Proklamaturi tas-​Saltna Jirrapportaw

“Il-​Poplu Tiegħek Minn Rajh Joffri Lilu Nnifsu”

NAGĦMAN, il-​kap setgħan taʼ l-​armata Sirjana, għandu l-​ġdiem. Jekk titħalla mingħajr kura, din il-​marda taʼ min jistmerrha tistaʼ tirriżulta f’li wieħed jisfigura ruħu u jmut. X’għandu jagħmel Nagħman? Fost dawk taʼ dar Nagħman hemm tifla żgħira, “lsira minn art Iżrael.” Hi titkellem bil-​qlubija u tidentifika lil profeta Eliżew bħala l-​wieħed li jistaʼ jfejjaq lil Nagħman.—2 Slaten 5:1-3, Karm Żammit.

Minħabba l-​waqfa kuraġġuża tagħha, Nagħman ifittex lil Eliżew u jiġi mfejjaq. Barra minn hekk, Nagħman isir adoratur taʼ Jehovah! Din l-​esperjenza, iddokumentata fil-​Bibbja, ġrat fl-​għaxar seklu Q.E.K. (2 Slaten 5:4-15) Illum, ħafna żgħażagħ juru kuraġġ simili meta jitkellmu għan-​nom taʼ l-​interessi tas-​Saltna. L-​esperjenza li jmiss mill-​Możambik tikkonferma dan.

Nuno, li għandu sitt snin huwa pubblikatur mhux mgħammed taʼ l-​aħbar tajba. Saħansitra qabel ma sar pubblikatur mhux mgħammed, Nuno kien jiġbor lit-​tfal taʼ l-​inħawi tiegħu, jgħid talba, u jgħallimhom il-​Bibbja, billi juża l-​pubblikazzjoni Il-​Ktieb Tiegħi taʼ Stejjer mill-​Bibbja.

Ħafna drabi Nuno jqum kmieni s-​Sibt fil-​għodu u jfakkar lill-​familja tiegħu: “Illum noħorġu fil-​ministeru taʼ l-​għalqa.” Iż-​żelu tiegħu għall-​ministeru jidher f’modi oħrajn. Waqt li jakkumpanja lill-​ġenituri tiegħu fil-​ministeru fit-​toroq taʼ Maputo, Nuno taʼ spiss javviċina lin-​nies waħdu. F’okkażjoni minnhom, negozjant mar fuqu u staqsieh: “Għala qiegħed tbigħ dawn ir-​rivisti?” Nuno qallu: “Jien mhux qed inbigħhom ir-​rivisti, imma naċċetta kontribuzzjonijiet li jgħinu biex jiffinanzjaw ix-​xogħol taʼ l-​ippridkar.” In-​negozjant wieġbu: “Għalkemm m’iniex interessat, jien impressjonat bl-​attitudni u bl-​abbiltà tiegħek. Nixtieq nagħmel kontribuzzjoni għal dan ix-​xogħol.”

F’okkażjoni oħra, Nuno resaq lejn raġel fit-​triq u offrielu l-​ktieb True Peace and Security​—How Can You Find It? Ir-​raġel staqsieh: “Int ma tmurx f’dik l-​iskola t’hemmhekk?” “Iva,” wieġbu Nuno, “f’dik l-​iskola mmur, imma llum qed nippreżenta messaġġ importanti minn dan il-​ktieb. Dan jurik li int tistaʼ tgħix fid-​dinja l-​ġdida li se jġib Alla, bħalma turi l-​istampa f’dan il-​ktieb.” Nuno ma rrealizzax li dak ir-​raġel li kellem kien għalliem fl-​iskola tiegħu. L-​għalliem mhux biss aċċetta l-​ktieb imma issa jirċievi wkoll ir-​rivisti t-​Torri taʼ l-​Għassa u Stenbaħ! regolarment mingħand Nuno.

Meta Nuno jiġi mistoqsi għala jħobb jieħu sehem fix-​xogħol taʼ l-​ippridkar, hu jgħid: “Irrid nitkellem man-​nies u ngħallimhom dwar Jehovah u Ibnu, Ġesù Kristu.” Hu jżid: “U jekk in-​nies ma jridux jisimgħu, m’għandix għalfejn ninkwieta.”

Mad-dinja kollha, eluf taʼ żgħażagħ bħal Nuno ‘minn rajhom joffru lilhom infushom’ biex jgħallmu u jippridkaw dwar is-​Saltna t’Alla. (Salm 110:3, KŻ) Imma dan ma jiġrix b’kumbinazzjoni. Ġenituri li jgħallmu lil uliedhom dwar Jehovah minn ċkunithom, li jagħtu eżempju tajjeb fil-​ministeru, u li b’mod żeluż ifittxu l-​interessi tas-​Saltna se jiġu ppremjati bil-​kbir.