Proklamaturi tas-Saltna Jirrapportaw
Alla Qed Iġagħalha Tikber fl-Alaska
TAĦT kisja taʼ borra u silġ, żerriegħa żgħira qed tistenna l-opportunità biex tiżviluppa għall-maturità. Fil-perijodu qasir tas-sajf taʼ l-Alaska, li fih biss tliet xhur, żerriegħa taʼ kaboċċa li għandha dijametru taʼ 3mm tistaʼ tikber sa kważi 40 kilo! Iva, dan il-pajjiż li darba kien meqjus minn ħafna bħala art moxa u xagħri ffriżat, jistaʼ jipproduċi frott bl-abbundanza.
Dan japplika speċjalment għall-għalqa spiritwali fl-Alaska. Hemmhekk, fl-art taʼ xtiewi twal, ix-Xhieda taʼ Jehovah jkomplu jiżirgħu ż-żerriegħa tas-Saltna. Bħal f’partijiet oħrajn tad-dinja, Alla jkabbar iż-żerriegħa fi qlub fertili.—1 Korintin 3:6, 7.
● Waqt li kienet fuq il-private taʼ l-iskola, Xhud żagħżugħa jisimha Vanessa osservat studenta taʼ mparha, jisimha Ann, li dejjem kienet toqgħod bil-qiegħda waħedha. Ann dehret imdejqa, għalhekk Vanessa stiednet lil Ann biex tpoġġi ħdejha. Mhux taʼ b’xejn li Ann kienet imdejqa! Ommha kienet mietet b’attakk tal-qalb, u ftit żmien wara, missierha miet bil-kanċer. Kien għalhekk li Ann kienet qed tgħix maʼ qrabatha fl-Alaska.
Darba s-Sibt waqt li kienet fis-servizz taʼ l-għalqa, Vanessa marret s’għand il-ħabiba ġdida tagħha u ħallitilha l-brochure Veru Li Alla Jimpurtah Minna? It-Tnejn taʼ wara fl-iskola, Ann marret tfittex lix-Xhud żagħżugħa. Ann kellha ħafna mistoqsijiet mill-Bibbja u Vanessa kienet kapaċi tweġibhomlha. “Fejn tiltaqgħu intom?” staqsietha. Dik il-lejla stess Ann attendiet l-ewwel laqgħa tagħha fis-Sala tas-Saltna.
M’għaddiex ħafna żmien għal din l-orfni taʼ 17-il sena biex issib ħafna ‘missirijiet’ u ‘ommijiet,’ sewwa sew bħalma wiegħed Ġesù. (Mattew 19:29) U x’okkażjoni taʼ ferħ kienet dik, li tara lil Ann ferħana u titbissem waqt li ssimbolizzat id-dedikazzjoni tagħha lil Jehovah bil-magħmudija fl-ilma fil-Konvenzjoni Distrettwali “Messaġġiera tal-Paċi Divina”!
● Fl-inħawi remoti tar-reġjun Artiku vast taʼ l-Alaska—fejn bejn raħal u ieħor hemm mijiet taʼ kilometri taʼ xagħri—l-ajruplan b’żewġ magni tal-Watch Tower Society ġie wżat biex tinżeraʼ ż-żerriegħa tas-Saltna f’iktar minn 150 komunità. Imma t-tkabbir spiritwali permezz taʼ studju regulari tal-Bibbja jiddependi fuq il-korrispondenza. Ladarba ħafna jsibuha diffiċli biex jiktbu l-ittri, għalliem tal-Bibbja għandu bżonn ikun kreattiv sabiex ikun jistaʼ jżomm ħaj l-interess taʼ l-istudent. Dan kif jistaʼ jiġi mwettaq?
Kathy kkonduċiet studju tal-Bibbja progressiv maʼ Edna, għalkemm kienu jgħixu iktar minn 600 kilometru ’l bogħod minn xulxin! Minflok ma sempliċement ikkopjat il-mistoqsijiet tal-ktieb li kienu qed jistudjaw, Kathy għamlet karta oħra bil-mistoqsijiet u ħalliet spazju għat-tweġibiet. Wara li Edna kitbet it-tweġibiet, Kathy wieġbet lura u daħlet kummenti fejn kien hemm bżonn biex tiċċara xi punt. Kathy tistqarr: “Warrabt fil-ġenb l-Erbgħa fil-għaxija għal dan l-‘istudju,’ u pprovajt inżommu bħal kwalunkwe appuntament ieħor taʼ studju tal-Bibbja. Kont nibgħatilha wkoll envelop bl-isem u bl-indirizz tiegħi u bil-bolla fuqu. Minħabba li kien jieħu ġimgħatejn biex nirċievu l-posta, studju permezz tal-korrispondenza deher li miexi daqsxejn bil-mod.”
Immaġina kemm kienu eċċitati Kathy u Edna meta ltaqgħu wiċċ imbwiċċ fil-konvenzjoni distrettwali f’Anchorage wara għaxar xhur taʼ studju permezz taʼ l-ittri! Ix-Xhieda wkoll kienu ferħanin li fl-attendenza kien hemm studenti tal-Bibbja u wħud interessati oħrajn minn diversi rħula iżolati fl-Alaska.
Għalkemm it-tkabbir xi drabi għandu mnejn jidher li miexi bil-mod, xi “pjanti żgħar” jinbtu malajr meta jiġu esposti għad-dawl tal-verità. Bejn wieħed u ieħor, iktar minn mitt individwu ġdid li jfaħħar lil Jehovah qed jitgħammed kull sena fl-Alaska! Aħna ngħidu, “Grazzi, Jehovah,” talli qed iġġagħalha tikber!