Il-​Festi tal-​Ħsad Jogħġbuh Lil Alla?

FROTT li jgħaxxqek, ħaxix li jpaxxik, u ħemel taʼ qamħ frisk f’munzelli kbar joffru stampa li tpaxxi l-​għajnejn. Fi żmien il-​ħsad wirjiet bħal dawn isebbħu l-​artali u l-​pulpti tal-​knejjes madwar l-​Ingilterra kollha. Fl-​Ewropa, bħal fi kwalunkwe post ieħor, ċelebrazzjonijiet numerużi jimmarkaw kemm il-​bidu u kemm it-​tmiem taʼ l-​istaġun tal-​ħsad.

Dawk li l-​għajxien tagħhom jiddependi fuq il-​ħamrija huma grati b’mod speċjali għal dak li tipproduċi l-​art. Tabilħaqq, Alla esiġa min-​nazzjon taʼ Iżrael tal-​qedem biex jiċċelebra tliet festi annwali li kienu assoċjati mill-​qrib mal-​ħsad. Fil-​bidu tar-​Rebbiegħa, matul il-​Festa taʼ l-​Ażżmi, l-​Iżraeliti kienu jippreżentaw lil Alla qatta mill-​ewwel frott tal-​ħsad tax-​xgħir. Fil-​Festa tal-​Ġimgħat (jew, Pentekoste) lejn tmiem ir-​Rebbiegħa, kienu joffru ħbejżiet magħmulin mill-​ewwel frott tal-​ħsad tal-​qamħ. Fil-​Ħarifa kienet issir il-​Festa taʼ l-​Għerejjex, li kienet timmarka t-​tmiem tas-​sena agrikola taʼ Iżrael. (Eżodu 23:14-17) Dawn il-​festi kienu “festi tal-​Mulej” u żminijiet taʼ ferħ.—Levitiku 23:2; Dewteronomju 16:16.

Xi ngħidu, mela, għaċ-​ċelebrazzjonijiet moderni tal-​ħsad? Jogħġbuh dawn lil Alla?

Konnessjonijiet Pagani

Inkwetat min-​natura sekulari tal-​bankett taʼ żmien il-​ħsad tradizzjonali u s-​sokor assoċjat maċ-​ċelebrazzjoni, membru tal-​kleru Anglikan ġewwa Cornwall, l-​Ingilterra, fl-​1843 iddeċieda li jerġaʼ jqajjem tradizzjoni medjevali tal-​ħsad. Ħa xi ftit mill-​ewwel qamħ maħsud u minnu għamel ħobż għaċ-​ċelebrazzjoni tat-​tqarbin fil-​knisja tiegħu. Billi għamel hekk, hu għamel tifkira tal-​festa taʼ Lammas​—ċelebrazzjoni “Kristjana” li xi wħud jgħidu li kellha l-​oriġini tagħha mal-​qima tal-​qedem taʼ l-​alla Ċeltiku Lugh.a B’hekk, il-​festa Anglikana moderna tal-​ħsad għandha oriġini pagana.

Xi ngħidu dwar ċelebrazzjonijiet oħrajn li jsiru fit-​tmiem taʼ l-​istaġun tal-​ħsad? Skond l-​Encyclopædia Britannica, ħafna mid-​drawwiet li jimmarkaw dawn iċ-​ċelebrazzjonijiet imorru lura għall-​oriġini tagħhom tat-​“twemmin animistiku fl-​ispirtu tal-​qamħa jew il-​qamħa omm.” F’xi reġjuni l-​bdiewa kienu jemmnu li spirtu kien jgħix fl-​aħħar faxx tal-​qamħ li jiġi maħsud. Biex ikeċċu l-​ispirtu ’l barra, kienu jsabbtu l-​faxx maʼ l-​art u jsawtuh biz-​zkuk sa ma toħroġ l-​aħħar qamħa miz-​zokk. F’postijiet oħrajn kienu jinsġu xi ftit mill-​weraq tawwali taċ-​ċereali f’“pupa tal-​qamħ” li kienu jżommuha f’post taʼ sigurtà biex ikollhom “xorti tajba” sakemm jiżirgħu ż-​żrieragħ tas-​sena taʼ wara. Imbagħad kienu jaħartu l-​isbul tal-​qamħ lura fil-​ħamrija bit-​tama li dan kien se jbierek iż-​żaraʼ l-​ġdid.

Xi leġġendi jassoċjaw żmien il-​ħsad mal-​qima taʼ l-​alla Babilonjan Tammuz, sieħeb l-​alla mara tal-​fertilità Ixtar. Il-​qtugħ tas-​sbula misjurin kien parallel mal-​mewta qabel żmienha taʼ Tammuz. Leġġendi oħrajn saħansitra jagħmlu konnessjoni bejn żmien il-​ħsad u s-​sagrifiċċju uman​—prattika li Alla Jehovah jobgħod.—Levitiku 20:2; Ġeremija 7:30, 31.

X’Inhi L-​Ħarsa T’Alla?

It-​trattar t’Alla maʼ Iżrael tal-​qedem juri b’mod ċar li Jehovah, il-​Ħallieq u s-​Sors tal-​ħajja, esiġa devozzjoni esklussiva mill-​adoraturi tiegħu. (Salm 36:9; Naħum 1:2) Fi żmien il-​profeta Eżekjel, il-​prattika tal-​biki għall-​alla Tammuz kienet ‘għarukaża kbira’ f’għajnejn Jehovah. Din, flimkien maʼ riti reliġjużi foloz oħrajn, ġagħlu lil Alla jagħlaq widnejh għat-​talb taʼ dawk l-​adoraturi foloz.—Eżekjel 8:6, 13, 14, 18.

Agħmel kuntrast bejn dan u l-​istruzzjoni li Alla Jehovah ta lil Iżrael biex josservaw in konnessjoni mal-​ħsad. Fil-​Festa taʼ l-​Għerejjex, l-​Iżraeliti kellhom assemblea solenni li matulha żgħar u kbar, għonja u fqar, għexu f’tined temporanji mżejnin bil-​weraq kbar taʼ siġar sbieħ ferm. Dan kien żmien taʼ ferħ kbir għalihom, imma kien ukoll żmien biex jirriflettu fuq il-​ħelsien li Alla kien ta lil missirijiethom fiż-​żmien taʼ l-​Eżodu mill-​Eġittu.—Levitiku 23:40-43.

Matul il-​festi taʼ l-​Iżraeliti, offerti kienu jiġu ppreżentati lil Jehovah, l-​uniku Alla veru. (Dewteronomju 8:10-20) Rigward it-​twemmin animistiku li ssemma qabel, il-​Bibbja mkien ma titkellem dwar prodotti, bħalma huma l-​faxxi tal-​qamħ, bħala li għandhom ruħ.b U l-​Iskrittura turi b’mod ċar li l-​idoli m’għandhomx ħajja, u ma jistgħux jitkellmu, jaraw, jisimgħu, ixommu, iħossu, jew joffru xi għajnuna lill-​adoraturi tagħhom.—Salm 115:5-8; Rumani 1:23-25.

Il-Kristjani llum m’humiex taħt il-​patt tal-​Liġi li Alla kkonkluda mal-​ġens taʼ Iżrael tal-​qedem. Tabilħaqq, Alla ‘neħħieha min-​nofs u sammarha maz-​zokk tat-​tortura’ taʼ Ġesù. (Kolossin 2:13, 14) Il-​qaddejja taʼ Jehovah taʼ żmienna jgħixu bil-​“liġi taʼ Kristu” u jwieġbu b’apprezzament għal dak kollu li jipprovdi Alla.—Galatin 6:2.

L-appostlu Pawlu stqarr b’mod ċar li l-​festi tal-​Lhud kienu “dell tal-​ħwejjeġ li għandhom jiġu,” u żied, “imma r-​realtà hija Kristu.” (Kolossin 2:16, 17) B’riżultat taʼ dan, il-​Kristjani veri jaċċettaw ir-​raġunar Skritturali: “Is-​sagrifiċċju li joffru l-​pagani, lid-​demonji joffruhom u mhux lil Alla. . . . Ma tistgħux tixorbu x-​xorb tal-​Mulej u x-​xorb tad-​demonji.” (1 Korintin 10:20, 21) Iktar minn hekk, il-​Kristjani jobdu d-​direttiva biex ma ‘jmissux l-​imniġġes.’ Għandhom il-​festi tal-​ħsad fl-​inħawi tiegħek konnotazzjonijiet reliġjużi pagani jew foloz? Jekk inhu hekk, Kristjani ġenwini jistgħu jevitaw li ma jogħġbux lil Jehovah billi ma jinvolvu ruħhom bl-​ebda mod f’qima kkontaminata bħal din.​—2 Korintin 6:17.

Meta iben li japprezza jirċievi rigal mingħand missieru, lil min jirringrazzja? Lil xi wieħed stranġier jew lill-​ġenitur tiegħu? Permezz taʼ talb mill-​qalb l-​adoraturi t’Alla jirringrazzjaw kuljum lil Jehovah, Missierhom tas-​smewwiet, għall-​ġenerożità abbundanti tiegħu.—2 Korintin 6:18; 1 Tessalonikin 5:17, 18. (w97 9/15)

[Noti taʼ taħt]