lil bnedmin sħabhom. Per eżempju, il-​kolletturi tat-​taxxa kienu magħrufin sew għall-​prattiċi korrotti tagħhom. Dan kien minkejja l-​liġi ċara u tonda t’Alla: “Ma tridx taċċetta tixħima, għax it-​tixħima tagħmi lil bnedmin taʼ vista ċara u tistaʼ tgħawweġ il-​kliem taʼ bnedmin twajbin.” (Eżodu 23:8) Żakkew, kap tal-​kolletturi tat-​taxxa, ammetta li kien għamel qliegħ b’qerq permezz taʼ akkużi foloz. Imma minflok ma ppromwova riforma soċjali fuq skala estensiva, Ġesù ħeġġeġ mill-​qalb lil individwi biex jindmu u jabbandunaw il-​modi korrotti tagħhom. Bħala riżultat, kolletturi tat-​taxxa korrotti magħrufin bħalma kienu Mattew u Żakkew abbandunaw l-​istil taʼ ħajja li kellhom qabel.—Mattew 4:17; 9:9-13; Luqa 19:1-10.

Dawk involuti fi prattiċi diżonesti llum daqstant ieħor jistgħu jwarrbu l-​korruzzjoni billi jilbsu “l-​personalità ġdida li kienet maħluqa skond ir-​rieda t’Alla fit-​tjieba vera u l-​lealtà.” (Efesin 4:24) Jistaʼ ma jkunx faċli li tħallas it-​taxxi b’mod onest jew li ma tkomplix tieħu sehem fi skemi dubjużi. Xorta waħda, il-​benefiċċji jimmeritaw kull sforz.

Mhux iktar maħkumin minn din id-​dinja korrotta, dawk li huma kkonċernati dwar il-​benesseri taʼ ħaddieħor igawdu paċi ġewwinija. M’hemmx biżaʼ li jiġu maqbudin fil-​ħażen. Minflok, igawdu kuxjenza tajba. Huma jimitaw l-​eżempju Bibliku taʼ Danjel il-​profeta. Ir-​rakkont tal-​Bibbja jgħid li uffiċjali għoljin kienu l-​ħin kollu jfittxu li jsibu xi skuża kontra Danjel. “Imma ma kien hemm ebda skuża jew ħaġa korrotta affattu li setgħu jsibu, ġaladarba kien taʼ min jafdah u ebda traskuraġni jew ħaġa korrotta affattu ma nstabet fih.”—Danjel 6:4.

Il-​Wegħda Taʼ Jehovah

Jehovah iwiegħed li “għalkemm midneb jistaʼ jkun qiegħed jagħmel il-​ħażen għal mitt darba u jkompli għal żmien twil kif jogħġob lilu, madankollu jien konxju wkoll li se jispiċċaw tajjeb dawk li qegħdin jibżgħu minn dak Alla veru, għaliex kienu fil-​biżaʼ tiegħu. Imma ma se jispiċċa tajjeb xejn dak li hu mill-​agħar, lanqas ma se jtawwal jiemu li huma bħal dell, għaliex mhux fil-​biżaʼ t’Alla.”—Ekkleżjasti 8:12, 13.

X’serħan meta l-​korruzzjoni ma tikkawżax iktar dwejjaq! X’barka li tgħix għal dejjem f’dinja mingħajr korruzzjoni! Dan m’huwiex impossibbli. Il-​Bibbja titkellem dwar it-​“tama tal-​ħajja taʼ dejjem li Alla, li ma jistax jigdeb, wiegħed minn qabel żminijiet dejjiema.” (Titus 1:2) Jekk int tobgħod il-​korruzzjoni u tħobb it-​tjieba, għandek il-​possibiltà li tara t-​twettieq tal-​wegħda t’Alla taʼ dinja mingħajr korruzzjoni. (w95 6/1)

[Stampa f’paġna 4]

Il-​korruzzjoni hija mifruxa ġmielha f’ambjenti governattivi u kummerċjali

[Stampa f’paġna 5]

Il-​korruzzjoni spiss teffettwa l-​ittrattar m’uffiċjali pubbliċi