Il-​Ġudizzju Esegwit f’Wied is-​Sentenza

“Ħa . . . jmorru [l-ġnus] fil-​Wied taʼ Ġosafat! Għax hemm se noqgħod biex nagħmel ħaqq mill-​ġnus kollha.”—ĠOEL 4:12 [ĠOEL 3:12, NW].

1. Ġoel għala jara rassa bla qjies miġbura “f’wied is-​sentenza”?

“RASSA bla qjies f’wied is-​sentenza!” Dan il-​kliem eċċitanti naqrawh f’​Ġoel 4:14 [Ġoel 3:14, NW]. Għala nġabret flimkien din ir-​rassa bla qjies? Ġoel iwieġeb: “Jum il-​Mulej fil-​qrib.” Huwa l-​jum il-​kbir tal-​vindikazzjoni taʼ Jehovah​—il-​jum biex isir ħaqq mill-​kotriet li ċaħdu s-​Saltna stabbilita t’Alla f’idejn Kristu Ġesù. Sa fl-​aħħar, l-​“erbaʼ anġli” t’Apokalissi kapitlu 7 se jerħu l-​qabda soda tagħhom fuq “l-​erbat irjieħ taʼ l-​art,” li jirriżulta f’“diqa [“tribulazzjoni,” NW] kbira li mill-​bidu tad-​dinja sa issa għadu qatt ma kien hawn bħalha u anqas ikun hawn.”—Apokalissi 7:1; Mattew 24:21.

2. (a) Il-​post fejn kellha ssir l-​esekuzzjoni tal-​ħaqq taʼ Jehovah għala bix-​xieraq kien jissejjaħ il-​“Wied taʼ Ġosafat”? (b) Ġosafat kif irreaġixxa bil-​għaqal meta kien qed jiġi attakkat?

² F’​Ġoel 4:12 [Ġoel 3:12, NW], il-​post fejn kellha ssir l-​esekuzzjoni tal-​ħaqq jissejjaħ il-​“Wied taʼ Ġosafat.” B’mod xieraq, matul perijodu mqalleb fl-​istorja taʼ Ġuda, Jehovah esegwixxa ħaqq hemmhekk f’isem is-​Sultan twajjeb Ġosafat, li ismu jfisser “Jehovah Hu Mħallef.” Jekk nikkunsidraw x’ġara dakinhar inkunu nistgħu napprezzaw iktar dak li dalwaqt se jseħħ fi żmienna. Dan jinsab iddokumentat fit-​2 Kronaki kapitlu 20. Fl-​ewwel vers taʼ dak il-​kapitlu, naqraw li “ġew għal Ġosafat biex jitqabdu miegħu wlied Mowab u wlied Għammon flimkien maʼ xi wħud mill-​Megħunin.” Ġosafat kif irreaġixxa? Hu għamel dak li dejjem jagħmlu l-​qaddejja leali taʼ Jehovah f’xi kriżi. Dar lejn Jehovah għall-​gwida, waqt li talab b’mod ferventi: “Alla tagħna, ma tagħmilx int ħaqq minnhom? Għax aħna ma għandniex saħħa quddiem din il-​kotra hekk kbira li ġejja kontra tagħna, u aħna ma nafux x’għandna nagħmlu; imma għajnejna huma fik!”—2 Kronaki 20:12.

Jehovah Jwieġeb it-​Talba

3. Jehovah liema istruzzjonijiet ta lil Ġuda meta ffaċċjaw l-​attakk mill-​ġnus taʼ madwarhom?

³ Waqt li “Ġuda kollu kienu weqfin quddiem il-​Mulej bit-​trabi tagħhom, u n-​nisa tagħhom, u wliedhom,” Jehovah ta t-​tweġiba tiegħu. (2 Kronaki 20:13) Sewwa sew bħalma llum juża lill-​“irsir leali u diskret” tiegħu, hekk ukoll is-​Semmiegħ il-​kbir tat-​talb ta l-​qawwa lill-​profeta Levita Ġaħżijel biex jagħti t-​tweġiba Tiegħu lil dawk li kienu miġburin. (Mattew 24:45, NW) Naqraw: “Dan jgħid il-​Mulej: Tibżgħux! Titwerwrux quddiem din il-​kotra kollha, għaliex it-​taqbida m’hijiex tagħkom, imma taʼ Alla. . . . Intom ma tiġġildux f’din il-​battalja; oqogħdu f’postkom, tiċċaqilqux, u taraw ir-​rebħa tal-​Mulej għalikom. . . . Tibżgħux, titwerwrux; għada oħorġu għalihom, u l-​Mulej ikun magħkom.”—2 Kronaki 20:15-17.

4. Jehovah b’liema mod irrikjeda li n-​nies tiegħu jkunu attivi u mhux passivi, meta ffaċċjaw l-​isfida taʼ l-​għedewwa?

⁴ Jehovah rrikjeda iktar mis-​Sultan Ġosafat u mill-​poplu tiegħu milli sempliċement joqogħdu b’idejhom fuq żaqqhom, u jistennew xi ħelsien mirakoluż. Huma kellhom jieħdu l-​inizjattiva billi jilqgħu l-​isfida taʼ l-​għadu. Is-​sultan u ‘Ġuda kollu bit-​trabi tagħhom, u n-​nisa tagħhom, u wliedhom,’ esprimew fidi qawwija billi obdew u qamu kmieni fil-​għodu u mmarċjaw biex jiltaqgħu mal-​qtajjaʼ li kienu ġejjin għalihom. Fit-​triq, is-​sultan kompla jipprovdi inkuraġġiment u istruzzjonijiet teokratiċi, billi ħeġġiġhom: “Emmnu fil-​Mulej, Alla tagħkom, u titwettqu; emmnu fil-​profeti tiegħu u tirbħu.” (2 Kronaki 20:20) Fidi f’Jehovah! Fidi fil-​profeti tiegħu! Dak kien is-​sigriet għas-​suċċess. Bl-​istess mod illum, hekk kif nibqgħu attivi fis-​servizz taʼ Jehovah, jalla qatt ma niddubitaw li hu se jġiegħel il-​fidi tagħna toħroġ rebbieħa!

5. Ix-​Xhieda taʼ Jehovah llum kif inhuma attivi hekk kif ifaħħru lil Jehovah?

⁵ Bħall-​Ġudeani taʼ żmien Ġosafat, irridu ‘nfaħħru lill-​Mulej, għax għal dejjem it-​tjieba tiegħu.’ Kif se nagħtuh dan it-​tifħir? Bl-​ippridkar żeluż tagħna dwar is-​Saltna! Bħalma dawk il-​Ġudeani “bdew jgħannu u jfaħħru lil Alla,” l-​istess aħna nżidu l-​għemejjel mal-​fidi tagħna. (2 Kronaki 20:21, 22) Iva, ejjew nuru fidi impekkabbli bħal din hekk kif Jehovah jħejji biex jidħol fl-​azzjoni kontra l-​għedewwa tiegħu! Għalkemm it-​triq tistaʼ tidher twila, ejjew inkunu ddeterminati li nissaportu, attivi fil-​fidi, saħansitra bħalma l-​poplu rebbieħ tiegħu qed jagħmel illum fi nħawi kollhom inkwiet fid-​dinja. F’xi pajjiżi milqutin bl-​ikrah mill-​persekuzzjoni, mill-​vjolenza, mill-​ġuħ, u minn kundizzjonijiet ekonomiċi estremi, qaddejja leali t’Alla qegħdin jesperjenzaw riżultati rimarkevoli, bħalma jirrapporta n-​1998 Yearbook of Jehovah’s Witnesses.

Jehovah Jsalva lill-​Poplu Tiegħu

6. Fidi soda kif tgħinna nibqgħu leali llum?

⁶ Il-​ġnus ħżiena taʼ madwar Ġuda pprovaw jibilgħuh lill-​poplu t’Alla, imma b’fidi eżemplari l-​qaddejja taʼ Jehovah rreaġixxew billi kantawlu tifħir. Aħna nistgħu nesprimu l-​istess fidi llum. Billi nimlew ħajjitna b’xogħlijiet taʼ tifħir lil Jehovah, inkunu qegħdin insaħħu l-​armar spiritwali tagħna, u b’hekk ma nħallu l-​ebda spazju għall-​makakkeriji taʼ Satana biex jinfdu. (Efesin 6:11) Fidi qawwija se toħnoq it-​tentazzjoni li niġu aljenati minħabba d-​divertiment degradanti, il-​materjaliżmu, u l-​apatija li jikkaratterizzaw lid-​dinja moribonda taʼ madwarna. Din il-​fidi invinċibbli se żżommna naqdu lealment flimkien maʼ l-​“irsir leali u diskret” hekk kif niġu sostnuti kontinwament bid-​dieta taʼ ikel spiritwali pprovduta “fiż-​żmien xieraq.”—Mattew 24:45, NW.

7. Ix-​Xhieda taʼ Jehovah kif wieġbu għad-​diversi attakki li saru kontriehom?

⁷ Il-​fidi tagħna bbażata fuq il-​Bibbja se ssaħħaħna biex nieqfu sodi kontra kampanji taʼ mibegħda li jqajmu dawk li għandhom l-​ispirtu tal-​“qaddej ħażin” taʼ Mattew 24:48-51. Billi jwettqu din il-​profezija b’mod rimarkevoli, l-​apostati llum qegħdin jiżirgħu gideb u propaganda f’ħafna pajjiżi, saħansitra billi jikkonfoffaw maʼ xi wħud f’pożizzjoni t’awtorità fost il-​ġnus. Fejn kien xieraq, ix-​Xhieda taʼ Jehovah rreaġixxew, kif deskritt f’Filippin 1:7, billi ‘ddefendew u wettqu l-​Evanġelju.’ Per eżempju, fis-​26 taʼ Settembru, 1996, f’każ imqajjem mill-​Greċja, id-​disaʼ mħallfin tal-​Qorti Ewropea tad-​Drittijiet tal-​Bniedem, fi Strasbourg, b’mod unanimu affermaw mill-​ġdid li “x-​Xhieda taʼ Jehovah jaqgħu taħt id-​definizzjoni taʼ ‘reliġjon rikonoxxuta,’” intitolati li jgawdu l-​libertà tal-​ħsieb, tal-​kuxjenza, u tat-​twemmin, u d-​dritt li jxandru l-​fidi tagħhom. Inkwantu għall-​apostati, il-​ġudizzju t’Alla jistqarr: “Ġralhom kif jgħid sewwa l-​proverbju: ‘Il-​kelb idur għall-​vomtu tiegħu’, u ‘Il-​ħanżira l-​maħsula titmiegħek fit-​tajn.’”—2 Pietru 2:22.

8. Fi żmien Ġosafat, Jehovah kif esegwixxa ġudizzju kontra l-​għedewwa tal-​poplu Tiegħu?

⁸ Lura fi żmien Ġosafat, Jehovah esegwixxa ġudizzju kontra dawk li riedu jagħmlu l-​ħsara lill-​poplu Tiegħu. Naqraw: “Il-​Mulej qiegħed nasba għal ulied Għammon u Mowab u għal dawk li jgħammru fuq il-​muntanja taʼ Xegħir, li ġew għal Ġuda; u sfaw mirbuħa. Għaliex in-​nies taʼ Għammon u taʼ Mowab qamu għan-​nies li jgħammru fuq il-​muntanja taʼ Xegħir, u qerduhom għalkollox. Wara li qerdu lin-​nies taʼ Xegħir, għenu lil xulxin biex jeqirdu wieħed lil ieħor.” (2 Kronaki 20:22, 23) Il-​Ġudeani semmew dak il-​post Wied Berakah, għax Berakah tfisser “Barka.” Fi żminijiet moderni wkoll, l-​esekuzzjoni taʼ ġudizzju minn Jehovah fuq l-​għedewwa tiegħu se tirriżulta f’barkiet għall-​poplu tiegħu stess.

9, 10. Min kienu dawk li wrew li jistħoqqilhom il-​ġudizzju avvers taʼ Jehovah?

⁹ Forsi nistaqsu, Min fiż-​żmien modern se jirċievi ġudizzju avvers mingħand Jehovah? Biex ikollna t-​tweġiba għal dik il-​mistoqsija, irridu nerġgħu mmorru għall-​profezija taʼ Ġoel. Ġoel 4:3 [Ġoel 3:3, NW] jitkellem dwar l-​għedewwa tal-​poplu tiegħu bħala dawk li lil “uliedhom subjien bidluhom man-​nisa żienja, u ’l uliedhom bniet bigħuhom għall-​inbid.” Iva, huma jqisu lill-​qaddejja t’Alla bħala li huma inferjuri ħafna għalihom, bħal li kieku wliedhom ma jiswewx iktar minn kirja taʼ prostituta jew mill-​prezz taʼ buqar inbid. Se jkollhom jagħtu kont għal dan.

¹⁰ Dawk li jikkommettu prostituzzjoni spiritwali ħaqqhom l-​istess ġudizzju. (Apokalissi 17:3-6) U l-​iktar li ħaqqhom il-​kundanna huma dawk li jinfluwenzaw lill-​qawwiet politiċi biex jippersegwitaw lix-​Xhieda taʼ Jehovah u jfixklu l-​attività tagħhom, bħalma kienu qegħdin jagħmlu dan l-​aħħar xi mexxejja reliġjużi xewwiexa fl-​Ewropa tal-​Lvant. Jehovah jesprimi d-​determinazzjoni tiegħu biex jaġixxi kontra dawn li tant iħobbu jagħmlu l-​ħażin.—Ġoel 4:4-8 [Ġoel 3:4-8, NW].

“Ħejju għall-​Gwerra Qaddisa!”

11. Jehovah kif jisfida lill-​għedewwa tiegħu għall-​gwerra?

¹¹ Imbagħad, Jehovah jsejjaħ lill-​poplu tiegħu biex jipproklama din l-​isfida fost il-​ġnus: “Ħejju għall-​gwerra qaddisa! Qajjmu l-​qalbenin! Ħa jersqu, ħa jitilgħu l-​irġiel kollha tal-​gwerra!” (Ġoel 4:9 [Ġoel 3:9, NW]) Din hija dikjarazzjoni taʼ gwerra mhux tas-​soltu​—gwerra taʼ tjieba. Ix-​Xhieda leali taʼ Jehovah jistrieħu fuq armi spiritwali hekk kif iwieġbu għall-​propaganda qarrieqa, billi jirribattu l-​gideb bil-​verità. (2 Korintin 10:4; Efesin 6:17) Dalwaqt, Alla se jqaddes il-​“gwerra taʼ nhar il-​Jum il-​Kbir taʼ Alla li jistaʼ kollox.” Din se teħles lill-​art minn dawk kollha li jopponu lis-​sovranità t’Alla. Il-​poplu tiegħu fuq l-​art m’huwiex se jieħu sehem b’mod fiżiku f’dan. B’mod litterali u figurattiv, huma ‘bidlu x-​xwabel tagħhom f’sikek tal-​moħriet, u l-​lanez tagħhom fi mnieġel.” (Isaija 2:4) B’kuntrast, Jehovah jisfida lill-​ġnus li jopponu biex jagħmlu l-​kontra: “Is-​sikek tagħkom dewwbuhom fi sjuf, l-​imnieġel tagħkom f’lanez.” (Ġoel 4:10 [Ġoel 3:10, NW]) Hu jistedin-hom biex jużaw il-​ħażna kollha li għandhom taʼ inġenji tal-​gwerra u armamenti moderni f’din il-​battalja. Imma ma jistgħux jirnexxu, għax it-​taqbida u r-​rebħa huma taʼ Jehovah!

12, 13. (a) Għalkemm il-​Gwerra Bierda kienet spiċċat, ħafna ġnus kif urew li huma għadhom armati għall-​gwerra? (b) Il-​ġnus m’humiex ippreparati għal liema ħaġa?

¹² Fil-​bidu tas-​snin 90, il-​ġnus iddikjaraw li l-​Gwerra Bierda kienet spiċċat. B’dan quddiem għajnejna, nistgħu ngħidu li l-​Ġnus Magħquda laħqet il-​mira primarja għall-​paċi u s-​sigurtà? Ma tantx! X’jgħidulna l-​ġrajjiet fil-​Burundi, f’dik li qabel kienet il-​Jugoslavja, fl-​Iraq, fir-​Repubblika Demokratika tal-​Kongo, fl-​Irwanda, fis-​Somalja, u fil-​Liberja? Fi kliem Ġeremija 6:14, qegħdin jgħidu: “‘Sliem, Sliem’ u m’huwa sliem xejn.”

¹³ Avolja waqfu l-​gwerer diretti f’xi postijiet, nazzjonijiet membri tal-​ĠM xorta għadhom jikkompetu bejniethom fil-​manifattura taʼ armi tal-​gwerra sofistikati. Xi wħud għadhom iżommu ħażniet kbar t’armi nukleari. Oħrajn jiżviluppaw armamenti kimiċi jew batterjoloġiċi għall-​qerda tal-​massa. Hekk kif dawk il-​ġnus jinġabru lejn il-​post simboliku msejjaħ Armageddon, hu jisfidahom: “Ħa jgħid id-​dgħajjef: ‘Jien qalbieni!’ Ħaffu u ejjew, intom ġnus kollha taʼ madwar, u nġabru hemm!” Ġoel imbagħad jinterrompi bl-​appell tiegħu stess: “Niżżel, Mulej, il-​qalbieni [“il-​qalbenin,” KŻ] tiegħek!” (Korsiv tagħna.)—Ġoel 4:10, 11 [Ġoel 3:10, 11, NW].

Jehovah Jipproteġi lil Tiegħu

14. Min huma l-​qalbenin taʼ Jehovah?

¹⁴ Min huma l-​qalbenin taʼ Jehovah? Għal xi 280 darba fil-​Bibbja, dak Alla veru jissejjaħ “il-​Mulej taʼ l-​eżerċti.” Dawn l-​eżerċti huma l-​qtajjaʼ anġeliċi tas-​sema li jinsabu lesti biex jagħmlu dak li jikkmandahom Jehovah. Meta s-​Sirjani fittxew li jaħtfu lil Eliżew, Jehovah fl-​aħħar fetaħ għajnejn il-​qaddej t’Eliżew biex jara għala ma kienx se jirnexxilhom: “Dan ra l-​għolja mimlija żwiemel u karrijiet tan-​nar madwar Eliżew.” (2 Slaten 6:17) Ġesù qal li hu setaʼ kieku ried talab lil Missieru għal “aktar minn tnax-il leġjun taʼ anġli.” (Mattew 26:53) Waqt li jiddeskrivi lil Ġesù riekeb biex jesegwixxi ġudizzju f’Armageddon, Apokalissi jistqarr: “Mexjin warajh, fuq żwiemel bojod, kien hemm l-​eżerċti tas-​sema, lebsin l-​għażel abjad bla nikta. Minn fommu ħierġa xabla misnuna, biex joqtol il-​ġnus, u jmexxihom b’xettru tal-​ħadid. Huwa jisħaq l-​inbid ibaqbaq fil-​magħsra tal-​korla taʼ Alla li jistaʼ kollox.” (Apokalissi 19:14, 15) Dik il-​magħsra simbolika hija deskritta b’mod vivaċi bħala l-​“magħsra l-​kbira tal-​korla taʼ Alla.”—Apokalissi 14:17-20.

15. Ġoel kif jiddeskrivi l-​gwerra taʼ Jehovah kontra l-​ġnus?

¹⁵ Mela, Jehovah kif iwieġeb il-​petizzjoni taʼ Ġoel biex iniżżel il-​qalbenin t’Alla stess? Dan narawh permezz taʼ dan il-​kliem mimli ħajja: “Ħa jitqanqlu il-​ġnus u jmorru fil-​Wied taʼ Ġosafat! Għax hemm se noqgħod biex nagħmel ħaqq mill-​ġnus kollha taʼ madwar. Ressqu l-​minġel; għax laħaq il-​ħsad! Ejjew, isħqu b’riġlejkom, għax mimli l-​magħsar; il-​btieti mfawwrin, għax kbira ħżunithom! Rassa bla qjies f’wied is-​sentenza! Għax Jum il-​Mulej fil-​qrib f’wied is-​sentenza. Ix-​xemx u l-​qamar jiddallmu, u l-​kwiekeb jitilfu dijiethom. Il-​Mulej iriegħed minn Sijon, isammaʼ leħnu minn Ġerusalemm; u s-​smewwiet u l-​art jitriegħdu!”—Ġoel 4:12-16 [Ġoel 3:12-16, NW].

16. Min se jkun inkluż fost dawk li kontriehom Jehovah se jesegwixxi ġudizzju?

¹⁶ Daqs kemm hu veru li l-​isem Ġosafat ifisser “Jehovah Hu Mħallef,” daqstant hu veru li Alla tagħna, Jehovah, se jivvindika bis-​sħiħ is-​sovranità tiegħu meta hu nnifsu jesegwixxi ġudizzju. Il-​profezija tiddeskrivi lil dawk li jirċievu ġudizzju avvers bħala “rassa bla qjies f’wied is-​sentenza.” Xi difensuri li jkun għad fadal tar-​reliġjon falza se jkunu f’dik ir-​rassa. Inklużi wkoll se jkun hemm dawk deskritti fit-​tieni Salm​—il-​ġnus, il-​popli, is-​slaten taʼ l-​art u l-​kbarat—​li ppreferew is-​sistema korrotta taʼ din id-​dinja milli ‘jaqdu lill-​Mulej bil-​biżaʼ.’ Dawn jonqsu li ‘jbusu lill-​iben.’ (Salm 2:1, 2, 11, 12) Ma jirrikonoxxux lil Ġesù bħala s-​Sultan imsieħeb maʼ Jehovah. Iżjed minn hekk, il-​folol immarkati għall-​qerda se jinkludu lin-​nies kollha li dak is-​Sultan glorjuż se jiġġudikahom bħala li huma “mogħoż.” (Mattew 25:33, 41) Fiż-​żmien maħtur taʼ Jehovah biex isammaʼ leħnu minn Ġerusalemm tas-​sema, is-​Sultan tas-​slaten maħtur se jimxi ’l quddiem biex jesegwixxi dak il-​ġudizzju. Is-​smewwiet u l-​art ċertament li se jitriegħdu! Madankollu, aħna aċċertati li “l-​Mulej ikun għall-​poplu tiegħu kenn, ikun fortizza għal ulied Iżrael!”—Ġoel 4:16 [Ġoel 3:16, NW].

17, 18. Min huma dawk li jiġu identifikati bħala dawk li jibqgħu ħajjin wara t-​tribulazzjoni l-​kbira, u liema kundizzjonijiet se jgawdu?

¹⁷ Apokalissi 7:9-17 jidentifika lil dawk li jibqgħu ħajjin wara t-​tribulazzjoni l-​kbira bħala “kotra kbira” magħmula minn dawk li jeżerċitaw fidi fil-​qawwa li tifdi li għandu d-​demm taʼ Ġesù. Dawn se jsibu protezzjoni fil-​jum taʼ Jehovah, meta dik ir-​rassa kbira tal-​profezija taʼ Ġoel tiffaċċja ġudizzju avvers. Ġoel jgħid lil dawk li jibqgħu ħajjin: “Mbagħad tagħrfu li jien il-​Mulej, Alla tagħkom, li ngħammar f’Sijon, il-​muntanja mqaddsa tiegħi,” il-​post fis-​sema fejn jgħammar Jehovah.—Ġoel 4:17a [Ġoel 3:17a, NW].

¹⁸ Il-​profezija mbagħad tinformana li d-​dominju tas-​Saltna tas-​sema t’Alla ‘jrid isir post qaddis, u qatt iżjed ma jgħaddu minnu l-​barranin!’ (Ġoel 4:17b [Ġoel 3:17b NW]) Fis-​smewwiet u fil-​qasam taʼ l-​art taʼ dik is-​Saltna tas-​sema, mhux se jkun hemm barranin, għax ilkoll se jkunu magħqudin fil-​qima pura.

19. L-​hena li ma bħalu tan-​nies t’Alla llum kif inhu deskritt minn Ġoel?

¹⁹ Anki llum, tirrenja abbundanza taʼ paċi fost il-​poplu taʼ Jehovah hawn fuq l-​art. Magħqudin, dawn qegħdin jipproklamaw il-​ġudizzji tiegħu f’iktar minn 230 pajjiż u f’iktar minn 300 lingwa differenti. Il-​prosperità tagħhom hija deskritta profetikament b’mod mill-​isbaħ minn Ġoel: “U jiġri dakinhar, il-​muntanji jqattru l-​inbid ġdid, l-​għoljiet inixxu l-​ħalib, u l-​widien kollha taʼ Ġuda ifuru bl-​ilmijiet.” (Ġoel 4:18 [Ġoel 3:18, NW]) Iva, Jehovah se jkompli jferraʼ fuq dawk li qegħdin ifaħħruh fuq l-​art, abbundanza taʼ prosperità u barkiet mimlijin ferħ u nixxiegħa li dejjem tikber taʼ veritajiet prezzjużi. Is-​sovranità taʼ Jehovah se tkun ġiet ivvindikata bis-​sħiħ f’wied is-​sentenza, u se joktor il-​ferħ hekk kif hu jgħammar għal dejjem fost il-​poplu mifdi tiegħu.—Apokalissi 21:3, 4.

Tiftakar Int?

◻ Jehovah kif ħeles lill-​poplu tiegħu fi żmien Ġosafat?

◻ Jehovah lil min jiġġudika bħala li jistħoqqlu l-​qerda f’“wied is-​sentenza”?

◻ Min huma l-​qalbenin t’Alla u x’parti se jkollhom fil-​konflitt finali?

◻ Liema hena jgawdu adoraturi leali llum?

[Stampa f’paġna 21]

Lil Ġuda ntqalilhom: ‘It-​taqbida m’hijiex tagħkom imma t’Alla’

[Stampa f’paġna 23]

Jehovah jisfida lill-​għedewwa tiegħu biex ‘is-​sikek tagħhom idewbuhom fi sjuf’

[Stampa f’paġna 24]

Il-​Bibbja tidentifika folla kbira taʼ wħud li jibqgħu ħajjin wara t-​tribulazzjoni kbira